2 TESALONIK 1 - Bibəl ta Sar̄

Pol rāā Tesalonik gə̄ lápə́ya

¹ I Pol nin̄ kə Silas ō, Timote ō n əlan̄ kə makətūbūú adə̄n̄ Egəlijə kə́ Tesalonik tə́ ń ɓoo naā kə Bɔbə̄jí Nə́ɓāá ō, kə Kɔ́ɔ̄ɓē Jeju Kərist ō ní.

² Ādə̄ Bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.

Sarya kə́ kəndā dɔ danaá tām̄ yā ndɔ̄ reē Kərist tə́

³ Ngákó̰ó̰jí gə̄, majə kadə̄ jə-ndadə̄ Nə́ɓā ngándáńg tām̄ yāsí tə́. Nge ń noō i gō tə́, tɔdɔ̄ taā kem yāsí aw̄ kum kə̄ kété kété kə ngangāá ngá̰ý ō, tár yāsí kə́ tām̄ yā naā tə́ a aw̄ i kum kə̄ kété kété ō.

⁴ Adə̄ j-ɔr ta rɔ̄jí najə̄ yāsí tə́ dan de gə̄ kə́ kem Egəlijə yā Nə́ɓā tə́. Tɔdɔ̄ dan ń rāān̄ kumsí ndoō tə́ ō, yá̰á̰ kə́ tōr̄ gə̄ rāān̄sí ō ní, sḭḭ̄ ə́hɔī rɔ̄sí tɔgə ō, ī-raī dɔ taā kem yāsí tə́ ō.

⁵ Tɔdɔ̄ i tītə̄ ń noō n sḭḭ̄ ā ásiīń kadə̄ sḭḭ̄ i de gə̄ kə́ tām̄ yā Ɓē ko̰o̰ yā Nə́ɓā ń á̰a̰ī tápə̄ najə̄n tə́ ní.

⁶ Ngé gə̄ ń rāān̄ adə̄ wur kɔl əsō dɔsí tə́ ní, i gōtə́ kadə̄ Nə́ɓā rāā adə̄ wur kɔl əsō dɔdə́ tə́ ō.

⁷ Ba kadə̄ sḭḭ̄ ń rāān̄sí yá̰á̰ kə́ tōr̄ ní, ni-rāā adə̄ ɔ̄rī koō naā tə́ sejí, ndɔ̄ téĺ Kɔ́ɔ̄ɓē Jeju tə́, kə deē yān gə̄ kə́ dɔ rā̰ tə́ kə́ tɔ́gə́də́ i ngá̰ý.

⁸ Ni a tél yā reē i kum hor kógə̄ḿ kə́ o̰o̰ tə́, yā dal ba̰ā̰ dɔ ngé ger̄ Nə́ɓā aĺ gə̄ tə́, adə̄ i dɔ ngé gə̄ ń sɔlə̄n̄ dɔdə́ kə̄ no Najə̄ kə́ Majə yā Kɔ́ɔ̄ɓē Jeju tə́ aĺ ní tə́.

⁹ Yá̰á̰ kə́ tōr̄ ń a rāādə́ tām̄ majaĺ yādə́ tə́ ní, i nujə kə́ ta ngóyn gətóó kə́ nin̄ a nujən̄ sák sák kɔ̄ɔ́, sa̰y rɔ̄ Kɔ́ɔ̄ɓē tə́ ō, sa̰y rɔ̄ tɔ́gən kə́ to kɔsə gɔn tə́ ō.

¹⁰ Dan ń a reē anī, deē yān gə̄ a rɔȳnən̄ ō, de gə̄ malang ń taān̄ kemən ní a a̰a̰n̄ majən ō. Ndɔ̄ ń noō tə́ ní sḭḭ̄ i dandə́ tə́ ō, tɔdɔ̄ sḭḭ̄ ī-taāī kem najə̄ ń j-ɔjəsí ní.

¹¹ I tām̄ ń toō tə́ n jə-ndɔ̄ȳ Nə́ɓā ngándáńg tām̄ yāsí tə́ ní, yā kadə̄ de gə̄ rāān̄sí de gə̄ kə́ ásiī tām̄ yā ɓāŕ ń Nə́ɓā ɓāŕsí tə́ ní. Yā kadə̄ Nə́ɓā adə̄sí tɔ́gə kadə̄ ī-rāāīneé yá̰a̰ malang kə́ majə ń kemsí gḛy ní ō, rāā adə̄ taā kem yāsí rāā kəla ō.

¹² I tītə̄ ń noō n rī Kɔ́ɔ̄ɓē Jeju a əngeń kɔsə gɔn kə ta kūl̄sí sḭḭ̄ḭ́ ō, sḭḭ̄ ā ə́ngeīń kɔsə gɔn kə ta kul̄ən ní ō ní. Yá̰á̰ ń kem majə yā Nə́ɓā yājí ō, yā Kɔ́ɔ̄ɓē Jeju Kərist ō, a rāā ní n noó.