EJEKIEL 25 - Bibəl ta Sar̄

Nə́ɓā gān̄g sarya dɔ gír de gə̄ tə́ ( 25—32 ) Najə̄ kə́ əlanə̄ń ɓōĺ kem Amon gə̄ tə́

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ī-tūr̄ kumií kə̄ dɔ Amon gə̄ tə́, ba ɔ̄r̄ najə̄ sedə́ ādə̄m̄.

³ Ə́dádə́ na kə oōn̄ yá̰á̰ ń mā Kɔ́ɔ̄ɓē Nə́ɓā m-ɔ̄r̄ sedə́ ní. Dan ń rāān̄ loo yāḿ kə́ táĺ loo kə́ karī tə́ ní, dan ń nujən̄ ɓē kə́ Israel tə́ kɔ̄ɔ́ ní, dan ń ɔyn̄ de kə́ Juda gə̄ dɔ gúú tə́ aw̄n̄ sedə́ dɔ ɓē kə́ rang tə́ ní, sḭḭ̄ ə̄gōīdə́ ngá̰ý.

⁴ Tām̄ najə̄ ń noō tə́ ní, m-ā m-ə́yá̰ ngé ngɔ̄m̄ yá̰a̰ kul̄ gə̄ kə́ ngé ndi gotə kógə̄ḿ aĺ gə̄, kə́ dām̄ kə́ gír ɓē tə́, kadə̄ taān̄ ɓē yāsí. Nin̄ a ndin̄ dɔ nang yāsí tə́, a túdə̄n̄ kújə tandā yādə́ gə̄ dɔ nang yāsí tə́. I nin̄ n a əsan̄ kan̄ kāgə̄ yāsí gə̄ ō, a a̰ȳn̄ mbaa yāsí ō ní.

⁵ Raba ń i ɓē bo yāsí ní, m-ā m̄-rāā kadə̄ a tél loo ko̰o̰ yā jámbal gə̄. Dɔ nang kə́ Amon malang a tél loo ra yā batə̄ gə̄. Tītə̄ ń noō ɓáa ā ī-gerī kadə̄ Kɔ́ɔ̄ɓē i mā.

⁶ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Dan ń sḭḭ̄ ōōī yá̰á̰ kə́ to kum kaȳ aĺ kə́ teē dɔ Israel tə́ ní, rɔ̄nel̄ rāāsí adə̄ ə́ndaī jīsí ō, ḭ́ḭḭ̄ bal walya ō. Sḭḭ̄ ī-rāāī rɔ̄nel̄ kə ngarā̰ kemsí gēé malang ō, ī-kídī gír deē yāḿ gə̄ ngá̰ý ō.

⁷ I beé ɓá ní, m-ā m-ɔ́jə́sí tɔ́gə́ḿ dɔdə́ tə́, m-ā m-ə́lásí kem jī tə̄rā gə̄ tə́ kadə̄ a ɔyn̄ yá̰a̰ yāsí dɔ gúú tə́. M-ā m̄-rāā kadə̄ nápar deē yāsí gə̄ a gətóon̄ kɔ̄ɔ́, m-ā m̄-rāā kadə̄ ɓē yāsí a gətóo, m-ā m̄-nujəsí sák sák kɔ̄ɔ́.

Najə̄ kə́ əlanə̄ń ɓōĺ kem Moab gə̄ tə́

⁸ Najə̄ ń Kɔ́ɔ̄ɓē Nə́ɓā ɔr̄ ní n toó: Moab gə̄ ədan̄ na: De gə̄ kə́ gír yā Juda tə́ gə̄ ton̄ i tītə̄ gotə nápar de gə̄.

⁹ M-ā m̄-teē ta róbə kem ɓē gə̄ kə́ Moab tə́, kem ɓē kə́ majə ngá̰ý kə́ Moab tə́ gə̄ ń i Bet Yesimot ō, Baal Meon ō, Kiryataim ō ní gə̄gē, a nujən̄də́ sák sák kɔ̄ɔ́.

¹⁰ M-ā m-ə́yá̰ ngé ngɔ̄m̄ yá̰a̰ kul̄ gə̄ kə́ ngé ndi gotə kógə̄ḿ aĺ gə̄ kə́ dām̄ kə́ gír ɓē tə́ kadə̄ a taān̄ ɓē kə́ Moab, tītə̄ ń taānəń ɓē kə́ Amon ní. A əga kem deē dɔ ɓē kə́ Moab tə́ to̰ alé.

¹¹ M-ā m-ún sarya ń m̄-gān̄g dɔ Moab tə́ ní yā rāań kəla. I tītə̄ ń noō tá nin̄ a gerə̄n̄ kadə̄ Kɔ́ɔ̄ɓē i mā.

Najə̄ kə́ əlanə̄ń ɓōĺ kem Edom gə̄ tə́

¹² Najə̄ ń Kɔ́ɔ̄ɓē Nə́ɓā ɔr̄ ní n toó: Edom gə̄ rāān̄ yá̰á̰ majaĺ ngá̰ý gə̄ dalnə̄ń ba̰ā̰ dɔ gír de gə̄ yā Juda tə́. I tām̄ najə̄ ń noō tə́ n najə̄ i dɔdə́ tə́ ní.

¹³ Tām̄ najə̄ ń noō tə́ ní, mā Kɔ́ɔ̄ɓē Nə́ɓā m-ə́da na: M-ā m-ɔ́jə́ tɔ́gə́ḿ dɔ Edom gə̄ tə́. De gə̄ ō dā̰ gə̄ ō kə́ kem ɓēé ń toō tə́ ní, m-ā m̄-tɔ̄l̄də́ kɔ̄ɔ́. M-ā m̄-nujə ɓē sák sák, ba m-ā m-ə́lá gír i dɔ ɓē kə́ Teman tə́, bátə́ ɓē kə́ Dedan tə́. A tɔ̄lə̄n̄ de kə́ kemeé gə̄ ta rɔ̄ɔ̄ tə́.

¹⁴ M-ā m-ə́yá̰ Israel gə̄ ń i gír deē yāḿ gə̄ ní kadə̄ dalən̄ ba̰ā̰ dɔ Edom gə̄ tə́ adə̄mə̄n̄. Israel gə̄ a rāān̄də́ yá̰á̰ ń wōn̄g yāḿ kə́ ngá̰ý ndḛḛ̄ kadə̄ yā rāā sedə́ ní. I tītə̄ ń noō tá Edom gə̄ a gerə̄n̄ kadə̄ rāā majaĺ seḿ māá i yá̰á̰ kə́ a ojə yá̰á̰ kə́ tōr̄ ngá̰ý. Najə̄ ń Kɔ́ɔ̄ɓē Nə́ɓā əda ní n noó.

Najə̄ kə́ əlanə̄ń ɓōĺ kem Pilistin gə̄ tə́

¹⁵ Najə̄ ń Kɔ́ɔ̄ɓē Nə́ɓā ɔr̄ ní n toó: Pilistin gə̄ dalən̄ ba̰ā̰ tə́ ō, nin̄ dalən̄ ba̰ā̰ ní i kə kídə̄ loo kə́ ngá̰ý dɔ madə̄ ba̰ā̰də́ kə́ ngándáńg tə́ ō, nin̄ nujən̄ sedə́ malang kɔ̄ɔ́ ō.

¹⁶ Tām̄ najə̄ ń noō tə́ ní, yá̰á̰ mā Kɔ́ɔ̄ɓē Nə́ɓā m-ə́dá ní n toó: M-ā m̄-rāā kadə̄ nin̄ a gerə̄n̄ gō tɔ́gə́ḿ. M-ā m̄-tɔ̄l̄ Pilistin gə̄ ń i de kə́ Kapətor gə̄ kə́ ndin̄ ɓē i kə gō kadə bā boó ní.

¹⁷ M-ā m̄-dal ba̰ā̰ kə́ ngá̰ý dɔdə́ tə́, m-ā m-ə́ndádə́ ndéý kə́ to ɓōĺ ngá̰ý. Loo ń noō tə́ nin̄ a gerə̄n̄ kadə̄ Kɔ́ɔ̄ɓē i mā.