AMOS 7 - Bibəl ta Sar̄

Yá̰á̰ kə́ ta kəga dɔ ń Amos a̰ā̰ ní i yim̄ gə̄

¹ Yá̰á̰ ń Kɔ́ɔ̄ɓē Nə́ɓā rāā adə̄ m-á̰a̰ā̰ ní n toó: Ni-ndi a rāā i yim̄ gə̄. I dan ń əjan̄ mu kə́ ta kəga dɔ kə́ tām̄ yā mban̄g tə́ oy á mu tél a əɓa gogə́ ní.

² Ba dan ń yim̄ gə̄ əsan̄ mu malang kə́ kem ɓēé kɔ̄ɔ́ anī, m-ə́da na: Kɔ́ɔ̄ɓē Nə́ɓā, m̄-rāāī ɓɔ́, ba ī-mā̰ȳ rɔ̄í dɔ gír deē yāí gə̄ tə́! Ré i beé aĺ ní, nin̄ a télən̄ i rí? Nin̄ dūún̄ ngá̰ý!

³ Loo ń noō tə́ Kɔ́ɔ̄ɓē lōō gíŕ yá̰á̰ ń ni sāā rāā tə́ ní, adə̄ əda na: Yá̰á̰ ní a rāā yá̰a̰ alé.

Yá̰á̰ kə́ nge ko̰ jōó i hor

⁴ Yá̰á̰ ń Kɔ́ɔ̄ɓē Nə́ɓā rāā adə̄ m-á̰a̰ā̰ ɓáý to̰ ní n toó: Ni sāā gān̄g sarya kógə̄ḿ kə horoó. Loo təngā rāā adə̄ man̄ kə́ gíŕ nángāá iī kɔ̄ɔ́ ō, loo təngā ní əla hor dɔ ɓē kə́ Israel tə́ ō.

⁵ Tā anī m-ə́da na: Kɔ́ɔ̄ɓē Nə́ɓā, m̄-rāāī ɓɔ́, ba ī-dəba. Ré i beé aĺ ní, gír deē yāí gə̄ a télən̄ i rí? Nin̄ dūún̄ ngá̰ý!

⁶ Loo ń noō tə́ Kɔ́ɔ̄ɓē lōō gíŕ yá̰á̰ ń ni a sāā rāā tə́ ní, adə̄ əda na: Yá̰á̰ ń noō a rāā yá̰a̰ aĺ ō.

Yá̰á̰ kə́ nge ko̰ mətá i kəlā kə́ gində̄ pəlo̰ i ta tə́

⁷ Yá̰á̰ ń Kɔ́ɔ̄ɓē rāā adə̄ m-á̰a̰ā̰ gō yá̰a̰ gə̄ ń noō tə́ ní n toó: Ni-ra i kə njan kə́ dɔɔ́ kadə ndogə̄ mbal̄ kógə̄ḿ tə́ ō, əhɔ kəla kógə̄ḿ kə́ gində̄ pəlo̰ i ta tə́ jīn tə́ ō.

⁸ Kɔ́ɔ̄ɓē dəjem̄ najə̄, əda na: Amos, yá̰á̰ ń á̰a̰ā̰ ní i rí? Anī m̄-tél m-ə́dan na: I kəlā kógə̄ḿ kə́ gində̄ pəlo̰ i ta tə́. Kɔ́ɔ̄ɓē un ta najə̄ yān kum kə̄ kété əda na: Yá̰á̰ ń m-á̰a̰ā̰ ní toó: Gír deē yāḿ gə̄ ton̄ i tītə̄ ndogə̄ mbal̄ kə́ ra súmūú aĺ beē. Ngɔlaā ní, m-ā m̄-mā̰ȳ rɔ̄ḿ dɔdə́ tə́ to̰ alé.

⁹ Loo ndɔ̄ȳ gə̄ yā kojə yā Isaak ní, m-ā m̄-nujəń kɔ̄ɔ́ ō, loo kə́ kɔr̄ kam̄ tām̄ yā Nə́ɓā tə́ gə̄ yā Israel ní, m-ā m̄-nujəń kɔ̄ɔ́ ō, m-ā m̄-rɔ̄ɔ̄ kojə kə́ ndogó mbangāá yā Jeroboam ō.

Tə̄ɓān̄ Amos Betel kɔ̄ɔ́

¹⁰ Amasia ń i nge tun̄ yá̰á̰ kə́ kem ɓē kə́ Betel tə́ ní, əla kəla rɔ̄ Jeroboam mban̄g kə́ Israel tə́ tə́, ni ədan na: Amos sāā mbəreī kɔ̄ɔ́ dɔ kōr̄ kāgə̄ mbang kə́ Israel tə́ tə́. De kə́ kem ɓēé gə̄ asən̄ tə́gā tadə́ dɔ najə̄ kɔrə̄n gə̄ tə́ to̰ alé.

¹¹ Tɔdɔ̄ najə̄ ń ni-əda ní n toó: Jeroboam a oy yo mósə tɔdɔ̄ a tɔ̄l̄nən̄ ō, a ɔyn̄ Israel gə̄ yā kaw̄ sedə́ dɔ ɓē kə́ rang tə́ dɔ gúú tə́ kadə̄ nin̄ i sa̰y rɔ̄ ɓē yādə́ tə́ ō.

¹² Gō tə́ anī Amasia əda Amos na: Nge ka̰a̰ yá̰a̰, āw̄ kɔ̄ɔ́, ī-tél āw̄ gogə́ dɔ nang kə́ Juda tə́! Nú ní ā ásə kənge yá̰a̰ kəsa yā ndiń kə kumií kə ta kūl̄ kógə̄ naā kə́ loo nge koō ta tə́!

¹³ Ba Betel tə́ laā ɓáa, ādə̄ asiī kɔr̄ najə̄ kə́ loo nge koō ta tə́! Tɔdɔ̄ i loo kə́ kɔr̄ kam̄ yā mban̄g ō, i kújə yā Kɔ́ɔ̄ɓē kə́ kem ɓē ko̰o̰ tə́ ō.

¹⁴ Amos tél əda Amasia na: Kété ní, mā i nge koō ta aĺ ō, m̄-teē i loo ndóō yá̰á̰ kógə̄ḿ yā ngé koō ta gə̄ tə́ aĺ ō. M-ā m-ūl̄ i man̄g gə̄ ō, m-ā m-á̰a̰ i gō kāgə̄ kótə̄ kə́ bembeé gə̄ ō.

¹⁵ Banī Kɔ́ɔ̄ɓē unəm̄ i dan ń mā i gō man̄g gə̄ tə́ ní. Ni ədam̄ na: Āw̄ ɔ̄r̄ najə̄ kə Israel gə̄ ń i gír deē yāḿ gə̄ ní ādə̄m̄.

¹⁶ Banī ḭ̄ Amasia ə́dam̄ na kə m̄-lōō kəda najə̄ kə́ Nə́ɓā əndā taḿ tə́ yā rɔ̄ɔ̄ń Israel, kə m̄-lōō kɔy najə̄ kə̄ naā tə́ dɔ kojə yā Isaak tə́!

¹⁷ I beé ní, najə̄ ń Kɔ́ɔ̄ɓē əda ní n toó: Nə̄yá̰í a téĺ ájə́ba kem ɓēé ō, a tɔ̄lə̄n̄ ngání kə́ dəngam gə̄ ō kə́ dəyá̰ gə̄ ō, a mbɔ̄jə́n̄ ngāl̄ dɔ nang yāí yā nə̄ɓō de kə́ rang gə̄ ō. Ba ḭ̄ ā óy kem ɓē kógə̄ḿ kə́ yḛr tə́ ō, a ɔyn̄ Israel gə̄ yā kaw̄ sedə́ dɔ ɓē kə́ rang tə́ dɔ gúú tə́, kadə̄ nin̄ i sa̰y rɔ̄ ɓē yādə́ tə́ ō.