EJEKIEL 15 - Bibəl ta Sar̄

Kāgə̄ nduú kə́ kəya̰n kadə̄ hor o̰o̰n

¹ Kɔ́ɔ̄ɓē Nə́ɓā ɔr̄ najə̄ seḿ, əda na:

² Ḭ̄ ngōn̄ deē, kāgə̄ nduú majə tɔȳ gotə kāgə̄ kə́ rang gə̄ a? Ta jīn gə̄ majən̄ tɔȳ ta jī kāgə̄ kə́ rang gə̄ kə́ kem ku loo tə́ a?

³ Deē a un kāgə̄ nduú yā tɔ́l rāā yá̰á̰ kógə̄ḿ tə́ a? Deē asə kun yā rāań yá̰á̰ kə́ yā naā yá̰a̰ rāā kəla tū tə́ tə́ a?

⁴ I beé alé, deē a rāań i hor ngóy. Loo ń ré hor o̰o̰ dām̄ tan kə́ jōó gə̄ ō, hor əhɔ danən ō anī, deē a rāań yá̰á̰ kógə̄ḿ ɓáý a?

⁵ Dan ń ni toń kə taá ɓáý ní, deē ger̄ yá̰á̰ kə́ yā rāań alé. Anī dan ń hor əhɔn malang kɔ̄ɔ́ ní, deē a rāań i rí ɓáý?

⁶ I beé ní, yá̰á̰ ń mā Kɔ́ɔ̄ɓē Nə́ɓā m-ə́dá ní n toó: I kāgə̄ nduú n gḛyn̄ kənī horoó ní banī i kāgə̄ kə́ rang alé. Adə̄ de kə́ Jerusalem gə̄ ní, m-ā m-ə́la hor dɔdə́ tə́.

⁷ M-ā m̄-rāādə́ yá̰á̰ kə́ tōr̄. Nin̄ ɔjənə̄ń na n-teēn̄ kum hor tə́ kɔ̄ɔ́, banī hor a o̰o̰də́. Ba ré m-ā m̄-rāādə́ yá̰á̰ kə́ tōr̄ anī, ā ī-gerī kadə̄ Kɔ́ɔ̄ɓē i mā.

⁸ M-ā m̄-rāā ɓē yādə́ kadə̄ tél dəla loo tām̄ ndūdə́ ń ənīn̄ adə̄mə̄n̄ ní ran̄ dɔ tə́ alé. Najə̄ ń Kɔ́ɔ̄ɓē Nə́ɓā əda ní n noó.