2 SAMUEL 2 - Bibəl ta Sar̄

Əndān̄ Dabid mban̄g

¹ Gō yá̰a̰ gə̄ ń noō tə́ anī, Dabid dəje Kɔ́ɔ̄ɓē na ké kə n-aw̄ kem ɓē kógə̄ḿ kə́ dan ɓē gə̄ yā Juda tə́ wa. Anī Kɔ́ɔ̄ɓē ədan na kə aw̄. Dabid tél dəje Kɔ́ɔ̄ɓē ɓáý to̰ na ké kə n-aw̄ i kem nge kə́ rá tə́ wa. Anī Kɔ́ɔ̄ɓē tél ədan na kə aw̄ kem ɓē kə́ Hebron tə́.

² Dabid aw̄ kem ɓē ní tə́ kə nə̄yá̰n kə́ jōó gēé. Dəyá̰ gə̄ ní i Ahinoam kə́ Jisreel ō, Abigail kə́ Karmel ń kété i nə̄yá̰ nge yo Nabal ní ō.

³ Dabid adə̄ de kə́ gōn tə́ gə̄ aw̄n̄ seneé ō. De gə̄ ní aw̄n̄ i kə ngéédə́ gēé. Nin̄ aw̄ ndin̄ kem ngán ɓē gə̄ kə́ kadə Hebron tə́.

⁴ Loo ń noō tə́ Juda gə̄ reē urən̄ yibə̄ ngār dɔ Dabid tə́ kem ɓē kə́ Hebron tə́. Nin̄ əndānən̄ mban̄g dɔ Juda gə̄ tə́. Dan ń reē ədan Dabid na i de gə̄ kə́ Yabes kə́ gō nang kə́ Galaad tə́ gə̄ ń dubə̄n̄ Saul anī,

⁵ ni-əla kəla əda de gə̄ ní na: Ādə̄ Kɔ́ɔ̄ɓē rāā majə sesí, sḭḭ̄ ń ī-dubī Saul ní, tām̄ ī-rāāī i háĺ kə́ súmūú kə kɔ́ɔ̄sí.

⁶ Ādə̄ Kɔ́ɔ̄ɓē rāā kem majə sesí ō, rāā háĺ kə́ súmūú sesí ō. Mā, m-ā m̄-rāā majə sesí tām̄ yā yá̰á̰ ń ī-rāāī tə́ ní ō.

⁷ Ba ngɔlaā ní ə́hɔī rɔ̄sí tɔgə, ādə̄ sḭḭ̄ i de kə́ dəngam gə̄. Rɔ̄kum, kɔ́ɔ̄sí Saul oy, ba i mā n Juda gə̄ əndāmə̄n̄ mban̄g kadə̄ m-ó̰o̰ ɓē dɔdə́ tə́ ní.

Əndān̄ Isəboset mban̄g kə́ Israel tə́

⁸ Abner kə́ ngōn̄ Ner ń i ngol ngé rɔ̄ɔ̄ gə̄ yā Saul ní un Isəboset kə́ ngōn̄ Saul, aw̄ seneé Mahanaim.

⁹ Ni-aw̄ əndān mban̄g dɔ de kə́ Galaad gə̄ tə́ ō, Aser gə̄ tə́ ō, Jisreel gə̄ tə́ ō, Epəraim gə̄ tə́ ō, Benjamḛ gə̄ tə́ ō, dɔ Israel gə̄ tə́ malang.

¹⁰ Dan ń Isəboset ndi mban̄g dɔ Israel gə̄ tə́ ní, ɓālə̄n i kutə sɔ́. Ni-o̰o̰ ɓē ɓāl̄ jōó. Banī de kə́ gír ɓē yā Juda tə́ gə̄ unən̄ i gō Dabid.

¹¹ Dabid o̰o̰ ɓē dɔ Juda gə̄ tə́ ɓāl̄ sīrí kə na mehḛ́. Ni-ndi i Hebron n a o̰o̰n ɓē ní.

Juda gə̄ rɔ̄ɔ̄n̄ naā kə Israel gə̄ Gabaon

¹² Abner kə́ ngōn̄ Ner nin̄ kə ngé rɔ̄ɔ̄ gə̄ yā Isəboset kə́ ngōn̄ Saul teēn̄ Mahanaim ba aw̄n̄ kumdə́ kə̄ Gabaon.

¹³ Joab kə́ ngōn̄ Seruya nin̄ kə ngé rɔ̄ɔ̄ yā Dabid gə̄ teēn̄ ō. Nin̄ əngen̄ naā kadə dang kə́ Gabaon tə́. Deē yā Abner gə̄ ran̄ gidə dang ní tə́ dām̄ kə́rēý tə́ ō, deē yā Joab gə̄ ran̄ gidə dang ní tə́ dāmə̄n kə́ noō tə́ ō.

¹⁴ Abner əda Joab na: Ādə̄ balsáa gə̄ ḭḭn̄ dɔɔ́ ba nāān̄ tɔ́gə naā ta kumjí tə́ yā ka̰a̰ ké i náā n ngan̄g ngá̰ý ní wa. Joab əda na: Ādə̄ ḭḭn̄ dɔɔ́ tā.

¹⁵ Nin̄ ḭḭn̄ dɔɔ́ anī tə́dan̄də́ kutə gidə i jōó dan de gə̄ kə́ gír ɓē yā Benjamḛ tə́ kadə̄ ɔsən̄ kum gotə Isəboset ngōn̄ Saul ō, tə́dan̄də́ kutə gidə i jōó dan deē yā Dabid gə̄ tə́ kadə̄ ɔsən kum gotə Dabid ō.

¹⁶ Ngé rɔ̄ɔ̄ gə̄ ní náā nəkɔ́ əhɔ dɔ madə̄ ba̰ā̰n ba ɔsə ngēl̄ kadən kə kaskaraá adə̄ əsōn̄ i mbak. Əndān̄ rī loo ní na i ndɔr̄ kə́ mbalá. Loo ní i Gabaon.

¹⁷ Ndɔ̄ ń noō tə́ rɔ̄ɔ̄ kə́ ngan̄g ngá̰ý əsō. Banī ngé rɔ̄ɔ̄ yā Dabid gə̄ tetən̄ Abner nin̄ kə ngé rɔ̄ɔ̄ kə́ Israel tə́ gə̄ rɔ̄ɔ̄.

¹⁸ Ngán Seruya kə́ mətá gə̄ ń rīdə́ na i Joab ō, Abisai ō, Asael ō ní nin̄ i kum tə́. Asael i de kə́ ngɔ̄də̄ ngá̰ý tītə̄ kāl̄ kə́ bembeé beé.

¹⁹ Ni-tetə rɔ̄n gō Abner tə́ a ngɔ̄dən kanjə̄ tɔ̄ɔ̄ ko̰ó̰ ō, geleé ō.

²⁰ Anī Abner tūr̄ tan ədan na ké i ni Asael n toó wa. Anī Asael tél ədan na i ni.

²¹ Abner ədan na kə tɔ̄ɔ̄ ko̰ó̰ aláa geleé, kə əhɔ balsáá kógə̄ḿ kə tɔ̄lən ba kə ró̰ȳ yá̰á̰ kə́ rɔ̄n tə́. Banī Asael gḛy tél gō Abner tə́ alé.

²² Abner tél ədan ɓáý to̰ na kə tél kɔ̄ɔ́ gōn tə́. Ké i gáŕ kadə̄ n-tɔ̄lən tá wa. Ré n-tɔ̄lən anī n-a n-asə ka̰a̰ ngōkó̰o̰n Joab dan kumən tə́ alé.

²³ Banī Asael mbātə́ kəya̰ gō Abner. Loo ń noō tə́ Abner ɔsə kemən kə gír nənga yānneé adə̄ teē dām̄ kə́rēý tə́. Asael əsō oy kə̄ loo nəkɔ́ ń noō tə́. De gə̄ malang ń reē ugə̄n̄ dɔ nīnə́n tə́ ní dəban̄.

²⁴ Joab nin̄ kə Abisai sōngə̄n̄ gō Abner. Dan ń ugə̄n̄ Gibea Ama anī mbang a udə i mbée. Ré deē ra Giya anī Gibea Ama i kə̄ dām̄ kə́ gír ɓē tə́, dɔ róbə́ kə́ kem dəla loo kə́ Gabaon tə́.

²⁵ Ngán Benjamḛ gə̄ əndān̄ rɔ̄də́ naā tə́ gidə Abner tə́ mejeje ō, ndin̄ dɔ loo kə́ kḭḭ kə̄ dɔɔ́ kógə̄ḿ tə́ ō.

²⁶ Abner ɓāŕ Joab ədan na: J-a jə-tɔ̄lī naā kə kaskaraá i kə́ njɔ́ḿ gə̄ tə́ kanjə̄ dəba a? Ta tɔ̄l̄ ta anī rɔ̄nel̄ a gətóó ní ī-ger̄ aĺ a? I rə́ngáý tə́ n ā ə́da deē yāí gə̄ kadə̄ asədə́ ngɔ̄də̄ ngákó̰ó̰də́ gə̄ ní?

²⁷ Joab tél ədan na: Tītə̄ ń Kɔ́ɔ̄ɓē ndiń kə kumuú noō, ré ɔ̄r̄ najə̄ aĺ anī, i bírí dəloí ngóy n a asə deē yāḿ gə̄ ngɔ̄də̄ gō ngákó̰ó̰də́ gə̄ ní.

²⁸ Joab ɓāŕ tōw̄ anī ngé rɔ̄ɔ̄ yān gə̄ malang dəban̄. Nin̄ tə̄ɓān̄ Israel gə̄ to̰ alé, asədə́ rɔ̄ɔ̄ kɔ̄ɔ́.

²⁹ Abner nin̄ kə deē yān gēé njə̄rān̄ kum ndágə mbō kə́ Araba tə́ ndɔ̄ɔ́ bátə́ loo tīī dɔdə́ tə́. Gō tə́ anī teēn̄ bā Jurdḛ ba əndan̄ dan wól loo kə́ Bitəron gāngə̄n̄, aw̄ ugə̄n̄ Mahanaim.

³⁰ Dan ń asə Joab ngɔ̄də̄ gō Abner ní, ni-ɔsə nja deē yān gə̄ kə̄ naā tə́ ba ɓāŕdə́ anī, i de gə̄ kutə gidə i ndōhó ngóy n gətóon̄ dan ngé rɔ̄ɔ̄ yā Dabid gə̄ tə́ ní, tá Asael gətóo to̰.

³¹ Banī Benjamḛ gə̄ ō, gotə de kə́ rang gə̄ ō ń nin̄ i deē yā Abner gə̄ ní, ngé rɔ̄ɔ̄ yā Dabid gə̄ tɔ̄lə̄n̄də́ ɓú mətá kə kutə mehḛ́.

³² Unən̄ nīń Asael aw̄ dubə̄n̄ kem bəlo mbal̄ ń dubə̄n̄ bɔbə̄n tū tə́ ní tə́ kem ɓē kə́ Betlehem tə́. Gō tə́ anī Joab nin̄ kə deē yān gēé njə̄rān̄ ndɔ̄ɔ́ bátə́ loo tīī. Dan ń mbang əɓa anī ugə̄n̄ Hebron.