EJEKIEL 16 - Bibəl ta Sar̄

Kété ní Jerusalem i ngōn̄ kə́ dəyá̰ kə́ kəya̰n kɔ̄ɔ́

¹ Kɔ́ɔ̄ɓē Nə́ɓā ɔr̄ najə̄ seḿ, ədam̄ na:

² Ḭ̄ ngōn̄ deē, ɔ́jə Jerusalem yá̰á̰ kə́ majaĺ ngá̰ý gə̄ ń ni-rāā ní.

³ Ā ə́dan na: Najə̄ ń mā Kɔ́ɔ̄ɓē Nə́ɓā m-ə́dan ní n toó: Kanaan i dɔ nang yā kaaí gə̄ ō, ojiīn̄ i noó ō. Bɔbí i Amor ō, kó̰ó̰í i Het ō.

⁴ Dan ń ojiīn̄ ní, deē əja kūmīí aĺ ō, ndogīīn̄ kə maná adə̄ ūnjə̄ aĺ ō, usən̄ rɔ̄í kə katāá aĺ ō, ɓir̄nī kə kūbūú aĺ ō.

⁵ De kə́ a̰a̰ kum tō ndoō yāí yā rāā yá̰a̰ gə̄ ń noō tām̄ yāí tə́ gətóo ō, de kə́ kumən o̰o̰n tām̄ yāí tə́ gətóo ō. Banī ndɔ̄ ń ojiīn̄ ní, ənīīn̄ i dɔ nang tə́, tām̄ nel̄ de gə̄ seí alé.

⁶ m̄-mān̄ kadií tə́ anī, m-á̰a̰ kadə̄ ī-to i kum mósə́ tə́, banī m-ə́daī, dan ń ī-to kum mósə́ tə́ ɓáý ní, kə ī-ndi kə kumií.

⁷ m̄-rāāī adə̄ ī-tɔgə tītə̄ mu kə́ kem ndɔr̄ gə̄ tə́. Ḭ̄ ə́la gír tɔgə ō, ī-ngāl̄ ō, ī-majə ngá̰ý ō. Ə́ɓa mbā ō, ə́ɓa bḭḭ̄ ō. Banī kūbə̄ gətóo rɔ̄í tə́, rɔ̄í i karī.

⁸ m̄-tél m̄-mān̄ kadií tə́ ɓáý to̰, anī m-á̰a̰ kadə̄ ásə dəyá̰ kɔ̄ɔ́. Loo ń noō tə́ ní m-ə̄nī kūbə̄ yāḿ dɔí tə́ m-utəń gidə rɔ̄í, tām̄ rɔ̄í i karī. m̄-túbə̄ m-ɔ́jəń kadə̄ m-ā m̄-ra dɔ ndūḿ kə́ m-ə̄nī m-ādī tə́ ō, m-ə́hɔ madə̄ naā seí ō. Loo ń noō tə́ ní ḭ̄ i yāḿ, adə̄ mā Kɔ́ɔ̄ɓē Nə́ɓā m-ə́da nge ń noō kə̄ ndágá.

⁹ M-ún man̄ m̄-tə́goń mósə́ kə́ rɔ̄í tə́ kɔ̄ɔ́ ō, m-ún yibə̄ kə́ otə majə m̄-ndumiīń ō.

¹⁰ M-ādī kūbə̄ kə́ kɔsə desḛ̄ḛ tū tə́ ō, sākə̄rāá ndāŕ kə́ majə ngá̰ý ō, kəlā lḛ́ḛ kə́ yā kadə̄ ə́hɔń ɓōdīí ō, kūbə̄ səwāa ō.

¹¹ m̄-tə́la yá̰a̰ ta mbī gə̄ mbīí tə́ ō, m̄-tə́la nə̄ngá gə̄ jīí tə́ ō, m-ə̄nī məde kɔ́ɔ́í tə́ ō.

¹² M-ə́la nə̄ngá kóní tə́ ō, m̄-tə́la yá̰a̰ ta mbī gə̄ mbīí tə́ ō, m-ə́la yá̰á̰ súū rɔ̄ kə́ majə ngá̰ý jākā tə́ dɔí tə́ ō.

¹³ Yá̰á̰ súū rɔ̄ yāí gə̄ i kə́ rāān̄də́ kə lɔ́rɔ́ ō, kə gində̄ arjā̰a̰á̰ ō, kūbə̄ yāí gə̄ i kə́ rāān̄də́ kə lḛ́ḛ́ ō, səwāa ō, ɔsən̄ desḛ̄ḛ tū tə́ ō. Yá̰a̰ kəsa yāí i ndujə̄ kə́ majə ngá̰ý ō, i yibə̄ tejə ō, i yibə̄ kan̄ kāgə̄ olibə ō. I beé n ī-mandəń ngá̰ý al̄ naā ní. Adə̄ gə̄rāīn̄ kadə̄ ḭ̄ i mban̄g kə́ dəyá̰.

¹⁴ Rī ɓār̄ yāí taā loo malang dan nápar de gə̄ tə́ sɔɔ̄ń majə kə́ ī-majə ɔ̄tə̄ kə taá. Tām̄ yá̰á̰ súū rɔ̄ ń m̄-súuń rɔ̄í ní, i yá̰á̰ súū rɔ̄ kə́ gātə̄n i sḛ́ý beē tə́ aĺ bátə́. I mā Kɔ́ɔ̄ɓē Nə́ɓā n m-ə́da najə̄ ń noō ní.

Jerusalem rāā ájə́ba

¹⁵ Banī ḭ̄ ə̄ndā kemií dɔ majií tə́ ō, ī-rāā ájə́ba tām̄ rīí kə́ ɓār̄ ngá̰ý tə́ ō. De kə́ dəngam gə̄ malang ń a mānə̄n̄ róbó noō ḭ̄ ī-ɓīī sedə́. Ḭ̄ ī-tél i yá̰a̰ yādə́.

¹⁶ Kūbə̄ yāí kə́rēý gə̄ kə́ majə ngá̰ý gə̄ ō, kə́ rāān̄ ɓáĺ yá̰a̰ gə̄ tū tə́ ō n ḭ̄ ɔ́ýdə́ ī-súuń loo ndɔ̄ȳ gə̄ ní ō, ī-rāā ájə́ba dɔ tə́ ō ní. Ba nge ń noō i yá̰á̰ kə́ majə kadə̄ rāā yá̰a̰ alé.

¹⁷ Yá̰á̰ súū rɔ̄ gə̄ kə́ rāān̄də́ kə lɔ́rɔ́ ō, kə gində̄ arjā̰a̰á̰ ō ń m-ādī ní, ḭ̄ ɔ́ýdə́ ī-rāādə́ ɓesə̄ kə́ dəngam gə̄ tə́, ba gōtə́ anī, ī-rāā ájə́ba sedə́.

¹⁸ Ḭ̄ ūtə̄ gidədə́ kə kūbə̄ yāí kə́ kɔsə desḛ̄ḛ tū tə́ gə̄ ō, yibə̄ gə̄ kə kajaja gə̄ ń m-ādī ní, ḭ̄ āwń ī-ndējə̄də́ ō.

¹⁹ Yá̰a̰ kəsa ń m-ādī ní, ḭ̄ ɔ́y malang ī-ndējə̄də́ yā kadə̄ nelən̄də́ seí, adə̄ i ndujə̄ kə́ lándə̄ ō, yibə̄ ō, yibə̄ tejə ō. Yá̰á̰ ń rāā yá̰á̰ ní n noó. Adə̄ mā Kɔ́ɔ̄ɓē Nə́ɓā m-ə́da na i rɔ̄kum.

²⁰ Ngání kə́ dəngam gə̄ ō, kə́ dəyá̰ gə̄ ō ń ójə ādə̄m̄ ní, ḭ̄ ī-tɔ̄l̄də́ ba ī-tun̄ ādə̄ nə́ɓā kə́ rɔ̄kum aĺ gə̄ ngeé ń noō kadə̄ i yá̰a̰ kəsa yādə́ tə́. Ájə́ba ń ī-rāā asiī aĺ i mbéé ɓáý a?

²¹ Ḭ̄ ī-tɔ̄l̄ ngánə́ḿ gə̄ ba ī-róōdə́ horoó ādə̄ nə́ɓā yāí kə́ rɔ̄kum aĺ gə̄!

²² Dan ń ā ī-rāań yá̰a̰ malang kə́ majaĺ ngá̰ý gə̄ ń noō tə́ ní ō, ā ī-rāań ájə́ba tə́ ō ní, əga kemií dɔ ndɔ̄ gə̄ ń ḭ̄ i ngōn̄ dūú tə́ ní alé. Dɔí ndígə̄nal dɔ ndɔ̄ gə̄ ń rɔ̄í i karī tə́ ní ō, dɔ ndɔ̄ gə̄ ń ī-toń kum mosí tə́ ní ō.

²³ Yá̰á̰ kə́ majaĺ gə̄ malang ń ī-rāā ní, yá̰a̰ gə̄ ń noō a reēn̄ kə yá̰á̰ kə́ to kum kaȳ aĺ dɔí tə́! I mā Kɔ́ɔ̄ɓē Nə́ɓā n m-ə́da najə̄ ń noō ní.

²⁴ Ɓá tā ba ī-na̰y kə̄ loo rāā ngán loo kə́ kḭḭ kə̄ dɔɔ́ gə̄ tə́, ī-na̰y kə̄ loo rāā loo kə́ kḭḭ kə̄ dɔɔ́ gə̄ tə́ malang tām̄ yāí tə́.

²⁵ Ḭ̄ rāā loo kə́ kḭḭ kə̄ dɔɔ́ tām̄ yāí tə́ kə̄ ta gajə róbə gə̄ tə́ malang. Ḭ̄ ún majə yā rɔ̄í ī-rāāń yá̰á̰ kə́ majaĺ ngá̰ý gə̄ loo ngeé gə̄ ń noō tə́. Ngé mān̄ róbə gə̄ malang ń noō ḭ̄ ādə̄də́ rɔ̄í ō, ḭ̄ ā ī-rāā ájə́ba kum kə̄ kété kété ō.

²⁶ Ḭ̄ ī-rāā ájə́ba kə de kə́ Ejiptə tə́ gə̄ ń i madə̄ ɓēí gə̄ kə́ rɔ̄də́ majə ngá̰ý ní ō, ī-rāā ájə́ba ní al̄ naā adə̄məń wōn̄g ngá̰ý ō.

²⁷ Loo ń noō tə́ m-ɔ́jə́ tɔ́gə́ḿ dɔí tə́. M-ɔ̄gī yá̰a̰ kəsa ō, m-ə́laī kem jī madə̄ ba̰ā̰í gə̄ ń i ɓē gə̄ yā Pilistin gə̄ ní tə́ ō. Tɔdɔ̄ rɔ̄də́ sɔl̄də́ najə̄ hálí kə́ majaĺ ngá̰ý tə́.

²⁸ Ájə́ba ń ī-rāā kété ní tɔ̄l̄ ɓōí alé, adə̄ ī-rāā ájə́ba kə de kə́ Asiri gə̄ ɓáý. Nge ń noō gə̄gē ní asiī aĺ ɓáý.

²⁹ Ḭ̄ ī-na̰y kə̄ loo rāā ájə́ba tə́ kem ɓē yā ngé rāā gātə̄ gə̄ tə́, adə̄ i kem ɓē yā Babilon gə̄ tə́, kanjə̄ kadə̄ tɔ̄l̄ ɓōí.

³⁰ Á, tɔ́gí gətóó ngá̰ý al̄ naā! Najə̄ ń mā Kɔ́ɔ̄ɓē Nə́ɓā m-ə́dá ní n noó. Dan ń ī-rāā yá̰a̰ gə̄ ń noō malang ní, ī-rāā i yá̰a̰ rāā ájə́ba kɔ̄r̄ kə́ tɔȳ ájə́ba madə̄n gə̄.

³¹ Ḭ̄ ī-rāā loo kə́ kḭḭ kə̄ dɔɔ́ ta gajə róbə gə̄ tə́ malang tām̄ yāí tə́ ō, ḭ̄ ī-rāā loo kə́ kadə̄ kum de gə̄ malang i dɔ tə́ ndágə loo gə̄ tə́ tām̄ yāí tə́ ō. Banī ḭ̄ n ī-ndējə̄ nar gírí tītə̄ ń gotə ájə́ba kə́ rang gə̄ a rāānəń ní alé.

³² Banī ḭ̄ ī-to i tītə̄ dəyá̰ kə́ nge rāā rāȳ kə́ gḛy i dəngam kə́ rang gə̄ banī gḛy ngaan alé beē.

³³ Ájə́ba gə̄ malang a əngen̄ nar gíŕdə́ banī i ḭ̄ n ə̄ndā nja ngé sāāí gə̄ malang. Ḭ̄ ādə̄də́ nar kadə̄ nin̄ teēnəń kə̄ ta loo gə̄ tə́ reē ɓīīnəń seí.

³⁴ Dan ń ī-rāā ájə́ba kə́ tītə̄ ń noō ní, ájə́ba yāí i ájə́ba kə́ dáńg ba i kə́ tītə̄ yā dəyá̰ madí gə̄ alé. Deē ndəleī aĺ ō, deē əgāī aĺ ō, banī i ḭ̄ n i nge kəgā de gə̄. Adə̄ yá̰á̰ ń kadə̄ ī-rāā ní ɓáa ḭ̄ ī-rāā i yá̰á̰ kə́ rang.

³⁵ I beé ní, ḭ̄ Jerusalem ń i dəyá̰ ájə́ba ní, ōō najə̄ yā Kɔ́ɔ̄ɓē.

³⁶ Yá̰á̰ ń mā Kɔ́ɔ̄ɓē Nə́ɓā m-āwń yā kədaī ní n toó: Ḭ̄ ɔ̄r̄ yá̰a̰ rɔ̄í tə́ adə̄ gírí i karī ō, ī-rāā adə̄ de gə̄ a̰a̰n̄ gotə rɔ̄í gə̄ malang ō, dan ń ā ī-rāań ájə́ba kə ngé sāāí gēé ní ō, dan ń ā ī-rāań ájə́ba kə ɓesə̄ yāí kə́ majən̄ aĺ ngá̰ý gə̄ ní ō. Ḭ̄ āw̄ bátə́ ī-ɓōkə́ mósə́ ngání gə̄ nang tə́ ī-ndə̄jə̄ ɓesə̄ yāí gə̄ ní.

³⁷ Tām̄ najə̄ ń toō tə́ ní, ngé sāāí gə̄ malang ń nel̄də́ seí adə̄ i ngé gə̄ ń nelī sedə́ ō, ngé gə̄ ń nelī sedə́ aĺ ō ní, m-ā m-ɔ́sə dɔdə́ naā tə́ malang. M-ā m-ɔ́ýdə́ kə̄ loo gə̄ tə́ malang yā reē sedə́, ba m-ā m-ɔ̄r̄ kūbə̄ rɔ̄í tə́ ta kumdə́ tə́, kadə̄ nin̄ a a̰a̰n̄ rɔ̄í kə́ karī.

³⁸ Jerusalem, m-ā m̄-gān̄g sarya dɔí tə́ tītə̄ ń a gāngə̄n̄neé sarya dɔ dəyá̰ kə́ ngé rāȳ gə̄ tə́ ní ō, dɔ dəyá̰ kə́ ngé tɔ̄l̄ de gə̄ tə́ ní ō. M-ā m̄-rāāī kadə̄ mósə a taā gidə rɔ̄í malang sɔɔ̄ ń wōn̄g kə́ rāām̄ ō, jang kə́ ɔsə seḿ ō.

³⁹ M-ā m-ə́laī kem jī ngé sāāí gə̄ tə́. Nin̄ a nujən̄ loo yāí kə́ kḭḭ kə̄ dɔɔ́ gə̄ ń ī-rāā adə̄ majə ní kɔ̄ɔ́ malang. Nin̄ a ɔyn̄ kūbə̄ yāí gə̄ kɔ̄ɔ́ ō, a ɔyn̄ yá̰á̰ súū rɔ̄ yāí kə́ majə gə̄ kɔ̄ɔ́ ō, ba a əya̰īn̄ kɔ̄ɔ́ kadə̄ ā ī-ndi rɔ̄í karī.

⁴⁰ Gō tə́ anī nin̄ a sə̄lān̄ kósə de gə̄ dɔí tə́ ō, a tə́nīīn̄ kə mbalá yā tə́nī tɔ̄lī ō, a tə́gāīn̄ kə kaskaraá yā tə́gā gángī naā tə́ ō,

⁴¹ a tə́lan̄ hor dɔ kújə yāí gə̄ tə́ ō. Sarya ń i kə́ gān̄g dɔí tə́ ní, nin̄ a unən̄ yā rāań yá̰a̰ seí i tītə̄ ń noō ta kum kósə dəyá̰ madí kə́ ngá̰ý gə̄ tə́. M-ā m̄-gān̄g ta ndɔ̄ ájə́ba yāí kɔ̄ɔ́ ō, ā ásə kəgā ngé sāāí gə̄ to̰ aĺ ō.

⁴² M-ā m̄-bə̄gā wōn̄g yāḿ kə́ ngá̰ý dɔí tə́ bátə́ ta tɔ̄l̄ ta tə́. Ba dan ń kum rāā jang yāḿ a gətóo anī, m-ā m̄-tél yā ndi jəke gogə́, wōn̄g a rāām̄ to̰ alé.

⁴³ Əga kemií dɔ yá̰á̰ ń m̄-rāā tām̄ yāí tə́ dan ń ī-na̰yń ngōn̄ ɓáý tə́ ní alé. Adə̄ ī-rāā adə̄ wōn̄g rāām̄ sɔɔ̄ń yá̰a̰ rāāí gə̄. Ń toō ɓáa ta i yāḿ kadə̄ m̄-rāāī kadə̄ ə̄gā kə̄rā yá̰a̰ rāāí gə̄. I mā Kɔ́ɔ̄ɓē Nə́ɓā n m-ə́da najə̄ ń noō ní. Tām̄ hálí ń ī-rāā ní to rɔ̄sɔl̄ ngá̰ý, tá ī-ra dɔ tə́ noō ī-rāā yá̰á̰ kə́ majaĺ ngá̰ý gə̄ ādə̄ nə́ɓā kə́ rɔ̄kum aĺ gə̄.

Jerusalem majaĺ ngá̰ý tɔȳ gotə ɓē kə́ rang gə̄

⁴⁴ Kɔ́ɔ̄ɓē əda ɓáý to̰ na: Jerusalem, ngé rāā mēlē tām̄ gə̄ a rāān̄ mēlē tām̄ ń toō seí, nin̄ a ədan̄ na: Kó̰o̰ ngōn̄ nin̄ kə ngōnən kə́ dəyá̰ ton̄ i tītə̄ naā.

⁴⁵ Tɔdɔ̄ ḭ̄ i ngōn̄ yā kó̰ó̰í rɔ̄kum. Kó̰ó̰í i dəyá̰ kə́ nelə̄n kə ngaaneé aĺ ngá̰ý ō, nelə̄n kə ngánən gēé aĺ ngá̰ý ō. Ḭ̄ ī-to i tītə̄ ngákó̰ó̰í kə́ dəyá̰ gə̄ ń nel̄də́ kə ngaadə́ gēé aĺ ō, kə ngáńdə́ gēé aĺ ō ngá̰ý ní. Kó̰ó̰sí i Het banī bɔbə̄sí i Amor.

⁴⁶ Rī ngōkó̰ó̰í kə́ dəyá̰ kə́ nga tɔ́gə na i Samari. Ni-ndi i dām̄ mbɔ́r ɓē kə́ ko̰ó̰ naā tə́ kə ngán ɓē kə́ dūú gēé kadən tə́. Ngōkó̰ó̰í kə́ dəyá̰ ń teē gidií tə́ ní rīn na i Sodom. Ni-ndi i dām̄ mbɔ́r ɓē kə́ geleé tə́, naā tə́ kə ngán ɓē kə́ dūú gēé kadən tə́.

⁴⁷ Ḭ̄ ī-ndájə̄ i háĺdə́ ngóy aĺ ō, ī-rāā i yá̰á̰ kə́ majaĺ ngá̰ý gə̄ ń nin̄ rāān̄ ní ngóy aĺ ō. Ngé gə̄ ń noō i yá̰á̰ kə́ sḛ́ý beē gə̄! Hálí majaĺ ngá̰ý tɔȳ yā gotə ɓē kə́ rang gə̄.

⁴⁸ Tītə̄ ń mā Kɔ́ɔ̄ɓē Nə́ɓā m̄-ndiń kə kumḿ rɔ̄kum noó, Jerusalem, yá̰á̰ ń m-ə́daī ní n toó: Sodom ń i ngōkó̰ó̰í kə́ dəyá̰ ní ō, ngán ɓē kə́ dūú gə̄ kə́ kadən tə́ ō ní, yá̰á̰ kə́ majaĺ ń nin̄ rāān̄ ní asə kə yāí aĺ ō, asə kə yā ngán ɓē kə́ dūú gə̄ kə́ kadií tə́ aĺ ō.

⁴⁹ Yá̰á̰ kə́ gōtə́ aĺ gə̄ ń Sodom nin̄ kə ɓē kə́ kadən tə́ gə̄ rāān̄ ní n toó: Nin̄ ɔjən̄ rɔ̄də́ ō, əsan̄ yá̰a̰ adə̄ al̄ kemdə́ ō, usədə́ yá̰a̰ aĺ ō, rāān̄ kə ngé ndoō gēé aĺ ō, kə ngé rɔ̄ tō ndoō gēé aĺ ō.

⁵⁰ Nin̄ télən̄ de kə́ ngé kídə̄ loo gə̄ ō, rāān̄ yá̰á̰ kə́ majaĺ gə̄ kə́ m-ásə́ tə́gā taḿ dɔ tə́ aĺ ō. Loo ń noō tə́ m̄-rāā adə̄ nin̄ gətóon̄ kɔ̄ɔ́ dɔ nang tə́, tītə̄ ń ī-gerə̄ń ní.

⁵¹ Yā Samari tā anī, majaĺ ń ḭ̄ ī-rāā ní, núsən gə̄gē ni-rāā alé. Ḭ̄ Jerusalem ī-rāā yá̰á̰ kə́ majaĺ ngá̰ý gə̄ tɔȳn. Sodom ō Samari ō ń nin̄ i ngákó̰ó̰í kə́ dəyá̰ gə̄ ní, ré deē əndādə́ kadií tə́ anī, ton̄ tītə̄ kə́ nin̄ rāān̄ yá̰á̰ kógə̄ḿ kə́ majaĺ aĺ beē.

⁵² I beé ɓá ní, ta i dɔí tə́ ngɔlaā kadə̄ ə́la dɔí gír rɔ̄sɔl̄ tə́ sɔɔ̄ń yá̰a̰ rāāí kə́ gōtə́ aĺ gə̄: A̰á̰ā̰, ḭ̄ ī-rāā yá̰á̰ kə́ majaĺ ngá̰ý al̄ naā tɔȳ yā ngákó̰ó̰í kə́ dəyá̰ gə̄. I beé n nin̄ tonə̄ń tītə̄ de kə́ gōtə́ tɔyī gə̄ ní. Adə̄ ta i dɔí tə́ kadə̄ rɔ̄í sɔlī ō, hɔ̄r̄mɔ̄í gətóo ō.

⁵³ M-ā m̄-tél yā rāā ɓē gə̄ ní gogə́ rang: M-ā m̄-rāā ɓē kə́ Sodom ō, ngán ɓē kə́ kadə tə́ gə̄ ō kadə̄ tél majən̄ gogə́ rang. Gō tə́ anī m-ā m̄-tél yā rāāī ḭ̄ Samari kadə̄ ī-tél ī-majə gogə́ rang ō.

⁵⁴ Adə̄ hɔ̄r̄mɔ̄í a gətóo ō, rɔ̄í a sɔlī tām̄ yá̰a̰ malang ń ī-rāā tə́ ní ō. Nge ń noō a sɔl̄ kem ngákó̰ó̰í kə́ dəyá̰ gə̄ ń i ɓē gə̄ ń noō ní.

⁵⁵ Sodom ō, Samari ō, ngán ɓē gə̄ kə́ kadədə́ gə̄ tə́ ō, a télən̄ yā majə gogə́. Yāí ḭ̄ Jerusalem ō, yā ngán ɓē gə̄ kə́ kadií gə̄ tə́ ō, a tél yā to i tītə̄ ń noō ō.

⁵⁶ Dan ń ā ɔ́jəń rɔ̄í tə́ ní, ḭ̄ ɔ̄r̄ najə̄ yā Sodom majə alé.

⁵⁷ I kété pá tá kadə̄ teēn̄ dɔ kem ndul yāí tə́ ɓáý. Ń toō ɓáa ta i dɔí tə́ kadə̄ kadə̄ ɓē gə̄ kə́ Sodom ō, ngán ɓē gə̄ kə́ kadədə́ gə̄ tə́ ō, naā tə́ kə ɓē gə̄ yā Pilistin gə̄ ō tájīīn̄ tā. Tām̄ nin̄ kídīn̄ i kə̄ ta gə̄ tə́.

⁵⁸ I tītə̄ ń noō n ə́lań dɔí gír kɔȳ yá̰a̰ rāāí kə́ to rɔ̄sɔl̄ gə̄ tə́ ō, yá̰a̰ rāāí kə́ majaĺ ngá̰ý gə̄ tə́ ō ní. Najə̄ ń mā Kɔ́ɔ̄ɓē m-ə́dá ní n noó.

⁵⁹ Najə̄ ń mā Kɔ́ɔ̄ɓē Nə́ɓā m-ə́dá ní n toó: Usiī dɔ míndí ń ə̄nī tə́ ní alé, adə̄ ī-mbātə́ madə̄ naā ń j-əhɔ ní kɔ̄ɔ́. I beé ɓá ní, m-ā m̄-rāāī yá̰á̰ ń ḭ̄ ī-ndetə kadə̄ m̄-rāā seí ní.

⁶⁰ Ba mā tā a m-ā m̄-ra dɔ madə̄ naā ń m-ə́hɔ seí dan mandií tə́ ní ō, m-ā m̄-tūr̄ madə̄ naā kə́ a to ngándáńg.

⁶¹ Dan ń ā ī-tél ā ə́ngé ngákó̰ó̰í kə́ dəyá̰ kə́ ngátɔ́gí gə̄ ō, gidií kə́ dəyá̰ gə̄ ō gogə́ anī, ā ī-gír̄ dɔ hálí tə́ ō, rɔ̄í a sɔlī najə̄n tə́ ō. M-ā m-ə́la dɔdə́ gíŕ tɔ́gə yāí tə́, tītə̄ kə́ nin̄ i ngání kə́ dəyá̰ gə̄ beé. Nge ń noō ndetə madə̄ naā ń m-ə́hɔ seí ní alé ɓá tā, ba m-ā m̄-rāā nge ń noō.

⁶² Jerusalem, m-ā m-ə́hɔ madə̄ naā seí. Loo ń noō tə́ ā ī-ger̄ kadə̄ Kɔ́ɔ̄ɓē i mā.

⁶³ Loo ń noō tə́ a əga kemií dɔ yá̰á̰ kə́ mān̄ kɔ̄ɔ́ tə́ ō, rɔ̄í a sɔlī najə̄n tə́ ō, ā ī-teē taí yā kɔrə̄ń najə̄ to̰ aĺ ō. Banī mā m-ā m̄-mā̰ȳ rɔ̄ḿ dɔ yá̰a̰ malang ń ī-rāā tə́ ní. Najə̄ ń Kɔ́ɔ̄ɓē Nə́ɓā əda ní n noó.