EJEKIEL 11 - Bibəl ta Sar̄

A gāngə̄n̄ sarya dɔ ɓē kə́ Jerusalem tə́ tām̄ yā yá̰a̰ rāān kə́ gōtə́ aĺ gə̄ tə́

¹ Ndíl Kɔ́ɔ̄ɓē unəm̄ nang tə́ kum kə̄ dɔɔ́, ba aw̄ seḿ ta kújə yā Kɔ́ɔ̄ɓē kə́ dām̄ kə́ gír ɓēé tə́. De kə́ dəngam gə̄ kutə jōó gidə i mí ndin̄ ta róbə́ tə́. M-á̰a̰ ngār gə̄ yā ngán Israel gə̄ jōó dandə́ tə́ m̄-ger̄də́. I Yajania kə́ ngōn̄ Ajur ō, Pelatia kə́ ngōn̄ Benaya ō.

² Ndíl ədam̄ na: Ḭ̄ ngōn̄ deē, ōō! De gə̄ ń gírə̄n̄ rāā yá̰á̰ kə́ majaĺ ní n ndin̄ noō. Nin̄ adə̄n̄ de gə̄ kɔjə̄ kə́ majaĺ gə̄ kem ɓē kə́ Jerusalem tə́.

³ Nin̄ ədan̄ na: J-a jə-rāāī kújə gə̄ loo ń toō tə́ laā i ngɔr ń toō tə́ aĺ ɓáý. Jerusalem rāā rɔ̄n i jóo ndīr̄ yá̰á̰ tə́, ba jḭḭ̄ i dā̰ kə́ kemeé.

⁴ I beé ní, ḭ̄ ngōn̄ deē, ī-teē kə gíŕdə́ dɔɔ́, kə ta kūl̄ najə̄ ń m-ə̄ndā taí tə́ ní.

⁵ Loo ń noō tə́ Ndíĺ Kɔ́ɔ̄ɓē əhɔm̄, ba ədam̄ na kə m-ə́da najə̄ ń toō: Najə̄ ń Kɔ́ɔ̄ɓē əda ní n toó. Sḭḭ̄ Israel gə̄, najə̄ ń ɔ̄rī ní m̄-ger̄ ō, m̄-ger̄ gír̄ yāsí ō.

⁶ Sḭḭ̄ ī-tɔ̄lī de gə̄ ngá̰ý kem ɓē ń toō tə́, ī-rāāī ādə̄ nīń de gə̄ táā loo kum róbə kɔsə gə̄ tə́.

⁷ I tām̄ ń toō tə́ n mā Kɔ́ɔ̄ɓē Nə́ɓā m-ə́dásí najə̄ ń toō ní: Ɓē kə́ Jerusalem to i tītə̄ jóo rɔ̄kum, banī dā̰ i de gə̄ ń sḭḭ̄ ī-tɔ̄līdə́ ní. Ba sḭḭ̄ ɓáa m-ā m̄-tə̄ɓāsí kɔ̄ɔ́ kemeé.

⁸ Sḭḭ̄ ī-ɓōlíī rɔ̄ɔ̄! I beé ní, m-ā m-ə́lań yā kadə̄sí. I mā Kɔ́ɔ̄ɓē Nə́ɓā n m-ə́da najə̄ ní.

⁹ M-ā m̄-tə̄ɓāsí kɔ̄ɔ́ kem ɓē kə́ Jerusalem tə́, m-ā m-ə́lásí kem jī tə̄rā gə̄ tə́. M-ā m-ún sarya gāngə̄ḿ yā rāań yá̰a̰ sesí.

¹⁰ Loo ń noō tə́ ā ī-gerī kadə̄ Kɔ́ɔ̄ɓē i mā. M-ā m̄-gān̄g sarya dɔsí tə́ i gō nang kə́ Israel tə́, adə̄ m-ā m̄-rāā kadə̄ ā óyiī ta rɔ̄ɔ̄ tə́.

¹¹ Jerusalem a ngɔ̄m̄sí tītə̄ ń jóo a ngɔ̄məń yá̰á̰ ní alé, sḭḭ̄ i dā̰ kə́ tə́jā ń jóo a ngɔ̄m̄ ní alé. Banī m-ā m̄-gān̄g sarya dɔsí tə́ dɔ nang kə́ Israel tə́.

¹² Loo ń noō tə́ ā ī-gerī kadə̄ Kɔ́ɔ̄ɓē i mā. Sḭḭ̄ úniī gō ndū najə̄ yāḿ gə̄ aĺ ō, úniī jī bēl̄ loo rāā yá̰a̰ yāḿ gə̄ ī-rāāiń yá̰a̰ aĺ ō. Banī sḭḭ̄ úniī gō yá̰a̰ kāgə̄ ɓē gə̄ nápar de gə̄ ń ndin̄ gīrə̄n̄ gidəsí ní.

¹³ Dan ń m̄-rā m-ā m-ə́da najə̄ ń toō ń Kɔ́ɔ̄ɓē taḿ tə́ ní anī, Pelatia kə́ ngōn̄ Benaya gān̄g dɔɔ́ oy. M-ə̄sō m̄-séw kumḿ nang tə́ ō, m-ə́ga kɔŕ ō, m-ə́da na: Á! Kɔ́ɔ̄ɓē Nə́ɓā, adə̄ gotə ngán Israel gə̄ ń na̰yn̄ ní, ā ī-rāādə́ kadə̄ oyn̄ malang a?

Nə́ɓā a ɔsə nja ngán Israel gə̄ ń tə̄ndān̄ naā tḭ̄ḭ̄n̄ kə̄ loo gə̄ tə́ ní kə̄ naā tə́

¹⁴ Kɔ́ɔ̄ɓē ɔr̄ najə̄ seḿ, ni ədam̄ na:

¹⁵ Ḭ̄ ngōn̄ deē, kɔjə̄ ń de kə́ Jerusalem gə̄ adə̄n̄ ngákó̰ó̰í gə̄, adə̄n̄ de kə́ kem kojə yāí tə́ gə̄, adə̄n̄ Israel gə̄ malang ń ɔyn̄də́ dɔ gúú tə́ aw̄n̄ sedə́ dɔ ɓē kə́ rang tə́ ní n toó: I beé ní, ī-ndi sa̰y kə loo ń Kɔ́ɔ̄ɓē i tū tə́ ní tə́. Tām̄ dɔ nang ń toō ní i jḭḭ̄ n ni-adə̄jí kadə̄ i yājí tə́ ní.

¹⁶ I beé ní, ngé gə̄ ń ɔyn̄də́ dɔ gúú tə́ aw̄n̄ sedə́ dɔ ɓē kə́ rang tə́ naā tə́ seí ní, ā ə́dádə́ na: Najə̄ ń mā Kɔ́ɔ̄ɓē Nə́ɓā m-ɔ̄r̄ sedə́ ní n toó: M-ə́la sesí sa̰y, kə̄ loo gə̄ tə́ malang dan nápar de gə̄ tə́ ɓá tā, ba mā i dansí tə́ tītə̄ ń m̄-ndiń kem loo kə́ táĺ tə́ tə́.

¹⁷ Adə̄ ə́dádə́ najə̄ ń toō ādə̄m̄, ə́dádə́ na: Mā Kɔ́ɔ̄ɓē Nə́ɓā, m-ā m-ɔ́ýsí dan gír de kə́ tayā tayā gə̄ ń m̄-tə̄ndā m̄-tḭ̄ḭ̄sí dandə́ tə́ ní ō, m-ā m-ɔ́ýsí kem ɓē gə̄ ń āwī tū tə́ dɔ gúú tə́ ní ō, yā kɔsə njasí naā tə́, ba yā tél kadə̄sí dɔ nang kə́ Israel tə́ gogə́.

¹⁸ Ré ī-tél ī-reē ūgī gogə́ anī, kəla kə́ majaĺ ngá̰ý gə̄ ń de kə́ kemeé gə̄ a rāān̄ adə̄n̄ nə́ɓā kə́ rɔ̄kum aĺ gə̄ ní, ā ī-rāāī kadə̄ a gətóo kɔ̄ɔ́.

¹⁹ M-ādə̄sí dan wur kə́ kijə, m-ā m-ə̄ndā ndíĺ kə́ kijə kemsí tə́. M-ā m-ɔ̄r̄ kemsí kə́ ngan̄g tītə̄ mbal̄ kɔ̄ɔ́, ba m-ā m-ādə̄sí kem kə́ ndigə yá̰á̰ ń Nə́ɓā gḛy ní.

²⁰ I beé n ā úniīń gō ndū najə̄ ń m-ādə̄sí ní ō, ā ə̄ndāiń kumsí gír jī bēl̄ loo rāā yá̰a̰ yāḿ gə̄ tə́ ba ā úniīń gō ní ō. Loo ń noō tə́ sḭḭ̄ i gír deē yāḿ gə̄ ō, mā i Nə́ɓā yāsí ō.

²¹ Banī ngé rɔȳ nə́ɓā kə́ rɔ̄kum aĺ gə̄ ō, ngé rāā yá̰á̰ kə́ majaĺ ngá̰ý tɔdɔ̄ nin̄ unən̄ i gō ngur gə̄ kə́ kemdə́ tə́ ō ní, m-ā m̄-rāādə́ kadə̄ nin̄ a əgān̄ kə̄rā háĺdə́. Yá̰á̰ mā Kɔ́ɔ̄ɓē Nə́ɓā m-ə́dásí kə̄ ndágá ní n noó.

Kɔsə gɔn yā Kɔ́ɔ̄ɓē teē kɔ̄ɔ́ kem ɓē kə́ Jerusalem tə́

²² Loo ń noō tə́ Serubḛ gə̄ jā̰ā̰n̄ bɔ̄gə̄də́ ō, nja púsə gə̄ ní əlan̄ gíŕ ndɔ́tə̄ naā tə́ sedə́ ō. Kɔsə gɔn yā Nə́ɓā yā Israel ndə́lē dɔdə́ tə́ dɔɔ́.

²³ Gō tə́ anī kɔsə gɔn yā Kɔ́ɔ̄ɓē ḭḭ kum kə̄ dɔɔ́ dan ɓēé ba aw̄ dəba dɔ mbal̄ bo tə́ dām̄ kə́ gír ɓē tə́.

²⁴ Kum mbang ń m-ā m-á̰a̰ń yá̰a̰ ngeé ń noō tə́ ní, Ndíĺ Nə́ɓā unəm̄ nang tə́ kum kə̄ dɔɔ́. Ni-tél reē seḿ gogə́ rɔ̄ de gə̄ ń ɔyn̄də́ aw̄n̄ sedə́ Babilon dɔ gúú tə́ ní. Yá̰á̰ ń Nə́ɓā əlań adə̄ m-á̰a̰ā̰ ní dəba.

²⁵ Loo ń noō tə́ m-ə̄nī de gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní gotə yá̰a̰ malang ń Kɔ́ɔ̄ɓē rāā adə̄ m-á̰a̰ā̰ ní.