DANIEL 5 - Bibəl ta Sar̄

Mban̄g Baltajar rāā yá̰a̰ kəsa kə́ ngá̰ý

¹ Mban̄g Baltajar rāā yá̰a̰ kəsa kə́ ngá̰ý tām̄ yā de kə́ bo yān gə̄ tə́. De gə̄ ní i deē dūbú. Ni a̰ȳ kasə nduú sedə́.

² Kasə ní rāān adə̄ əda kadə̄ reēn̄ kə ngáń gájə́ yá̰a̰ rāā kəla gə̄ kə́ rāān̄ kə lɔ́rɔ́ ō, kə gində̄ arjā̰a̰á̰ ō ń bɔbə̄n Nabukodonosor ɔy kem kújə yā Kɔ́ɔ̄ɓē tə́ Jerusalem reēń ní. Ni sāā i yā ka̰ȳń kasə kə de kə́ bo yān gēé ō, kə də̄yá̰ gidə ndogə̄ yān gēé ō, kə dəyá̰ kə́ ngé rāā kəla yān gēé ō.

³ Adə̄ reēn̄ kə ngáń gájə́ yá̰a̰ rāā kəla gə̄ kə́ rāān̄ kə lɔ́rɔ́ ń ɔyn̄ kem kújə yā Kɔ́ɔ̄ɓē tə́ adə̄ i kem kújə yā Nə́ɓā tə́ Jerusalem ní, adə̄ mban̄g a̰ȳń yá̰a̰ kə mbā yān gēé.

⁴ Nin̄ a̰ȳn̄ kasə nduú ō, tɔ̄ȳn̄ nə́ɓā gə̄ kə́ rāān̄də́ kə lɔ́r ō, kə gində̄ arjā̰a̰ ō, kə gində̄ nə̄ngá kasə ō, kə gində̄ kə́ karī ō, kə kāgə̄ ō, kə mbal̄ ō.

⁵ Kə̄ ta jī tə́ noō jī deē teē hɔy, ngɔr kə̄ kadə kāgə̄ hor tə́ ba ndang yá̰a̰ kadə bɔr kújə yā mban̄g ń rāān̄ ho̰ rō̰ kə́ ndaa tū tə́ ní tə́. Dan ń mban̄g a̰a̰ jī deē ń a ndang yá̰á̰ ní anī

⁶ ta kumən tetə ndaa ō, gír̄ yān gə̄ əlan̄ ɓōĺ kemən tə́ ō, ni sōl̄ ō, dɔ kur jejə njan gə̄ tə́ndān̄ naā ō.

⁷ Mban̄g un ndūn kə̄ dɔɔ́ ngá̰ý ədań kə tɔ́gɔ́ kadə̄ reēn̄ kə ngé kum kedə̄ gə̄ kə́ Babilon rɔ̄n tə́, adə̄ i ngé bógə̄rō de gə̄ ō, ngé ger̄ tə́yō̰ gə̄ ō, kɔdə̄ sāā gə̄ ō. Ni un najə̄ ɔr̄ sedə́, ədadə́ na: Deē ń a tə́dá yá̰á̰ ń ndangən̄ toó ō, a ɔjəm̄ kumən ō anī a o̰ō̰ kūbə̄ kə́ majə ngá̰ý ō, a o̰ō̰ məde lɔ́r kɔ́ɔn tə́ ō, a tél nge ko̰o̰ ɓē kə́ dan ngé ko̰o̰ ɓē kə́ bo gə̄ tə́ kem ɓē ko̰o̰ yāḿ tə́ ō.

⁸ Ngé kum kedə̄ gə̄ malang ń a rāān̄ kəla yā mban̄g ní reēn̄, banī nin̄ asən̄ tə́dá yá̰á̰ ń ndangən̄ ní aĺ ō, asən̄ kɔjə mban̄g kum aĺ ō.

⁹ Adə̄ mban̄g sōl̄ ngá̰ý ō, ta kumən tetə ndaa tɔȳ kə́ kété ō, ɔr kum de kə́ bo yān gə̄ ngá̰ý ō.

Daniel ɔjə kum yá̰á̰ ń ndangən̄ ní

¹⁰ Dan ń kó̰o̰ mban̄g oō najə̄ kɔr̄ mban̄g ō, de kə́ bo yān gə̄ ō anī, udə kem kújə kəsa yá̰á̰ tə́ ba un najə̄ ɔr̄, əda na: Kɔ́ɔ̄ ɓē gə̄, ādə̄ dɔí ngan̄g májə́ májə́! Ādə̄ gír̄ yāí gə̄ əlan̄ ɓōĺ kemií tə́ aĺ ō, ādə̄ ta kumií tetə ndaa aĺ ō!

¹¹ De kógə̄ḿ kə́ ndíĺ nə́ɓā kə́ táĺ gə̄ i kemən tə́ ndi kem ɓē ko̰o̰ yāí tə́ noō. Ɓāl̄ yā bɔbí tə́ teēn̄ dɔ tə́ kadə̄ ni i de kə́ a̰a̰ yá̰á̰ ngá̰ý ō, i de kə́ nge ger̄ kum yá̰a̰ gə̄ ō, i de kə́ aw̄ kə kum kedə̄ kə́ tītə̄ yā nə́ɓā gə̄ ō. Adə̄ mban̄g Nabukodonosor ń i bɔbí ní əndān dɔ mbōlí gə̄ tə́ ō, ngé bógə̄rō de gə̄ tə́ ō, de ger̄ tə́yō̰ gə̄ tə́ ō kɔdə̄ sāā gə̄ tə́ ō.

¹² Ndíĺ kə́ kemən tə́ i ndíĺ kə́ tayā. Ni i de kə́ ger̄ kəndā ma̰ȳ yá̰a̰ ō, ger̄ kum yá̰a̰ ō, ger̄ kəda kum nī gə̄ ō, ger̄ kum səngó gə̄ ō, i de kə́ nge teē kə gíŕ yá̰á̰ kə́ to loo mundə̄ tə́ gə̄ ō. Beé ní ādə̄ ɓārə́n̄ Daniel ngeé ń toō ń mban̄g əndā rāān na i Beltasar ní ādə̄ reē. Ni a ɔjə kum yá̰á̰ ń ndangən̄ kadə̄ bɔr tə́ ní.

¹³ Adə̄ aw̄n̄ kə Danieleé rɔ̄ mban̄g tə́. Mban̄g un najə̄ ɔr̄, əda na: Daniel kə́ dan ɓəlo gə̄ kə́ Juda tə́ ń bɔbə́ḿ mban g ḭḭ sedə́ dɔ nang kə́ Juda tə́ reē sedə́ ní i īkɔ́ n toó a?

¹⁴ Ədan̄ najə̄ yāí adə̄ m-ōō. Ədan̄ na ndíĺ nə́ɓā gə̄ na i kemií tə́ ō, teēn̄ dɔ tə́ kadə̄ ḭ̄ i de kə́ á̰á̰ yá̰á̰ ngá̰ý ō, de kə́ nge ger̄ kum yá̰a̰ gə̄ ō, āw̄ kə kum kedə̄ kə́ tayā ō.

¹⁵ Reēn̄ kə ngé kum kedə̄ gə̄ ō, ngé bógə̄rō de gə̄ ō, rɔ̄ḿ tə́ kadə̄ tə́dan̄ yá̰á̰ ń ndangən̄ toó ō, ɔjəmən̄ kum ō, banī dum̄də́ kɔ̄ɔ́.

¹⁶ Ba mā m-ōō kadə̄ ḭ̄ na ásə kəda kum səngó gə̄ ō, teē kə gíŕ yá̰á̰ kə́ to loo mundə̄ tə́ gēé ō. Adə̄ ré ī-tə́dá yá̰á̰ ń ndangən̄ toó ō, ɔ́jəm̄ kum ō anī, ā ō̰ō̰ kūbə̄ kə́ kərē ning ō, ā ō̰ō̰ məde lɔ́ŕ kɔ́ɔ́í tə́ ō, ā ī-tél nge ko̰o̰ ɓē kə́ dan ngé ko̰o̰ ɓē kə́ bo gə̄ tə́ kem ɓē ko̰o̰ yāḿ tə́ ō.

¹⁷ Anī Daniel un najə̄ ɔr̄, əda mban̄g na: Kɔ́ɔ̄ ɓē gə̄, ī-ngɔ̄m̄ kadə̄ karī yāí gə̄ tām̄ yāí īkɔ́ tə́ ō, yá̰a̰ kəndā nja yāí gə̄ ní ādə̄ de kə́ rang gə̄ ō! Banī m-ā m̄-tə́dá yá̰á̰ ń ndangən̄ ní yā kadī ō, m-ā m-ɔ́jiī kumən ō.

¹⁸ Kété ní Nə́ɓā kə́ dɔɔ́ sa̰y ngá̰ý rāā adə̄ bɔbí Nabukodonosor ndi mban̄g kə́ bo ō, adə̄n kɔsə gɔn ō, hál de kə́ bo ō.

¹⁹ Bo ń adə̄n ní rāā adə̄ de kə́ gíŕdə́ i tayā tayā gə̄ ō, nápardə́ i tayā tayā gə̄ ō, ta yādə́ i tayā tayā gə̄ ō, ɓōĺ rāādə́ adə̄ ndewn̄ ta kumən tə́. Tɔdɔ̄ deē ń kemən ndigə tɔ̄lən a a tɔ̄lən ō, deē ń kemən ndigə kəya̰n a a əya̰n ō, deē ń kemən ndigə kɔsən kə̄ dɔɔ́ a a ɔsən kə̄ dɔɔ́ ō, deē ń kemən ndigə tél seneé kə̄ nang tə́ a a tél seneé kə̄ nang tə́ ō.

²⁰ Ba dan ń ɔjə rɔ̄n ō, gán̄g rɔ̄n ō anī, mbərenən̄ kɔ̄ɔ́ dɔ kōr̄ kāgə̄ mban̄g yān tə́ ō, ɔsən̄ gɔnən to̰ aĺ ō.

²¹ tə̄ɓānən̄ kɔ̄ɔ́ dan de gə̄ tə́ ō, kemən tél to tītə̄ kem dā̰ gə̄ ō, ndi i dan kərō kə́ bembeé gə̄ tə́ ō, a əsa i mu tītə̄ yā man̄g gə̄ ō, tal kə́ dɔ rā̰ tə́ əhɔ dā̰ rɔ̄n tə́ ō, bátə́ ugə̄ ndɔ̄ ń ni gerə̄ń kadə̄ Nə́ɓā kə́ dɔɔ́ sa̰y ngá̰ý aw̄ kə tɔ́gə dɔ ko̰o̰ ɓē yā de gə̄ tə́ ō, ni i nge kadə̄ deē ń kemən ndigə ní ko̰o̰ ɓē ō ní.

²² Ḭ̄ ngōnən Baltajar ī-ger̄ yá̰a̰ gə̄ ń noō malang, banī ī-sɔl̄ dɔí alé.

²³ Ḭ̄ ī-tɔ́sə̄ gātə̄ Nə́ɓā kə́ dɔ rā̰ tə́, tām̄ ādə̄ reēn̄ kə ngáń gájə́ yá̰a̰ rāā kəla gə̄ kə́ kem kújə yān tə́ adə̄ ā̰yń kasə nduú, ḭ̄ ō, de kə́ bo yāí gə̄ ō, də̄yá̰ gidə ndogə̄ yāí gə̄ ō, dəyá̰ kə́ ngé rāā kəla yāí gə̄ ō. Tá ɓáý to̰ ní ḭ̄ ī-tɔ̄ȳ nə́ɓā gə̄ kə́ rāān̄də́ kə gində̄ arjā̰a̰ ō, kə lɔ́r ō, kə gində̄ nə̄ngá kasə ō, kə gində̄ kə́ karī ō, kə kāgə̄ ō, kə mbal̄ ō. Adə̄ i nə́ɓā gə̄ kə́ a̰a̰n̄ loo aĺ ō, oōn̄ loo aĺ ō, gerə̄n̄ yá̰a̰ aĺ ō. Ba Nə́ɓā ń koōí ō, yá̰a̰ gə̄ ń a reēn̄ dɔí tə́ ndɔ̄n tə́ ō, i kem jīn tə́ ní, ḭ̄ ī-rɔȳn alé!

²⁴ I tām̄ najə̄ ń noō tə́ n ni-əla jī deē reē ndang yá̰á̰ ń toō ní.

²⁵ Najə̄ ń ndang ní n toó: Mene, mene, tekel, uparsin.

²⁶ Kumən n toó: Mene ní kumən na i tə́dan̄, adə̄ Nə́ɓā tə́da ko̰o̰ ɓē yāí kɔ̄ɔ́ ō, rāā adə̄ gír ko̰o̰ ɓē yāí gān̄g kɔ̄ɔ́ ō.

²⁷ Tekel ní kumən na mbɔ̄jə́n̄ kɔȳn, adə̄ mbɔ̄jə́n̄ kɔyí kə yá̰a̰ mbɔ̄jə́ kɔȳ yá̰á̰, ba a̰a̰n̄ kadə̄ ásə alé.

²⁸ Peres ní kumən na gāngə̄n̄ naā tə́, adə̄ gāngə̄n̄ ko̰o̰ ɓē yāí naā tə́ yā kadə̄ Medə gə̄ núsən kógə̄ḿ ō, yā kadə̄ Persə gə̄ núsən kə́rēý ō.

²⁹ Kə̄ ta jī tə́ noō Baltajar əda ngé kəla yān gə̄ kadə̄ əlan̄ kūbə̄ kə́ kərē ning rɔ̄ Daniel tə́ ō, kadə̄ ənīn̄ məde lɔ́ŕ kɔ́ɔn tə́ ō, ni-əda kadə̄ ənīn̄ mbēr̄ na Daniel na tél nge ko̰o̰ ɓē dan ngé ko̰o̰ ɓē kə́ bo gə̄ tə́ kem ɓē ko̰o̰ yān tə́ ō.

³⁰ Ndɔ̄ɔ́ ndɔ̄ nəkɔ́ noō tə́ tɔ̄lə̄n̄ Baltajar mban̄g kə́ Babilon.