2 SAMUEL 20 - Bibəl ta Sar̄

Seba sə̄lā de gə̄ kadə̄ mbātə́n̄ Dabid

¹ Benjamḛ kə́rēý kə́ nge rāā hál ndi noó, rīn na i Seba, ngōn̄ Bikri. Ni kɔ̄ŕ tōw̄ ba əga kɔŕ ədań de gə̄ na: Yá̰a̰ yājí i dɔ naā tə́ kə Dabidí alé. Yá̰a̰ ndəbā yājí i dɔ naā tə́ kə ngōn̄ Jese alé! Sḭḭ̄ Israel gə̄ ī-téliī kógə̄ḿ kógə̄ḿ kə̄ ɓē yāsí gə̄ tə́!

² Loo ń noō tə́ Israel gə̄ malang mbātə́n̄ Dabid ba ndigən̄ Seba ngōn̄ Bikri. Banī Juda gə̄ əhɔn̄ gō mban̄g yādə́. Nin̄ ḭḭn̄ seneé bā Jurdḛ tə́ bátə́ ugə̄n̄ seneé Jerusalem.

³ Dabid tél aw̄ gogə́ kem kújə yān kə́ Jerusalem tə́. Ni ɓōkə́ də̄yá̰ gidə ndogə̄ yān kə́ kutə gə̄ ń əya̰də́ kadə̄ ngɔ̄mə̄n̄ kem kújə yān ní kem kújə́ kə́rēý tə́, ba əndā ngé ngɔ̄m̄ loo gə̄ tadə́ tə́ adə̄ ngɔ̄mə̄n̄də́ majə. Ni-a̰a̰ gōdə́ majə banī aw̄ rɔ̄də́ to̰ alé. Utə̄n̄ tadə́ kújú bátə́ ndɔ̄ yodə́ tə́. Nin̄ ndin̄ i tītə̄ dəyá̰ kə́ ngaa koy gə̄ beé.

Joab tɔ̄l̄ Amasa

⁴ Gō tə́ anī mban̄g əda Amasa na: Ī-ɓāŕ ngé rɔ̄ɔ̄ kə́ Juda tə́ gə̄ malang ādə̄m̄. M-ādī ndɔ̄ mətá kadə̄ ī-ɓārə́nńdə́. Gō tə́ anī ī-ra loo ń toō tə́.

⁵ Amasa rāā yá̰á̰ ń mban̄g ədan ní, ba ndɔ̄ ń mban̄g gān̄g ní mān̄ pá tá kadə̄ ni ugə̄ ɓáý.

⁶ Dabid əda Abisai na: Seba ngōn̄ Bikri a rāājí yá̰á̰ kə́ majaĺ tɔȳ Absalom, adə̄ ɔ́ý deē yāḿ gə̄, ba ī-sōn̄g gōn na sōgə́ ənge ɓē bo gə̄ kə́ ndogə̄ mbal̄ i gidə tə́ gə̄ anī a a̰ȳjí.

⁷ Deē yā Joab gə̄ ō, Kereti gə̄ ō, Peleti gə̄ ō, go̰ rɔ̄ɔ̄ gə̄ malang ō, aw̄n̄ kə Abisai. Nin̄ teēn̄ kem ɓē kə́ Jerusalem tə́ ba sōngə̄n̄ gō Seba ngōn̄ Bikri.

⁸ Nin̄ i kadə mbal̄ bo kə́ Gabaon tə́ n Amasa aw̄ əngeńdə́ ní. Joab ra i kə kūbə̄ áskar yān gēé rɔ̄n tə́. Ni do̰ō̰ kaskar kə hɔ̄pə̄n gēé gírən tə́ dɔ kūbə̄ ní tə́. Dan ń Joab a njə̄rā kə̄ kété anī kaskar ní teē əsō.

⁹ Joab əda Amasa na: Ngōkó̰ó̰ḿ, ī-to karī a? Ba láā mbāý Amasa kə jīn kə́ ko̰ó̰ əhɔnneé kə̄ rɔ̄n tə́.

¹⁰ Kaskar ń Joab un kə jī gelneé ní Amasa əndā kemən dɔ tə́ alé. Joab ɔsəń kemən adə̄ tiīn kəjā nang tə́. Ni ɔsən kə́ ko̰ jōó to̰ alé, ba Amasa oy. Gō tə́ anī Joab nin̄ kə ngōkó̰o̰n Abisai sōngə̄n̄ gō Seba ngōn̄ Bikri.

Gír dum naā yā Seba gān̄g

¹¹ Ngōn̄ yā Joab kógə̄ḿ ra dɔ nīń Amasa tə́ ba əda na: De gə̄ ń ndigən̄ Joab ō, Dabid ō ní, kadə̄ unən̄ gō Joab!

¹² Ba Amasa to i kum mósən tə́ kum róbó adə̄ de gə̄ malang dəban̄. Dan ń ngōn̄ yā Joab ní a̰a̰ kadə̄ de gə̄ malang ń reē ugə̄n̄ rɔ̄ Amasa tə́ ní dəban̄ anī, ni unən kɔ̄ɔ́ kum róbó aw̄ ənīn kem mu tə́ ba ənī kūbə̄ dɔn tə́.

¹³ Dan ń ni unən kɔ̄ɔ́ kum róbó anī, de gə̄ malang mānə̄n̄ gō Joab tə́ ba sōngə̄n̄ gō Seba ngōn̄ Bikri.

¹⁴ Joab mān̄ dan gír ɓē gə̄ kə́ Israel tə́ malang, aw̄ ugə̄ Abel Bet Maaka. Beritə gə̄ malang kánə̄n̄ naā ba aw̄n̄ gōn̄ tə́ ō.

¹⁵ Joab nin̄ kə deē yān gēé reē gīrə̄n̄ gidə ɓē kə́ Abel Bet Maaka tɔdɔ̄ Seba i kemeé. Nin̄ ɔsən̄ nán̄g kə̄ nja ndogə̄ mbal̄ tə́ adə̄ ra dɔ naā tə́ bing, gidən asə naā kə ta ndogə̄ mbalá dɔɔ́. Gō tə́ anī ndērə̄n̄ gír ndogə̄ mbal̄ kadə̄ tetə.

¹⁶ Anī dəyá̰ kógə̄ḿ kə́ kumən edə̄ ngá̰ý un ndūn kə̄ dɔɔ́ ɔrə̄ń najə̄ kem ɓēé, əda na: Ōōī ɓoo! Ə́daī Joab ādə̄ reē na m̄-sāā kɔr̄ najə̄ seneé.

¹⁷ Joab aw̄ rɔ̄n tə́, anī dəyá̰ ní dəjen na ké i ni Joab n toó wa. Anī Joab tél ədan na i ni. Loo ń noō tə́ dəyá̰ ní ədan na: Ōō najə̄ ń mā nge kəla yāí m-ā m-ə́daī ní. Anī Joab tél ədan na: m̄-nēl̄ mbīḿ laā yā koōń.

¹⁸ Dəyá̰ ní əda na: De gə̄ a ədan̄ kāgə̄ najə̄ kógə̄ḿ kété jóo na: Āwī ī-dəjeī najə̄ kə́ dɔ tə́ kem ɓē kə́ Abel Bet Maaka tə́ ādə̄ gír najə̄ gān̄g.

¹⁹ Dɔ nang kə́ Israel tə́ ní yá̰á̰ kə́ reē kə lápə́yaá tɔȳ gotə yá̰a̰ gə̄ malang i ɓē yājí ō, yá̰á̰ kə́ kadə̄ deē ənī kemən adə̄n tɔȳ gotə yá̰a̰ gə̄ malang i ɓē yājí ō. Banī ḭ̄ ī-sāā nujə ɓē kə́ bo kə́ dan madə̄ gə̄ tə́ dɔ nang kə́ Israel tə́. Yá̰á̰ ń i yá̰a̰ yā Kɔ́ɔ̄ɓē ní ī-sāā nujəń i tām̄ rí tə́?

²⁰ Joab tūr̄ əda dəyá̰ ní na: Najə̄! m̄-gír̄ nujə loo sák sák kadə̄ ɓē gətóo kɔ̄ɔ́ alé.

²¹ I yá̰á̰ ń noō n m̄-sāā rāā ní alé. I deē kógə̄ḿ kə́ dɔ mbal̄ yā Epəraim tə́ kə́ rīn na i Seba ngōn̄ Bikri n un jīn dɔɔ́ yā rɔ̄ɔń mban̄g Dabid ní. Əhɔin̄ nəkɔ́ kə kérneé ādə̄mī seneé anī m-ā m-ə́ya̰ ɓē. Dəyá̰ ní əda Joab na: Majə, j-a j-ənī dɔn dɔ ndogə̄ mbal̄ tə́ yā kadī.

²² Dəyá̰ ní tél aw̄ kem ɓēé aw̄ ɔjə de gə̄ malang kum kedə̄ yān ní, adə̄ gāngə̄n̄ dɔ Seba ngōn̄ Bikri ənīn̄ dɔ bɔr tə́ kə̄ gidə kə́rēý tə́ adə̄n̄ Joab. Joab kɔ̄ŕ tōw̄ anī, deē yān gə̄ ń gīrə̄n̄ gidə ɓē ní tḭ̄ḭ̄n̄ naā kógə̄ḿ kógə̄ḿ, tél aw̄n̄ kə̄ ɓē yādə́ gə̄ tə́. Joab tá tél aw̄ gogə́ rɔ̄ mban̄g tə́ Jerusalem.

Rī ngé kəla yā Dabid gə̄

²³ Joab i ngol ngé rɔ̄ɔ̄ gə̄ malang kə́ Israel tə́. Benaya ngōn̄ Yehoyada i ngol Kereti gə̄ ō, Peleti gə̄ ō.

²⁴ Adoram i ngāgəra dɔ ngé rāā kəla ngámba gə̄. Yehosapatə ngōn̄ Ahilud i kɔdə̄ mbēr̄ yā mban̄g.

²⁵ Sewa i nge ndang makətūbə̄. Sadok ō, Abiatar ō, i ngé tun̄ yá̰a̰ gə̄.

²⁶ Ira ń i de kə́ Yair tə́ ní i nge tun̄ yá̰a̰ yā Dabid.