2 SAMUEL 6 - Bibəl ta Sar̄

Dabid aw̄ gō sandúkə yā Kɔ́ɔ̄ɓē tə́

¹ Dabid kán̄ go̰ rɔ̄ɔ̄ gə̄ malang kə́ Israel tə́. Nin̄ i dūbú kutə mətá.

² Nin̄-dānə̄n̄ Dabid aw̄n̄ seneé Baala gō sandúkə yā Nə́ɓā tə́. Baala i ɓē kə́ gō nang yā Juda tə́. Ba sandúkə ń aw̄n̄ gō tə́ ní i sandúkə yā Nə́ɓā ń əndān̄ rī Kɔ́ɔ̄ɓē dɔ tə́ na i Kɔ́ɔ̄ɓē kə́ bo kə́ tɔ́gən i ngá̰ý, nge ndi dɔ de kə́ dɔ rā̰ tə́ kə́ ngé ngɔ̄m̄ loo gə̄ tə́ ní.

³ Unən̄ sandúkə ní kem kújə yā Abinadab ń ra i dɔ loo kə́ kḭḭ kə̄ dɔɔ́ tə́ ní, ba əndān̄ kem púsə́ kə́ kijə tə́ aw̄n̄neé. I Uja nin̄ kə Ahio n i ngé kəhɔ ta man̄g gə̄ ní. Nin̄ i ngán Abinadab gə̄.

⁴ Ahio a njə̄rā i kété no sandúkə tə́.

⁵ Dabid nin̄ kə ngán Israel gə̄ malang ɔjən̄ rɔ̄nel̄ yādə́ kə̄ ndágá. Nin̄-ugən̄ yá̰á̰ kə́ ɓār̄ gōsə̄ kə́ tayā gə̄ kə́ rāān̄də́ kə kāgə̄ sipəres gə̄, adə̄ i kənde gə̄ kə́ kəlādə́ i ngá̰ý gə̄ ō, kə́ kəlādə́ i ngá̰ý aĺ gə̄ ō. Əndan̄ kɔdə gō tə́ ō, sə̄kān̄ yá̰a̰ gō tə́ ō, dānə̄n̄ gō kə kōō gində̄ kə́ laa gə̄ kə́ yā kənda naā tə́ kadə̄ ɓār̄ gə̄ ō.

⁶ Dan ń aw̄ ugə̄n̄ kadə gár̄ yā Nakon tə́ ní a, man̄g gə̄ rāān̄ yá̰a̰ adə̄ nay i sḛ́ý a sandúkə yā Nə́ɓā əsō. Uja əla jīn əhɔń sandúkə ní kə̄ dɔɔ́.

⁷ Anī wōn̄g rāā Kɔ́ɔ̄ɓē seneé adə̄ Kɔ́ɔ̄ɓē əndan tām̄ yā yá̰á̰ kə́ gōtə́ aĺ ń ni-rāā tə́ ní. Uja oy kə̄ loo nəkɔ́ ń noō tə́ kadə sandúkə yā Nə́ɓā tə́.

⁸ Tōr̄ Dabid ngá̰ý najə̄ kənda ń Kɔ́ɔ̄ɓē ənda Uja ənda tɔ̄lə̄n ní tə́. Ni-əndā rī loo ní na i Peres Uja, adə̄ bátə́ ɓōólaā gə̄gē rī loo ní na i Peres Uja.

⁹ Ndɔ̄ ń noō tə́ Dabid ɓōĺ Kɔ́ɔ̄ɓē adə̄ əda na: Loo kadə̄ sandúkə yā Kɔ́ɔ̄ɓē reē ɓēé looḿ i ba̰ý?

¹⁰ Ni-lōō gír kaw̄ kə sandúkə yā Kɔ́ɔ̄ɓē ɓēé looneé kɔ̄ɔ́, ba adə̄ əndān̄ kem kújə yā Obed Edom ń i de kə́ Gat ní tə́.

¹¹ Sandúkə yā Kɔ́ɔ̄ɓē ndi kem kújə yā Obed Edom tə́ rāā nāā mətá, ba Kɔ́ɔ̄ɓē rāā majə kə Obed Edom ō, kə deē yān gēé malang ō.

Sandúkə yā Kɔ́ɔ̄ɓē reē ugə̄ Jerusalem

¹² Reē ədan̄ mban̄g Dabid na Kɔ́ɔ̄ɓē na rāā majə kə gír kojə yā Obed Edom ō, kə yá̰a̰ yān gə̄ malang ō, sɔɔ̄ń sandúkə yā Nə́ɓā. Tā anī Dabid aw̄ gō sandúkə yā Nə́ɓā tə́ ɓē Obed Edom, un reēń kem ɓē yān tə́ kə rɔ̄nelēé.

¹³ Dan ń ngé kətō sandúkə yā Kɔ́ɔ̄ɓē gə̄ njə̄rān̄ ta njadə́ mehḛ́ anī Dabid tun̄ man̄g kə́ bəra kógə̄ḿ ō, ngōn̄ man̄g kə́ yḛmbə kógə̄ḿ ō adə̄ Nə́ɓā.

¹⁴ Gō tə́ anī ni ndām̄ kə tɔ́gən gēé malang ta kum Kɔ́ɔ̄ɓē tə́ ɔsəń gɔn Kɔ́ɔ̄ɓē. Kūbə̄ ń do̰ō̰ gírən tə́ ní i ta kūbə̄ lḛ́ḛ.

¹⁵ Dabid nin̄ kə ngán Israel gēé aw̄n̄ kə sandúkə yā Kɔ́ɔ̄ɓēé Jerusalem i kə kɔŕ rɔ̄nel̄ gēé ō, nin̄ kɔ̄rə́n̄ ga̰ā̰ ō.

¹⁶ Dan ń sandúkə yā Kɔ́ɔ̄ɓē udə kem ɓē yā Dabid tə́ ní a, Mikal kə́ ngōn̄ Saul a̰a̰ loo ko̰rō̰ kújə tə́. Ni-a̰a̰ mban̄g Dabid loo ndām̄ tə́ ō, loo kənī gir̄ gində̄ tə́ no sandúkə tə́ ō anī ni idə tan gírən tə́.

¹⁷ Aw̄ əndān̄ sandúkə yā Kɔ́ɔ̄ɓē loo ń kadə̄ ndi tū tə́ ní, kem kújə tandā ń Dabid udə kə rīí tə́ ní. Gō tə́ anī Dabid ndējə̄ Kɔ́ɔ̄ɓē dā̰ kə́ róō horoó gə̄ ō, dā̰ kə́ tun̄ tām̄ yā kem kógə̄ḿ tə́ ō.

¹⁸ Dan ń ni ndējə̄ Kɔ́ɔ̄ɓē dā̰ kə́ tun̄ gə̄ oy anī, tɔ́r̄ tan dɔ ngán Israel gə̄ tə́ kə rī Kɔ́ɔ̄ɓē kə́ bo kə́ tɔ́gən i ngá̰ý.

¹⁹ Gō tə́ anī adə̄ nə̄ɓōn̄ kósə́ ngán Israel gə̄ yá̰a̰ kəsa. De gə̄ malang dəngam gə̄ ō, dəyá̰ gə̄ ō, əngen̄ mápá kə́ gōr̄ kógə̄ḿ kógə̄ḿ ō, makəla kan̄ túmbur kógə̄ḿ kógə̄ḿ ō, makəla kan̄ kāgə̄ nduú kə́ tutə kógə̄ḿ kógə̄ḿ ō. Gō tə́ anī de gə̄ malang télən̄ kə̄ ɓē gə̄ tə́.

²⁰ Dan ń Dabid tél reē ɓēé yā tɔ́r̄ tan dɔ de gə̄ kə́ kem kújə yān tə́ anī, Mikal ngōn̄ Saul teē tə́nī tan ba ədan na: Mban̄g kə́ Israel tə́ ɔr ta rɔ̄n ɓōólaā tā! Ɔr̄ yá̰a̰ rɔ̄n tə́ ta kum ngé kəla kə́ dəyá̰ yā ɓer̄ yān gə̄ tə́ tītə̄ de kə́ karī beé!

²¹ Dabid tél ədan na: m̄-ndām̄ m-ɔ́səń i gɔn Kɔ́ɔ̄ɓē ń gə̄rām̄ mā ba əya̰ bɔbí ō, gír kojə yān ō kɔ̄ɔ́ ní. Kɔ́ɔ̄ɓē gə̄rām̄, əndām̄ dɔ gír deē yān gə̄ ń i ngán Israel gə̄ ní tə́, kadə̄ mā i ngār yādə́, adə̄ m-ā m-ɔ́jə rɔ̄nel̄ yāḿ kə̄ ndágá yā kɔsəń gɔnən ɓáý to̰.

²² M-ā m̄-tél kə rɔ̄ḿ kə̄ nang tə́, m-ā m-á̰a̰ rɔ̄ḿ i yá̰á̰ kə́ karī tə́ ta kumḿ mə̄kɔ́ tə́ ɓáý to̰, ba i loo ń noō tə́ n ngé rāā kəla kə́ dəyá̰ gə̄ ń ə́da najə̄ yādə́ ní a rɔȳmə̄n̄ ɓáý ní.

²³ I tām̄ najə̄ ń noō tə́ n Mikal ngōn̄ Saul ojəń ngōn̄ aĺ bátə́ oyń ní.