DANIEL 7 - Bibəl ta Sar̄

Daniel a̰a̰ yá̰a̰ gə̄ ( 7—12 ) Yá̰á̰ kə́ ta kəga dɔ ń Daniel a̰ā̰ ní: I dā̰ kə́ sɔ́ gə̄

¹ Nī kógə̄ḿ rāā Daniel ɓāl̄ ko̰o̰ ɓē kə́ ta kəga dɔ yā Baltajar mban̄g kə́ Babilon tə́. Daniel a̰a̰ yá̰a̰ gə̄ i ngá̰ý dan ń ni to dɔ tə̄rá ɓīīn tə́ ní. Gō tə́ anī ni ndang yá̰á̰ ń ni-a̰a̰ kem nī tə́ ní. Nī ní n toó,

² kə gō ń nəkɔ́ ɔjəń gotə ní, əda na: Nī rāām̄ ndɔ̄ɔ́ adə̄ m-á̰a̰ kadə̄ nél ḭḭ dām̄ kə́ gír ɓē tə́ ō no ɓē tə́ ō dām̄ mbɔ́r ɓē kə́ ko̰ó̰ tə́ ō kə́ geleé tə́ ō, ba əla kə tɔ́gɔ́ dɔ bā bo tə́ adə̄ man̄ ḭḭ ngá̰ý.

³ Anī dā̰ kə́ to ɓōĺ ngá̰ý gə̄ sɔ́ teēn̄ kum bā tə́. Nin̄ ton̄ tītə̄ naā alé.

⁴ Nge kə́ ta kəga dɔ to tītə̄ ɓɔl ō, bɔ̄gə̄n gə̄ ton̄ tītə̄ bɔ̄gə̄ kə̄rō ō. m̄-na̰y kə̄ loo ka̰ā̰ tə́ anī ɔrə̄n̄ bɔ̄gə̄n gə̄ ō, un udənən̄ dɔɔ́ adə̄ ra dɔ njan kə́ gogə́ kə́ jōó gə̄ tə́ tītə̄ deē ō, adə̄nən̄ dan wur kə́ ger̄ najə̄ tītə̄ da n wur deē ō.

⁵ Dā̰ kə́ nge ko̰ jōó to tītə̄ dā̰ úrsə. Ni-ɔr̄ tan dɔɔ́ sḛ́ý beē ō, əhɔ kə̄ngā nganjə yá̰a̰ gə̄ mətá tan tə́ kə ngāngəneé ō. Ədanən̄ na kə ḭḭ kə əsa dā̰ ngá̰ý!

⁶ Gō tə́ anī m-á̰a̰ dā̰ kə́ rang kə́ to tītə̄ kagə beé ba bɔ̄gə̄ yel̄ gə̄ i sɔ́ dan gidən tə́. Dɔn i sɔ́ ō, adə̄nən̄ tɔ́gə kadə̄ o̰o̰ń ɓē ō.

⁷ Yá̰a̰ gə̄ ń teēn̄ ta kumḿ tə́ ndɔ̄ɔ́ ní m̄-na̰y kə̄ loo ka̰a̰də́ tə́: Dā̰ kə́ nge ko̰ sɔ́ ń m-á̰a̰ā̰ ní i dā̰ kə́ to ɓōĺ ngá̰ý ō, i dā̰ kə́ a rāā deē kə ɓōló ngá̰ý ō, ngan̄g to ɓōĺ ngá̰ý ō, rāān̄də́ i kə gidí ō, ni əsań yá̰a̰ ō, gángəń yá̰a̰ naā tə́ ō, gotə yá̰á̰ ń na̰y ní ɓáa ni tə́ɓā kə njaneé ō. Dā̰ kə́ mətá gə̄ ń teēn̄ kété non tə́ ní to tītə̄də́ aĺ ō, gajən i kutə kógə̄ḿ ō.

⁸ M-ə̄ndā ma̰ȳ gajən gə̄ ní anī m-á̰a̰ nge kə́ dūú əɓa dan madə̄ gə̄ tə́. Ró̰ȳn̄ gajən kə́ kété gə̄ mətá kɔ̄ɔ́ non tə́. M-á̰a̰ kum yá̰a̰ gə̄ kə́ ton̄ tītə̄ kum deē beé ō, ta de kə́ a tə́da najə̄ kə́ to ngonjə̄ gə̄ ō ton̄ tū gajən kə́ dūú ní tə́.

Sarya yā Nə́ɓā

⁹ m̄-na̰y kə̄ loo ka̰a̰ yá̰á̰ tə́ ɓáý: Tə́ndān̄ kōr̄ kāgə̄ mbang gə̄, anī deē kógə̄ḿ kə́ tɔgə ɓə́ga reē ndi. Kūbə̄ kə́ rɔ̄n tə́ na tītə̄ búy kūbə̄ beé nənga dɔn to tītə̄ bḭḭ̄ batə̄ kə́ ndaa kə́ tə́go beé ō. Kōr̄ kāgə̄ mbang yān i kə́ rāā kə ndo̰ horoó ō, njan kə́ gōr̄ gə̄ i kə́ rāā kə hor kə́ unjūú ō.

¹⁰ Hor kógə̄ḿ kə́ to tītə̄ bā beé a əɓa non tə́ ō, a nūgə́ non tə́ ō. De gə̄ dūbú nja dūbú ra a rāān̄ kəla yān. De gə̄ dūbú kutə nja dūbú kutə ran̄ non tə́. Sarya əla gír adə̄ teēn̄ makətūbə̄ gə̄.

¹¹ m̄-na̰y kə̄ loo ka̰ā̰ tə́ sɔɔ̄ń najə̄ kə́ to ngonjə̄ gə̄ ń ngōn̄ gajə dā̰ kə́ dūú a tə́da kə ndūn kə́ ɓār̄ ngá̰ý ní. Ba dan ń m̄-na̰y kə̄ loo ka̰ā̰ tə́ anī tɔ̄lə̄n̄ dā̰ kə́ nge ko̰ sɔ́ ní. Rɔ̄n tél tetə mbuk ō, ənīnən̄ kum hor tə́ adə̄ hor o̰o̰n ō.

¹² Gotə dā̰ kə́ rang gə̄ ní ɔgə̄n̄də́ tɔ́gə́ ń a o̰o̰n̄neé ɓē ní kɔ̄ɔ́. Banī ənīn̄ ndɔ̄də́ ta madə̄ tə́ kadə̄ ndin̄ kə kumdə́ bátə́ ugə̄ ndɔ̄ ń ɔjən̄neé tə́ ní ō, kum mbang ń ɔjən̄neé tə́ ní ō.

¹³ m̄-na̰y kə̄ loo ka̰a̰ yá̰a̰ gə̄ tə́ kem nī tə́ ndɔ̄ɔ́: M-á̰á̰ yá̰á̰ kógə̄ḿ a reē naā tə́ kə kil̄ man̄ gēé tītə̄ ngōn̄ deē ndul beé. Reē bátə́ teē rɔ̄ de kə́ tɔgə ɓə́gá ní tə́, anī aw̄n̄ seneé rɔ̄n tə́.

¹⁴ Adə̄nən̄ kadə̄ i ni n i dɔ yá̰a̰ gə̄ tə́ malang ba de kə́ dɔn ni tə́ gətóo ō, adə̄nən̄ kɔsə gɔn ō ko̰o̰ ɓē ō, de kə́ gíŕdə́ i tayā tayā gə̄ ō nápardə́ i tayā tayā gə̄ ō, rāān̄ kəla yān. Ndi dɔ yá̰a̰ gə̄ tə́ malang yān dan a gān̄g aĺ ō, ta ngóyn a gətóo ō, ɓē ko̰o̰ yān i ɓē ko̰o̰ kə́ a nujə aĺ bátə́ ō.

Kum yá̰á̰ kə́ ta kəga dɔ ń Daniel a̰ā̰ ní

¹⁵ Ɓōĺ rāām̄ mā Daniel ngá̰ý ō, yá̰a̰ gə̄ ń m-á̰a̰ā̰ ní tōr̄ rɔ̄ḿ ngá̰ý ō.

¹⁶ m̄-ndɔ́tə̄ ngɔr kə̄ rɔ̄ deē kógə̄ḿ kə́ dan de gə̄ ń ran̄ tə́ ní, m̄-dəjen kum yá̰á̰ kə́ rɔ̄kum kə́ tū yá̰a̰ gə̄ ń n oō tə́ malang. Loo ń noō tə́ ni ɔjəm̄ kum əda na:

¹⁷ Dā̰ kə́ to ɓōĺ ngá̰ý gə̄ ń nin̄ i deē sɔ́ ní i mban̄g kə́ dɔ nang tə́ gə̄ sɔ́.

¹⁸ Gō tə́ anī ngé kə́ táĺ gə̄ yā Nə́ɓā kə́ dɔɔ́ sa̰y ngá̰ý a əngen̄ ko̰o̰ ɓē ō, a ngɔ̄mə̄n̄ ko̰o̰ ɓē ní tām̄ yādə́ tə́ kə́ njɔ́ḿ gə̄ tə́ ō.

¹⁹ Loo ń noō tə́ m̄-sāā ger̄ najə̄ kə́ dɔ dā̰ kə́ nge ko̰ sɔ́ ń to tītə̄ gotə madə̄ gə̄ aĺ ní tə́ kadə̄ unjə̄. Dā̰ ní to ɓōĺ ngá̰ý, ngn̄gən gə̄ i kə́ rāā kə gíndí ō, hēl̄ jīn gə̄ kə kə hēl̄ njan gə̄ i kə́ rāā kə gində̄ nə̄ngá kasaá ō. Yá̰a̰ gə̄ ń ni-əhɔdə́ ní əsadə́ gán̄gdə́ naā tə́ ō, gotə ń əsa aĺ ní ɓáa tə́ɓā kə njaneé ō.

²⁰ m̄-dəje kum gajə kə́ kutə gə̄ kə́ dɔ dā̰ ní tə́ ō, kum gajə kə́ rang ń əɓa á gajə mətá tə́sōn̄ kɔ̄ɔ́ non tə́ ní o. Gajə dā̰ ní kumən gə̄ ton̄ ō, aw̄ kə tan kə́ a tə́dań najə̄ ō, á̰a̰n ɓáa bo tɔȳ madə̄n gə̄ ō.

²¹ Dan ń m̄-na̰y kə̄ loo ka̰a̰ tə́ anī a rɔ̄ɔ̄ i gír de kə́ táĺ gə̄ ō, ni tetədə́ rɔ̄ɔ̄ ō.

²² Banī de kə́ tɔgə ɓə́ga ní reē gān̄g sarya kə́ gōtə́ tām̄ yā gír de kə́ táĺ gə̄ yā Nə́ɓā kə́ dɔɔ́ sa̰y ngá̰ý tə́. Dan ń kum mbang asə anī ngé kə́ táĺ gə̄ o̰o̰n̄ ɓē.

²³ Ni ədam̄ kum yá̰á̰ ní əda na: Dā̰ kə́ nge ko̰ sɔ́ ní i ko̰o̰ ɓē kə́ nge ko̰ sɔ́ kə́ a to dɔ nang tə́. Gotə ko̰o̰ ɓē gə̄ malang ní ni a to tītə̄də́ alé. Ni a taā loo malang kə́ dɔ nang tə́ ō, a tə́ɓā dɔ nang kə njaneé ō, a gángə̄n naā tə́ ō.

²⁴ Ba gajə dā̰ kə́ kutə gə̄ ní, i mban̄g gə̄ kutə kə́ o̰o̰n̄ ɓē gotə naā tə́ kem ɓē ko̰o̰ ní tə́. Mban̄g kə́ nge kutə gidə i kógə̄ḿ, kə́ to tītə̄ madən kə́ kété gə̄ aĺ a tɔ̄l̄ madə̄n kə́ mətá gə̄ kɔ̄ɔ́ yā ndiń dɔ ɓē tə́.

²⁵ Ni a tə́da najə̄ dɔ Nə́ɓā kə́ dɔɔ́ sa̰y ngá̰ý tə́ ō, a rāā gír de kə́ táĺ gə̄ yá̰á̰ kə́ tōr̄ ō. Ni a ɔjə tūr̄ gír ndɔ̄ naā gə̄ ō, ndū najə̄ ō. A əlan̄ de kə́ táĺ gə̄ kem jīn tə́ bátə́ ɓāl̄ mətá kə nāā mehḛ́.

²⁶ Gō tə́ anī ngé sarya kə́ dɔ rā̰ tə́ gə̄ a rāān̄ sarya, adə̄ nin̄ a rāān̄ kadə̄ gír ndi dɔ yá̰a̰ gə̄ tə́ malang yān gān̄g kɔ̄ɔ́, yā nujənneé sák sák kɔ̄ɔ́ ō, yā tḭ̄ḭń tan kə́ njɔ́ḿ gə̄ tə́ ō.

²⁷ Ba ko̰o̰ ɓē ō, ndi dɔ yá̰a̰ gə̄ tə́ malang ō, bo yā ɓē ko̰o̰ gə̄ malang kə́ dɔ nang tə́ ō ní, a adə̄n̄ gír de kə́ táĺ gə̄ yā Nə́ɓā kə́ dɔɔ́. Ko̰o̰ ɓē yān i ko̰o̰ ɓē kə́ a to ngándáńg. ngé ndi dɔ ɓē gə̄ tə́ malang a rāān̄ kəla yān ō a oōn̄ tan ō.

²⁸ Gír najə̄ ní gān̄g i loo ń toō tə́. Mā Daniel tā anī gír̄ yāḿ gə̄ əlan̄ ɓōĺ kemḿ tə́ ngá̰ý. gír̄ gə̄ ní rāāmə̄n̄ adə̄ m̄-tetə ndaa ō, asəm̄ gír̄ yá̰a̰ dɔ tə́ aĺ ō.