AMOS 3 - Bibəl ta Sar̄

Gír de gə̄ yā Nə́ɓā a ɔrən̄ gíŕ yá̰á̰ ń nin̄ rāān̄ ní

¹ Israel gə̄, sḭḭ̄ i gír kojə kə́ Kɔ́ɔ̄ɓē ḭḭ sesí i Ejiptə tə́ n tél reē sesí gogə́ ɓēé ní. Ōōī najə̄ ń ni-əda dɔsí tə́ ní:

² Dan gír kojə gə̄ malang kə́ dɔ nang tə́ ní, i sḭḭ̄ ngóy m-ə̄ndā kumḿ gíŕsí tə́ ní. I tām̄ najə̄ ń noō tə́ n m-ā m̄-rāāsí yá̰á̰ kógə̄ḿ, najə̄ yá̰a̰ rāāsí gə̄ malang kə́ majaĺ ngá̰ý tə́ ní.

Nə́ɓā ɔr̄ najə̄ ɓáa nge koō ta asə ndi tan mbóo alé

³ De kə́ dəngam gə̄ jōó njə̄rān̄ naā tə́ kanjə̄ kadə̄ nin̄ oōn̄ naā dɔ tə́ a?

⁴ Dan ń ɓɔl ənge dā̰ kə́ yā kəsa aĺ anī, ni a nōō kem ku loo tə́ á? Dan ń balsáa ɓɔl əhɔ yá̰a̰ aĺ ní, ni a to loo ɓɔ̄ɔ̄ rɔ̄ yān tə́ yā nōoń a?

⁵ Ngōn̄ yel̄ a əsō kum gūmbə̄ tə́ kanjə̄ kadə̄ i yá̰á̰ kógə̄ḿ n ndɔ́rə̄n aw̄ seneé tū tə́ a? Gūmbə̄ a kāl̄yā kanjə̄ kadə̄ əhɔ i yá̰á̰ kógə̄ḿ a?

⁶ Deē a kɔĺ tōw̄ rɔ̄ɔ̄ kem ɓēé kanjə̄ kəla ɓōĺ kem de kə́ kem ɓēé gə̄ tə́ a? Yá̰á̰ kə́ to kum kaȳ aĺ kógə̄ḿ a reē dɔ ɓē tə́ kanjə̄ kadə̄ i Kɔ́ɔ̄ɓē n əlań a?

⁷ Yá̰á̰ ń Kɔ́ɔ̄ɓē Nə́ɓā sāā rāā ní, ni a rāā yá̰á̰ ní kanjə̄ kɔjə ngé kəla yān gə̄ ń i ngé koō ta gə̄ ní alé i tītə̄ ń noō ō.

⁸ Dan ń ɓɔl nōō ní, i náā n ɓōĺ aĺ ní? Dan ń Kɔ́ɔ̄ɓē Nə́ɓā ɔr̄ najə̄ ní, i náā n ɔjə najə̄ najə̄ yān aĺ ní?

Sarya ń gāngə̄n̄ dɔ Samari tə́ ní

⁹ Ī-raī dɔ kújə́ kə́ majə gə̄ kə́ kem ɓē kə́ Asdod tə́ ō, kə́ kem ɓē kə́ Ejiptə tə́ ō, ə́gaīń kɔŕ ə́daī na: Ɔ́siī dɔsí naā tə́ loo kə́ kḭḭ kə̄ dɔɔ́ gə̄ kə́ Samari tə́ tə́, ba á̰a̰ī yá̰á̰ kə́ a̰a̰ gō naā aĺ gə̄ kə́ ngá̰ý ō, yá̰á̰ kə́ rāā kə dɔ́nɔ́ kə́ i kemeé.

¹⁰ Kɔ́ɔ̄ɓē əda na: Yá̰a̰ malang ń yá̰a̰ rāā kə́ kə dɔ́nɔ́ reēń ō, ɓogə reēń ō ní, ngé kə́rēý gə̄ kánə̄n̄ kə̄ dɔ naā tə́ kem kújə yādə́ kə́ majə gə̄ tə́. De gə̄ ń noō nin̄ gerə̄n̄ rāā yá̰á̰ kə́ rɔ̄kum alé.

¹¹ Ɓē kə́ Samari, i tām̄ najə̄ ń noō tə́ n mā Kɔ́ɔ̄ɓē Nə́ɓā, m-ə́daī najə̄ ń toō ní: Madə̄ ba̰ā̰í gə̄ a gīrə̄n̄ gidə ɓē. Nin̄ a nujən̄ ndogə̄ mbal̄ yāí gə̄ kə́ yā rɔ̄ɔ̄ń dɔ ɓē tə́ kɔ̄ɔ́ ō, a ɔyn̄ yá̰á̰ kə́ kem kújə yāí kə́ majə gə̄ tə́ kɔ̄ɔ́ ō.

Kajə kə́ to rɔ̄nel̄ aĺ

¹² Najə̄ ń Kɔ́ɔ̄ɓē əda ní n toó: Dan ń ɓɔl əhɔ batə̄ kógə̄ḿ anī, njan kə́ jōó gə̄ ō, núsə mbīn ō ní, nge ngɔ̄m̄ yá̰a̰ kul̄ gə̄ taā tan tə́. Israel gə̄ ń ndin̄ Samari á nin̄ ton̄ nang tə́ kə ngāl̄də́ dɔ yá̰a̰ ndi kə́ sɔl̄ lɔ́ḿ lɔ́ḿ gə̄ tə́, aláa dɔ yá̰a̰ taā gír dɔ gə̄ kə́ kem tə̄rá tə́ ní, yá̰á̰ kə́ kógə̄ḿ beē ń toō a rāādə́ ō: I tītə̄ ń noō ō n a ajən̄ i núsə́də́ kə́ dūú gə̄ ngóý ní.

¹³ Najə̄ ń Kɔ́ɔ̄ɓē Nə́ɓā kə́ bo kə́ tɔ́gən i ngá̰ý əda ní n toó: Ōōī tāā gə̄ ń toō, ba ī-rāāī ādə̄ kojə yā Jakob ger̄ gō tāā gə̄ ní:

¹⁴ Ndɔ̄ ń m-ā m̄-rāań yá̰á̰ kógə̄ḿ kə gír de gə̄ yā Israel najə̄ yá̰a̰ rāādə́ kə́ majaĺ ngá̰ý tə́ ní, m-ā m̄-rāā yá̰á̰ kógə̄ḿ kə loo tun̄ yá̰a̰ gə̄ kə́ Betel. A tɔ̄ɔ̄n̄ kíl loo tun̄ yá̰a̰ gə̄ ń rāān̄ adə̄ ḭḭ kə̄ dɔɔ́ ní ō, kíl loo tun̄ yá̰a̰ gə̄ ní a tə́sōn̄ nang tə́ ō.

¹⁵ Kújə́ kə́ rāā tām̄ yā loo kə́ kūlīí tə́ ō, nge kə́ rāā tām̄ yā loo kə́ ngā nəngāá tə́ ō ní, m-ā m̄-tɔ̄ɔ̄də́ kɔ̄ɔ́. Kújə gə̄ ń rāān̄ ro̰də́ kə ngān̄g dā̰á̰ ní, m-ā m̄-nujəń kɔ̄ɔ́ ō, kújə́ kə́ bo bo gə̄ a gətóon̄ kɔ̄ɔ́ ō. Najə̄ ń Kɔ́ɔ̄ɓē əda ní n noó.