2 TIMOTE 3 - Bibəl ta Sar̄

Ta ngóy ndɔ̄ gə̄

¹ Yá̰á̰ ń kadə̄ ī-ger̄ majə ní n toó: Ta ngóy ndɔ̄ gə̄ tə́ anī, kum mbang kə́ tōr̄ gə̄ a ton̄.

² Tɔdɔ̄ a o̰o̰ de gə̄ i ta rɔ̄də́ nin̄ kɔ́ gə̄ ō, a rāān̄ ta nar ō, a gángə̄n̄ rɔ̄də́ ō, a ɔjən̄ rɔ̄də́ ō, a ngonjə̄n̄ ō, a mbātə́n najə̄ ta ngé kojədə́ gə̄ tə́ ō, a gerə̄n̄ majə kə́ deē rāā sedə́ aĺ ō, ā ɓōlə́n̄ gidə yá̰á̰ kə́ táĺ gə̄ aĺ ō,

³ a usədə́ yá̰a̰ aĺ ō, a rāān̄ yá̰a̰ i kə̄ nodə́ tə́ ō, a tāmən kə de gēé ō, a rāān̄ yá̰á̰ ń ndū najə̄ əda ní aĺ ō, kumdə́ a o̰o̰də́ aĺ ō, a gḛyn̄ yá̰á̰ kə́ majə aĺ ō,

⁴ a télən̄ kɔ̄ɔ́ gír madə̄də́ gə̄ tə́ ō, a rāān̄ yá̰a̰ kanjə̄ gíŕ yá̰a̰ ō, kɔjə rɔ̄ utə̄ kumdə́ kɔ̄ɔ́ ō, a gḛyn̄ Nə́ɓā alé ba a gḛyn̄ i rɔ̄nel̄ yādə́ tá.

⁵ Yá̰a̰ rāādə́ kə́ ndágá ɔjə kadə̄ nin̄ i ngé rāā yá̰a̰ kə gō ń Nə́ɓā ndigə ní, banī nin̄-nējə̄n̄ tɔ́gə́ kə́ tū tə́ kɔ̄ɔ́. Adə̄ ī-tūr̄ gidií kɔ̄ɔ́ ta de gə̄ ń noō tə́.

⁶ Nin̄ i ngé túdə̄ kə̄ kem kújə gə̄ tə́ kə̄ gō dəyá̰ kə́ ngan̄g aĺ gə̄ tə́, yā rāādə́ kadə̄ əsōn̄ kum gūmbə̄ yādə́ gə̄ tə́. Dəyá̰ gə̄ ngeé ń toō ní, majaĺ rosə kemdə́ ō, ngur yá̰á̰ kə́ tayā tayā gə̄ ndɔ́r̄də́ ō.

⁷ Nin̄-ndóōn̄ yá̰á̰ ngándáńg ba asən̄ ger̄ najə̄ kə́ rɔ̄kum alé.

⁸ Tītə̄ ń Janes nin̄ kə Jambəres mbātə́n̄neé najə̄ gō Moijə tə́ ní, de gə̄ ń toō mbātə́n̄ najə̄ kə́ rɔ̄kum ō. Nin̄ i de gə̄ kə́ gír̄ yādə́ nujə kɔ̄ɔ́ ō, taā kem yādə́ teē yá̰a̰ aĺ ō.

⁹ Nin̄ a aw̄n̄ kumdə́ kə̄ kété to̰ alé, tɔdɔ̄ mbóo yādə́ a to i kə̄ dɔ ndágá ta kum de gə̄ tə́ malang, tītə̄ yā de kə́ jōó gə̄ ń noō.

Kɔ̄jə̄ gə̄ kə́ ta tɔ̄l̄ ta tə́

¹⁰ Banī ḭ̄ ún gō yá̰á̰ ndóō ń m-ɔ́jə de gə̄ ní ō, úń hálə́ḿ ō, ī-ger̄ yá̰a̰ gə̄ ń m̄-núm̄ ní ō, loo taā kem yāḿ tə́ ō, tə́gā ta yāḿ ō, táŕ yāḿ ō, kəhɔ rɔ̄ tɔgə yāḿ ō.

¹¹ Ī-ger̄ yá̰á̰ kə́ tōr̄ gə̄ ō, tápə̄ gə̄ ō ń m-ə́ngédə́ kem ɓē kə́ A̰tiyos tə́ ō, Ikoniyɔm tə́ ō, Listər tə́ ō ní. A̰á̰ā̰, m-á̰á̰ tápə́ ngá̰ý, banī Kɔ́ɔ̄ɓē ɔrə̄m̄ kɔ̄ɔ́ kum yá̰á̰ gə̄ ń noō tə́ malang.

¹² Tá de gə̄ malang ń ndigən̄ rāā yá̰a̰ kə gō ń Nə́ɓā ndigə ní, kə gō ɓoo naā yādə́ kə Kərist Jeju ní, a rāān̄də́ ndoō tə́ ō.

¹³ Banī de kə́ majaĺ gə̄ ō, ngé gól̄ loo gə̄ ō, a rāān̄ yá̰á̰ kə́ majaĺ i kum kə̄ kété kété ō, nin̄ a gólə̄n madə̄də́ gə̄ ō, a gólə̄n̄də́ nin̄ ō.

¹⁴ Ba ḭ̄, ī-ra dɔ yá̰a̰ gə̄ ń ī-ndóō á ī-ger̄ majə kadə̄ i yá̰á̰ kə́ rɔ̄kum gə̄ ní tə́. De gə̄ ń ndóōnī yá̰á̰ ní ḭ̄ ī-ger̄də́ majə.

¹⁵ I dan ń ḭ̄ i ngōn̄ kə́ dūú ɓáý ní n ī-ger̄ makətūbə̄ yā Nə́ɓā ní. Makətūbə̄ ní asə rāā kadə̄ kumií edə̄. Ba kum kedə̄ ngeé ń toō a rāā kadə̄ ájə, kə ta kūl̄ taā kə́ ī-taā kem Kərist Jeju.

¹⁶ Najə̄ gə̄ malang ń ndangən̄ kem makətūbə̄ yā Nə́ɓā tə́ ní, teēn̄ i ta Nə́ɓā tə́. Majə ndóoń deē yá̰a̰ ō, kɔjəń deē kadə̄ gír̄ yān i gō tə́ aĺ ō, tūrəń deē dɔ hálən tə́ ō, ndóoń deē loo rāā yá̰á̰ kə́ gōtə́ ō,

¹⁷ yā kadə̄ deē yā Nə́ɓā i kə́ majə ɔtə̄ kə taá ō, ənge yá̰a̰ gə̄ kə́ yā rāāń kəla malang kə́ majə ō.