2 SAMUEL 22 - Bibəl ta Sar̄

Dabid ndadə̄ Nə́ɓā

¹ Dan ń Kɔ́ɔ̄ɓē ɔr̄ Dabid kɔ̄ɔ́ jī madə̄ ba̰ā̰n gə̄ tə́ ō, jī Saul tə́ ō ní anī, ənī pā ń toō adə̄ Kɔ́ɔ̄ɓē,

² əda na: Kɔ́ɔ̄ɓē i mbal̄ yāḿ, ni i kújə́ kə́ ngan̄g ngá̰ý yāḿ kə́ m̄-ndi kemeé anī, yá̰a̰ a ɔdə rɔ̄ḿ alé.

³ Nə́ɓā i mbal̄ ɓɔ̄ɔ̄ rɔ̄ yāḿ. Ni i der yāḿ ō, gində̄ ń m-ā m̄-tetəń rɔ̄ɔ̄ ní ō. Ni i kújə́ kə́ ngan̄g yāḿ ō, kə́ m̄-ndi kemeé anī m-ájə, loo ɓɔ̄ɔ̄ rɔ̄ yāḿ ō, nge kajəḿ ō. Ni i nge kɔrə̄m̄ kɔ̄ɔ́ jī ngé dɔ́nɔ gə̄ tə́.

⁴ Ī-tɔ̄yī Kɔ́ɔ̄ɓē! m̄-ɓāŕ Kɔ́ɔ̄ɓē, anī m̄-tetə madə̄ ba̰ā̰ḿ gə̄ rɔ̄ɔ̄.

⁵ Yo ɓírə̄m̄ kə tɔ́gɔ́ tītə̄ bəngál man̄ beé, m̄-ɓōĺ tɔdɔ̄ to i tītə̄ man̄ dɔ mbal̄ kə́ a nūgə́ kə tɔ́gɔ́ yā nujə loo beé.

⁶ Kəlā kə́ ɓádá gə̄ ɓír̄mə̄n̄, yo əyā gūmbə̄ noḿ tə́.

⁷ Dan ń wur kɔl kə́ ngá̰ý əsō dɔḿ tə́ ní, m̄-ɓāŕ Kɔ́ɔ̄ɓē, m̄-ɓāŕ Nə́ɓā yāḿ. Anī ni-ndi kem kújə yān tə́ oō ndūḿ. Kɔŕ yāḿ əsō mbīn tə́.

⁸ Loo ń noō tə́ dɔ nang ndebə ō, dɔ rā̰ yéȳ ō. Dan ń wōn̄g rāā Kɔ́ɔ̄ɓē ní, dɔ rā̰ ō, dɔ nang ō ndewn̄.

⁹ Sa teē kɔ́nən tə́ ō, hor teē tan tə́ ō, yā̰l̄ hor gə̄ teēn̄ gō tə́ ō.

¹⁰ Kɔ́ɔ̄ɓē tetə ta dɔ rā̰ kə̄ nang tə́ ba risə nang tə́. Kil̄ man̄ kə́ ndul ndí ndḭ́ i gír njan tə́.

¹¹ Ni-ndi i gidə de kə́ dɔ rā̰ tə́ kógə̄ḿ tə́ ń a risəń ní Ni teē hɔy dɔ néĺ tə́.

¹² Ni utə̄ gidə rɔ̄n kə loo kə́ risə tilií. Ɓɔ̄ɔ̄ rɔ̄n dan kil̄ man̄ kə́ ndul ndí ndḭ́ tə́, dan kil̄ man̄ gə̄ kə́ man̄ i tū tə́ tə́.

¹³ Loo kə́ unjə̄ kow kə́ ndə́lē ngá̰ý i kété non tə́. Hor kə́ tū tə́ ndɔ́w̄ adə̄ kə́rā sir sir.

¹⁴ Kɔ́ɔ̄ɓē ndi dɔ rā̰ tə́ ndán̄g loo, Nə́ɓā kə́ dɔɔ́ sa̰y ngá̰ý rāā adə̄ ndūn ɓār̄.

¹⁵ Ni túr̄də́ kə kum gərá anī tə̄ndān̄ naā tḭ̄ḭ̄n̄. Ni urdə́ kə tel̄ maná anī tḭ̄ḭ̄n̄ naā kógə̄ḿ kógə̄ḿ.

¹⁶ Ndū Kɔ́ɔ̄ɓē ń ndángəń loo ní ō, koō ń teē kɔ́nən tə́ ō ní, rāā adə̄ gír bā bo teē dɔɔ́ ō, gír ngəra dɔ nang teē dɔɔ́ ō.

¹⁷ Ni-ndi dɔɔ́ əla jīn əhɔmə̄ń. Unəm̄ kɔ̄ɔ́ kum yá̰á̰ kə́ tōr gə̄ ń reēn̄ dɔḿ tə́ ní.

¹⁸ Ni ɔrə̄m̄ kɔ̄ɔ́ jī madə̄ ba̰ā̰ḿ gə̄ kə́ tɔ́gə́də́ i ngá̰ý tə́, jī madə̄ ba̰ā̰ḿ gə̄ ń tɔ́gə́də́ i ngá̰ý tɔȳ yāḿ ní tə́.

¹⁹ Ndɔ̄ ń tɔ́gə́ḿ gətóoń tə́ ní, nin̄ ənīmə̄n̄ rɔ̄ɔ̄ kə ngangá ngá̰ý, banī Kɔ́ɔ̄ɓē reē dḭḭ̄m̄.

²⁰ Ni-taā əya̰m̄ dɔɔ́ adə̄ mā i kɔ́ɔ̄ rɔ̄ḿ, ni ajəm̄ tɔdɔ̄ tárəm̄.

²¹ I tām̄ háĺ kə́ gōtə́ kə́ m̄-rāā tə́, I tām̄ jīḿ kə́ unjə̄ njáý njáý tə́ n Kɔ́ɔ̄ɓē rāań yá̰á̰ kə́ beē seḿ ní.

²² Tɔdɔ̄ m̄-rāā yá̰a̰ gə̄ ń Kɔ́ɔ̄ɓē ɔjəm̄ ní, m̄-rāā háĺ kə́ sew aĺ kə Nə́ɓā yāḿ alé.

²³ M-ə̄ndā kumḿ gír ndū najə̄ yān gə̄ tə́ m̄-ngɔ̄m̄ majə. Gō míndə gə̄ ń ni-əda kadə̄ yā rāā ní mā m-mbātə́ rāā alé.

²⁴ m̄-ndigə kadə̄ ənge yá̰á̰ kə́ yā kəda dɔḿ tə́ alé. m̄-gḛy kadə̄ najə̄ əhɔm̄ alé, adə̄ m̄-ngɔ̄m̄ rɔ̄ḿ.

²⁵ Loo ń noō tə́ Kɔ́ɔ̄ɓē əndā njaḿ najə̄ háĺ kə́ gōtə́ kə́ m̄-rāā seneé tə́, najə̄ háĺ kə́ unjə̄ njáý njáý kə́ m̄-rāā adə̄ a̰a̰ kə kumneé tə́.

²⁶ Kɔ́ɔ̄ɓē, deē ń ra dɔ ndūn tə́ anī, ḭ̄ ī-ra dɔ ndūí tə́ seneé ō. Deē ń najə̄ gətóo dɔn tə́ ní, ḭ̄ ɔ́jən kadə̄ najə̄ gətóo dɔí tə́ ō.

²⁷ Deē ń unjə̄ njáý njáý ní ḭ̄ a ɔjən kadə̄ ḭ̄ i kə́ unjə̄ njáý njáý ō. Ba ḭ̄ ā i lur de kə́ nge gól̄ loo.

²⁸ Ḭ̄ ī-dḭḭ̄ gír de gə̄ ń madə̄də́ gə̄ rāān̄də́ mbóó tə́ ní, ba ī-kídə̄ ngé kɔjə rɔ̄ gə̄.

²⁹ Kɔ́ɔ̄ɓē, i ḭ̄ n i lámba yāḿ ní, adə̄ loo kə́ ndɔ̄ɔ́ ń m̄-ndi kum tə́ ní, ḭ̄ ūnjə̄ tū tə́.

³⁰ M-ḭ́ḭ bal dɔ bəlo tə́ i kə ta kūlīí, m-āl̄ dɔ ndogə̄ mbal̄ tə́ m̄-jə̄ngā kə̄ gidə kə́rēý tə́ i kə Nə́ɓā yāḿ.

³¹ Róbə yā Nə́ɓā i róbə́ kə́ majə ɔtə̄ ta. Najə̄ yā Kɔ́ɔ̄ɓē rāā yá̰á̰ kə́ ɔjə kadə̄ i najə̄ kə́ rɔ̄kum. Kɔ́ɔ̄ɓē i der yā de gə̄ malang ń a nam̄nən̄ ní.

³² Kɔ́ɔ̄ɓē ngóy i Nə́ɓā! I Nə́ɓā yājí ngóy n i mbal̄ yājí ní!

³³ I ni n i loo ɓɔ̄ɔ̄ rɔ̄ yāḿ kə́ ngan̄g ngá̰ý ní! I ni n i nge rāā róbə noḿ tə́ ní.

³⁴ Ni-rāā adə̄ njaḿ ɔl tītə̄ nja dul. Ni-əhɔm̄ adə̄ m̄-rā kə njaḿ dɔɔ́ dɔ loo kə́ kḭḭ kə̄ dɔɔ́ gə̄ tə́.

³⁵ I ni n i nge ndóōm̄ loo rɔ̄ɔ̄ ō, nge rāā seḿ kadə̄ jīḿ rugə ga̰ gəra kə́ rāā kə gində̄ nə̄ngá kasaá ō ní.

³⁶ Kɔ́ɔ̄ɓē, ī-ra noḿ tə́ tītə̄ der ō, ájəm̄ ō. Ré m̄-ɓāríī anī ḭ̄ ī-ndigəm̄ ō, ḭ̄ ī-rāā adə̄ tɔ́gə́ḿ to ō.

³⁷ M-ā̰ȳ ngɔ̄də̄ ngá̰ý ō, njaḿ udə̄ aĺ ō, i kə ta kūlīí.

³⁸ m̄-ngɔ̄də̄ madə̄ ba̰ā̰ḿ gə̄ ba m̄-tɔ̄l̄də́ kɔ̄ɔ́ malang. Dan ń m̄-tɔ̄l̄də́ aĺ ɓáý ní, m̄-tél gōdə́ tə́ alé.

³⁹ Ré əngən̄ do kə́ asə yodə́ anī, m-ɔ́sə́də́ dɔ tə́ m̄-tɔ̄l̄də́. Deē kógə̄ḿ dandə́ tə́ kə́ m-ə́ya̰n gətóo, m̄-tɔ̄l̄də́ malang. Nin̄ ḭḭn̄ dɔɔ́ to̰ alé, nin̄ i nang tə́ ba m-ə̄ndā njaḿ dɔdə́ tə́.

⁴⁰ Ḭ̄ ādə̄m̄ tɔ́gə kadə̄ m̄-rɔ̄ɔń. Ngé kənīḿ rɔ̄ɔ̄ gə̄ ní, ḭ̄ ə́la dɔdə́ gír njaḿ tə́.

⁴¹ Ḭ̄ ī-rāā ādə̄ madə̄ ba̰ā̰ḿ gə̄ tūrə̄n̄ gándə́də́ taḿ tə́ kə ngɔ̄dɔ̄ɔ́. Ngé rɔ̄ɔ̄m̄ gə̄ ní, m̄-tɔ̄l̄də́ kɔ̄ɔ́ náḿ náḿ.

⁴² Nin̄ əgan̄ kɔŕ ba de kə́ dḭḭ̄də́ gətóo. Nin̄ əgan̄ kɔŕ kə̄ dɔ Kɔ́ɔ̄ɓē tə́, ba ni dal alé.

⁴³ m̄-rāādə́ bumbə́rú tə́. m̄-rējə̄də́, m̄-tə́ɓādə́ tītə̄ bɔr kə́ kum róbó beē.

⁴⁴ Ḭ̄ ɔ̄rə̄m̄ kɔ̄ɔ́ ta deē gír yāḿ gə̄ ń ənīn̄ wúȳ jīḿ tə́ ní, adə̄ rāān̄ yá̰á̰ kə́ majaĺ seḿ alé Ḭ̄ ə̄ndām̄ dɔ gír nápar de gə̄ tə́ ba ī-ngɔ̄mə̄m̄ ādə̄ mā i dɔdə́ tə́ dɔɔ́. Gír de kə́ m̄-ger̄də́ aĺ gə̄ a rāān̄ kəla yāḿ.

⁴⁵ Tə̄rā gə̄ reē a gólə̄n̄ kumḿ, m-ə́dádə́ najə̄ ta kógə̄ḿ anī oōn̄ taḿ.

⁴⁶ Kemdə́ taā loo to̰ alé adə̄ nin̄ teēn̄ loo ɓɔ̄ɔ̄ rɔ̄ yādə́ gə̄ tə́ kə rɔ̄ ndebeé.

⁴⁷ Kɔ́ɔ̄ɓē ndi ngáńdáńg! m̄-rāā mbal̄ yāḿ kə́ra! Nə́ɓā i go̰ rɔ̄ɔ̄, ni i mbal̄ yāḿ ō, nge kajəḿ ō.

⁴⁸ Ni i Nə́ɓā kə́ nge dal ba̰ā̰ḿ, kə́ nge kəla dɔ nápar de gə̄ gír tɔ́gə yāḿ tə́.

⁴⁹ Kɔ́ɔ̄ɓē, ḭ̄ ɔ̄rə̄m̄ kɔ̄ɔ́ ta madə̄ ba̰ā̰ḿ gə̄ tə́. Ḭ̄ ī-rāā adə̄ ngé gə̄ ń ənīmə̄n̄ rɔ̄ɔ̄ ní m̄-tetədə́ rɔ̄ɔ̄. Ḭ̄ ɔ̄rə̄m̄ kɔ̄ɔ́ jī ngé dɔ́nɔ gə̄ tə́.

⁵⁰ Adə̄ m̄-ndigə ɓōkíī tɔ̄ȳ dan nápar de gə̄ tə́ ō, m̄-ndigə kɔsə gɔnií kə pā yāḿ gēé ō.

⁵¹ Kɔ́ɔ̄ɓē rāā yá̰á̰ kə́ bo gə̄ dḭḭ̄ń mban̄g ń ni gə̄rā ní. Ni-rāā kem majə kə nge ń ni ur yibə̄ ngār dɔn tə́ ní, adə̄ i kə Dabidí ō, kə gír kaa yānneé ō, bátə́ kə̄ no tə́.