EJEKIEL 14 - Bibəl ta Sar̄

Majə kadə̄ ngán Israel gə̄ əya̰n̄ nə́ɓā yādə́ kə́ rɔ̄kum aĺ kɔ̄ɔ́

¹ Ndɔ̄ kógə̄ḿ tə́ kum kɔɔ̄ kə́rēý gə̄ kə́ Israel tə́ reēn̄ rɔ̄ḿ tə́, ba ndin̄ nang tə́ noḿ tə́.

² Anī Kɔ́ɔ̄ɓē ɔr̄ najə̄ seḿ, ədam̄ na:

³ Ḭ̄ ngōn̄ deē, ōō! De gə̄ ń noō aw̄n̄ kə nə́ɓā yādə́ kə́ rɔ̄kum aĺ gə̄ ngarā̰ kemdə́ tə́ noō. Kemdə́ gḛy yá̰á̰ ń na rāādə́ adə̄ a tə́sōn̄ kum majaĺ tə́ ní ngá̰ý. Ní kə m-ə́ya̰ rɔ̄ḿ kadə̄ kə dəjemə̄n̄ najə̄ a?

⁴ I beé ní, ə́dádə́ yá̰á̰ ń mā Kɔ́ɔ̄ɓē Nə́ɓā m-ə́dádə́ ní: Tītə̄ ń toō ré deē kógə̄ḿ kə́ Israel tə́ əhɔ gō ɓesə̄ yān gə̄ ō, gḛy yá̰á̰ ń a rāān adə̄ a tə́sō kum majaĺ tə́ ní ngá̰ý ō, ba reē koō najə̄ kə́ ta nge koō ta kógə̄ḿ tə́ anī, i mā Kɔ́ɔ̄ɓē n m-ā tūrə̄n najə̄ tə́ ní. Ba m-ā m̄-rā i dɔ ɓesə̄ yān kə́ ngá̰ý gə̄ ń ni a rɔȳdə́ tə́ ní yā tūrəń najə̄ kədan.

⁵ I tītə̄ ń noō n najə̄ yāḿ a əsōń kem ngán Israel gə̄ ń əya̰mə̄n̄ kɔ̄ɔ́ ba aw̄n̄ sa̰y najə̄ yā nə́ɓā yādə́ kə́ rɔ̄kum aĺ gə̄ tə́ ní.

⁶ Adə̄ ə́dá ngán Israel na: Kɔ́ɔ̄ɓē Nə́ɓā dəjesí kadə̄ ī-tūrī háĺsí ba ə́ya̰ī ɓesə̄ yāsí gə̄ kɔ̄ɔ́ ō, ī-tūrī gidəsí kɔ̄ɔ́ ta yá̰a̰ rāāsí kə́ majaĺ ngá̰ý gə̄ tə́ ō.

⁷ Yá̰á̰ kə́ rang ń a asə kə́ yā rāā yá̰á̰ ɓáý to̰ ní n toó: Ré ngōn̄ Israel kógə̄ḿ, aláa tə̄rā kógə̄ḿ kə́ ndi dɔ nang kə́ Israel tə́, əya̰m̄ kɔ̄ɔ́ ba aw̄ sa̰y. Ni-əhɔ gō ɓesə̄ yān gə̄ ō, gḛy yá̰á̰ ń a rāān adə̄ a tə́sō kum majaĺ tə́ ní ngá̰ý ō, ba reē koō najə̄ kə́ ta nge koō ta tə́ yā gerə̄ń ń yá̰á̰ ń m̄-ndigə ní anī, i mə̄kɔ́ Kɔ́ɔ̄ɓē n m-ā m̄-tūr̄ najə̄ yā kədan ní.

⁸ M-ā m̄-rāā yá̰á̰ kógə̄ḿ kə́ majaĺ kə deē ngeé ń noō. Yá̰á̰ ń m-ā m̄-rāā seneé ní a tél i kāgə̄ najə̄. M-ā m-ɔ̄rən kə̄ gogə́ kɔ̄ɔ́ dan gír deē yāḿ gə̄ tə́. Loo ń noō tə́ ā ī-gerī kadə̄ Kɔ́ɔ̄ɓē i mā.

⁹ Yá̰á̰ kə́ rang ń asə rāā yá̰á̰ ɓáý to̰ ní n toó: Ré nge koō ta kógə̄ḿ ndúm̄, adə̄ i nəkɔ́ n tūr̄ najə̄ əda anī, kumən na i mə̄kɔ́ Kɔ́ɔ̄ɓē n m-ə́ya̰n adə̄ rāā yá̰á̰ ń noō ní. Ɓá tā ba m-ā m-ɔ́jə́ tɔ́gə́ḿ dɔn tə́ ō, m-ā m-ɔ̄rən kə̄ gogə́ kɔ̄ɔ́ dan Israel gə̄ ń i gír deē yāḿ gə̄ ní tə́ ō.

¹⁰ Nge koō ta ń noō ō, nge dəjen najə̄ ń noō ō ní, yá̰á̰ kə́ gōtə́ aĺ kə́ kógə̄ḿ beē nəkɔ́ ń toō ní, najə̄n i dɔdə́ tə́ mbak.

¹¹ I beé n ngán Israel gə̄ a əya̰mə̄n̄neé kɔ̄ɔ́ yā kaw̄ sa̰y yā kaw̄ tḭ̄ḭ̄ń ta rɔ̄də́ kɔ̄ɔ́ aĺ ní. Nin̄ a télən̄ de kə́ yḛr gə̄ sɔɔ̄ń yá̰a̰ rāādə́ kə́ gōtə́ aĺ gə̄ kə́ i ngá̰ý tə́ to̰ alé. Banī nin̄ a télən̄ gír deē yāḿ gə̄ ō, mā m-ā m̄-téĺ Nə́ɓā yādə́ ō. Najə̄ ń mā Kɔ́ɔ̄ɓē Nə́ɓā m-āwń yā kəda ní n noó.

Yá̰á̰ kə́ a ɔgə̄ Nə́ɓā gān̄g sarya gətóo

¹² Kɔ́ɔ̄ɓē ɔr̄ najə̄ seḿ, ədam̄ na:

¹³ Ḭ̄ ngōn̄ deē, ōō! Majanī deē kógə̄ḿ gə̄ kə́ kem ɓē kógə̄ḿ tə́ rāān̄ yá̰á̰ kə́ gōtə́ aĺ seḿ, adə̄ najə̄ i dɔdə́ tə́, tɔdɔ̄ nin̄ ran̄ dɔ míndə́də́ tə́ alé. Loo ń noō tə́ m-ā m-ɔ́jə́ tɔ́gə́ḿ dɔdə́ tə́. Yá̰a̰ kəsa yādə́ ń ngɔ̄mə̄n̄ ní m-ā m̄-nujəń kɔ̄ɔ́ ō, m-ā m-ə̄nī ɓō dɔdə́ tə́ ō. I tītə̄ ń noō n m-ā m̄-rāań kadə̄ de gə̄ gə̄gē dā̰ gə̄ gə̄gē gətóon̄neé kɔ̄ɔ́ kem ɓēé ní.

¹⁴ Ká ré de kə́ mətá kə́ tītə̄ Noe ō, Danel ō, Job ō, nin̄ i dan de gə̄ kə́ kem ɓē ń toō tə́ gə̄ tə́ anī, ra dɔ ndū tə́ yādə́ a ajə i rɔ̄də́ nin̄ kɔ́ gə̄ ngóy. I mā Kɔ́ɔ̄ɓē Nə́ɓā n m-ə́da najə̄ ń noō ní.

¹⁵ Aĺ ɓáa m-ə́ya̰ dā̰ kə́ do̰ gə̄ dɔɔ́ kadə̄ rɔ̄ɔ̄n̄ de kə́ kem ɓēé ń toō tə́ gə̄. Nin̄ a tɔ̄lə̄n̄ de kə́ kemeé gə̄ malang kɔ̄ɔ́, yā kadə̄ ɓē a tél dəla loo ō, de kə́ yā nāā njə̄rā kemeé a gətóo sɔɔ̄ń ɓōĺ kə́ ni ɓōĺ dā̰ gə̄ ní ō.

¹⁶ Ré de kə́ mətá gə̄ ń jə-tə́daī rīdə́ kété laā ní ndin̄ kem ɓē ní tə́ anī, i nin̄ ngóy n a teēn̄ ta yo tə́ ní. I mā Kɔ́ɔ̄ɓē Nə́ɓā kə́ ndi kə kumneé n m-ə́da na i rɔ̄kum ní. Ngán kemdə́ gə̄ gə̄gē nin̄ a asən̄ kajədə́ aĺ ō, ɓē a tél dəla loo ō.

¹⁷ Aĺ ɓáa m-ā m̄-rāā kadə̄ de gə̄ a reēn̄ yā rɔ̄ɔ̄ gír de gə̄ ń toō. M-ā m-ə̄ndā dɔ ngé rɔ̄ɔ̄ gə̄ tə́ kadə̄ nujən̄n ɓē kɔ̄ɔ́ ō, kadə̄ tɔ̄lə̄n̄ de gə̄ ō, dā̰ gə̄ ō kɔ̄ɔ́.

¹⁸ Ré de kə́ mətá gə̄ ń j-ədaī rīdə́ kété laā ní ndin̄ kem ɓēé anī, i nin̄ ngóy n a teēn̄ ta yo tə́ ní. I mā Kɔ́ɔ̄ɓē Nə́ɓā kə́ ndi kə kumneé n m-ə́da na i rɔ̄kum ní: Ngán kemdə́ gə̄ gə̄gē nin̄ a asən̄ kajədə́ alé.

¹⁹ Aĺ ɓáa m-ə́la kə mo̰y ń rīn na i mo̰y ngāl̄bɔ̄gīí ní dɔ gír de gə̄ ń toō tə́. M-ā m̄-bə̄gā wōn̄g yāḿ kə́ ngá̰ý dɔdə́ tə́ i kə ta kūl̄ yá̰á̰ kə́ to kum kaȳ aĺ kə́ ngá̰ý ń noō. Mo̰y ní a tɔ̄l̄ de gə̄ ō, dā̰ gə̄ ō kə́ kem ɓēé kɔ̄ɔ́.

²⁰ Ká ré Noe ō, Danel ō, Job ō, nin̄ i dan de kə́ kem ɓēé gə̄ tə́ anī, ra dɔ ndūdə́ tə́ yādə́ a ajə i rɔ̄də́ nin̄ kɔ́ gə̄ ngóy. I mā Kɔ́ɔ̄ɓē Nə́ɓā kə́ ndi kə kumneé n m-ə́da na i rɔ̄kum ní: Ngán kemdə́ nin̄ kɔ́ gə̄ gə̄gē nin̄ a asən̄ kajədə́ alé.

²¹ Gō tə́ anī Kɔ́ɔ̄ɓē Nə́ɓā ədam̄ na: M-ə́la kə yá̰á̰ kə́ to kum kaȳ aĺ kə́ bo bo gə̄ gír i sɔ́ dɔ ɓē kə́ Jerusalem tə́. Yá̰a̰ gə̄ ní i rɔ̄ɔ̄ ō, ɓō ō, dā̰ kə́ do̰ gə̄ ō, mo̰y ngāl̄bɔ̄gīí kə́ kadə̄ tɔ̄l̄ de gə̄ ō dā̰ gə̄ ō.

²² Ɓá tā ba de kə́rēý gə̄, adə̄ i dəngam gə̄ ō, dəyá̰ gə̄ ō a teēn̄ ta yo tə́. Nin̄ a teēn̄ kɔ̄ɔ́ Jerusalem ba a aw̄n̄ gōsí tə́ dɔ gúú tə́ yā kaw̄ kəngesí dɔ ɓē kə́ rang tə́. Dan ń ā á̰a̰ī háĺdə́ ō, yá̰a̰ rāādə́ gə̄ ō anī, kemsí a sɔl̄ najə̄ yá̰á̰ kə́ to kum kaȳ aĺ kə́ bo ngá̰ý gə̄ ń m-ādə̄ rāā ɓē ní.

²³ Dan ń ā á̰a̰īdə́ anī kemsí a sɔl̄. Tām̄ ā ī-gerī kadə̄ yá̰á̰ ń m̄-rāā kə ɓē ń toō ní najə̄ i yāḿ. Yá̰á̰ Kɔ́ɔ̄ɓē Nə́ɓā əda ní n noó.