EJEKIEL 22 - Bibəl ta Sar̄

Yá̰á̰ kə́ majaĺ ngá̰ý gə̄ kə́ de kə́ Jerusalem tə́ gə̄ rāān̄

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ā ī-gān̄g sarya dɔ ɓē kə́ Jerusalem tə́ tɔdɔ̄ tɔ̄l̄ naā i ngá̰ý kemeé. Majə kadə̄ ɔ́jən yá̰a̰ rāān kə́ majaĺ ngá̰ý gə̄ ādə̄ ger̄.

³ Ā ədan na: Najə̄ ń Kɔ́ɔ̄ɓē Nə́ɓā ɔr̄ ní n toó: Ḭ̄ ɓē kə́ Jerusalem, de kə́ ngé ndi kemií tə́ gə̄ tɔ̄lə̄n̄ de gə̄ kem ɓēé, ba i tītə̄ ń noō n nin̄ a əndānəń dɔ kum mbang kə́ yā nujəń seí kɔ̄ɔ́ sák sák naā tə́ ní. Nin̄ rāān̄ yá̰á̰ kə́ tɔ́sə̄ kum gotə nə́ɓā kə́ rɔ̄kum aĺ gə̄ tām̄ yādə́ tə́ yā rāań kadə̄ ī-tél ɓē kə́ yḛr.

⁴ De gə̄ malang ń oyn̄ noó najə̄n i dɔí tə́. Ḭ̄ ī-tél ɓē kə́ yḛr sɔɔ̄ń yá̰a̰ gə̄ ń de kə́ ngé ndi kemií tə́ gə̄ a tɔ́sə̄n̄ ní, ḭ̄ ī-ndɔ́tə̄ kə ndɔ̄ koyií ī-reēń ngɔr rɔ̄í tə́ i kə ta kūl̄ yá̰á̰ ń noō. A nujən̄ seí ngɔr. I tām̄ najə̄ ń noō tə́ n m-ə́la rɔ̄sɔl̄ dɔí tə́ ta kum nápar de gə̄ tə́ ní. De gə̄ kə́ kem ɓē gə̄ tə́ malang a mbóōn̄ seí.

⁵ Ḭ̄ ī-tḭ̄ḭ̄ ta hɔ̄r̄mɔ̄ yāí kɔ̄ɔ́, tɔdɔ̄ yá̰á̰ kə́ a̰a̰ gō naā aĺ gə̄ i ngá̰ý kemií tə́. Adə̄ gír de gə̄ malang, ngé gə̄ ń ndin̄ sa̰y, aké ngé gə̄ ń ndin̄ ngɔr ní a əgōīn̄.

⁶ Ngār kə́ Israel tə́ ń ndin̄ kemií ḭ̄ ɓē kə́ Jerusalem tə́ ní, nin̄ kógə̄ḿ kógə̄ḿ a unən̄ i ko̰o̰ ɓē yādə́ gə̄ n a tɔ̄l̄nəń madə̄də́ gə̄.

⁷ De gə̄ a kídə̄n̄ i bɔbə̄də́ gə̄ kə kó̰ó̰də́ gə̄ ɓēé looí ō, a rāān̄ i kum ngé nam̄ ɓē gə̄ ndoō tə́ ō, a əsan̄ i tətō ngán hal gə̄ ō dəyá̰ kə́ ngaa koy gə̄ ō.

⁸ De gə̄ a kídə̄n̄ i yá̰á̰ kə́ kɔr̄ kəndā tām̄ yāḿ tə́ ō, a kídə̄n̄ i ndɔ̄ sabat ń i ndɔ̄ kə́ kɔr̄ tām̄ yāḿ tə́ ní ō.

⁹ Ɓēé looí de kə́rēý gə̄ a sorə̄n̄ i dɔ madə̄də́ gə̄ tə́ yā tɔ̄ləńdə́. De gə̄ ń ndin̄ kemií tə́ ní, nin̄ i ngé kəsa yá̰á̰ kə́ tun̄ gə̄ dɔ mbal̄ gə̄ tə́ ō, nin̄ i de kə́ kaya gə̄ ō.

¹⁰ De kə́rēý gə̄ i ngé ɓīī kə nə̄yá̰ bɔbə̄də́ gə̄ aláa i ngé sāā dəyá̰ kə́ mósə əhɔdə́ gə̄ dɔ gúú tə́.

¹¹ Ngé kə́rēý gə̄ i ngé sāā nə̄yá̰ madə̄də́ gə̄ ō, ngé kə́ rang gə̄ i ngé sāā nə̄yá̰ ngáńdə́ gə̄ aláa i ngé sāā kem bəra madə̄də́ gə̄ dɔ gúú tə́ ō.

¹² Ḭ̄ Jerusalem, ɓēé looí de gə̄ a taān̄ kadə̄ karī gə̄ jī de gə̄ tə́ a tɔ̄l̄nəń de gə̄ ō, de gə̄ a adə̄n̄ de gə̄ nar loo tə̄nā tə́ a taānəń manə̄n kə́ ngá̰ý al̄ naā dɔ tə́ ō, de gə̄ a kə́ran̄ madə̄də́ gə̄ dɔ yá̰a̰ yādə́ gə̄ tə́ ō. Ba mā ɓáa dɔdə́ ndígə̄naləḿ kɔ̄ɔ́ i kə́ njɔ́ḿ gə̄ tə́. Najə̄ ń mā Kɔ́ɔ̄ɓē Nə́ɓā m-ə́dá ní n noó.

¹³ Ta i dɔḿ tə́ yā kadə̄ m̄-ɓir̄ jīḿ ba m-ə́la kum kə̄ dɔsí tə́, sḭḭ̄ de kə́ Jerusalem gə̄, sɔɔ̄ń yá̰a̰ gə̄ kə́ ə́ngeī kə ta róbə́ kə́ gōtə́ aĺ ō, de gə̄ kə́ ī-tɔ̄līīdə́ ō.

¹⁴ Ndɔ̄ ń m-ā m̄-rɔ̄ɔńsí tə́ ní ā ə́hɔī rɔ̄sí tɔgə ō, ā ə́ngeī tɔ́gə ō a? I mā Kɔ́ɔ̄ɓē n m-ɔ̄r̄ najə̄ ní, ba yá̰á̰ ń m-ə́dá ní m-ā m̄-rāā.

¹⁵ M-ā m̄-tə̄ndā yā tḭ̄ḭ̄sí kə̄ loo gə̄ tə́ dan nápar de gə̄ tə́, kə̄ kem ɓē kə́ rang gə̄ tə́ ō, yá̰a̰ rāāsí kə́ yḛr gə̄ malang ní m-ā m̄-rāā kadə̄ gíŕdə́ a gān̄g kɔ̄ɔ́ ō.

¹⁶ Sḭḭ̄ ī-tḭ̄ḭ̄ ta hɔ̄r̄mɔ̄ yāsí kɔ̄ɔ́ ta kum nápar de gə̄ tə́, sɔɔ̄ń yá̰a̰ rāāsí kə́ gōtə́ aĺ. Banī ā ī-gerī kadə̄ Kɔ́ɔ̄ɓē i mā.

¹⁷ Kɔ́ɔ̄ɓē ɔr̄ najə̄ seḿ, ədam̄ na:

¹⁸ Ḭ̄ ngōn̄ deē, ōō! Ngán Israel gə̄ ton̄ i tītə̄ yedə̄ gində̄ beé. Ton̄ i tītə̄ yedə̄ gində̄ arjā̰a̰ ō, yedə̄ gində̄ nə̄ngá kasə ō, yedə̄ gində̄ etḛ̄ḛ ō, yedə̄ gində̄ kə́ karī ō, yedə̄ gində̄ pəlɔm ō, kum hor yā kɔdə̄ tə́ beē.

¹⁹ I tām̄ najə̄ ń toō tə́ n mā Kɔ́ɔ̄ɓē Nə́ɓā m-ə́dádə́ yá̰á̰ ń toō ní: Sḭḭ̄ malang ní ī-téliī i gində̄ gə̄ kə́ kə yedə̄də́ gēé tū tə́. Adə̄ m-ā m̄-kán̄sí kə̄ dɔ naā tə́ kem ɓē kə́ Jerusalem tə́.

²⁰ Nang ń gində̄ arjā̰a̰, aláa gində̄ nə̄ngá kasə, aláa gində̄ kə́ karī, aláa gində̄ pəlɔm, aláa gində̄ etḛ̄ḛ i tū tə́ ní, a ɔy yā ɓōkə́n̄ dɔ naā tə́ sululu kem yá̰a̰ ɓōkə́ yá̰á̰ kógə̄ḿ tə́, ba a əlan̄ hor gírí kadə̄ yḛḛ̄. I beé ní, m-ā m̄-rāā tītə̄ ń noō sesí ō. Kem wōn̄g yāḿ kə́ ngá̰ý tə́ ní, m-ā m̄-kán̄sí kə̄ dɔ naā tə́ ba m-ā m-ə́la hor gíŕsí tə́ kadə̄ ī-yḛḛ̄ī!

²¹ M-ā m̄-kán̄sí kə̄ dɔ kem ɓē kə́ Jerusalem nəkɔ́ tə́, ba m-ā m-ə́la hor wōn̄g yāḿ gíŕsí tə́, kadə̄ ā ī-yḛḛ̄ī tītə̄ gində̄ gə̄ beé.

²² Ā ī-toī tītə̄ gində̄ arjā̰a̰ kə́ yḛḛ̄ kum hor tə́ beē. Loo ń noō tə́ ā ī-gerī kadə̄ i mā Kɔ́ɔ̄ɓē n m̄-bə̄gā wōn̄g yāḿ kə́ ngá̰ý dɔsí tə́ ní.

²³ Kɔ́ɔ̄ɓē ɔr̄ najə̄ seḿ, ədam̄ na:

²⁴ Ḭ̄ ngōn̄ deē, ə́dá ngán Israel gə̄ na ɓē yādə́ to i tītə̄ dɔ nang kə́ man̄ edə tū tə́ aĺ beē. Ndɔ̄ wōn̄g yāḿ tə́ ní man̄ edə dɔ tə́ alé.

²⁵ Ngār yādə́ gə̄ ton̄ i tītə̄ ɓɔl gə̄ kə́ a nōōn̄ beé. Dā̰ ń nin̄ əhɔn̄ ní, nin̄ rə́yā̰n̄ naā tə́. Nin̄ tɔ̄lə̄n̄ de gə̄ ō, ɓogən̄ yá̰a̰ kənge gə̄ ō, yá̰a̰ yā madə̄də́ gə̄ ō, rāān̄ adə̄ dəyá̰ kə́ ngaa koy gə̄ i ngá̰ý ō.

²⁶ Ngé tun̄ yá̰a̰ yādə́ gə̄ rāān̄ dɔ ngan̄g ta ndū najə̄ yāḿ gə̄ tə́ ō, ɓōlə́n̄ gidə loo kə́ kɔr̄ kam̄ tām̄ yāḿ tə́ gə̄ aĺ ō, ɔrə̄n̄ kam̄ yá̰á̰ kə́ yā ɓōĺ gidə naā tə́ kə yá̰á̰ kə́ karī aĺ ō, ndóōn̄ de gə̄ loo ka̰a̰ yá̰á̰ kə́ unjə̄ njáý njáý ger̄ aĺ ō, loo ka̰a̰ yá̰á̰ kə́ yḛr ger̄ aĺ ō. Nin̄ kídə̄n̄ ndɔ̄ sabat ō. I tām̄ najə̄ ń toō tə́ n deē kógə̄ḿ kə́ dandə́ tə́ kə́ ɓōĺ gidəḿ gətóó ní.

²⁷ Ngār gə̄ kə́ dɔ gír de gə̄ tə́ ton̄ i tītə̄ soó gə̄ kə́ ngé rə́yā̰ dā̰ kəhɔdə́ gə̄ naā tə́ beē kem ɓē kə́ Jerusalem tə́. Nin̄ tɔ̄lə̄n̄ de gə̄ yā ɓogəń yá̰a̰ kənge yādə́ gə̄.

²⁸ Ngé koō ta yādə́ gə̄ utə̄n̄ gidə yá̰a̰ gə̄ ń noō malang kə hō̰rō̰ kə́ ndaá kɔ̄ɔ́. Yá̰a̰ gə̄ ń nin̄ a̰a̰n̄ ní, i yá̰a̰ gə̄ kə́ kanjə̄ kumən ō, yá̰a̰ gə̄ ń nin̄ ədan̄ na a rāā yá̰á̰ ní i yá̰á̰ kə́ rɔ̄kum aĺ gə̄ ō. Nin̄ ədan̄ na: Kɔ́ɔ̄ɓē Nə́ɓā əda na, tá mā m-ɔ̄r̄ najə̄ sedə́ alé.

²⁹ De gə̄ a rāān̄ yá̰a̰ i kə tɔ́gə́də́ ō, i kə dɔ́nɔ́ ō, kə̄ loo gə̄ tə́ malang kem ɓēé. Nin̄ ɓogən̄ ō, əsan̄ tətō ngé ndoō gə̄ ō, ngé rɔ̄ tō ndoō gə̄ ō, rāān̄ kum ngé nam̄ ɓē gə̄ ndoō tə́ kanjə̄ ɓōĺ gidə yá̰a̰ rāā kə́ gōtə́ ō.

³⁰ m̄-sāā deē kógə̄ḿ dandə́ tə́ kə́ əndā ndogə̄ mbal̄ yā rɔ̄ɔń dɔ rɔ̄n tə́, kə́ ra ta kumḿ tə́ a ngɔ̄məń ndogə̄ mbal̄ tām̄ majə yā ɓē tə́, tá kadə̄ m̄-nujəń ɓē alé. Banī m-ə́nge deē kógə̄ḿ alé.

³¹ Loo ń noō tə́ m̄-bə̄gā wōn̄g yāḿ kə́ ngá̰ý dɔdə́ tə́. m̄-rāā adə̄ nin̄ gətóon̄ kɔ̄ɔ́ kum hor wōn̄g ní tə́, m̄-rāā adə̄ nin̄ əgān̄ kə̄rā yá̰a̰ rāādə́ kə́ majaĺ gə̄. Najə̄ ń Kɔ́ɔ̄ɓē Nə́ɓā əda ní n noó.