EJEKIEL 13 - Bibəl ta Sar̄

Najə̄ kə́ dɔ ngé koō ta kə́ rɔ̄kum aĺ gə̄ tə́

¹ Kɔ́ɔ̄ɓē ɔ̄r̄ najə̄ seḿ, ədam̄ na:

² Ḭ̄ ngōn̄ deē, ngé gə̄ ń ədan̄ na nin̄ na i ngé koō ta kə́ Israel tə́ gə̄ ba a ədan̄ i najə̄ kə́ dɔdə́ nin̄ kɔ́ gə̄ adə̄də́ gə̄ ní, ī-teē kə gíŕdə́ dɔɔ́. Ə̄ndā dɔdə́ tə́ ādə̄ oōn̄ najə̄ yāḿ mā.

³ Najə̄ ń mā Kɔ́ɔ̄ɓē Nə́ɓā m-ə́dá ní n toó: Yá̰á̰ kə́ to kum kaȳ aĺ a teē dɔ ngé koō ta kə́ mbóo gə̄ tə́. Nin̄ a unən̄ i gō gír̄ yādə́ nin̄ kɔ́ gə̄ ń reē dɔdə́ tə́ ní, ba a̰a̰n̄ yá̰á̰ kógə̄ḿ alé.

⁴ Ngán Israel gə̄, ngé koō ta yāsí gə̄ ton̄ tītə̄ tal̄ gə̄ kə́ a dáȳn̄ gotə ɓē kə́ nujə sák sák kɔ̄ɔ́ tə́ beē.

⁵ Nin̄ aw̄ tínīn̄ kum bəlo gə̄ kə́ tū ndogə̄ mbal̄ tə́ aĺ ō, ənīn̄ ndogə̄ mbal̄ dɔsí tə́ yā ngɔ̄məńsí ta rɔ̄ɔ̄ tə́ ndɔ̄ wōn̄g yā Kɔ́ɔ̄ɓē tə́ aĺ ō.

⁶ Yá̰a̰ gə̄ ń a̰a̰n̄ ní i yá̰á̰ kə́ rɔ̄kum aĺ gə̄ ō, yá̰a̰ gə̄ ń nin̄ ədan̄ na a rāā yá̰á̰ ní, i yá̰á̰ kə́ rɔ̄kum aĺ gə̄ ō. Nin̄ ədan̄ na: Kɔ́ɔ̄ɓē əda na, banī mā Kɔ́ɔ̄ɓē m-ə́ládə́ alé. Nin̄ əndān̄ kemdə́ dɔ tə́ kadə̄ najə̄ yādə́ i rɔ̄kum.

⁷ Banī najə̄ ń m-ə́dádə́ ní n toó: Yá̰a̰ gə̄ ń á̰a̰ī ní i yá̰á̰ kə́ rɔ̄kum aĺ gə̄ ō, yá̰a̰ gə̄ ń sḭḭ̄ ə́daī na a rāā yá̰á̰ ní, i yá̰á̰ kə́ rɔ̄kum aĺ gə̄ ō. Sḭḭ̄ ə́daī na Kɔ́ɔ̄ɓē na əda na, banī najə̄ kógə̄ḿ kə́ mā m-ɔ̄r̄ sesí gətóo.

⁸ Adə̄ yá̰á̰ kə́ rɔ̄kum ń mā Kɔ́ɔ̄ɓē Nə́ɓā m-ə́dásí ní n toó: Dan ń i sḭḭ̄ kɔ́ gə̄ n ə́daī najə̄ kə́ reē dɔsí tə́ ō, yá̰a̰ gə̄ ń á̰a̰ī ní i yá̰á̰ kə́ rɔ̄kum aĺ gə̄ ō ní, m-ā m̄-rāā yá̰á̰ kə́ tōr̄ sesí. Najə̄ ń Kɔ́ɔ̄ɓē Nə́ɓā əda ní n noó.

⁹ Ngé koō ta gə̄ ń a ənīn̄ gotə yá̰á̰ kə́ ka̰ā̰ kə́ rɔ̄kum aĺ gə̄ ō, yá̰a̰ gə̄ ń nin̄ ədan̄ na a rāā yá̰á̰ á i yá̰á̰ kə́ rɔ̄kum aĺ gə̄ ō ní, m-ā m-ɔ́jə́ tɔ́gə́ḿ dɔdə́ tə́. Nin̄ i dan ngé kán̄ naā gə̄ yā gír deē yāḿ gə̄ tə́ aĺ ō, a ndangən̄ rīdə́ dan rī ngán Israel gə̄ tə́ aĺ ō, nin̄ a télən̄ yā reē gogə́ dɔ nang yādə́ tə́ aĺ ō. I tītə̄ ń noō n nin̄ a ger̄nəń kadə̄ Kɔ́ɔ̄ɓē Nə́ɓā i mā ní.

¹⁰ Ngé koō ta gə̄ gólə̄n̄ gír deē yāḿ gə̄ ədan̄ na: Yá̰a̰ malang i kə́ njə̄rā majə, tá yá̰a̰ malang i kə́ a̰a̰ gō naā alé. Gír deē yāḿ gə̄ əndān̄ ndogə̄ mbal̄, banī nin̄ ɓáa nel̄də́ i rāā hō̰rō̰ dɔ tə́.

¹¹ I beé ní, ə́dá ngé rāā hō̰rō̰ kutə̄ń gidə ndogə̄ mbal̄ na: A tɔ̄ɔ̄n̄ ndogə̄ mbal̄ yāsí kɔ̄ɔ́. Man̄ kə́ bo a edə ō, kɔ̄sə̄ a tə́sō ō, nél man̄ a əla kə tɔ́gɔ́ ō.

¹² Dan ń ndogə̄ mbal̄ a tetə nang tə́ anī, de gə̄ a dəjen̄sí na ké hō̰rō̰ ń ūtīiń gidə ní ké rāā i rí wa?

¹³ I beé ní, yá̰á̰ ń mā Kɔ́ɔ̄ɓē Nə́ɓā m-ə́dá ní n toó: Kem wōn̄g yāḿ kə́ ngá̰ý tə́ ní, m-ā m̄-rāā kadə̄ nél man̄ kə́ bo ngá̰ý a əla kə tɔ́gɔ́ ngá̰ý ō, m-ā m̄-rāā kadə̄ man̄ a edə ngá̰ý ō. Kɔ̄sə̄ a tə́sō kə ngangá ngá̰ý yā nujə yá̰a̰ malang kɔ̄ɔ́.

¹⁴ Ndogə̄ mbal̄ ń ī-rāāī hō̰rō̰ gidə tə́ ní, m-ā m̄-mbəren yā kənīn nang tə́ kɔ̄ɔ́. M-ā m̄-bótīyōn dɔɔ́ bátə́ kadə̄ ugə̄ nang tə́, adə̄ de gə̄ a a̰a̰n̄ gírən ń əndān̄ ní. Ndogə̄ mbal̄ ní a əsō ō, mbal̄ kə́ tū tə́ gə̄ a rējə̄n̄sí ō. Loo ń noō tə́ ā ī-gerī kadə̄ Kɔ́ɔ̄ɓē i mā.

¹⁵ M-ā bə̄gā wōn̄g yāḿ dɔ ndogə̄ mbal̄ tə́ ō, dɔ de gə̄ ń rāān̄ hō̰rō̰ gidə tə́ ní ō. A ədan̄sí na ndogə̄ mbal̄ ní i kə́ nujəń kɔ̄ɔ́! Ngé rāā hō̰rō̰ gidə tə́ gə̄ ní, gír yādə́ gān̄g kɔ̄ɔ́.

¹⁶ Ngé koō ta kə́ Israel tə́ gə̄ ń kété nin̄ a ɔrə̄n̄ i najə̄ kə́ ndɔ̄ń tə́ kə́ dɔ ɓē kə́ Jerusalem tə́ ní, nin̄ gətóon̄ kɔ̄ɔ́. Yá̰a̰ gə̄ ń nin̄ a̰a̰n̄ ní, ɔjən̄ kadə̄ yá̰a̰ malang i kə́ njə̄rā majə. Tá yá̰a̰ malang i kə́ a̰a̰ gō naā alé. Yá̰á̰ ń Kɔ́ɔ̄ɓē Nə́ɓā əda ní n noó.

Najə̄ kə́ dɔ dəyá̰ kə́ ngé rāā mbōlí gə̄ tə́

¹⁷ Ḭ̄ ngōn̄ deē, dəyá̰ kə́ Israel tə́ gə̄ kə́ ngé kɔr̄ najə̄ kə rīdə́ nin̄ kɔ́ gɔ̄ɔ́ ní, ī-tūr̄ rɔ̄í kə̄ rɔ̄də́ tə́, ba ī-teē kə gíŕdə́ dɔɔ́ tām̄ gól̄ loo yādə́ tə́.

¹⁸ Ə́dádə́ na najə̄ ń Kɔ́ɔ̄ɓē Nə́ɓā əda ní n toó: Yá̰á̰ kə́ to kum kaȳ aĺ a teē dɔsí tə́. Tɔdɔ̄ sḭḭ̄ ūrī ta kūbə̄ kə́ dɔ kur jī de gə̄ tə́ malang ō, ī-rāāī mandíl gə̄ kə́ ɓāl̄də́ gə̄ i tayā tayā tə́ ō, yā kadə̄ sḭḭ̄ ə́ngeīneé tɔ́gə dɔ ndi kə kumuú yādə́ tə́. Sḭḭ̄ ī-sāāī taā ndi kə kumuú yā de gə̄ kə́ dan gír deē yāḿ gə̄ tə́, banī ī-ngɔ̄mī ndi kə kumuú yāsí sḭḭ̄ kɔ́ gə̄.

¹⁹ Sḭḭ̄ ī-kídə̄mī ta kum gír deē yāḿ gə̄ tə́, tām̄ yā kəngeń kōō ɔ́rjə́ kə́ kem jī kóndóńg wań, aláa tām̄ yā kəngeń yá̰a̰ kəsa kə́ sḛ́ý beē. Sḭḭ̄ ī-gólī gír deē yāḿ gə̄ kə́ ngé taā kem sor̄ yāsí gə̄. I tītə̄ ń noō n sḭḭ̄ ī-tɔ̄līneé de gə̄ ń sɔɔ̄ kadə̄ nin̄ oyn̄ aĺ ní ō, ngé gə̄ ń sɔɔ̄ kadə̄ nin̄ ndin̄ kə kumdə́ aĺ ní ɓáa, sḭḭ̄ ī-rāāī adə̄ nin̄ ndin̄ kə kumdə́ ō ní.

²⁰ I tām̄ najə̄ ń toō tə́ n mā Kɔ́ɔ̄ɓē Nə́ɓā m-ə́dásí najə̄ tītə̄ ń toō ní: Ta kūbə̄ yāsí gə̄ ń ə́hɔīneé ndi kə kumuú yā madə̄sí gə̄ dəngáý ní, m-ā m̄-rɔ̄ɔ̄ sedə́. M-ā m̄-ngīīdə́ jīsí tə́ kɔ̄ɔ́ yā rə́yā̰də́ ō, de gə̄ ń sḭḭ̄ ə́hɔīdə́ dəngáý ní, m-ā m̄-taādə́ jīsí tə́ yā kəya̰də́ dɔɔ́ ō.

²¹ M-ā m̄-rə́yā̰ mandíl yāsí gə̄ kɔ̄ɔ́ ō, m-ā m̄-taā gír deē yāḿ gə̄ jīsí tə́ yā kəya̰də́ dɔɔ́ ō. Nin̄ a əsōn̄ kum gūmbə̄ yāsí gə̄ tə́ to̰ aĺ ō, ā ī-gerī kadə̄ Kɔ́ɔ̄ɓē i mā ō.

²² De gə̄ ń kété nin̄ i ngé rāā yá̰á̰ kə́ gōtə́ gə̄ ní, sḭḭ̄ ɔ̄rī tɔ́gə́də́ kɔ̄ɔ́ kə ta kūl̄ najə̄ kə́ sor̄ yāsí gēé, banī mā m̄-gḛy rāādə́ yá̰á̰ kə́ majaĺ alé. Sḭḭ̄ ə́laī go̰ kem de kə́ majaĺ gə̄ tə́ adə̄ nin̄ nan̄neé kə̄ loo rāā háĺ kə́ majaĺ yādə́ tə́ kadə̄ oynə̄ń.

²³ I beé ní, yá̰á̰ kə́ rɔ̄kum aĺ gə̄ ń ā á̰a̰ī ō, najə̄ kə́ rɔ̄kum aĺ gə̄ ń ā ə́daī ō ní, gíŕdə́ gān̄g. M-ā m̄-taā gír deē yāḿ gə̄ jīsí tə́ yā kəya̰də́ dɔɔ́ ō, ā ī-gerī kadə̄ Kɔ́ɔ̄ɓē i mā ō.