EJEKIEL 23 - Bibəl ta Sar̄

Samari rāā ájə́ba

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ōō! Gotə najə̄ yā ngákó̰o̰ naā kə́ dəyá̰ kə́ jōó gə̄ ń kó̰ó̰də́ i kógə̄ḿ beē ní n toó:

³ Dan ń nin̄ na̰yn̄ mandə ɓáý ní, nin̄ rāān̄ ájə́ba kem ɓē kə́ Ejiptə tə́. Dəngam gə̄ kógə̄n̄ naā kə mbaadə́ gēé nú. Nin̄ wār̄yān̄ kadədə́ gə̄ ń i kadə ngámandə gə̄ ní.

⁴ Rī ni kə́ nga tɔ́gə na i Ohola, banī rī gidən na i Oholiba. Ni kə́ nga tɔ́gə i Samari, banī gidən i Jerusalem. Nin̄ i yāḿ gə̄ mbak ō, ojən̄ ngáń kə́ dəngam gə̄ ō, ngáń kə́ dəyá̰ gə̄ ō.

⁵ Banī Ohola rāā ájə́ba, tá ni i yāḿ mā. Madə̄ ɓēn gə̄ ń i de kə́ Asiri gə̄ ní, ni gḛydə́ ngá̰ý ō, rāādə́ i ngé sāān gə̄ tə́ ō.

⁶ Nin̄ o̰ō̰n̄ kūbə̄ kə́ kərē ning kə́ majə ngá̰ý gə̄, tām̄ nin̄ i ngé ko̰o̰ ɓē gə̄ ō, nin̄ i ngé gān̄g sarya gə̄ ō. Nin̄ malang i ngásáā gə̄ ō, majən̄ deē ngá̰ý ō, gerə̄n̄ kal̄ sə́nda ngá̰ý ō.

⁷ Ohola rāā ájə́ba kə Asiri gə̄ kə́ ngé rāā kəla kə́ bo gə̄ ń noō malang. Kə dɔ gḛy ń ni a gḛy deē kógə̄ḿ ngá̰ý dan dəngam gə̄ ń noō tə́ malang noó, ni rɔȳ nə́ɓā yādə́ kə́ rɔ̄kum aĺ gə̄ téləń de kə́ yḛr.

⁸ Ni na̰y kə̄ loo rāā ájə́ba tə́ tītə̄ ń kété a rāań dɔ nang kə́ Ejiptə tə́ ní. Nú ní dan ń ni na̰y mandə ɓáý ní, dəngam gə̄ ɓīīn̄ seneé ō, wār̄yān̄ kadə ń i kadə ngōmandə ní ō, ndɔ́r̄ əlan̄ tan tū kaya tə́ ō.

⁹ I tām̄ najə̄ ń noō tə́ n m-ə́lan kem jī ngé sāān gə̄ tə́ ní, adə̄ i jī Asiri gə̄ ń ni gḛydə́ ngá̰ý ní tə́.

¹⁰ Nin̄ ɔrə̄n̄ kūbə̄ rɔ̄n tə́ kɔ̄ɔ́ malang ba tɔ̄l̄nən̄ kə kaskaraá ō, ɔyn̄ ngánən kə́ dəngam gə̄ ō, ngánən kə́ dəyá̰ gə̄ ō. Ni-ənge ndéy tām̄ yá̰a̰ rāān kə́ gōtə́ aĺ tə́ i tītə̄ ń noō. Adə̄ Ohola i yá̰a̰ kɔjə̄ tām̄ yā gotə dəyá̰ kə́ rang gə̄ tə́.

Jerusalem rāā ájə́ba

¹¹ Ngōkó̰o̰n kə́ dəyá̰ ń rīn na i Oholiba ní, a̰a̰ yá̰a̰ gə̄ ń noō malang ɓá tā, ba dan ń ngur dəngam rāān ngá̰ý ní, ni-rāā kə́ majaĺ mān̄ yā Ohola ɓáý. Ájə́ba yān ni mān̄ yā ngōkó̰o̰n kə́ dəyá̰ ɓáý.

¹² Ni gḛy Asiri gə̄ ń i madə̄ ɓē gə̄ ní ngá̰ý. Nin̄ i ngé ko̰o̰ ɓē gə̄ ō, ngé gān̄g sarya gə̄ ō, kə́ kūbə̄ ko̰ō̰də́ gə̄ i kūbə̄ kə́ majə ngá̰ý gə̄. Nin̄ gerə̄n̄ kal̄ sə́nda ngá̰ý ō, nin̄ malang i ngásáā gə̄ ō, majən̄ deē ngá̰ý ō.

¹³ Mā m-á̰a̰ kadə̄ ni-tél de kə́ yḛr ō. Adə̄ ngákó̰o̰ naā kə́ dəyá̰ kə́ jōó gə̄ ní, unən̄ i róbə́ kə́ kógə̄ḿ beē.

¹⁴ Banī ájə́ba yā Oholiba mān̄ yā ngōkó̰o̰n kə́ dəyá̰. Ndɔ̄ kógə̄ḿ tə́ a̰a̰ de kə́ dəngam gə̄ kə́ rāān̄də́ kadə ndogə̄ mbal̄ tə́ ō, rāān̄ man̄ yá̰á̰ kə́ kərē rɔ̄də́ tə́ ō. De gə̄ ní i kum gotə de kə́ Babilon gə̄.

¹⁵ Nin̄ əhɔn̄ ɓōdə̄də́ kə ndāŕ ō, əndan̄ dɔdə́ kə ta kūbūú ō. De gə̄ ní i ngé rɔ̄ɔ̄ gə̄ ō, majən̄ ngá̰ý ō. Nin̄ teēn̄ i de kə́ dəngam gə̄ kə́ dɔ nang kə́ Babilon tə́ jéjé. Babilon i ɓē yādə́.

¹⁶ Dan ń ni a̰a̰də́ anī, ni gḛydə́ kə̄ ta jī tə́ noō ngá̰ý, adə̄ ni-əla de gə̄ dɔ nang yādə́ tə́.

¹⁷ Loo ń noō tə́ de kə́ Babilon gə̄ reē ɓīīn̄ seneé. Nin̄ rāān̄ adə̄ ni-tél de kə́ yḛr, tɔdɔ̄ nin̄ rāān̄ ájə́ba seneé. Dan ń ni yḛr rɔ̄n sedə́ oy anī, ni gḛydə́ aĺ kə́ al̄ naā.

¹⁸ Ni-rāā ájə́ba i ta kum de gə̄ tə́ malang, rāā adə̄ de gə̄ a̰ā̰n̄ rɔ̄n kə́ karī. Loo ń noō tə́ nelə̄m̄ seneé aĺ ngá̰ý, tītə̄ ń nel̄məń kə ngōkó̰o̰n kə́ dəyá̰ aĺ ngá̰ý ní.

¹⁹ Ni-rāā ájə́ba i kum kə̄ kété kété, tītə̄ ń rāań kem ɓē kə́ Ejiptə tə́ dan mandən tə́ ní.

²⁰ Nú ní, ni gḛy dəngam gə̄ kə́ ngé sāā dəyá̰ loo kaya tə́ gə̄ ngá̰ý. Sāā dəyá̰ yādə́ i tītə̄ yā dā̰ gə̄ beé. Nin̄ əhɔn̄ rɔ̄də́ loo sāā naā tə́ alé tītə̄ yā kərō gə̄, aláa tītə̄ yā sə́nda gə̄ beé.

Əndan̄ ɓē kə́ Jerusalem

²¹ Oholiba, ḭ̄ ī-téĺ úń gíŕ ájə́ba yāí tītə̄ kə́ kété dan mandií tə́: Dan ngeé ń noō tə́ ní, ḭ̄ ə́ya̰ de kə́ Ejiptə gə̄ adə̄ kógə̄n̄ naā kə mbaaí ō, wār̄yān̄ kadií ń i kadə ngōmandə ní ō.

²² I tām̄ najə̄ ń noō tə́ n mā Kɔ́ɔ̄ɓē Nə́ɓā m-ə́daī najə̄ ń toō ní: M-ā m̄-sə̄lā ngé sāāí gə̄ dɔí tə́, ngé gə̄ ń ta tɔ̄l̄ ta anī nelī sedə́ aĺ ngá̰ý ní. M-ā m-ɔ́ýdə́ kə̄ loo gə̄ tə́ malang yā kɔsə dɔdə́ naā tə́ kadə̄ reē rɔ̄ɔ̄īn̄.

²³ M-ā m̄-reē kə Babilon gə̄ ō, Kalde gə̄ malang ō, de kə́ kem ɓē kə́ Pekod tə́ gə̄ ō, Sowa tə́ gə̄ ō, Kowa tə́ gə̄ ō, de kə́ Asiri gə̄ a reēn̄ sedə́ ō. M-ā m-ɔ́sə dɔ de kə́ dəngam gə̄ ń noō naā tə́. Nin̄ i de kə́ balsáa gə̄ ō, majən̄ deē ō, nin̄ i ngé ko̰o̰ ɓē gə̄ ō, ngé gān̄g sarya gə̄ ō, nin̄ i ngé rɔ̄ɔ̄ gə̄ ō, ngé kəla kə́ bo gə̄ ō, nin̄ malang ní gerə̄n̄ kal̄ sə́nda majə ō.

²⁴ Nin̄ a ḭḭn̄ i dām̄ mbɔ́r ɓē kə́ ko̰ó̰ tə́ yā reē. A ndin̄ i dɔ púsə rɔ̄ɔ̄ gə̄ tə́ n a reēnəń ō, dɔ yá̰a̰ kal̄ kə́ tayā tayā gə̄ tə́ ō, a reēn̄ i kə ngé rɔ̄ɔ̄ kə́ ngá̰ý gə̄ ō. Nin̄ a utə̄n̄ gidə rɔ̄də́ i kə der gə̄ ō, kə jākā gində̄ gə̄ ō. Nin̄ a gīrīn̄ kə̄ ta gə̄ tə́. M-ā m-ɔ́jə́də́ najə̄ yāí ō, nin̄ a gāngə̄n̄ sarya dɔí tə́ i kə gō ndū najə̄ yādə́ gēé ō.

²⁵ Ḭ̄ Oholiba, wōn̄g a rāām̄ seí. I tām̄ najə̄ ń noō tə́ n yá̰á̰ ń nin̄ a rāān̄ seí ní i kə dɔ́nɔ́ ní. Nin̄ a gāngə̄n̄ kóní ō, a gángə̄n̄ mbīí gə̄ ō. A tɔ̄lə̄n̄ gotə de kə́ kem ɓēé gə̄ ń a na̰yn̄ ní kə kaskaraá ō, a ɔyn̄ ngání kə́ dəngam gə̄ ō kə́ dəyá̰ gə̄ ō, ngé gə̄ ń a ndin̄ kə kumdə́ ɓáý ní, a əlan̄ hor dɔdə́ tə́ kadə̄ hor o̰o̰də́ ō.

²⁶ Nin̄ a táān̄ kūbə̄ yāí gə̄ kɔ̄ɔ́ ō, a táān̄ yá̰á̰ súū rɔ̄ yāí kə́ majə ngá̰ý gə̄ kɔ̄ɔ́ ō.

²⁷ Ḭ̄ Oholiba, yá̰a̰ rāāí kə́ to rɔ̄sɔl̄ gə̄ ní, m-ā m̄-rāā kadə̄ gír a gān̄g kɔ̄ɔ́ ō, ájə́ba yāí ń ə́lá gír rāā i dɔ nang kə́ Ejiptə tə́ ní, m-ā m̄-rāā kadə̄ gír a gān̄g kɔ̄ɔ́ ō. Ḭ̄ a á̰a̰ de kə́ dəngam gə̄ to̰ aĺ ō, a əga kemií dɔ de kə́ Ejiptə tə́ to̰ aĺ ō.

²⁸ Mā Kɔ́ɔ̄ɓē Nə́ɓā m-ə́da na: A̰á̰ā̰, m-ā m-ə́laī kem jī de gə̄ ń nelī sedə́ aĺ ngá̰ý tə́ ní, de gə̄ ń ta tɔ̄l̄ ta anī īm̄də́ ní.

²⁹ Nin̄ a rāāīn̄ yá̰á̰ kə́ tōr̄ tām̄ nel̄də́ seí aĺ ngá̰ý. Yá̰a̰ malang ń ḭ̄ ə́nge kə ta kūl̄ kəla rāāí ní, nin̄ a ɓogən̄ kɔ̄ɔ́. Nin̄ a əya̰īn̄ gírí karī. Loo ń noō tə́ de gə̄ malang a gerə̄n̄ hálí kə́ to rɔ̄sɔl̄ ń i hál rāā ájə́ba ní.

³⁰ Yá̰á̰ ń rāā yá̰á̰ á rāān̄ yá̰á̰ kə́ tītə̄ ń noō seí ní n toó: Ḭ̄ ī-rāā kaya, de kə́ rá gə̄gē a ḭ̄ ī-ɓīī seneé, ī-rāā ájə́ba kə dəngam gə̄ kə́ dan nápar de kə́ rang gə̄ tə́, ḭ̄ ī-rɔȳ ɓesə̄ yādə́, adə̄ ī-tél de kə́ yḛr.

³¹ Ḭ̄ ī-ndájə̄ ngōkó̰ó̰í kə́ dəyá̰ ń rīn na i Ohola ní. I beé ní, m-ā m̄-rāā kadə̄ ā ā̰ȳ yá̰á̰ kə́ kem bay wōn̄g yāḿ tə́ ō.

³² Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Ā ā̰ȳ yá̰á̰ kə́ kem bay kə́ kógə̄ḿ beē tə́ sḭḭ̄ kə ngōkó̰ó̰í kə́ dəyá̰. I bay kə́ ta laa ō, rúu ō. De gə̄ a əgōīn̄ ō, a mbóon̄ seí ō, tām̄ bay ní rosə ngá̰ý.

³³ Ka̰a̰ tápə̄ a rāāī kə́ kasə tə́. I bay ndi kə kéré ō, i bay rɔ̄nel̄ aĺ ō. Ba ngōkó̰ó̰í kə́ dəyá̰ ń i Samari ní, a̰ȳ yá̰á̰ ní kɔ̄kə́ ɓá.

³⁴ Ḭ̄ ā ā̰ȳ yá̰á̰ kə́ kem bay ní bátə́ kadə̄ təgā ō, ā ī-tɔ̄ɔ̄ bay ní kə gɔgií ō, gájən gə̄ ɓáa ā ī-já̰a̰ń dɔ mbaaí gə̄ ō. I mā Kɔ́ɔ̄ɓē Nə́ɓā n m-ɔ̄r̄ najə̄ ní ō, yá̰á̰ ń m-ə́dá ní n noó ō.

³⁵ I tām̄ najə̄ ń toō tə́ n yá̰á̰ ń m-ə́dá ní n toó ní, m-ə́da na: Jerusalem, dɔí ndígə̄naləḿ kɔ̄ɔ́ ō, ḭ̄ ə́ya̰m̄ kɔ̄ɔ́ ō. I beé ɓá ní, īkɔ́ ā ī-ndíbə̄ hor yá̰á̰ ń hálí kə́ to rɔ̄sɔl̄ adə̄ i háĺ ájə́ba reēń dɔí tə́ ní.

Nə́ɓā gān̄g sarya dɔ ɓē kə́ Samari tə́ ō, dɔ ɓē kə́ Jerusalem tə́ ō

³⁶ Kɔ́ɔ̄ɓē ədam̄ na: Ḭ̄ ngōn̄ deē, ā ī-gān̄g sarya dɔ Ohola tə́ ō, dɔ Oholiba tə́ ō. Yá̰á̰ kə́ majaĺ ngá̰ý gə̄ malang ń nin̄ rāān̄ ní, ī-teēń kə̄ ndágá ī-ɓōkə́ ta kumdə́ tə́ ādə̄ a̰ā̰n̄.

³⁷ Nin̄ i dəyá̰ kə́ ngé rāȳ gə̄ ō, nin̄ tɔ̄lə̄n̄ de gə̄ ō. Nin̄ rāān̄ rāȳ, tām̄ nin̄ rɔȳn̄ nə́ɓā yādə́ kə́ rɔ̄kum aĺ gə̄. Nin̄ tɔlə̄n̄ de gə̄, tām̄ ngáńdə́ gə̄ ń ojən̄ tām̄ yāḿ tə́ ní, nin̄ tɔ̄lə̄n̄də́ ba tun̄ adə̄n̄ nə́ɓā yādə́ kə́ rɔ̄kum aĺ gə̄.

³⁸ Ba i yá̰a̰ gə̄ ń noō ngóy n nin̄ rāān̄ ní alé! Nin̄ rāān̄ loo yāḿ kə́ táĺ adə̄ tél loo kə́ yḛr ō, nin̄ kídə̄n̄ ndɔ̄ sabat ń i ndɔ̄ kə́ kɔr̄ kamə̄n tām̄ yāḿ tə́ ní ō. Nin̄ rāān̄ yá̰a̰ gə̄ ń noō malang i kem ndɔ̄ kə́ kógə̄ḿ beē tə́!

³⁹ Tām̄ ndɔ̄ ń nin̄ tə́ngānəń ngáńdə́ kə́ dəngam gə̄ adə̄n̄ nə́ɓā yādə́ kə́ rɔ̄kum aĺ gə̄ tə́ ní, nin̄ udən̄ kem loo kə́ táĺ yāḿ tə́, udən̄ kem kújə yāḿ tə́, nin̄ rāān̄ kújə yāḿ i yá̰á̰ kə́ karī tə́.

⁴⁰ Tá ɓáý to̰ ní, nin̄ əlan̄ deē ɓāŕ de kə́ dəngam gə̄ tə́ dɔ ɓē kə́ sa̰y gə̄ tə́. Dan ń nin̄ oōn̄ ɓār̄ yādə́ anī, nin̄ reē ugə̄n̄ rɔ̄də́ tə́. Nin̄ ndogə̄n̄ man̄ tām̄ yādə́ tə́ ō, nin̄ rāān̄ man̄ yá̰a̰ dɔ kumdə́ gə̄ tə́ ō, tə́lan̄ yá̰a̰ ta mbī gə̄ ō.

⁴¹ Gō tə́ anī nin̄ ton̄ dɔ tə̄rá kə́ majə ngá̰ý gə̄ tə́. Nin̄ əndān̄ tábəl kógə̄ḿ nodə́ tə́, ba əndān̄ ndujə̄ yá̰á̰ kə́ kotə majə ō, yibə̄ kə́ guŕ naā tə́ kə ítirií ō ń i yá̰a̰ yāḿ gə̄ gə̄ ní dɔ tə́.

⁴² De gə̄ i ngá̰ý noō ō, deē a oō i kōō kósə de kə́ ngá̰ý gə̄ kə́ usədə́ yá̰a̰ aĺ ō. De kə́ dəngam gə̄ kə́ ḭḭn̄ kə̄ loo gə̄ tə́ malang kem dəla loo tə́ i noó ō. Nin̄ tə́lan̄ nə̄ngá gə̄ jī ngákó̰o̰ naā kə́ dəyá̰ kə́ jōó gə̄ ní tə́ ō, əlan̄ jākā mbang kə́ majə ngá̰ý dɔdə́ tə́ ō.

⁴³ Loo ń noō tə́ m̄-gíŕ yá̰á̰ m-ə́da na: Nge ń hál rāāī yān taā tɔ́gən tɔȳ yā madə̄n gə̄ ní gə̄gē, un rɔ̄n rāań ájə́ba ɓáý to̰!

⁴⁴ Dəngam gə̄ aw̄n̄ kə̄ rɔ̄n tə́! Ohola nin̄ kə Oholiba ń i dəyá̰ gə̄ kə́ i náā gə̄gē anī a ɓīī seneé ní, dəngam gə̄ aw̄n̄ ɓēé loodə́ tītə̄ loo kaw̄ ɓē dəyá̰ ájə́ba gēé beē!

⁴⁵ Banī de kə́ dəngam kə́ gōtə́ gə̄ a rāān̄ sarya kə dəyá̰ gə̄ ngeé ń toō, tītə̄ ń a rāānəń sarya kə ngé rāȳ gə̄ ō, kə ngé tɔ̄l̄ de gə̄ ō ní. Tɔdɔ̄ nin̄ rāān̄ rāȳ ō, jīdə́ i mósə ō.

⁴⁶ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Ɔ́siī dɔ de gə̄ kə̄ naā tə́ ādə̄ rɔ̄ɔ̄n̄də́, ādə̄ rāān̄də́ kadə̄ ɓōĺ rāādə́ kadə̄ ndewn̄ ō, ādə̄ taān̄ yá̰a̰ malang ń nin̄ əngen̄ ní kɔ̄kə́ ō!

⁴⁷ Ī-tə́nīdə́ kə mbalá gēé ō, ī-tɔ̄līdə́ kə kaskaraá ō! Ī-tɔ̄lī ngáńdə́ kə́ dəngam gə̄ ō, ngáńdə́ kə́ dəyá̰ gə̄ ō, ī-tə́laī hor dɔ kújə yādə́ gə̄ tə́ ō!

⁴⁸ Yá̰á̰ kə́ to rɔ̄sɔl̄ gə̄ ń de gə̄ rāān̄ kem ɓēé ní, m-ā m̄-rāā kadə̄ gír a gān̄g kɔ̄ɔ́. Nge ń noō a tél i yá̰a̰ kɔjə̄ tām̄ yā dəyá̰ gə̄ tə́ malang ō, nin̄ a ndájə̄n̄ háĺ kə́ majaĺ yā ngákó̰o̰ naā kə́ dəyá̰ kə́ jōó gə̄ ń toō aĺ ō.

⁴⁹ Ohola ō, Oholiba ō, yá̰a̰ rāāsí kə́ majaĺ gə̄ ní, najə̄n i dɔsí sḭḭ̄ kɔ́ gə̄ tə́. Ī-ndíbī horən, i tām̄ sḭḭ̄ ī-rɔyī nə́ɓā kə́ rɔ̄kum aĺ gə̄. Loo ń noō tə́ ā ī-gerī kadə̄ Kɔ́ɔ̄ɓē Nə́ɓā i mā.