EJEKIEL 12 - Bibəl ta Sar̄

Ejekiel rāā yá̰á̰ kə́ ɔjə kadə̄ a ɔyn̄ de gə̄ yā kaw̄ sedə́ dɔ ɓē kə́ rang tə́ dɔ gúú tə́

¹ Kɔ́ɔ̄ɓē ɔr̄ najə̄ seḿ, əda na:

² Ḭ̄ ngōn̄ deē, ī-ndi dan de kə́ ngé mbātə́ najə̄ gə̄ tə́. Kumdə́ i noó yā ka̰a̰ń loo ɓá ta banī nin̄ a̰ā̰n̄ loo alé. Mbīdə́ i noó kadə̄ koōń loo ɓá tā banī nin̄ oōn̄ loo alé. Tɔdɔ̄ i gír de kə́ ngé mbātə́ najə̄ gə̄.

³ I beé ní, ḭ̄ ngōn̄ deē, ɔ́sə nja yá̰a̰ mbā yāí kə̄ naā tə́ dan kadaá, ta kum de gə̄ tə́ malang tām̄ yā de kə́ a aw̄n̄ seneé kə̄ dɔ ɓē kə́ rang tə́ dɔ gúú tə́ tə́. Gō tə́ anī ī-ndɔ́tə̄ loo ń ī-ndi tū tə́ ní tə́ kɔ̄ɔ́ ba āw̄ loo kə́ rang tə́, ta kum de gə̄ tə́ malang. Na majanī a a̰a̰n̄ kadə̄ nin̄ i gír de kə́ ngé mbātə́ najə̄ gə̄.

⁴ Ā ɔ́ý yá̰a̰ mbā yāí gə̄ yā teēń kújə yāí tə́ kə̄ ndágá i dan kadaá, ta kum de gə̄ tə́ malang. Ba loo tíbí anī, ā ɔ́tə ta kumdə́ tə́ yā kaw̄ tītə̄ de kə́ a aw̄n̄ seneé kə̄ dɔ ɓē kə́ rang tə́ dɔ gúú tə́ beē.

⁵ Ā ī-mbutə kum loo tū ndogə̄ mbal̄ tə́ i ta kumdə́ tə́ ō, ā ī-teē kum bəlo loo ní tə́ kə̄ ndágá i ta kumdə́ tə́ ō.

⁶ Ā úń yá̰a̰ mbā yāí yā kəndā dɔ bɔ̄gīí tə́ i ta kumdə́ tə́ ō, ā āwń i ndɔ̄ɔ́ ō. Ā ūtə̄ ta kumií kɔ̄ɔ́ ō, ā ásə ka̰a̰ loo ń ā āw̄ kə̄ tū tə́ ní aĺ ō. I tītə̄ ń noō n m-ā m̄-rāāiń de kə́ nge tāā ngán Israel gə̄ tə́ ní.

⁷ m̄-rāā yá̰á̰ ń Kɔ́ɔ̄ɓē ədam̄ kadə̄ m̄-rāā ní. M-ɔ́ý yá̰a̰ mbā yāḿ gə̄ m̄-teēń ndágá dan kadaá, tītə̄ yā nge kaw̄ kə̄ dɔ ɓē kə́ rang tə́ dɔ gúú tə́ beē. Loo tíbí anī, m̄-mbutə kum loo tū ndogə̄ mbal̄ tə́ kə jīḿ. De gə̄ a̰a̰mə̄n̄ loo kaw̄ tə́ ndɔ̄ɔ́, kə ngong mbā yāḿ dɔ bɔ̄gə̄ḿ tə́.

⁸ Teē kə ndɔ̄ kə́ noō dəloí anī, Kɔ́ɔ̄ɓē ɔr̄ najə̄ seḿ, ədam̄ na:

⁹ Ḭ̄ ngōn̄ deē, ōō! Ngán Israel gə̄ ń i gír de kə́ ngé mbātə́ najə̄ gə̄ ní, a dəjeīn̄ na ké ā ī-rāā i rí n toó wa.

¹⁰ Anī ī-téĺ ə́dádə́ na: Najə̄ ń Kɔ́ɔ̄ɓē Nə́ɓā əda ní n toó: Yá̰á̰ ń toō i tāā kə́ tām̄ yā ngār kə́ Jerusalem tə́ ō, ngán Israel gə̄ malang ń ndin̄ noó ní tə́ ō.

¹¹ Ə́dádə́ na: m̄-tāāsí i najə̄ yá̰á̰ a rāā yā reē ní. Yá̰á̰ ń m̄-rāā ní i yá̰á̰ ń noō n a rāān̄ sesí ní. A ɔyn̄sí yā kaw̄ sesí dɔ ɓē kə́ rang tə́ dɔ gúú tə́, a tə̄ɓān̄sí kɔ̄ɔ́ kem ɓē yāsí tə́.

¹² Nge kɔr nosí a un yá̰a̰ yān yā kəndā dɔ bɔ̄gə̄n tə́ ndɔ̄ɔ́ ba a teē kɔ̄ɔ́ kem ɓēé. A mbutən̄ kum loo tū ndogə̄ mbal̄ tə́ yā kadə̄ ni teēń kə̄ gidə kə́rēý tə́. Ni a utə̄ ta kumən kɔ̄ɔ́ yā kadə̄ ni a a̰a̰ń loo ń ni a aw̄ kum kə̄ tū tə́ ní alé.

¹³ Mā Kɔ́ɔ̄ɓē m-ā m-ə̄yā gūmbə̄ non tə́ ō, m-ā m-ə́hɔn ō. M-ā m-āw̄ seneé kem ɓē yā Babilon gə̄ tə́, banī ni a asə ka̰a̰ ɓē ní aĺ ō, ni a oy i noó ō.

¹⁴ De gə̄ malang ń gīrə̄n̄ gidən ní, adə̄ i ngé ngɔ̄mən gə̄ ō, áskar yān gə̄ ō ní, m-ā m̄-rāādə́ kadə̄ a aw̄n̄ kə̄ loo gə̄ tə́. Gō tə́ anī m-ā m̄-ngɔ̄də̄də́ kə kaskar yāḿ.

¹⁵ Dan ń m-ā m̄-tə̄ndā m̄-tḭ̄ḭ̄də́ kə̄ dan nápar de kə́ rang gə̄ tə́ ō, kə̄ kem ɓē kə́ rang gə̄ tə́ ō anī, nin̄ a gerə̄n̄ kadə̄ Kɔ́ɔ̄ɓē i mā.

¹⁶ Ɓá tā ba m-ā m-ə́ya̰ de kə́rēý gə̄ kadə̄ teēn̄ ta rɔ̄ɔ̄ tə́ ō, ta ɓō tə́ ō, ta mo̰y ngāl̄bɔ̄gīí tə́ ō. Loo ń noō tə́ nin̄ a ənīn̄ de kə́ kem ɓēé gə̄ ń nin̄ a aw̄n̄ kə̄ tū tə́ ní, gotə yá̰a̰ malang kə́ majaĺ ngá̰ý gə̄ ń nin̄ rāān̄ ní. Adə̄ de kə́ kem ɓē ní tə́ gə̄ a gerə̄n̄ kadə̄ Kɔ́ɔ̄ɓē i mā.

¹⁷ Kɔ́ɔ̄ɓē ɔr̄ najə̄ seḿ, əda na:

¹⁸ Ḭ̄ ngōn̄ deē, ə́sá mápa yāí kə rɔ̄ ndebeé ō, ā̰ȳ man̄ yāí kə ɓōló ō, kə sōlōó ō.

¹⁹ Gō tə́ anī, ā ə́da de kə́ kem ɓēé gə̄ na: Najə̄ ń Kɔ́ɔ̄ɓē Nə́ɓā əda ní n toó: Gotə de kə́ Jerusalem tə́ gə̄ ń na̰yn̄ dɔ nang kə́ Israel tə́ ní a əsan̄ mápa yādə́ i kə sōlōó ō, a a̰ȳn̄ man̄ yādə́ i kə ɓōĺ kə́ a ndewdə́ ō. Tɔdɔ̄ a nujən̄ ɓē yādə́ sák sák kɔ̄ɔ́, tām̄ de kə́ kemeé gə̄ rāān̄ adə̄ yá̰a̰ rāā kə́ kə dɔ́nɔ́ taā loo kem ɓēé.

²⁰ De kə́ kem ɓēé gə̄ a gətóon̄ kɔ̄ɔ́ ō, ɓē a tél dəla loo ō. Loo ń noō tə́ ā ī-gerī kadə̄ Kɔ́ɔ̄ɓē i mā.

Najə̄ Kɔ́ɔ̄ɓē əda ní a reē yā kudə gírí

²¹ Kɔ́ɔ̄ɓē ɔr̄ najə̄ seḿ, ədam̄ na:

²² Ḭ̄ ngōn̄ deē, ōō! Sḭḭ̄ ī-tél ā ə́daī kāgə̄ najə̄ ń toō kə̄ nja naā tə́ kə̄ dɔ ɓē kə́ Israel tə́ ə́daī na: Kum mbang mān̄ ō, yá̰á̰ kə́ ka̰ā̰ gə̄ ní, kógə̄ḿ kə́ reē udə gíŕ kə́ rɔ̄ tə́ gətóo ō. Ní, ə́daī nge ń noō i tām̄ rí tə́?

²³ I beé ní, ə́dá ngán Israel gə̄ na mā Kɔ́ɔ̄ɓē Nə́ɓā m-ā m̄-rāā kadə̄ de gə̄ a ədan̄ kāgə̄ najə̄ ń noō to̰ alé. De kə́ yā tél kəda kə̄ nja naā tə́ dɔ nang kə́ Israel tə́ to̰ a gətóo. Banī ə́dádə́ na: Kum mbang ń kadə̄ yá̰á̰ kə́ ka̰ā̰ gə̄ malang reē udən̄neé gíŕ kə́ rɔ̄ tə́ ní, dɔ i ngɔr.

²⁴ Yá̰á̰ kə́ ka̰ā̰ kə́ rɔ̄kum aĺ a gə̄ gətóon̄ kɔ̄ɔ́ ō, yá̰a̰ gə̄ ń nin̄ ədan̄ na a rāā yá̰á̰ á i yá̰á̰ kə́ rɔ̄kum aĺ gə̄ ní, a gətōon̄ kɔ̄ɔ́ ō dɔ dáń ngán Israel gə̄ tə́.

²⁵ Tɔdɔ̄ i mā Kɔ́ɔ̄ɓē n m-ɔ̄r̄ najə̄ ní ō, yá̰á̰ ń m-ə́dá ní a rāā yá̰a̰ kanjə̄ kɔr bā̰ā̰ ō. A̰á̰ā̰, i dan ń sḭḭ̄ ngé mbātə́ najə̄ gə̄ ī-ndiīneé kə kumsí ɓáý ní n m-ā m̄-rāań yá̰á̰ m-ə́dá ní. Yá̰á̰ ń Kɔ́ɔ̄ɓē Nə́ɓā əda ní n noó.

²⁶ Kɔ́ɔ̄ɓē ɔr̄ najə̄ seḿ ɓáý to̰, ni-əda na:

²⁷ Ḭ̄ ngōn̄ deē, ōō! Ngán Israel gə̄ ədan̄ na: Yá̰a̰ gə̄ Ejekiel ədadə́ ní a reēn̄ yā kudə gíŕ kə́ rɔ̄ tə́ i ndɔ̄ń tə́ ɓáý ō, najə̄ ń m-ə̄ndā taí tə́ á ə́dá ní, na i tām̄ yā ndɔ̄ gə̄ kə́ sa̰y ngá̰ý tə́ ō.

²⁸ I beé ɓá ní, ə́dádə́ najə̄ ń toō ādə̄m̄: Yá̰a̰ malang ń m-ə́da najə̄n kété ní, mā Kɔ́ɔ̄ɓē Nə́ɓā m-ā m̄-rāā yā kadə̄ a reē yā kudə gíŕ kə́ rɔ̄ tə́ ngɔr. Najə̄ ń Kɔ́ɔ̄ɓē ədam̄ ní n noó.