EJEKIEL 21 - Bibəl ta Sar̄

Najə̄ kə́ majə koō aĺ kə́ tām̄ yā ngán Israel gə̄ tə́

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ī-tūr̄ kumií kə̄ dām̄ mbɔ́r ɓē kə́ geleé tə́. De gə̄ ń ndin̄ kem ku gə̄ tə́ dām̄ mbɔ́r ɓē kə́ geleé tə́ ní, ɔ̄r̄ najə̄ sedə́ kə ngangá ādə̄m̄.

³ Ə̄ndā gúu dɔdə́ tə́ ādə̄ oōn̄ najə̄ gə̄ ń mā Kɔ́ɔ̄ɓē Nə́ɓā m-ɔ̄r̄ kə ku kāgə̄ gə̄ kə́ dām̄ mbɔ́r ɓē kə́ geleé tə́ ní: M-ā m-ə́la hor kógə̄ḿ dɔ kāgə̄ yāí kə́ to mbōl̄ gə̄ tə́ ō, dɔ kāgə̄ yāí kə́ tutə gə̄ tə́ ō, kadə̄ o̰o̰də́ malang. Hor ní a oy aĺ ō, a o̰o̰ de gə̄ malang ō. A əla gír i dām̄ mbɔ́r ɓē kə́ geleé tə́ bátə́ dām̄ mbɔ́r ɓē kə́ ko̰ó̰ tə́.

⁴ Loo ń noō tə́ de gə̄ malang a a̰a̰n̄ kadə̄ i mā Kɔ́ɔ̄ɓē n m-ə́la hor ní ō, hor ní a oy aĺ ō.

⁵ Mā nge koō ta m̄-tūr̄ m-ə́da na: Á! Kɔ́ɔ̄ɓē Nə́ɓā! Najə̄ ń de gə̄ ədan̄ dɔḿ tə́ kɔ̄ɔ́ ɓá ní n toó: Deē ń noō ni ger̄ i kəga səngó ngóy.

⁶ Kɔ́ɔ̄ɓē ɔr̄ najə̄ seḿ ɓáý to̰ əda na:

⁷ Ḭ̄ ngōn̄ deē, ī-tūr̄ kumií kə̄ Jerusalem. Ɔ̄r̄ najə̄ kə loo kə́ kɔr̄ kam̄ gēé kə ngangá ō, ə́da najə̄ kə́ Nə́ɓā əndā taí tə́ dɔ ɓē kə́ Israel tə́ ō.

⁸ Ā ə́dá ngán Israel gə̄ na najə̄ ń Kɔ́ɔ̄ɓē əda ní n toó: M-ā m̄-rāā yá̰á̰ kə́ tōr̄ seí. M-ā m-ɔ̄r̄ kaskar yāḿ kem hɔ̄pə̄n tə́ ō, m-ā m̄-tɔ̄l̄sí malang kɔ̄ɔ́ ō, de kə́ majə gə̄ ō, de kə́ majaĺ gə̄ ō.

⁹ A̰á̰ā̰, m̄-ndigə nujə sesí kɔ̄ɔ́ malang, de kə́ majə gə̄ gə̄gē, de kə́ majaĺ gə̄ gə̄gē. I tām̄ najə̄ ń noō tə́ n m-ā m-ɔ̄r̄ kaskar yāḿ kem hɔ̄pə̄n tə́ yā tɔ̄ləń de gə̄ malang ní. M-ā m-ə́lá gír i dām̄ mbɔ́r ɓē kə́ geleé tə́ bátə́ dām̄ mbɔ́r ɓē kə́ ko̰ó̰ tə́.

¹⁰ Loo ń noō tə́ de gə̄ malang a gerə̄n̄ kadə̄ mā Kɔ́ɔ̄ɓē m-ɔ̄r̄ kaskar yāḿ kem hɔ̄pə̄n tə́ ō, m-ā m̄-tél yā kəla gogə́ to̰ aĺ ō.

¹¹ Ba ḭ̄ ngōn̄ deē ń yá̰á̰ kə́ yā kadə̄ ə̄ndā kemií dɔ tə́ to̰ gətóo ō, wurií atī ō ní, ī-tó̰ō̰ rus rus ta kumdə́ tə́ malang.

¹² Loo ń ré a dəjeīn̄ na ké ā ī-tó̰ō̰ rus rus i tām̄ rí tə́ wa anī, ī-téĺ ə́dádə́ na ōō najə̄ kə́ majaĺ ō, yá̰á̰ ni na a rāā yá̰a̰ ō. Kem de gə̄ na a nujə sák sák kɔ̄ɔ́ ō, jī de gə̄ a ur̄ wak kɔ̄ɔ́ ō. Kum mbangən n toó! Yá̰á̰ ní a rāā yá̰a̰ i ngɔr ń toō tə́. Najə̄ ń Kɔ́ɔ̄ɓē Nə́ɓā əda ní n noó.

Najə̄ kə́ dɔ kaskar tə́ ń Nə́ɓā əndā ta nge koō ta tə́ ní

¹³ Kɔ́ɔ̄ɓē ɔr̄ najə̄ seḿ ɓáý to̰, ni ədam̄ na:

¹⁴ Ḭ̄ ngōn̄ deē, ə́da najə̄ ń m-ə̄ndā taí tə́ ní. Ā ə́da de gə̄ na: Ōōī najə̄ ń Kɔ́ɔ̄ɓē əda ní, ni-əda na: Kaskar kógə̄ḿ n toó, i kaskar kə́ kɔl ta ō, kə́ ndə́lē ō.

¹⁵ Ɔlən̄ tan i yā tɔ̄ləń de gə̄, Usən̄ kaskar ní i yā kadə̄ ndə́lē pipir.

¹⁶ m̄-dəje kadə̄ usən̄ kaskar ní i yā kadə̄ to rāań kəla. Ɔlən̄ ta ō, ndə́lē ō i yā kəla jī nge tɔ̄l̄ deē tə́.

¹⁷ Ḭ̄ ngōn̄ deē, ə́ga kɔŕ kə́ ɔjə kadə̄ ə̄ndā kemií dɔ yá̰á̰ kógə̄ḿ tə́ to̰ alé! Kaskar ní i kə́ tūr̄ kə̄ dɔ gír deē yāḿ gə̄ tə́ ō, kə̄ dɔ ngār gə̄ yā ngán Israel gə̄ tə́ malang ō. A̰á̰ā̰, a tɔ̄lə̄n̄ ngār gə̄ naā tə́ kə́ gír deē yāḿ gēé. Ə́nda kadií ī-nōoń rɔ̄í.

¹⁸ A̰á̰ā̰, i yá̰a̰ nāā kə́ ngan̄g ngá̰ý. Najə̄ ń mā Kɔ́ɔ̄ɓē Nə́ɓā m-ə́dá ní n noó.

¹⁹ Ngɔlaā ní, ḭ̄ ngōn̄ deē, ə́da najə̄ ń m-ə̄ndā taí tə́ ní ō, ī-ɓir̄ jīí ə́ndań yá̰a̰ nja kógə̄ḿ ō, nja jōó ō, nja mətá ō. I kaskar tɔ̄l̄ yo, i kaskar kə́ nge tɔ̄l̄ de gə̄ malang ō, kə́ nge tə́gā de gə̄ kə̄ loo gə̄ tə́ ō.

²⁰ m̄-sāā i kɔr̄ tɔ́gə́də́ kɔ̄ɔ́ ō, m̄-sāā i rāādə́ kadə̄ tə́sōn̄ ō. M-ə̄ndā kaskar kə́ nge tɔ̄l̄ yo kə gō ta kújə gə̄ kógə̄ḿ kógə̄ḿ. Rāān̄ kaskar ní i yā kadə̄ ndə́lē pipir ō, ɔlən̄ ta i yā kadə̄ tɔ̄l̄ yá̰a̰ majə ō.

²¹ Kaskar kə́ a əja yá̰a̰ gān̄g, ī-tə́gā de gə̄ ko̰ó̰ gē geleé gē! Ī-tūr̄ taí kə́ atə límbé límbé kə̄ loo gə̄ tə́ malang.

²² Ta i dɔḿ tə́ kadə̄ m̄-ɓir̄ jīḿ m-ə́ndań yá̰a̰ ō, m-ā m-ə́ya̰ kadə̄ wōn̄g yāḿ kə́ ngá̰ý rāā kəla bátə́ ta tɔ̄l̄ ta tə́ ō. I mā Kɔ́ɔ̄ɓē n m-ə́da najə̄ ń noō ní.

De ənīn̄ ɓē kə́ Jerusalem rɔ̄ɔ̄

²³ Kɔ́ɔ̄ɓē ɔr̄ najə̄ seḿ, ədam̄ na:

²⁴ Ḭ̄ ngōn̄ deē, ī-njar róbə jōó ādə̄ mban̄g kə́ Babilon reēń kə kaskar yānneé. Majə kadə̄ róbə́ kə́ jōó gə̄ ní əlan̄ gír i kem ɓē kə́ kógə̄ḿ beē tə́. Ba ī-ndang rī ɓē gə̄ ń deē un róbə gə̄ ní anī a ugə̄ tū tə́ ní tū yá̰á̰ tə́ ba ī-tə́ndā ta róbə gə̄ ní tə́.

²⁵ Dan róbə́ kə́ jōó gə̄ ń noō tə́ ní, nge kə́ kógə̄ḿ a aw̄ kə áskar kə́ Babilon gə̄ kem ɓē yā Amon gə̄ ń rīn na i Raba ní tə́ ō, nge kə́ noō a aw̄ sedə́ dɔ nang kə́ Juda tə́, kem ɓē kə́ Jerusalem ń i ɓē kə́ ngɔ̄mə̄n̄ majə ngá̰ý ní tə́.

²⁶ Mban̄g kə́ Babilon a dəba ta gajə róbə́ tə́, ta róbə́ kə́ jōó gə̄ ní tə́ yā túgəń wə̄lā yā gerə̄ń yá̰á̰ kə́ ɔjə dɔn. Ni yéȳ kum gərā gə̄ ō, yá̰á̰ kə́ dūú gə̄ ń tɔ́sə̄n̄ kum gotə yá̰a̰ gə̄ ní, ni dəjedə́ najə̄ ō, ni-əndā ma̰ȳ wur dā̰ gə̄ ō.

²⁷ Gərāń ń ɔjə dɔ ɓē kə́ Jerusalem ní əsō kem jīn kə́ ko̰ó̰ tə́. Ni a əda kadə̄ de gə̄ aw̄ tɔ̄lə̄n̄ de gə̄ nú ō, de gə̄ ní a urən̄ kɔŕ rɔ̄ɔ̄ ō. Ni a tə́ndā yá̰a̰ rɔ̄ɔ̄ gə̄ ta róbə gə̄ kə́ yā kudəń kə̄ kem ɓēé tə́ ō, a ɔy nán̄g kadə̄ ra dɔ naā tə́ bing yā kənīń rɔ̄ɔ̄ ō, ni a ndēr̄ bəlo kə́ ra kə ngālāá gə̄ ō.

²⁸ De kə́ Jerusalem gə̄ gírə̄n̄ kadə̄ wə̄lā kə́ túgə̄ ń noō na a rāā yá̰á̰ kógə̄ḿ alé. Tām̄ túbə adə̄n̄də́ kadə̄ a ngɔ̄mə̄n̄də́. Banī mban̄g kə́ Babilon tə́ ter̄ kemdə́ dɔ ra ń nin̄ ran̄ dɔ ndūdə́ tə́ seneé aĺ ní tə́ ō, ni tāādə́ ədadə́ na n-a n-ɔydə́ yā kaw̄ sedə́ dɔ ɓē kə́ rang tə́ dɔ gúú tə́ ō.

²⁹ I tām̄ najə̄ ń noō tə́ n mā Kɔ́ɔ̄ɓē Nə́ɓā m-ə́dásí yá̰á̰ ń toō ní: Sḭḭ̄ ī-rāāī adə̄ dɔ deē ndígə̄nal dɔ dɔ ngan̄g yāsí tə́ aĺ ō, ɔ́jiī majaĺ yāsí gə̄ kə̄ ndágá tū yá̰a̰ rāāsí gə̄ tə́ malang ō. I tītə̄ ń noō n ā ī-terīiń kemḿ dɔ yá̰a̰ rāāsí kə́ gōtə́ aĺ gə̄ tə́ ngándáńg kanjə̄ kadə̄ asəsí ní. I beé ní, madə̄ ba̰ā̰ a əhɔsí dəngáy, tām̄ sḭḭ̄ ī-rāāī adə̄ dɔḿ ndígə̄nalsí alé.

³⁰ Ba ḭ̄ ngār kə́ Israel tə́, ḭ̄ i nge ndaa deē ndaa kə́ to rɔ̄sɔl̄ ngá̰ý! Kum mbang a reē noó kadə̄ tɔ̄l̄ ń ā ī-tɔ̄l̄ de gə̄ ní gír a gān̄g.

³¹ Yá̰á̰ ń mā Kɔ́ɔ̄ɓē Nə́ɓā m-ə́dá ní n toó: A taān̄ ta kūbə̄ kənda dɔ yāí kɔ̄ɔ́ ō, a taān̄ jākā mbang yāí kɔ̄ɔ́ ō. Yá̰a̰ gə̄ a tūrə̄n̄! A ɔsən̄ de kə́ najə̄də́ gətóo gə̄ kə̄ dɔɔ́, ba a télən̄ kə de kə́ bo gə̄ kə̄ nang tə́.

³² Loo nujə sák sák, ngándáńg loo nujə sák sák! Yá̰á̰ m-ā m̄-rāā kə Jerusalem ní n toó: I loo kə́ nujə sák sák kə́ to dɔ naā tə́ bing! M-ādə̄ deē kógə̄ḿ tɔ́gə kadə̄ rɔ̄ɔ̄nəń. A nujən̄ ɓē kə́ Jerusalem malang kɔ̄ɔ́, ba i kété no kugə̄ deē ngeé ń noō tə́ alé.

Ənīn̄ Amon gə̄ rɔ̄ɔ̄

³³ Kɔ́ɔ̄ɓē Nə́ɓā ədam̄ ɓáý to̰ na: Ḭ̄ ngōn̄ deē, ə́da Amon gə̄ najə̄ ādə̄m̄. Nin̄ tájə̄n̄ Israel gə̄. I beé ɓá ní, ə́dádə́ na: Kaskar n toó, kaskar kə́ ɔrə̄n̄ kɔ̄ɔ́ kem hɔ̄pə̄n tə́. Ɔlən̄ ta adə̄ atə i yā tɔ̄ləń deē ō, i yā kadə̄ əsa deē ō, i yā kadə̄ ndə́lē pipir ō.

³⁴ Sḭḭ̄ ī-raī i dɔ yá̰á̰ kə́ ka̰ā̰ kə́ rɔ̄kum aĺ gə̄ tə́ ō, de gə̄ a ədan̄sí i najə̄ kə́ sor̄ gə̄ dɔ yá̰a̰ gə̄ kə́ a rāān̄ yā rāā yá̰á̰ ɓáý tə́ ō. Ba kum mbang ngeé ń noō tə́ ɓáa kaskar əndā dɔ rɔ̄n danaá kɔ̄ɔ́ yā gān̄g dɔ de kə́ majaĺ gə̄ kɔ̄ɔ́ ō, yā gān̄g dɔ ngé rāā majaĺ gə̄ kɔ̄ɔ́ ō. Tɔdɔ̄ i kum mbang ń kadə̄ gíŕ yá̰a̰ rāādə́ kə́ gōtə́ aĺ gə̄ gāngəń kɔ̄ɔ́ ní.

³⁵ Ngɔlaā ní ī-tél ī-tə́laī kaskar yāsí gə̄ kem hɔ̄pə̄n gə̄ tə́ gogə́. M-ā m̄-gān̄g sarya dɔsí tə́ loo ń rāān̄sí tū tə́ ní tə́, kem ɓē ń ojən̄sí tū tə́ ní tə́.

³⁶ M-ā m̄-bə̄gā wōn̄g yāḿ kə́ ngá̰ý dɔsí tə́, m-ā m̄-bə̄gā hor wōn̄g yāḿ dɔsí tə́. M-ā m-ə́la dɔsí gíŕ tɔ́gə yā de kə́ ngé rāā yá̰a̰ kə dɔ́nɔ́ gə̄ tə́, de gə̄ kə́ yá̰á̰ ń nin̄ gerə̄n̄ ní i nujə loo ngóy.

³⁷ Hor a əsasí ō, a ɓōkə́n̄ mósə́sí kem ɓēé malang ō. Gō tə́ anī de kə́ yā kadə̄ a əga kemən dɔsí tə́ to̰ a gətóo. I mā Kɔ́ɔ̄ɓē n m-ə́da najə̄ ń noō ní.