AMOS 4 - Bibəl ta Sar̄

¹ Sḭḭ̄ dəyá̰ kə́ Samari gə̄ ń ī-boōī lútə́ lútə́ tītə̄ kó̰o̰ man̄g gə̄ kə́ Basan ní, ōōī najə̄ ń toō: Sḭḭ̄ ī-rējī ngé ndoō gə̄ kə yá̰a̰ rāāsí kə́ gōtə́ aĺ ō, ī-tə́nāī ngé rɔ̄ tō ndoō gə̄ nang tə́ ō, ba ə́daī ngaasí gə̄ na: Ī-reē kə yá̰a̰ ka̰yā̰á̰ tā!

² Kɔ́ɔ̄ɓē túbə̄ əda na: Tītə̄ nəkɔ́ ń mā i Nə́ɓā kə́ táĺ rɔ̄kum noó, ndɔ̄ a reē noó yā kadə̄ de gə̄ a əhɔn̄sí yā kaw̄ sesí ō, a ndɔ́rə̄n̄sí kógə̄ḿ kógə̄ḿ tītə̄ kānjə̄ gə̄ kə́ əhɔn̄də́ kə gində̄ kə́ ta ruguú, aláa kə kuyú beē yā kaw̄ń ndo̰ kanjāá.

³ Ā ī-teēī kɔ̄ɔ́ kem ɓēé i kum bəlo loo gə̄ kə́ tū ndogə̄ mbal̄ tə́ tə́. Sḭḭ̄ kógə̄ḿ kógə̄ḿ ní, náā nəkɔ́ ɓáa kumən i súmūú non tə́ ō, a ɓōkə́n̄sí i kum kə̄ dām̄ mbɔ́r ɓē kə́ ko̰ó̰ tə́ ō. Najə̄ ń Kɔ́ɔ̄ɓē əda ní n noó.

Tun̄ yá̰a̰ ō, kɔr̄ yá̰á̰ kə́ nge ko̰ kutə kadə̄ ō kə́ ndāng karī

⁴ Sḭḭ̄ Israel gə̄, ī-na̰yiī kə̄ loo mbātə́ najə̄ gōḿ tə́ tə́ kə̄ nosí tə́, tɔdɔ̄ āwī kújə ɓesə̄ kə́ Betel tə́ ō, ī-mbātíī najə̄ gōḿ tə́ ɓáý to̰ kə̄ nosí tə́, tɔdɔ̄ āwī Gilgal ō. I tītə̄ ń noō n ā ī-mānīiń dɔ ndūḿ kum kə̄ kété ɓáý to̰ ní! Teē gidə gō ndɔ̄ ń sḭḭ̄ ūgīiń tə́ ní, ī-ndējī yá̰a̰ tun̄ yāsí gə̄ ō, kə ndɔ̄ kə́ nge ko̰ mətá anī, ī-ndējī kadə̄ karī yāsí gə̄ ō.

⁵ Ī-róōī mápá kə́ kaa mápa i tū tə́ dɔ loo tun̄ yá̰á̰ tə́, kadə̄ i yá̰a̰ tun̄ yāsí kə́ yā ɓōkə́nń tɔ̄ȳ. Israel gə̄, yá̰a̰ ndējə̄ yāsí gə̄ ń ī-ndējə̄mī kə gō kem ndigə yāsí ní, ə̄nīī mbēr̄ dɔ tə́ ta kum de gə̄ tə́ malang, tām̄ i nge ń noō n nel̄sí ní! Najə̄ ń Kɔ́ɔ̄ɓē Nə́ɓā əda ní n noó.

Tāā kə́ rāā yá̰á̰ kógə̄ḿ alé

⁶ Mā m̄-rāā adə̄ ɓō əsō dɔsí tə́ kə̄ kem ɓē bo yāsí gə̄ tə́ malang. M-ɔ̄gə̄sí yá̰a̰ kəsa kə̄ kem ngán ɓē yāsí gə̄ tə́ malang, banī sḭḭ̄ ī-téliī ī-reēī kum kə̄ rɔ̄ḿ tə́ alé. Najə̄ ń Kɔ́ɔ̄ɓē əda ní n noó.

⁷ M-ɔ̄gə̄sí man̄, adə̄ man̄ edə dɔsí tə́ alé nāā mətá kété no sāā kōō gə̄ tə́. m̄-rāā adə̄ man̄ edə dɔ ɓē kógə̄ḿ tə́ banī edə dɔ ɓē kə́ rang tə́ alé. M-ādə̄ man̄ edə dɔ ndɔr̄ kógə̄ḿ tə́ banī edə dɔ ndɔr̄ kə́rēý tə́ alé, adə̄ ndɔr̄ ní tutə kɔ̄ɔ́.

⁸ De kə́ kem ɓēé gə̄ ḭḭn̄ ɓē kə́rēý tə́ aw̄n̄ ɓē kə́ rang tə́ sāā man̄ ka̰yā̰á̰, banī nin̄ əngen̄ asə tadə́ alé. Ɓá tā banī sḭḭ̄ ī-téliī ī-reēī kum kə̄ rɔ̄ḿ tə́ alé. Najə̄ ń Kɔ́ɔ̄ɓē əda ní n noó.

⁹ Mā m̄-rāā ādə̄ kōō yāsí gə̄ tutən̄ ta bēl̄ tə́ aláa ndumən̄ kem ndɔrɔ́. Mā m̄-nujə ndɔr̄ tá̰a̰ yāsí gə̄ ō, ndɔr̄ kāgə̄ nduú yāsí gə̄ ō, gaẃ gə̄ əsan̄ kāgə̄ kótə̄ yāsí gə̄ ō, kāgə̄ olibə yāsí gə̄ ō. Ɓá tā banī sḭḭ̄ ī-téliī ī-reēī kum kə̄ rɔ̄ḿ tə́ alé. Najə̄ ń Kɔ́ɔ̄ɓē əda ní n noó.

¹⁰ m̄-rāā adə̄ mo̰y ngāl̄bɔ̄gīí kógə̄ḿ kə́ tītə̄ nge ń əsō dɔ dā̰ gə̄ kə́ Ejiptə tə́ ní, əsō dɔsí tə́. M-ə́ya̰ madə̄ ba̰ā̰ gə̄ adə̄ tɔ̄lə̄n̄ balsáa yāsí gə̄, dan ń de gə̄ a ɔyn̄neé sə́nda yāsí gə̄ ní. Sēē nīń kə́ otə majaĺ ngá̰ý aw̄ bátə́ ugə̄ kó̰ńsí tə́. Ɓá tā banī sḭḭ̄ ī-tél ī-reēī kum kə̄ rɔ̄ḿ tə́ alé. Najə̄ ń Kɔ́ɔ̄ɓē əda ní n noó.

¹¹ m̄-mbə́rē yá̰a̰ malang kə́ ɓēé loosí m̄-tə́nī kɔ̄ɔ́, tītə̄ kə́ kété kə́ Sodom tə́ ō kə́ Gomor tə́ ō. Adə̄ ī-toī i tītə̄ ta kīr̄ hor kə́ deē ɔr̄ kum hor tə́ kɔ̄ɔ́ beē. Ɓá tā banī sḭḭ̄ ī-tél ī-reēī kum kə̄ rɔ̄ḿ tə́ alé. Najə̄ ń Kɔ́ɔ̄ɓē əda ní n noó.

¹² Israel, i tām̄ najə̄ ń noō tə́ n ā á̰á̰ yá̰á̰ ń m-ā m̄-rāā seí ní. Sɔɔ̄ ń yá̰á̰ ń m-ā m̄-rāā yā rāā seí ní, ī-rāā gō rɔ̄í tá kadə̄ ī-ndɔ̄də̄məń mā Nə́ɓā yāí.

¹³ I ni n rāā mbal̄ bo gə̄ ní. Ni-rāā nél ō, ɔjə deē ndul gə̄ yá̰a̰ gə̄ ń ni núm̄ rāā ní ō. Ni-rāā loo kə́ dəloí kə́ unjə̄ kow adə̄ tél loo kə́ ndɔ̄ɔ́ ō, njə̄rā dɔ loo kə́ kḭḭ kə̄ dɔɔ́ gə̄ kə́ dɔ nang tə́ tə́ ō. Rīn na i Kɔ́ɔ̄ɓē, Nə́ɓā kə́ kɔ́ɔ̄ dɔ rā̰ ō dɔ nang ō.