EJEKIEL 24 - Bibəl ta Sar̄

Jerusalem to i tītə̄ jóo ndīr̄ yá̰á̰ kə́ əhɔ kārā beé

¹ Ɔyn̄ de gə̄ dɔ gúú tə́ aw̄n̄ sedə́ dɔ ɓē kə́ rang tə́ rāā ɓāl̄ ndōhó kɔ̄ɔ́. Ba kə ndɔ̄ kə́ nge ko̰ kutə, yā nāā kə́ nge ko̰ kutə kə́ kem ɓāl̄ kə́ nge ko̰ ndōhó tə́ anī, Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ī-ndang ndɔ̄ kə́ ɓōólaā. Tām̄ mban̄g kə́ Babilon əla gír kənī ɓē kə́ Jerusalem rɔ̄ɔ̄ i ɓōólaā.

³ Ī-rāā ngōn̄ yá̰á̰ kógə̄ḿ kə́ sḛ́ý beē ta kum ngán Israel gə̄ tə́. Nin̄ i ɓūtə̄ de kə́ dɔdə́ ngan̄g gə̄. Ā ə́dádə́ na i najə̄ kə́ i mā Kɔ́ɔ̄ɓē Nə́ɓā n m-ɔ̄r̄ sedə́. Ə̄ndā dɔ jóo ndīr̄ yá̰a̰ naā tə́. Ī-ɓōkə́ man̄ kemeé ādə̄ rosə.

⁴ Ī-tə́jā dā̰ ī-ɓōkə́ kemeé, dā̰ kə́ majə majə gə̄ malang, ɓúrən ō, kɔ̄bən ō. Ī-ɓōkə́ kə̄ngān kə́ majə majə gə̄ dɔ tə́ ī-tɔ̄ləń ta ādə̄ rosə.

⁵ Ɔ́y dā̰ ngán batə̄ gə̄ ń i dā̰ kə́ ngəra aĺ ní ō, ī-ɓōkə́ kə̄ngā gə̄ gíŕ jóó ō, ba ə̄ndā horó malang ādə̄ nēgə́ dul dul. Ādə̄ kə̄ngā gə̄ gə̄gē a ndīrə̄n̄ ō.

⁶ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Ɓē ń mósə taā loo kə́ kemeé malang ní, yá̰á̰ kə́ to kum kaȳ aĺ i tām̄ yān tə́! Ni to i tītə̄ jóo ndīr̄ yá̰á̰ kə́ əhɔ kārā kə́ deē asə tə́go aĺ beé. Ī-kə̄tó kūrū dā̰ gə̄ malang, kógə̄ḿ kógə̄ḿ kə gō naá, kanjə̄ túgə̄ wə̄lā dɔ kūrū dā̰ gə̄ ní tə́.

⁷ Mósə́ ń Jerusalem ɓōkə́ nang tə́ ní to kem ɓēé ɓáý. Ɓōkə́n̄ mósə́ ní i dɔ mbal̄ kə́ ndágə doy tə́. De kə́ ɓōkə́ mósə́ ní dɔ dā̰ nang tə́ gətóo ō, de kə́ əga nán̄g dɔ tə́ gətóo ō.

⁸ Mā m-ə́yá̰ mósə́ ni dɔ mbal̄ kə́ ndágə doy tə́, loo kə́ deē asə kutə dɔ tū tə́ aĺ tə́, yā kadə̄ ni-rāā tá wōn̄g rāām̄ ngá̰ý ō, yā kadə̄ ni-rāā tá kadə̄ m̄-dal ba̰ā̰ ō.

⁹ A̰á̰ā̰, mā Kɔ́ɔ̄ɓē Nə́ɓā m-ə́da na: Ɓē ń mósə taā loo kə́ kemeé malang ní na yá̰á̰ kə́ to kum kaȳ aĺ i tām̄ yān tə́, tɔdɔ̄ m-ā m̄-kán̄ kīr̄ kə̄ dɔ naā tə́ yā rāań hor kógə̄ḿ kə́ bo ngá̰ý!

¹⁰ Ɔ́y kīr̄ ī-kán̄ ādə̄ ra dɔ naā tə́ bing ō, ə́la hor tū tə́ ō. Ī-ndīr̄ dā̰ ba ī-tél ī-ndīr̄ ɓáý to̰. Ī-ɓōkə́ mu kə́ kotə majə gə̄ tū tə́ ō, ī-rāā ādə̄ hor o̰o̰ kə̄ngā gə̄ bátə́ ta tɔ̄l̄ ta tə́.

¹¹ Gō tə́ anī, ə̄ndā jóo ndīr̄ yá̰á̰ ń kemən i karī ní, dɔ yā̰l̄ hor gə̄ tə́ ādə̄ təngā ō, ādə̄ gində̄ jóo tawá ní kərē káláńg káláńg ō. Loo ń noō tə́ yá̰á̰ kə́ yḛr kə́ kemeé gə̄ a gətóon̄ kɔ̄ɔ́ ō, hor a o̰o̰ kārā kɔ̄ɔ́ ō.

¹² Banī yá̰a̰ malang ń noō rāā yá̰á̰ kógə̄ḿ alé. Kārā malang ń rosə kem ní, aw̄ kum hor tə́ kɔ̄ɔ́ alé.

¹³ Jerusalem, ḭ̄ i de kə́ yḛr tām̄ ī-rāā kaya. m̄-gḛy rāāī kadə̄ ūnjə̄ njáý njáý, banī ī-tél de kə́ ūnjə̄ njáý njáý alé. I beé ɓá ní, ré m-ə́ya̰ wōn̄g yāḿ kə́ ngá̰ý dɔɔ́ adə̄ rāā kəla bátə́ ta tɔ̄l̄ ta tə́ pá tá ā ūnjə̄ njáý njáý ɓáý. Ā ūnjə̄ kété no tə́ alé.

¹⁴ I mā Kɔ́ɔ̄ɓē m-ɔ̄r̄ najə̄ ō, yá̰á̰ m-ə́dá ní m-ā m̄-rāā ō. M-ā m̄-tél kə gōḿ aĺ ō, kumḿ a o̰o̰m̄ aĺ ō. M-ā m̄-ndə̄ngā rɔ̄ḿ najə̄ yá̰á̰ kógə̄ḿ tə́ aĺ ō. Jerusalem, m-ā m̄-rāā sarya seí sɔɔ̄ń hálí ō, yá̰a̰ rāāí gə̄ ō. Yá̰á̰ ń Kɔ́ɔ̄ɓē Nə́ɓā əda ní n noó.

Ejekiel əhɔ ndoō

¹⁵ Kɔ́ɔ̄ɓē ɔr̄ najə̄ seḿ, ədam̄ na:

¹⁶ Ḭ̄ ngōn̄ deē, dəyá̰ ń ka̰a̰n nelī ngá̰ý ní, m-ā m̄-taān̄ jīí tə́ kɔ̄ɔ́ i taā kə́ rétə́ ngá̰ý. Ā ī-rāā yon aĺ ō, ā ī-sɔ̄ḿ aĺ ō, ā ī-nōō aĺ ō.

¹⁷ Ī-lōō kɔjə wur tōr̄ yāí kadə̄ deē a̰ā̰ ō, ī-lōō rāā yá̰a̰ kāgə̄ ɓē kə́ ɔjə dɔ yo ō. Banī ə́nda dɔí kə ta kūbūú ō, ādə̄ sākə̄rā yāí to njaí tə́ ō, ī-lōō seĺ yá̰a̰ ta kumií tə́, ko̰o̰ mur̄ yo ō.

¹⁸ M-ɔ̄r̄ najə̄ kə de gēé dəloí, ba ré loo sɔlí anī, nə̄yá̰ḿ oy. Teē kə ndɔ̄ kə́ noō dəloí anī, m̄-rāā yá̰á̰ ń Kɔ́ɔ̄ɓē ədam̄ ní.

¹⁹ De gə̄ dəjemə̄n̄ na kə m-ɔ́jə́də́ kum yá̰á̰ ń m̄-rāā ní.

²⁰ Anī m̄-téĺ m-ə́dádə́ na: Yá̰á̰ Kɔ́ɔ̄ɓē mērə̄m̄ kədasí sḭḭ̄

²¹ ngán Israel gə̄ ní n toó: Mā Kɔ́ɔ̄ɓē Nə́ɓā m-ā m-ə́ya̰ de gə̄ kadə̄ rāān̄ loo yāḿ kə́ táĺ ń i yá̰a̰ kɔjə rɔ̄ yāsí ō, nel̄sí ka̰a̰ ngá̰ý ō, ā ī-ndiī ā ə̄ndāī kemsí i dɔ tə́ ō ní, loo kə́ karī tə́. Ngáńsí kə́ dəngam gə̄ ō kə́ dəyá̰ gə̄ ō ń ə́ya̰īdə́ kem ɓē kə́ Jerusalem tə́ ní, a tɔ̄lə̄n̄də́ kə kaskaraá.

²² Loo ń noō tə́ ā ī-r̄āāī yá̰a̰ tītə̄ yā Ejekiel. Adə̄ ā ī-selíī yá̰a̰ ta kumsí tə́ aĺ ō, ā ó̰o̰ī mur̄ yo aĺ ō.

²³ Ta kūbə̄ ń ə́ndaīń dɔsí ní a to dɔsí tə́ beé ō, sākə̄rā yāsí gə̄ ī-tə́laī njasí tə́ ní, a ton̄ njasí tə́ beē ō, ā ī-nōōī rɔ̄sí aĺ ō, ā ī-nōōī kə man̄ kumsí aĺ ō.

²⁴ Dan ń Ejekiel rāā yá̰a̰ beé ní, tāāsí i najə̄ yā yá̰á̰ ń a rāā yā reē ní. Ā ī-rāāī yá̰a̰ i tītə̄ yān jéjé. Ba ré yá̰á̰ ní reē ugə̄ anī, ā ī-gerī kadə̄ Kɔ́ɔ̄ɓē Nə́ɓā i mā.

²⁵ Gō tə́ anī Kɔ́ɔ̄ɓē ədam̄ na: Ḭ̄ ngōn̄ deē, ōō! Loo kə́ táĺ ń i loo ɓɔ̄ɔ̄ rɔ̄ yādə́ ō, i loo kə́ nel̄də́ ka̰a̰ ngá̰ý ō, i loo ń nin̄ a ɔjənə̄ń rɔ̄də́ ō, a əndān̄ kemdə́ dɔ tə́ ō ní, m-ā m̄-taā jīdə́ tə́ kɔ̄ɔ́. Ngáńdə́ kə́ dəngam gə̄ ō kə́ dəyá̰ gə̄ ō ní, m-ā m̄-taādə́ jīdə́ tə́ kɔ̄ɔ́ ō.

²⁶ Ndɔ̄ ngeé ń noō tə́ ní, deē kógə̄ḿ kə́ teē ta yo tə́ a reē yā kədaī kōō yá̰á̰ ń rāā yá̰á̰ ní.

²⁷ Ndɔ̄ ngeé ń noō tə́ ní, gír kəlā ndo̰í a do̰ō̰ naā to̰ alé, ā ī-tél yā kɔr̄ najə̄ gogə́, adə̄ ā ɔ̄r̄ najə̄ kə deē ń teē ta yo tə́ ní. Ā ī-tél i de kə́ nge tāā ngán Israel gə̄, loo ń noō tə́ nin̄ a gerə̄n̄ kadə̄ Kɔ́ɔ̄ɓē i mā.