2 SAMUEL 8 - Bibəl ta Sar̄

Dabid tetə madə̄ ba̰ā̰n gə̄ rɔ̄ɔ̄

¹ Gō tə́ anī Dabid tetə Pilistin gə̄ rɔ̄ɔ̄. Ni-taā ko̰o̰ ɓē jīdə́ tə́ kɔ̄ɔ́ əlań rɔ̄sɔl̄ dɔdə́ tə́.

² Ni-tetə Moab gə̄ rɔ̄ɔ̄ ō, laadə́ nang tə́ ba tɔ̄l̄ kə́rēý gə̄ ō, əya̰ kə́rēý gə̄ ō. Ré nin̄ i mətá anī tɔ̄l̄ kə́ jōó gə̄ ba əya̰ kógə̄ḿ. Loo ń noō tə́ Moab gə̄ télən̄ ɓəlo yā Dabid gə̄ ō, nin̄ a tīrə̄n̄ dɔ yá̰a̰ gə̄ a adə̄nən̄ ō.

³ Dabid tetə Hadadejer ngōn̄ Rehob rɔ̄ɔ̄. Hadadejer i mban̄g kə́ Soba. Dabid tetən rɔ̄ɔ̄ i dan ń a sāań taā bā Opəratə gogə́ ní.

⁴ Dabid əhɔ ngé kal̄ sə́nda yā Hadadejer gə̄ dūbú kə ɓú sīrí ō, ngé rɔ̄ɔ̄ yān gə̄ kə́ ngé njə̄rā kə njadə́ gə̄ dūbú kutə jōó ō. Ni-gán̄g ngəra nja sə́nda gə̄ ń a ndɔ́rə̄n̄ púsə rɔ̄ɔ̄ gə̄ ní kɔ̄ɔ́ malang, ba ngɔ̄m̄ sə́nda gə̄ kə púsə rɔ̄ɔ̄ gə̄ ɓú kógə̄ḿ tām̄ yān tə́.

⁵ Loo ń noō tə́ Aram gə̄ kə́ Damas reē dḭḭ̄n̄ Hadadejer mban̄g kə́ Soba. Banī Dabid tɔ̄l̄ de gə̄ dūbú kutə jōó gidə i jōó dandə́ tə́,

⁶ ba tə́ndā ngé ko̰o̰ ɓē gə̄ dɔ nang kə́ Aram tə́ ń ɓē bo yān i Damas ní. Loo ń noō tə́ Aram gə̄ télən̄ ɓəlo gə̄ yā Dabid ō, a tīrə̄n̄ dɔ yá̰a̰ gə̄ a adə̄nən̄ ō. Adə̄ Kɔ́ɔ̄ɓē rāā adə̄ Dabid tetə rɔ̄ɔ̄ loo malang ń ni-aw̄ rɔ̄ɔ̄ tə́ tū tə́ ní.

⁷ Dabid taā der lɔ́r gə̄ ń ngé kəla yā Hadadejer gə̄ a ətōn̄ ní, ba ɔy aw̄ń Jerusalem.

⁸ Mban̄g Dabid taā gində̄ nə̄ngá kasə kə́ ngá̰ý kem ɓē gə̄ yā Hadadejer tə́. Rī ɓē gə̄ ní na i Beta ō, Berotai ō.

⁹ Mban̄g kə́ Hamat ń rīn na i Toi ní, oō kadə̄ ngé rɔ̄ɔ̄ gə̄ malang yā Hadadejer i kə́ Dabid tetədə́ rɔ̄ɔ̄ kɔ̄ɔ́.

¹⁰ Anī əla ngōnən Yoram rāā Dabid lápə́ya tə́ ō, kadə̄ a̰a̰ yá̰a̰ ta kumən tə́ najə̄ rɔ̄ɔ̄ ń rɔ̄ɔ̄ Hadadejer ba tetən rɔ̄ɔ̄ tə́ ní ō. Tɔdɔ̄ Hadadejer i madə̄ ba̰ā̰ Toi. Yá̰á̰ ń Yoram aw̄ń kadə̄ Dabid tə́ ní i yá̰á̰ kə́ rāā kə gində̄ arjā̰a̰á̰ ō, kə gində̄ lɔ́rɔ́ ō, kə gində̄ nə̄ngá kasaá ō.

¹¹ Mban̄g Dabid ɔr̄ kam̄ yá̰á̰ ní tayā tām̄ yā Kɔ́ɔ̄ɓē tə́ tītə̄ ń ɔrə̄ń kam̄ gində̄ arjā̰a̰ ō, lɔ́r ō ń ni-taā jī nápar de gə̄ ń əla dɔdə́ gír tɔ́gə yān tə́ ní.

¹² Nápar de gə̄ ní i Aram gə̄ ō, Moab gə̄ ō, Amon gə̄ ō, Pilistin gə̄ ō, Amalek gə̄ ō. Yá̰a̰ kənge gə̄ ń Dabid taā jī mban̄g kə́ Soba tə́ ń i Hadadejer ngōn̄ Rehob ní, ni-ɔr̄ kam̄də́ tayā tām̄ yā Kɔ́ɔ̄ɓē tə́ ō.

¹³ I beé n rī Dabid ɓārəń ngá̰ý ní. Dan ń Dabid tetə Aram gə̄ rɔ̄ɔ̄ oy anī, tél dɔ tə́ reē ənī Edom gə̄ rɔ̄ɔ̄ kum wól loo katə̄ tə́ ba tetədə́ rɔ̄ɔ̄. Ni-tɔ̄l̄də́ dūbú kutə gidə i sɔ́sɔ́.

¹⁴ Dabid tə́ndā ngé ko̰o̰ ɓē gə̄ dɔ nang kə́ Edom tə́ kə taá malang, adə̄ Edom gə̄ télən̄ ɓəlo gə̄ yā Dabid. Kɔ́ɔ̄ɓē rāā adə̄ Dabid tetə rɔ̄ɔ̄ loo malang ń ni-aw̄ rɔ̄ɔ̄ tə́ tū tə́ ní.

Rī de kə́ bo gə̄ yā Dabid

¹⁵ Dabid o̰o̰ ɓē dɔ ngán Israel gə̄ tə́ malang. Ni-gān̄g sarya yā de gə̄ malang i kə gōó.

¹⁶ Ngol ngé rɔ̄ɔ̄ gə̄ i Joab ngōn̄ Seruya. Kɔdə̄ mbēr̄ yā mban̄g i Yosapat ngōn̄ Ahilud.

¹⁷ Ngé tun̄ yá̰a̰ gə̄ i Sadok ngōn̄ Ahitub nin̄ kə Ahimelek ngōn̄ Abiatar. Nge ndang makətūbə̄ i Seraya.

¹⁸ Ngol ngé ngɔ̄m̄ dɔ ngār gə̄ ń i Kereti gə̄ kə Peleti gə̄ ní i Benaya ngōn̄ Yoyada. Ngán Dabid gə̄ nin̄ i ngé tun̄ yá̰a̰ gə̄ ō.