EJEKIEL 18 - Bibəl ta Sar̄

Nə́ɓā rāā sarya kə de gə̄ kógə̄ḿ kógə̄ḿ sɔɔ̄ń i dɔ háĺdə́

¹ Kɔ́ɔ̄ɓē ɔr̄ najə̄ seḿ, ədam̄ na:

² I tām̄ rí tə́ á ədan̄ kāgə̄ najə̄ ń toō kə̄ nja naā tə́ dɔ nang kə́ Israel tə́ ní, ədan̄ na: Bɔbə̄ ngán gə̄ əsan̄ kan̄ kāgə̄ nduú kə́ ɓogə́ro, ba i ngán gə̄ n ngān̄gdə́ oy ō ní?

³ Tītə̄ ń m̄-ndiń kə kumḿ rɔ̄kum noó ní, najə̄ ń mā Kɔ́ɔ̄ɓē Nə́ɓā m-ə́dásí ní toó: Ā ī-téliī yā kəda kāgə̄ najə̄ ń noō dɔ nang kə́ Israel tə́ to̰ alé.

⁴ Tām̄ ndi kə kumuú yā de gə̄ kógə̄ḿ kógə̄ḿ i yá̰a̰ yāḿ mā. Ndi kə kumuú yā ngé kojə ngán gə̄ ō, yā ngán gə̄ ō, i yá̰a̰ yāḿ mā. I deē ń rāā majaĺ ní n sɔɔ̄ kadə̄ oy ní.

⁵ Yá̰á̰ kə́ yā kɔjəń n toó: De kógə̄ḿ rāā yá̰á̰ majə, ni ɓōĺ ndū najə̄ gə̄ ba rāā yá̰á̰ kə́ gōtə́.

⁶ Ni-əsa yá̰á̰ kə́ tun̄ gə̄ dɔ mbal̄ gə̄ tə́ aĺ ō, rāā kəla adə̄ ɓesə̄ gə̄ yā ngán Israel gə̄ aĺ ō. Ni-əla rɔ̄sɔl̄ dɔ nə̄yá̰ deē tə́ aĺ ō, sāā dəyá̰ kə́ mósə əhɔn aĺ ō.

⁷ Ni-əsa tətō deē aĺ ō, ɓogə yá̰a̰ yā deē aĺ ō. Yá̰á̰ ń deē adə̄n tə̄nań yá̰a̰ jīn tə́ ní, ni téləń adə̄ kɔ́ɔ̄ gogə́. Deē ń ɓō rāān ní, ni-adə̄n yá̰a̰ kəsa ō, deē ń rɔ̄n i karī ní, ni-adə̄n kūbə̄ ō.

⁸ Ni-adə̄ nar yān loo tə̄nā tə́ yā kəngeń manə̄n dɔ tə́ aĺ ō, yā kəngeń yá̰á̰ kógə̄ḿ gírí aĺ ō. Ni tūr̄ gidən kɔ̄ɔ́ ta yá̰a̰ rāā kə́ gōtə́ aĺ tə́ ō, gān̄g sarya i kə gō róbə najə̄ kə́ rɔ̄kum ō.

⁹ Ni-rāā yá̰a̰ gə̄ ń ndū najə̄ yāḿ gə̄ ədan̄ ní ō, əndā kumən gír jī bēl̄ loo rāā yá̰a̰ yāḿ gə̄ tə́ ba rāādə́ kanjə̄ kəya̰ gō kɔ̄ɔ́ ō. Adə̄ mā Kɔ́ɔ̄ɓē Nə́ɓā m-ə́da na de kə́ beé i de kə́ gōtə́ rɔ̄kum ō, ni a ndi kə kumneé ō.

¹⁰ Ngōnə̄ḿ kə́ dəngam i de kə́ nge rāā yá̰a̰ kə dɔ́nɔ́ ō, i de kə́ nge tɔ̄l̄ de gə̄ ō, nge rāā yá̰á̰ kə́ rang kə́ tītə̄ ń noō gə̄ ō.

¹¹ Yá̰a̰ gə̄ ń noō malang ní, bɔbə̄ ngōn̄ ní rāā alé. Ngōnən kə́ dəngam ní ra dɔ tə́ noō əsa yá̰a̰ kə́ tun̄ gə̄ dɔ mbal̄ gə̄ tə́ ō, əla rɔ̄sɔl̄ dɔ nə̄yá̰ madə̄n gə̄ tə́ ō,

¹² əsa tətō ngé ndoō gə̄ ō, ngé rɔ̄ tō ndoō gə̄ ō, ɓogə de gə̄ ō, yá̰a̰ gə̄ ń de gə̄ adə̄nən̄ tə̄nānən̄neé yá̰á̰ ní, ni téləń adə̄ kɔ́ɔ̄n gə̄ gogə́ aĺ ō, ni-rāā kəla adə̄ nə́ɓā kə́ rɔ̄kum aĺ gə̄ ō, rāā yá̰á̰ kə́ majaĺ ngá̰ý gə̄ loo ń noō tə́ ō.

¹³ Ni-adə̄ nar yān loo tə̄nā tə́ yā kəngeń manə̄n dɔ tə́ ō, yā kəngeń yá̰á̰ gírí ō. Ngōn̄ ń noō ní a ndi kə kumneé a? Rɔ̄kum, a ndi kə kumneé alé! Yá̰á̰ kə́ majaĺ ngá̰ý gə̄ malang ń noō ni-rāādə́. Adə̄ ni a oy ō, najə̄ yon a tél yā kəsō i dɔn nəkɔ́ tə́ ō.

¹⁴ Ba ré tītə̄ ń toō ni i kə ngōn̄ kə́ dəngam ba ngōn̄ ní a̰a̰ majaĺ ń bɔbə̄n rāā ní banī mbātə́ rāā tītə̄ yā bɔbə̄n,

¹⁵ adə̄ ni-əsa yá̰á̰ kə́ tun̄ gə̄ dɔ mbal̄ gə̄ aĺ ō, ni-rāā kəla adə̄ nə́ɓā kə́ rɔ̄kum aĺ gə̄ yā ngán Israel aĺ ō, ni-əla rɔ̄sɔl̄ dɔ nə̄yá̰ deē tə́ aĺ ō,

¹⁶ əsa tətō deē aĺ ō, ɓogə deē aĺ ō. Deē ń ɓō rāān ní ni-adə̄n yá̰a̰ kəsa ō, deē ń rɔ̄n i karī ní, ni-adə̄n kūbə̄ ō.

¹⁷ Ni tūr̄ gidən kɔ̄ɔ́ ta yá̰a̰ rāā kə́ gōtə́ aĺ tə́ ō, ni-adə̄ nar yān loo tə̄nā tə́ yā kəngeń manə̄n dɔ tə́ aĺ ō, yā kəngeń yá̰á̰ kógə̄ḿ gírí aĺ ō. Ni un gō jī bēl̄ loo rāā yá̰a̰ yān gə̄ ō, ni-rāā yá̰a̰ gə̄ ń ndū najə̄ yāḿ gə̄ ədan̄ ní ō. Ní, de kə́ beē a oy najə̄ yá̰á̰ kə́ gōtə́ aĺ gə̄ ń bɔbə̄n rāā tə́ ní a? I rɔ̄kum kadə̄ ni a oy najə̄n tə́ alé, ba a ndi kə kumneé.

¹⁸ I bɔbə̄n n rāā yá̰á̰ kə́ gōtə́ aĺ kə madə̄n gēé rāań kumdə́ ndoō tə́ ō, ɓogədə́ ō, rāā de gə̄ kə́ dan gír deē yān gə̄ tə́ yá̰á̰ kə́ majaĺ ō ní. Adə̄ i ni n a oy tām̄ yá̰a̰ rāān gə̄ kə́ gōtə́ aĺ tə́ ní.

¹⁹ Sḭḭ̄ ī-dəjeī najə̄ ə́daī na ké i tām̄ rī tə́ áké ngōn̄ ətō ndə̄tō yá̰á̰ kə́ gōtə́ aĺ ń bɔbə̄n rāā ní alé ní wa. I tɔdɔ̄ ni ɓōĺ ndū najə̄ gə̄ ō, rāā yá̰á̰ kə́ gōtə́ ō. Yá̰a̰ malang ń m-ə́da kadə̄ yā rāā ní, ni oō taḿ ba rāādə́ rɔ̄kum. Adə̄ ni a ndi kə kumneé tām̄ yā nge ń noō tə́.

²⁰ I deē ń rāā majaĺ ní n sɔɔ̄ kadə̄ ni-oy ní. A əndan̄ ngán gə̄ tām̄ majaĺ yā bɔbə̄də́ gə̄ tə́ aĺ ō, a əndan̄ bɔbə̄ ngán gə̄ tām̄ majaĺ yā ngáńdə́ gə̄ tə́ aĺ ō. Deē ń rāā yá̰á̰ kə́ majə ní, a əndān̄ njan tām̄ yá̰a̰ rāān gə̄ kə́ gōtə́ tə́ ō, deē ń rāā yá̰á̰ kə́ majaĺ ní, a əndanən̄ tām̄ yá̰a̰ rāān kə́ majaĺ tə́ ō.

Kɔjə̄ kə́ tām̄ yā rāā yá̰á̰ kə́ majə tə́

²¹ Yá̰á̰ ń asə kadə̄ a rāā yá̰á̰ ní n toó: Ré de kə́ majaĺ tūr̄ gidən ta yá̰a̰ rāān gə̄ kə́ gōtə́ aĺ gə̄ tə́ kɔ̄ɔ́ malang, ba rāā yá̰a̰ malang ń m-ə́da kadə̄ yā rāā ní ō, ɓōĺ ndū najə̄ gə̄ ō, rāā yá̰á̰ kə́ gōtə́ ō anī, rɔ̄kum ni a ndi kə kumneé banī ni a oy alé.

²² Yá̰a̰ malang kə́ gōtə́ aĺ ń ni-rāā ní, dɔdə́ a ndígə̄nal dɔ tə́ kɔ̄ɔ́ ō, ni a ndi kə kumneé sɔɔ̄ń yá̰á̰ kə́ majə ń ni-rāā ní ō.

²³ Ɔ́jiīń na nelə̄m̄ ka̰a̰ de kə́ majaĺ gə̄ loo koy tə́ a? Mā Kɔ́ɔ̄ɓē Nə́ɓā m-ə́dásí na: Yá̰á̰ ń m̄-ndigə ní, i kadə̄ nin̄ tūrə̄n̄ jī bēl̄ loo rāā yá̰a̰ yādə́ gə̄ ba ndin̄ kə kumdə́.

²⁴ Ba ré de kə́ majə lōō gír rāā yá̰á̰ kə́ gōtə́ tə́ ba rāā yá̰á̰ kə́ majaĺ, tām̄ ni ndájə̄ yá̰a̰ rāā kə́ majaĺ ngá̰ý gə̄ malang yā de kə́ majaĺ gə̄ anī, ɔ́jiīń na a ndi kə kumneé a? I beé alé! Yá̰a̰ malang kə́ majə gə̄ ń ni-rāā ní, dɔdə́ a ndígə̄nal dɔ tə́ kɔ̄ɔ́. Ni a oy sɔɔ̄ń ra kə́ ni-ra dɔ ndūn tə́ aĺ ō, yá̰á̰ kə́ majaĺ kə́ ni-rāā ō.

²⁵ Ɓá tā banī sḭḭ̄ ə́daī na jī bēl̄ loo rāā yá̰a̰ gə̄ yā Kɔ́ɔ̄ɓē na majə alé! Sḭḭ̄ Israel gə̄ ōōī, i jī bēl̄ loo rāā yá̰a̰ yāḿ mā n i kə́ majə aĺ ní a? I jī bēl̄ loo rāā yá̰a̰ yāsí gə̄ n i kə́ majə aĺ ní.

²⁶ Tītə̄ ń toō ré deē kógə̄ḿ kə́ nge rāā yá̰a̰ majə lōō gír rāā yá̰á̰ kə́ gōtə́, ba rāā yá̰a̰ majə aĺ, oy ō anī, oy i tām̄ yá̰á̰ kə́ majaĺ ń ni-rāā tə́ ní.

²⁷ Ba ré de kə́ majə aĺ tūr̄ gidən kɔ̄ɔ́ ta yá̰á̰ kə́ majə aĺ ń ni-rāā tə́ ní ba ɓōĺ ndū najə̄ ō, rāā yá̰á̰ kə́ gōtə́ ō anī, ni a ajə rɔ̄n.

²⁸ Ré kumən reē teē dɔ yá̰a̰ rāān kə́ majaĺ gə̄ tə́ ō, lōō gír rāādə́ tə́ ō anī, ni a ndi kə kumneé, rɔ̄kum, ni a oy alé.

²⁹ Banī sḭḭ̄ Israel gə̄ ə́daī na jī bēl̄ loo rāā yá̰a̰ yā Kɔ́ɔ̄ɓē na majə alé. Ní, i jī bēl̄ loo rāā yá̰a̰ yāḿ mā n i kə́ majə aĺ ní a? I jī bēl̄ loo rāā yá̰a̰ yāsí sḭḭ̄ gə̄ n i kə́ majə aĺ ní!

³⁰ I tām̄ najə̄ ń noō tə́ n mā Kɔ́ɔ̄ɓē Nə́ɓā m-ə́dásí sḭḭ̄ Israel gə̄ najə̄ ń toō ní: M-ā m̄-rāā sarya sesí kógə̄ḿ kógə̄ḿ i kə gō háĺsí. I beé ní, ī-tūrī háĺsí, ī-tūrī gidəsí kɔ̄ɔ́ ta yá̰a̰ rāāsí kə́ gōtə́ aĺ gə̄ tə́. I tītə̄ ń noō n ā ə̄sōīiń kum majaĺ tə́ to̰ aĺ ní.

³¹ Ī-lōōī gíŕ yá̰a̰ rāāsí kə́ majaĺ gə̄ tə́. Ī-tūrī kemsí ō, ndíĺsí ō. Sḭḭ̄ Israel gə̄, ī-gḛyiī koy i najə̄ rí tə́?

³² Mā Kɔ́ɔ̄ɓē Nə́ɓā m-ə́da na m̄-gḛy kadə̄ deē kógə̄ḿ oy alé. Ī-tūrī gidesí kɔ̄ɔ́ ta yá̰á̰ kə́ majaĺ tə́ ba ī-ndiī kə kumsí!