EJEKIEL 2 - Bibəl ta Sar̄

Nə́ɓā əla Ejekiel kə̄ rɔ̄ ngán Israel gə̄ tə́

¹ Ni ədam̄ na: Ḭ̄ ngōn̄ deē, ḭ́ḭ ī-ra dɔɔ́, tɔdɔ̄ m-ā m-ɔ̄r̄ najə̄ seí.

² Dan ń ni ədam̄ najə̄ ń noō anī, Ndíl udə kemḿ tə́ ba un udəm̄ dɔɔ́. Adə̄ m-ōō najə̄ yā deē ń a ɔr̄ najə̄ seḿ ní.

³ Ni ədam̄ na: Ḭ̄ ń i ngōn̄ deē ní, m-ā m-ə́laī kə̄ rɔ̄ ngán Israel gə̄ tə́. Nin̄ i ɓūtə̄ de kə́ ngé mbātə́ najə̄ gə̄ kə́ mbātə́mə̄n̄ kɔ̄ɔ́. Nin̄ gə̄gē, kaadə́ gə̄gē, mbātə́mə̄n̄ bátə́ ɓōólaā.

⁴ I de kə́ ngé dɔ ngan̄g gə̄ ō, kə́ ngé kem ngan̄g gə̄ ō ń noō n m-ā m-ə́laī kə̄ rɔ̄də́ tə́ ní. Ā ə́dádə́ na: Najə̄ ń Kɔ́ɔ̄ɓē Nə́ɓā əda ní n toó:

⁵ Ká ré nin̄ oōn̄ aáā oōn̄ aĺ aáā tām̄ nin̄ i gír de kə́ mbātə́ najə̄ gə̄ ní, a gerə̄n̄ kadə̄ nge koō ta kógə̄ḿ i dandə́ tə́.

⁶ Ní, ḭ̄ ngōn̄ deē ndul, ī-lōō ɓōĺdə́ ō, ī-lōō ɓōĺ najə̄ kɔr̄də́ ō. Nin̄ a ədan̄ najə̄ kə́ mbātə́ yāí ḭ̄. Adə̄ ā ɔ́jəń na ī-ndi i dan kōn̄ gə̄ tə́, aláa na i dan kókə́rang gə̄ tə́. Banī ī-lōō ɓōĺ najə̄ kɔr̄də́ ō, ī-lōō ɓōĺ ta kumdə́ ō. Tɔdɔ̄ nin̄ i gír de kə́ ngé mbātə́ najə̄ gə̄.

⁷ Sɔɔ̄ń dɔ ngan̄g yādə́ ní, ká nin̄ oōn̄ najə̄ yāí aáā, oōn̄ najə̄ yāí aĺ aáā, yá̰á̰ ń m-ā m-ə́daī ní, ə́dádə́.

⁸ Ba ḭ̄ Ngōn̄ deē ndul, ī-lōō rāā dɔ ngan̄g tītə̄ yādə́, banī ōō yá̰á̰ ń m-ā m-ə́daī ní. Ī-teē taí ba ə́sá yá̰á̰ ń m-ā m-ādī ní.

⁹ Loo ń noō tə́ m-á̰a̰ jī deē kógə̄ḿ kə́ kəla kum kə̄ rɔ̄ḿ tə́ ō, jī deē ní əhɔ ndāŕ ndang najə̄ kógə̄ḿ kə́ ɓír̄ gidə naā tə́ ō.

¹⁰ Jī deē ní tútə ndāŕ ndang najə̄ ní gidə naā tə́ ta kumḿ tə́. Ndangən̄ najə̄ kemeé ō, gidə tə́ ō. Yá̰á̰ ń ndangən̄ ní i pā rɔ̄nel̄ aĺ gə̄ ō, i pā yo gə̄ ō, nōō rɔ̄ gə̄ ō.