EJEKIEL 10 - Bibəl ta Sar̄

Nə́ɓā rāā yá̰á̰ kógə̄ḿ ɓáý to̰ ɔjəń Ejekiel kadə̄ na n-ndi noó

¹ Loo kə́ rāā gār̄ tītə̄ gār̄ kújə́ ń i dɔɔ́ dɔ Serubḛ gə̄ tə́ ní, m-ə̄ndā ma̰ȳ anī, m-á̰á̰ yá̰á̰ kógə̄ḿ kə́ to tītə̄ mbal̄ sapir beé tū tə́. Rāān̄ yá̰á̰ ní adə̄ to tītə̄ kōr̄ kāgə̄ mbang beé.

² Nə́ɓā əda deē ń o̰o̰ kūbə̄ lḛ́ḛ́ ní na: Ī-mān̄ mbo̰ō̰ nja púsə gə̄ ń i gír Serubḛ gə̄ tə́ ní, ba ɔ́y yā̰l̄ hor kə́ ajə ying ń to mbənā Serubḛ gə̄ tə́ ní ādə̄ rosə kem jīí ō, āw̄ ī-ɓōkə́ dɔ ɓē tə́ ō. Anī m-á̰a̰ deē ní loo kaw̄ tə́ mbo̰ō̰ nja púsə gə̄ tə́.

³ Kum mbang ngeé ń noō tə́ ní, Serubḛ gə̄ i kem kújə yā Kɔ́ɔ̄ɓē tə́, dām̄ kə́ ko̰ó̰ tə́ ō, ndágə loo kə́ gīr̄ gidə kújə yā Kɔ́ɔ̄ɓē kə́ kemeé tə́ ní, sa taā loo malang tū tə́ ō.

⁴ Kɔsə gɔn yā Kɔ́ɔ̄ɓē ń i dɔɔ́ dɔ Serubḛ gə̄ tə́ ní, ḭḭ aw̄ kum kə̄ ta róbə kə́ yā kudəń kə̄ kem kújə yā Kɔ́ɔ̄ɓē tə́ tə́. Loo ń noō tə́ kil̄ man̄ reē taā kem kújə yā Kɔ́ɔ̄ɓē ō, loo kə́ unjə̄ kow yā kɔsə gɔn yā Kɔ́ɔ̄ɓē taā loo ndágə loo kə́ gīr̄ gidə kújə yā Kɔ́ɔ̄ɓē tə́.

⁵ Kōō bɔ̄gə̄ Serubḛ gə̄ ń a ɓār̄ ní, deē ra i ndágə loo kə́ gīr̄ gidə kújə yā Kɔ́ɔ̄ɓē kə́ ndágá tə́ gə̄gē anī a oō. Kōō bɔ̄gə̄də́ ní ɓār̄ tītə̄ ndán̄g man̄ beé, i ndū Nə́ɓā kə́ tɔ́gən i ngá̰ý.

⁶ Deē ń o̰ō̰ kūbə̄ lḛ́ḛ́ ní aw̄ ra kadə nja púsə́ kógə̄ḿ tə́. Ni-aw̄ ra noó i dan ń Nə́ɓā ədan na kə un hor kə́ mbo̰ō̰ nja púsə gə̄ tə́, dɔ dán Serubḛ gə̄ tə́ ní.

⁷ Serubḛ kógə̄ḿ əla jīn kum kə̄ rɔ̄ hor ń to kadən tə́ ngɔr ní tə́. Ni ɔy yā̰l̄ hor kə́ ajə ying ní, ɓōkə́ jī deē ń o̰ō̰ kūbə̄ lḛ́ḛ́ ní tə́. Deē ní taā ba teē ndágá.

⁸ Yá̰á̰ kə́ to tītə̄ jī deē beé teē gír bɔ̄gə̄ Serubḛ gə̄ tə́ kə̄ ndágá.

⁹ M-á̰a̰ nja púsə gə̄ sɔ́ kadə Serubḛ gə̄ tə́ ō. Nja púsə́ kógə̄ḿ i kadə Serubḛ kógə̄ḿ tə́ kə dɔdə́ gēé. Nja púsə gə̄ ní ndə́lēn̄ tītə̄ mbal̄ kógə̄ḿ kə́ gātə̄n i ngá̰ý beē.

¹⁰ Nja púsə́ kə́ sɔ́ gə̄ ní teēn̄ naā malang ō, to tītə̄ kə́ tə́lan̄də́ i kem naā tə́ beé ō.

¹¹ Nin̄ asən̄ kaw̄ kum kə̄ kété kumdə́ sɔɔ̄ loo kə́ gíŕ sɔ́ gə̄ kanjə̄ rōngō werere. I loo ń dɔ Serubḛ gə̄ tūr̄ kum kə̄ tū tə́ ní n nin̄ a aw̄n̄ kum kə̄ tū tə́ ní. Nin̄ aw̄n̄ kum kə̄ kété i kanjə̄ rōngō.

¹² Rɔ̄ Serubḛ gə̄ ō, gidədə́ ō, jīdə́ ō, bɔ̄gə̄də́ gə̄ ō, nja púsə́ kə́ sɔ́ gə̄ ō ní, loo kə́ ndə́lē gə̄ i tū tə́ malang.

¹³ M-ōō ndū deē kógə̄ḿ ɓāŕ rī nja púsə gə̄ ní na i nél balway.

¹⁴ Nin̄ kógə̄ḿ kógə̄ḿ ní ta kumdə́ i sɔ́ sɔ́. Ta kum kə́ ta kəga dɔ i ta kum Serubḛ ō, ta kum nge kə́ ko̰ jōó i ta kum deē ō, ta kum nge kə́ ko̰ mətá i ta kum ɓɔl ō, ta kum nge kə́ ko̰ sɔ́ i ta kum kə̄rō ō.

¹⁵ Serubḛ gə̄ ní ḭḭn̄ kum kə̄ dɔɔ́. Nin̄ ton̄ tītə̄ yá̰á̰ kə́ kə kumuú gə̄ ń m̄-rā kadə bā Kebar tə́ á m-á̰á̰də́ ní.

¹⁶ Dan ń nin̄ aw̄n̄ kum kə̄ kété anī, nja púsə gə̄ ní aw̄n̄ kum kə̄ kété sedə́ ō. Dan ń Serubḛ gə̄ ní jā̰ā̰n̄ bɔ̄gə̄də́ yā kḭḭń nang tə́ kum kə̄ dɔɔ́ anī, nja púsə gə̄ ní ɔrə̄n̄ rɔ̄də́ kɔ̄ɔ́ rɔ̄də́ tə́ aĺ ō.

¹⁷ Dan ń Serubḛ gə̄ dəban̄ anī, nin̄ dəban̄ ō. Dan ń nin̄ ḭḭn̄ kum kə̄ dɔɔ́ anī, nin̄ ḭḭn̄ kum kə̄ dɔɔ́ sedə́ ō, tām̄ nja púsə gə̄ ní a njə̄rān̄ i kə gō kem ndigə yā yá̰á̰ kə́ kə kumuú gə̄ ní.

Kɔsə gɔn yā Kɔ́ɔ̄ɓē teē kɔ̄ɔ́ kem kújə yā Kɔ́ɔ̄ɓē tə́

¹⁸ Kɔsə gɔn yā Kɔ́ɔ̄ɓē ndɔ́tə̄ kɔ̄ɔ́ ta kújə yā Kɔ́ɔ̄ɓē tə́ ba aw̄ ra dɔ Serubḛ gə̄ tə́.

¹⁹ Anī nin̄ jā̰ā̰n̄ bɔ̄gə̄də́ yā kɔr̄ dɔɔ́. M-á̰á̰də́ loo kḭḭ tə́ nang tə́ kum kə̄ dɔɔ́, naā tə́ kə nja púsə gə̄ ní. Kɔsə gɔn yā Nə́ɓā yā Israel ndə́lē dɔdə́ tə́ dɔɔ́. Nin̄ aw̄ dəban̄ ta róbə́ kə́ yā kudəń kə̄ kem kújə yā Kɔ́ɔ̄ɓē tə́ tə́, dām̄ kə́ gír ɓē tə́.

²⁰ M-á̰á̰ yá̰á̰ kə́ kə kumuú gə̄ ní kété dan ń m̄-rāń kadə bā Kebar tə́ ní, adə̄ m̄-ger̄ kadə̄ yá̰a̰ gə̄ ní i Serubḛ gə̄.

²¹ Nin̄ kógə̄ḿ kógə̄ḿ ní ta kumdə́ i sɔ́ sɔ́ ō, bɔ̄gə̄də́ i sɔ́ sɔ́ ō, jī kə́ to tītə̄ jī deē i gír bɔ̄gə̄də́ gə̄ tə́ ō.

²² Ta kumdə́ gə̄ ní to tītə̄ ta kum yá̰á̰ kə́ kə kumuú gə̄ ń m-á̰á̰də́ kadə ba Kebar tə́ ní. Serubḛ gə̄ ní njə̄rān̄ kumdə́ i súmūú nodə́ tə́.