DANIEL 4 - Bibəl ta Sar̄

¹ Kété ní mā Nabukodonosor m̄-ndi i loo yāḿ jəke kem kújə yāḿ tə́ ō, rɔ̄ḿ nelə̄m̄ ngá̰ý kem kújə mban̄g yāḿ tə́ ō.

² Ndɔ̄ kə́rēý tə́ m̄-to dɔ tə̄rá yāḿ tə́ ndɔ̄ɔ́ anī nī kógə̄ḿ rāām̄, adə̄ m̄-gír̄ najə̄ ngá̰ý, tɔdɔ̄ yá̰á̰ ń m-á̰a̰ā̰ ní to ɓōĺ ngá̰ý.

³ Adə̄ m-ə́da kadə̄ reēn̄ kə ngé kum kedə̄ gə̄ malang kə́ Babilon rɔ̄ḿ tə́ kadə̄ ɔjəmə̄n̄ kum nī ní.

⁴ Dan ń mbōlí gə̄ ō, ngé bógə̄rō de gə̄ ō, ngé ger̄ tə́yō̰ gə̄ ō, kɔdə̄ sāā gə̄ ō, reēn̄ anī m-ɔ́jə́də́ gotə nī ní, banī nin̄ ɔjəmə̄n̄ kum alé.

⁵ Ta tɔ̄l̄ ta anī Daniel ń rīn kə́ ko̰ jōó na i Beltasar ní reē rɔ̄ḿ tə́ ō. Əndān̄ rīn kə́ ko̰ jōó ní i kə rī nə́ɓā yāḿ. Ndíĺ nə́ɓā kógə̄ḿ kə́ dan nə́ɓā kə́ táĺ gə̄ tə́ i kem Daniel tə́. M-ɔ́jə Daniel gotə nī yāḿ ní,

⁶ m-ə́dan na: Beltasar, ngār yā mbōlí gə̄, m̄-ger̄ kadə̄ ndíl nə́ɓā kə́ táĺ gə̄ i kemií tə́, adə̄ yá̰á̰ kə́ to loo mundə̄ tə́ kə́ kadə̄ dum̄ dɔí gətóo. Ní, ɔ́jəm̄ kum yá̰á̰ ń m-á̰a̰ā̰ kem nī tə́ ní.

⁷ Dan ń m̄-to dɔ tə̄rá yāḿ tə́ ní, yá̰á̰ ń m-á̰a̰ā̰ ní n toó: Kāgə̄ kógə̄ḿ kə́ bo ngá̰ý ra dɔ nang tə́ danaá bang.

⁸ Kāgə̄ ní tɔgə ō ngan̄g ō, ngāl̄ bátə́ ɔdə no rā̰ ō. Deē ra i ta ngóy dɔ nang tə́ gə̄gē a a̰a̰ kāgə̄ ní.

⁹ Mbīn majə ngá̰ý ō, kanən̄ i ngá̰ý ō, yá̰a̰ kəsa yā de gə̄ malang i kemən tə́ ō, dā̰ kə́ bembeé gə̄ a ɓɔ̄ɔ̄n̄ rɔ̄də́ i gírən tə́ ō, yel̄ kə́ dɔɔ́ gə̄ a rāān̄ ɓēdə́ i ta jīn gə̄ tə́ ō. Dā̰ rɔ̄ malang a ənge yá̰a̰ kəsa yān i rɔ̄n tə́.

¹⁰ m̄-to i dɔ tə̄rá yāḿ tə́ n m-ā m-á̰a̰ń yá̰a̰ gə̄ ní. Gō tə́ anī m-á̰a̰ de kə́ dɔ rā̰ tə́ kógə̄ḿ ḭḭ dɔ rā̰ tə́ jə̄ngā.

¹¹ Ni-əda kə́ tɔ́gɔ́ na: Ī-tə́gāī kāgə̄ ń toō kɔ̄ɔ́ ō, ī-tɔ́rī ta jīn gə̄ kɔ̄ɔ́ ō! Ī-túyiī mbīn gə̄ ō, ī-tə̄ndāī kanə̄n gə̄ ī-tḭ̄ḭ̄ kə̄ loo gə̄ tə́ ō! Ādə̄ dā̰ gə̄ a̰ȳn̄ naā gírən tə́ kɔ̄ɔ́ ō, ādə̄ yel̄ gə̄ a̰ȳn̄ naā kɔ̄ɔ́ ta jīn gə̄ tə́ ō!

¹² Banī ə́ya̰ī gír gisən ādī ra nang tə́ kə ngəran gēé kem mu gə̄ kə́ bembeé tə́. Ba ī-tó̰ō̰niī kə súĺ kə́ rāā kə gində̄ kə́ karīí ō, kə súĺ kə́ rāā kə gində̄ nə̄ngá kasaá ō. Ādə̄ tal əhɔ dɔn tə́ ō, ādə̄ əsa mu tītə̄ yā dā̰ gə̄ ō.

¹³ A tūrə̄n̄ dan wurən kɔ̄ɔ́ kadə̄ tél to tītə̄ yā deē alé, ba a adə̄nən̄ dan wur dā̰. Ādə̄ gír gisən ní ra tītə̄ ń noō bátə́ ɓāl̄ sīrí!

¹⁴ Yá̰á̰ ní a rāā yá̰a̰ i kə ta kūl̄ yá̰á̰ kə́ yā ndang kadə̄ yā rāā yā de kə́ dɔ rā̰ tə́ gēé, yā kadə̄ ngé ndi kə kumdə́ gə̄ malang ger̄nə̄n̄neé kadə̄ Nə́ɓā kə́ dɔɔ́ sa̰y ngá̰ý aw̄ kə tɔ́gə dɔ ko̰o̰ ɓē yā deē ndul gə̄ tə́. I deē ń kemən ndigə kadə̄n ko̰o̰ ɓē ní n ni a adə̄n ko̰o̰ ɓē ní. Deē ń tél kə rɔ̄neé kə̄ nang tə́ tɔȳ yā de gə̄ malang ní gə̄gē, ni asə kɔsən kə̄ dɔɔ́ yā kəndān dɔ ɓē tə́.

¹⁵ Nī ń rāām̄ mā mban̄g Nabukodonosor ní n noó. Ba ḭ̄ Beltasar, yāí i kadə̄ ɔ́jəm̄ kum. Tɔdɔ̄ ngé kum kedə̄ gə̄ malang kə́ kem ɓē ko̰o̰ yāḿ tə́ asəm̄ kɔjəm̄ kum alé. Banī ḭ̄ ásə, tām̄ ndíĺ nə́ɓā kə́ táĺ gə̄ i kemií tə́.

Daniel ɔjə kum nī yā mban̄g

¹⁶ Loo ń noō tə́ ɓōĺ rāā Daniel ń a ɓāŕnən̄ na i Beltasar ní ngá̰ý asə kum mban̄g kógə̄ḿ ō, gír̄ najə̄ yān gə̄ kə́ kemən tə́ rāānən̄ adə̄ sōl̄ ō. Mban̄g un najə̄ ɔr̄, əda na: Beltasar, ī-lōō sōl̄ najə̄ yā nī ní tə́ ō, najə̄ yā kumən tə́ ō! Beltasar dalən əda: Kɔ́ɔ̄ ɓē gə̄, ādə̄ nī ní i tām̄ yā madə̄ ba̰ā̰í gə̄ tə́ ō, ādə̄ kumən i tām̄ yā ngé rɔ̄ɔ̄í gə̄ tə́ ō.

¹⁷ Kāgə̄ ń á̰a̰ā̰ á tɔgə ō ngan̄g ō, ngāl̄ ugə̄ no rā̰ tə́ ō deē ra i rá dɔ nang tə́ gə̄gē a a̰a̰ ō,

¹⁸ mbīn i kə́ majə ō, kanə̄n i ngá̰ý ō, yá̰a̰ kəsa yā de gə̄ malang i kemən tə́ ō, dā̰ kə́ bembeé gə̄ a ndin̄ i gírən tə́ ō, yel̄ kə́ dɔɔ́ gə̄ a rāān̄ ɓēdə́ i kem mbīn kə́ əga ku gə̄ tə́ ō ní,

¹⁹ kɔ́ɔ̄ ɓē gə̄, kāgə̄ ní i ḭ̄! Tɔdɔ̄ ī-tél de kə́ bo ō tɔ́gí to ō, ī-tɔgə bátə́ ɔ́də no rā̰ ō, ó̰o̰ ɓē bátə́ ta ngóy dɔ nang tə́ ō.

²⁰ Gō tə́ anī á̰a̰ de kə́ dɔ rā̰ tə́ kógə̄ḿ ḭḭ dɔ rā̰ tə́ jə̄ngā ba əda na: Ī-tə́gāī kāgə̄ ń toō kɔ̄ɔ́ ō, ī-nujiī seneé kɔ̄ɔ́ ō! Banī ə́ya̰ī gír gisən ādə̄ ra nang tə́ kə ngəran gēé kem mu gə̄ kə́ bembeé tə́. Ba ī-tó̰ō̰ niī kə súĺ kə́ rāā kə gində̄ kə́ karīí ō, kə súĺ kə́ rāā kə gində̄ nə̄ngá kasaá ō. Ādə̄ tal əhɔ dɔn tə́ ō, ādə̄ ə sa yá̰a̰ kəsa dā̰ kə́ bembeé gə̄ ō, ɓāl̄ sīrí.

²¹ Kɔ́ɔ̄ ɓē gə̄, kum nī ní n noó kə gō yá̰á̰ ń Nə́ɓā kə́ dɔɔ́ sa̰y ngá̰ý gḛy rāā seí ní.

²² A təbānī kɔ̄ɔ́ dan de gə̄ tə́. Ā ī-ndi i dan dā̰ kə́ bembeé gə̄ tə́. Ā ə́sa i mu tītə̄ yā man̄g gə̄ ō, tal a əhɔ dɔí tə́ ō. Ā ī-ndi i tītə̄ ń noō bátə́ ɓāl̄ sīrí. ré gír ɓāl̄ kə́ sīrí gə̄ gān̄g anī, ā ī-ger̄ kadə̄ Nə́ɓā kə́ dɔɔ́ sa̰y ngá̰ý aw̄ kə tɔ́gə dɔ ɓē ko̰o̰ yā deē ndul gə̄ tə́ ō, ni i nge kadə̄ deē ń kemən ndigə ní ko̰o̰ ɓē ō.

²³ Gō tə́ anī ədan̄ najə̄ yā kəya̰ gír gisə kāgə̄ ní kadə̄ ra nang tə́ kə ngəran gēé. Kumən n toó: A télən̄ kə ko̰o̰ ɓēé yā kadī gogə́ kum mbang ń ā ī-gerə̄ń kadə̄ Nə́ɓā kə́ dɔɔ́ i kɔ́ɔ̄ yá̰a̰ gə̄ ní.

²⁴ Tām̄ najə̄ ń noō tə́ ní, kɔ́ɔ̄ ɓē gə̄, majə kadə̄ ī-ndigə kɔjə yāḿ! Ə̄gā kə̄rā yá̰á̰ kə́ majaĺ gə̄ ń ī-rāā ní kə ta kūl̄ rāā yá̰á̰ kə́ gōtə́ gə̄ ō, ə̄ga kə̄rā najə̄ ń əhɔī ní kə ta kūl̄ ka̰a̰ kum tō ndoō yā ngé ndoō gēé ō. Ré ī-rāā tītə̄ ń noō ɓáa majə a kum mbang ndi majə yāí a to kum kə̄ kété.

Yá̰á̰ ń nī ɔjə ní rāā yá̰a̰

²⁵ Yá̰a̰ gə̄ ń noō rāān̄ mban̄g Nabukodonosor malang.

²⁶ Tām̄ ɓāl̄ kógə̄ḿ gō tə́ ní, mban̄g a njə̄rā dɔ kújə mbang kə́ Babilon tə́ anī,

²⁷ un najə̄ ɔr̄, əda na: Babilon ń ɓē kə́ bo ń m̄-rāān i loo ndi mban̄g tə́ ní n toó. Ni ɔjə kə̄ ndágá kadə̄ tɔ́gə́ḿ i ngá̰ý ō, kadə̄ ko̰o̰ ɓē yāḿ to kɔsə gɔn ngá̰ý ō.

²⁸ Najə̄ ní i ta mban̄g tə́ ɓáý anī deē kógə̄ḿ ɔr̄ najə̄ dɔ rā̰ tə́ adə̄ ndūn ɓār̄ əda na: Mban̄g Nabukodonosor, ōō najə̄ ń toō, taān̄ ko̰o̰ ɓē jīí tə́ kɔ̄ɔ́!

²⁹ A tə̄ɓānī kɔ̄ɔ́ dan de gə̄ tə́! Ā ī-ndi i dan dā̰ kə́ bembeé gə̄ tə́ ō, ā ə́sa i mu tītə̄ yā man̄g gə̄ ō! Ā ī-ndi tītə̄ ń noō bátə́ ɓāl̄ sīrí. Ré gír ɓāl̄ kə́ sīrí gə̄ gān̄g anī ā ī-ger̄ kadə̄ Nə́ɓā kə́ dɔɔ́ sa̰y ngá̰ý aw̄ kə tɔ́gə dɔ ko̰o̰ ɓē yā deē ndul gə̄ tə́ ō, ni i nge kadə̄ deē ń kemən ndigə ní ko̰o̰ ɓē ō.

³⁰ Yá̰á̰ ní rāā mban̄g Nabukodonosor kə̄ ta jī tə́ noō: Tə̄ɓānən̄ kɔ̄ɔ́ dan de gə̄ tə́ ni a ə́sa i mu tītə̄ yā man̄g gə̄ ō, tal kə́ dɔ rā̰ tə́ əhɔ dɔ dā̰ rɔ̄n tə́ ō. Nənga dɔn ngāl̄ asə kə bel̄ kə̄rōó ō, hēl̄ jīn gə̄ kə hēl̄ njan gə̄ ngālə̄n̄ tītə̄ yā yel̄ gə̄ ō.

Nabukodonosor ənge rɔ̄ ngáā

³¹ Nabukodonosor əda na: Dan ń gír ɓāl̄ sīrí gə̄ gān̄g ní, mā Nabukodonosor m-ə̄nī kumḿ kə̄ dɔ rā̰ tə́ anī, kemḿ ger̄ najə̄ gogə́. m̄-rāā Nə́ɓā kə́ dɔɔ́ sa̰y ngá̰ý kə́ra. m̄-tɔ̄ȳ nge ndi kə kumneé ngándáńg ō, m-ɔ́sə gɔnən ō. Tām̄ tɔ́gə ko̰o̰ ɓē yān i tɔ́gə́ kə́ a to ngándáńg ō, ko̰o̰ ɓē yān a to ngándáńg ō,

³² De kə́ dɔ nang tə́ gə̄ malang ká nin̄ i ngá̰ý tītə̄ rí gə̄gē, nin̄ i yá̰a̰ alé ta kumən tə́. Ni a rāā yá̰a̰ i kə gō kem ndigə yānneé kə de kə́ dɔ rā̰ tə́ gēé ō, kə de kə́ dɔ nang tə́ gēé ō. De kə́ asə kəhɔ jīn ba kədan na ké ā i rí n toó wa ní gətóo.

³³ Kə̄ ta jī tə́ noō kemḿ tél ger̄ najə̄ gogə́ ō, yā kɔsən gɔn ko̰o̰ ɓē yāḿ ní hálə́ḿ kə́ loo de kə́ bo tə́ tél reē gogə́ ō, m̄-tél m̄-majə deē gogə́ ō. Ngé kadə̄m̄ kɔjə gə̄ ō, de kə́ bo yāḿ gə̄ ō, nāgə́n̄ láẃ reē sāān̄ njaḿ. Tél əndāmə̄n̄ nge ko̰o̰ ɓē tə́ gogə́ ō, rɔȳmə̄n̄ tɔȳ kə́ kété ō.

³⁴ Adə̄ ngɔlaā ní mā Nabukodonosor m̄-tɔ̄ȳ Mban̄g kə́ dɔ rā̰ tə́ ō, m̄-rāān adə̄ rɔ̄n nelə̄n ō, m-ɔ́sə gɔnən ō. Tɔdɔ̄ kəla rāān malang i kə́ rɔ̄kum ō, gō róbə yān gə̄ i gō róbə́ kə́ gōtə́ gə̄ ō, ngé kɔjə rɔ̄də́ gə̄ ní ni asə tél sedə́ kə̄ nang tə́ ō.