EJEKIEL 19 - Bibəl ta Sar̄

Pā nōō ɓɔl gə̄

¹ Kɔ́ɔ̄ɓē ədam̄ na kə m-ə̄nī pā yo ń toō tām̄ yā ngār gə̄ kə́ Israel tə́.

² Kété ní, kó̰ó̰sí i ɓɔl kə́ dəyá̰ dan ɓɔl kə́ rang gə̄ tə́. Ni to i dan ngán ɓɔl gə̄ tə́. Ni-ul̄ ngánən gə̄.

³ Ni ndóō ngōnən kógə̄ḿ kə́ dan madə̄ gə̄ tə́ yá̰a̰. Ngōnən ní tél balsáa ɓɔl kə́ tɔ́gən i ngá̰ý. Ni ndóō loo rə́yā̰ dā̰ naā tə́ ō, əhɔ deē ndul gə̄ əsadə́ ō.

⁴ Nápar de gə̄ oōn̄ najə̄ yān adə̄ əhɔnən̄ kə gūmbūú. Aw̄n̄ seneé dɔ nang kə́ Ejiptə tə́, gində̄ kə́ ta rugə i kónən tə́.

⁵ Kó̰o̰ ɓɔl ní ndi ngóō dan i ngá̰ý. Dan ń ni-a̰a̰ kadə̄ yá̰á̰ kə́ yā kəndā kemən dɔ tə́ to̰ gətóo anī, un ngōnən kə́ rang kə́ dan madə̄ gə̄ tə́ rāān adə̄ tél ngōn̄ ɓɔl kə́ tɔ́gən i ngá̰ý.

⁶ Ni-ndi i dan ɓɔl gə̄ tə́ ō, tél balsáa ɓɔl ō. Ni ndóō loo rə́yā̰ dā̰ naā tə́ ō, əhɔ deē ndul gə̄ əsadə́ ō.

⁷ Ni ɓéngə̄lē ndogə̄ mbal̄ yādə́ kə́ ngan̄g ngá̰ý gə̄ kɔ̄ɔ́ ō, nujə kə ɓē yādə́ gə̄ kɔ̄ɔ́ ō. De kə́ kem ɓēé gə̄ ōōn̄ kōō nōōn anī, ɓōĺ rāādə́ adə̄ nin̄ ndewn̄.

⁸ Anī nápar de gə̄ ḭḭn̄ kə̄ loo gə̄ tə́ reē əndān̄ rɔ̄də́ naā tə́ yā rɔ̄ɔ̄ seneé. Nin̄ əyān̄ gūmbə̄ non tə́, ba rāān̄ adə̄ ni-əsō kemeé.

⁹ Nin̄ ənīnən̄ kem ngōn̄ kújə́ kə́ rāān̄ kə gindīí tə́ ō, do̰ō̰nən̄ kə gində̄ kə́ ta ruguú ō, ba aw̄n̄ seneé rɔ̄ mban̄g kə́ Babilon tə́. Nin̄ ənīnən̄ kújə dəngáyá yā kadə̄ deē oō ndūn dɔ mbal̄ gə̄ kə́ Israel tə́ to̰ alé.

Pā nōō kāgə̄ nduú

¹⁰ Kó̰ó̰sí to i tītə̄ kāgə̄ nduú kə́ əhɔn̄ kadə man̄ tə́ beē. Ni an̄ ngá̰ý ō, mbīn i ngá̰ý ō, tɔdɔ̄ man̄ asən.

¹¹ Ta jīn gə̄ ngangə̄n̄ ō, télən̄ kāgə̄ jī yā mban̄g gə̄ ō. Ni tɔgə mān̄ kāgə̄ gə̄ kum kə̄ dɔɔ́. De gə̄ malang a̰a̰nən̄ sɔɔ̄ń ngāl̄ yān ō, ta jīn gə̄ malang ō.

¹² Banī ɔr̄nən̄ kə wōn̄g gēé ənīnən̄ nang tə́. Néĺ kə́ dūn̄ tə́ tutə kanə̄n gə̄, adə̄ kanə̄n gə̄ tə́sōn̄ nang tə́. Ta jīn kə́ ngan̄g gə̄ ní tutən̄ kɔ̄ɔ́ ō, hor o̰o̰də́ ō.

¹³ Ngɔlaā ní əhɔn̄ kāgə̄ nduú ní i kem dəla loo tə́, dɔ nang kə́ tutə kə́ man̄ gətóo tū tə́ tə́.

¹⁴ Banī hor kógə̄ḿ teē ɓōdə̄n tə́, o̰o̰ ta jīn gə̄ ō, kanə̄n gə̄ ō. Ta jīn kə́ ngan̄g kə́ yā kadə̄ tél kāgə̄ jī yā mban̄g to̰ gətóo. A ənīn̄ pā ń toō i tītə̄ loo kənī pā yo beé.