EJEKIEL 17 - Bibəl ta Sar̄

Kə̄rō nin̄ kə kāgə̄ nduú

¹ Kɔ́ɔ̄ɓē ɔr̄ najə̄ seḿ, ədam̄ na:

² Ḭ̄ ngōn̄ deē, ə́ga səngó kógə̄ḿ ādə̄ ngán Israel kə ta kūl̄ kənīdə́ gotə najə̄ kógə̄ḿ.

³ Ā ə́da na mā Kɔ́ɔ̄ɓē Nə́ɓā m-ə̄nīdə́ gotə najə̄ ń toō: I gotə najə̄ yā kə̄rō kə́ bo, kə́ bɔ̄gə̄n laa ō, belə̄n ngāl̄ ō, nder̄ gidə naā tə́ ō, ɓálən gə̄ i ngá̰ý ō. Kə̄rō ní ḭḭ bɔ̄gə̄ aw̄ bátə́ ugə̄ mbal̄ gə̄ kə́ Liban tə́.

⁴ Ni tētə̄ ta tél kāgə̄ sédər kógə̄ḿ. Gān̄g ta jīn kə́ ngāl̄ ngá̰ý dan madə̄ gə̄ tə́ aw̄ń dɔ nang kógə̄ḿ tə́. De kə́ dɔ nang ní tə́ gə̄ i ngé rāā kəla mang yá̰a̰ gātəń kə̄ kété gə̄. Ni-aw̄ udə ta jīn ní kem ɓē kógə̄ḿ kə́ de kə́ tū tə́ gə̄ i ngé rāā gātə̄ gə̄.

⁵ Gō tə́ anī ni un ngōn̄ kāgə̄ kə́ rang kə́ dɔ nang kə́ Israel tə́ ba udə kem loo kógə̄ḿ tə́ kə́ ndɔr̄ kɔ̄ɔ́ tə́. Ni-əhɔn kadə man̄ kə́ ngá̰ý tə́ tītə̄ kāgə̄ kə́ gḛy man̄ ngá̰ý beē.

⁶ Ngōn̄ kāgə̄ ní tɔgə ba tél kāgə̄ nduú kə́ majə ngá̰ý kə́ al nang tə́. Ta jīn gə̄ alən̄ kum kə̄ rɔ̄ kə̄rō ní tə́ ō, tə́la ngəran gə̄ nang tə́ gír bɔ̄gə̄n gə̄ tə́ ō. Kāgə̄ nduú ní tɔ̄ɔ̄ ta jīn kə́ kijə kanjə̄ dəba ta ō.

⁷ Banī kə̄rō kə́ rang kə́ bo reē ugə̄. Bɔ̄gə̄n i kə́ laa ō, belə̄n gə̄ i ngá̰ý ō. Kāgə̄ nduú ní tūr̄ ngəran gə̄ kum kə̄ rɔ̄n tə́ ō, tūr̄ ta jīn gə̄ kum kə̄ rɔ̄n tə́ ō. Ni-əndā kemən dɔ kənge man̄ tə́ kadə̄ tɔȳ kə́ kété kə́ dɔ nang ń əndānən̄ tū tə́ ní tə́.

⁸ Tá əndānən̄ i dɔ nang kə́ majə tə́, kadə bā kə́ man̄ i ngá̰ý tū tə́ tə́. Adə̄ ni asə tɔ̄ɔ̄ ta jīn gə̄ ō, asə kan̄ ō, asə tél kāgə̄ nduú kə́ majə ngá̰ý ō.

⁹ Ba mā Kɔ́ɔ̄ɓē Nə́ɓā m̄-dəje najə̄ m-ə́da na: Kāgə̄ nduú ń toō a asə rāā rɔ̄n a? Kə̄rō kə́ ta kəga dɔ a ró̰ȳ ngəran gə̄ kɔ̄ɔ́ ō, a tə́jā kanə̄n gə̄ kɔ̄ɔ́ ō aláa? Gō tə́ anī ta jīn kə́ kijə gə̄ a tutən̄ kɔ̄ɔ́ aĺ a? Yā kɔr̄nəń kɔ̄ɔ́ dɔ nang tə́ ní, ni a sāā i tɔ́gə́ kə́ ngá̰ý tá aĺ ō, ni a sāā i de kə́ ngá̰ý gə̄ tá aĺ ō.

¹⁰ Əhɔn̄ kāgə̄ nduú ní majə, banī ni asə rāā rɔ̄n alé. Ré néĺ kə́ dūn̄ ɓē tə́ a əla dɔn tə́ anī, ni a tutə malang kɔ̄ɔ́. Ni a tutə kɔ̄ɔ́ dɔ nang ń sɔɔ̄ kadə̄ ni tɔgə tū tə́ ní.

Kum gotə najə̄ ní

¹¹ Kɔ́ɔ̄ɓē ɔr̄ najə̄ seḿ, ədam̄ na:

¹² Kə m̄-dəje ɓūtə̄ ngé dɔ ngan̄g gə̄ ń toō ké gerə̄n̄ kum gotə najə̄ ń toō aĺ wa? Kə m̄-ter̄ kemdə́ dɔ yá̰á̰ ń toō tə́: Mban̄g kə́ Babilon udə kem ɓē kə́ Jerusalem tə́. Ni-əhɔ mban̄g ō, ngār gə̄ ō ba aw̄ sedə́ Babilon.

¹³ Gō tə́ anī gə̄rā deē kógə̄ḿ kə́ gír kojə yā mban̄g tə́, ba ənīn̄ ndūdə́ adə̄n̄ naā seneé ō, ni-adə̄ deē ní túbə ənīń ndūn yā ra dɔ ndūn tə́ seneé ō. Ni-əhɔ de kə́ bo kə́ kem ɓēé gə̄ aw̄ sedə́ kɔ̄ɔ́,

¹⁴ yā kadə̄ ɓē ko̰o̰ ndiń gotə kógə̄ḿ loo kə́ dūú tə́ ba aw̄ń kum kə̄ kété aĺ ō, kadə̄ deē ní ra dɔ ndūdə́ ń ənīn̄ adə̄n̄ naā tə́ ní ō.

¹⁵ Banī mban̄g kə́ kijə ní mbātə́ ta mban̄g kə́ Babilon, adə̄ əla de gə̄ Ejiptə tə́, kadə̄ ɓē kə́ Ejiptə adə̄n sə́nda gə̄ ō, ngé rɔ̄ɔ̄ gə̄ ngá̰ý ō. Deē ń rāā yá̰á̰ ń noō ní a asə a? Deē ń rāā yá̰a̰ beé ní a asə kaw̄ kum kə̄ kété a? A̰ á̰, ni a asə teē kum tə́ alé, tām̄ ni-ra dɔ ndūn ń ənī tə́ ní alé.

¹⁶ Tītə̄ ń m̄-ndiń kə kumḿ rɔ̄kum noó, mā Kɔ́ɔ̄ɓē Nə́ɓā m-ə́da na: Mban̄g kə́ Israel tə́ a oy i dɔ nang yā mban̄g kə́ Babilon nge kəndān dɔ kōr̄ kāgə̄ mbang tə́ tə́. Tām̄ usən dɔ túbə ń ni túbə́ ní tə́ alé, ni-ra dɔ ndūdə́ ń ənīn̄ adə̄n̄ naā ní tə́ alé. Adə̄ mban̄g kə́ Israel tə́ a oy i Babilon.

¹⁷ Mban̄g kə́ Ejiptə tə́ a asə rɔ̄ɔ̄ dɔn tə́ alé, ká ni reēń i kə ngé rɔ̄ɔ̄ kə́ ngá̰ý gə̄ ō, kə ɓūtə̄ de kə́ ngá̰ý gə̄ ō ní. Tɔdɔ̄ dan yā rɔ̄ɔ̄ tə́ anī, de kə́ Babilon gə̄ a əndān̄ ndogə̄ mbal̄ kə́ yā kənīń rɔ̄ɔ̄ ō, a ndērə̄n̄ bəlo gə̄ yā tɔ̄ləń de gə̄ ngá̰ý ō.

¹⁸ Usə mban̄g kə́ Israel tə́ dɔ túbə́ ń ni túbə́ tə́ ní alé, adə̄ ni-ra dɔ ndūdə́ ń ənīn̄ adə̄n̄ naā tə́ ní alé. Dan ń ni ənī ndūn pá tá rāā yá̰a̰ beé ní, ni a teē kum tə́ alé.

¹⁹ Tītə̄ ń m̄-ndiń kə kumḿ rɔ̄kum noó, yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Usə mban̄g kə́ Israel tə́ dɔ túbə́ ń ni túbə ta kumḿ tə́ ní alé. Ni-ra dɔ ndūdə́ ń ənīn̄ naā tə́ ní alé. Adə̄ m-ā m̄-rāā kadə̄ ni a əgā kə̄rān.

²⁰ M-ā m-ə̄yā gūmbə̄ non tə́ ō, m-ā m-ə́hɔn dəngáy ō. M-ā m-āw̄ seneé Babilon, ba m-ā m̄-gān̄g sarya dɔn tə́ nú, tɔdɔ̄ ni-ra dɔ ndūn tə́ seḿ alé.

²¹ A tɔ̄lə̄n̄ ngé rɔ̄ɔ̄ yān gə̄ kə́ gerə̄n̄ rɔ̄ɔ̄ tɔȳ madə̄də́ gə̄ ta rɔ̄ɔ̄ tə́ ō, ngé gə̄ ń teēn̄ ta yo tə́ ní a tə̄ndān̄ naā yā tḭ̄ḭ̄ kə̄ loo gə̄ tə́ ō. Loo ń noō tə́ ā ī-gerī kadə̄ i mā Kɔ́ɔ̄ɓē n m-ɔ̄r̄ najə̄ sesí ní.

Kɔ́ɔ̄ɓē ənī ndūn

²² Najə̄ ń Kɔ́ɔ̄ɓē Nə́ɓā ɔr̄ ní n toō, ni-əda na: Mə̄kɔ́ m-ā m̄-gān̄g ta jī kāgə̄ sedər kógə̄ḿ kə́ dūú ta télən tə́ dɔɔ́, ba m-ā m-ə̄ndān dɔ mbal̄ kógə̄ḿ kə́ ngāl̄ ngá̰ý tə́.

²³ M-ā m-ə̄ndān dɔ mbal̄ kógə̄ḿ kə́ ngāl̄ dɔ nang kə́ Israel tə́. Kāgə̄ ní a tɔ̄ɔ̄ ta jīn gə̄ ō, a an̄ ō, a tél kāgə̄ sedər kə́ majə ngá̰ý ō. Gír yel̄ kə́ tayā tayā gə̄ a rāān̄ ɓēdə́ ta jīn gə̄ tə́ ō, a ɔrə̄n̄ koō ndílən tə́ ō.

²⁴ Loo ń noō tə́ kāgə̄ kə́ kem bembeé gə̄ malang a gerə̄n̄ kadə̄ Kɔ́ɔ̄ɓē i mā. Mā i nge rāā kāgə̄ kə́ ngāl̄ gə̄ tə́lən̄ kə̄ nang tə́ ō, nge rāā kadə̄ kāgə̄ kə́ dūú gə̄ tɔgən̄ ō, nge rāā kadə̄ kāgə̄ kə́ mbōl̄ gə̄ tutən̄ ō, nge rāā kadə̄ kāgə̄ kə́ tutə gə̄ hútə̄n̄ ō. I mā Kɔ́ɔ̄ɓē n m-ɔ̄r̄ najə̄ ō, yá̰á̰ ń m-ə́dá ní m-ā m̄-rāā ō.