2 SAMUEL 9 - Bibəl ta Sar̄

Dabid əhɔ Mepiboset kə̄ rɔ̄n tə́ majə

¹ Ndɔ̄ kə́rēý tə́ anī Dabid dəje na ké de kə́rēý kə́ gír kojə yā Saul tə́ kə́ ndi kə kumneé i noó wa, na n-ndigə rāā majə kə kɔ́ɔ̄ɔ́ tām̄ yā Jonatan tə́.

² Nge kəla kə́rēý kə́ kem ndogə̄ yā Saul tə́ i noó, rī deē ní na i Siba. Aw̄ reēn seneé rɔ̄ mban̄g Dabid tə́, anī Dabid dəjen na ké i ni Siba n toó wa. Deē ní əda na: A̰á̰ā̰ i mā nge kəla yāí.

³ Mban̄g tél əda na: De kə́ gír kojə yā Saul tə́ kə́ na̰y kə́ ndi kə kumneé kadə̄ m̄-rāā kem majə yā Nə́ɓā seneé gətóo a? Siba əda mban̄g na: Ngōn̄ Jonatan kógə̄ḿ i noó, ba njan i kə́ lígə̄rī dām̄ jōó mbak.

⁴ Mban̄g dəje Siba na ké ni i rá wa. Anī Siba əda na, ni i ɓē Makir kə́ ngōn̄ Amiel, kem ɓē kə́ Loo Dabar tə́.

⁵ Mban̄g Dabid əla deē kógə̄ḿ gōn tə́ kem ɓē kə́ Loo Dabar tə́.

⁶ Dan ń Mepiboset kə́ ngōn̄ Jonatan ń i kaa Saul ní ugə̄ rɔ̄ Dabid tə́ anī, ɔsə non nang tə́ no mban̄g tə́. Dabid dəjen na ké i ni Mepiboset ń toó wa, anī ni-tél əda na: Mā nge kəla yāí n toó.

⁷ Dabid ədan na: Ī-lōō ɓōĺ. M-ā m̄-rāā majə seí sɔɔ̄ń bɔbí Jonatan. Dɔ nang yā kaaí Saul ní m-ā m̄-télən̄ yā kadī gogə́ malang ō, īkɔ́ ā ə́sá yá̰a̰ ta tábəl yāḿ tə́ kə dɔ ndɔ̄ gə̄ ō.

⁸ Mepiboset ɔsə non nang tə́ rɔȳń mban̄g Dabid ba əda na: Mā ń i bísə́ kə́ nger əsan ní, mā i rí kógə̄ḿ á kadə̄ ī-tūr̄ kumií kə̄ rɔ̄ḿ tə́ ní.

⁹ Dabid ɓāŕ nge kəla yā Saul ń i Siba ní adə̄ reē, ba ədan na: Yá̰a̰ yā Saul malang ō, yā gír kojə yān ō ní, m-ādə̄ Mepiboset ngōn̄ kaa kɔ́ɔ̄í.

¹⁰ Ḭ̄ ō, ngání gə̄ ō, ngé kəla yāí gə̄ ō ní, ā ī-ndɔrī dɔ nang yā kadə̄n ō, ā ī-reēī kə yá̰a̰ kəsa kə́ tām̄ yā kojə yān tə́ ō. Tɔdɔ̄ Mepiboset a əsa yá̰a̰ ta tábəl yāḿ tə́ kə dɔ ndɔ̄ gə̄. Ngán Siba gə̄ i kutə gidə i mí ō, ngé kəla yān gə̄ i kutə jōó ō.

¹¹ Ni-əda mban̄g na: Yá̰a̰ malang ń ə́dam̄ mā nge kəla yāí kadə̄ m̄-rāā ní, m-ā m̄-rāā. Loo ń noō tə́ Mepiboset əsa yá̰a̰ i ta tábəl yā Dabid tə́ tītə̄ kə́ ni i ngōn̄ Dabid beé.

¹² Ngōn̄ Mepiboset kə́ dəngam kógə̄ḿ kə́ dūú i noó, rīn na i Mika ō, de gə̄ malang kə́ kem ndogə̄ yā Siba tə́ i ngé rāā kəla yā Mepiboset gə̄ ō.

¹³ Mepiboset ndi Jerusalem, tɔdɔ̄ ni a əsa yá̰a̰ i ta tábəl yā mban̄g tə́ kə ndɔ̄ gə̄. Njan i kə́ ligərī dām̄ jōó.