2 SAMUEL 18 - Bibəl ta Sar̄

Rɔ̄ɔ̄ rāā deē yā Absalom gə̄

¹ Deē yā Dabid gə̄ ran̄ kə ta naá, adə̄ Dabid mān̄ a̰a̰də́. Ni tə́ndā ngoldə́ gə̄ kógə̄ḿ kógə̄ḿ dɔdə́ tə́. Ngol kə́rēý gə̄ aw̄n̄ kə de gə̄ dūbú ō, kə́rēý gə̄ aw̄n̄ kə de gə̄ ɓú ō,.

² Dabid kēgə̄ áskar gə̄ naā tə́ gír loo mətá: Kə́rēý gə̄ i jī Joab kə́ ngōn̄ Seruya tə́ ō, ngé kə́rēý gə̄ i jī Abisai kə́ ngōkó̰o̰ Joab tə́ ō, gotə gə̄ i jī Itai ń i de kə́ Gat ní tə́ ō. Gō tə́ anī mban̄g əda áskar gə̄ ní na nəkɔ́ n-a n-aw̄ rɔ̄ɔ̄ tə́ sedə́ ō.

³ Banī áskar gə̄ ní tél ədanən̄ na: Ā āw̄ sejí ta rɔ̄ɔ̄ tə́ alé! Tɔdɔ̄ ré jḭḭ j-a̰ȳ naā anī, a usə madə̄ ba̰ā̰ gə̄ alé. Ká ré i núsə́jí n oy gə̄gē anī a usədə́ alé. Banī ḭ̄ kal kógə̄ḿ beē ī-rāā rɔ̄í i de kə́ dūbú kutə gə̄ tə́ danjí tə́. Adə̄ majə kadə̄ ī-ndi i kem ɓēé tá ī-dḭḭ̄ńjí.

⁴ Mban̄g ədadə́ na majə, n-a n-rāā yá̰á̰ ń kemdə́ gḛy ní. Gō tə́ anī mban̄g ra kadə ta róbə́ kə́ yā kudəń kə̄ kem ɓēé tə́ ba ngé rɔ̄ɔ̄ gə̄ teēn̄ kə gō ɓūtə̄də́ gēé: De kə́ ɓú gə̄ ō, kə́ dūbú gə̄ ō.

⁵ Mban̄g əda Joab ō, Abisai ō, Itai ō, na ré ɓōlə́n̄ ndílən anī kə lōōn̄ rāā ngōnən Absalom yá̰á̰ kə́ tōr̄ gə̄. Najə̄ ń mban̄g əda ngol áskar gə̄ tām̄ yā Absalom tə́ ní ngé rɔ̄ɔ̄ gə̄ malang oōn̄.

⁶ Ngé rɔ̄ɔ̄ yā Dabid gə̄ teēn̄ aw̄n̄ dan bembeé, tə́nīn̄ ta deē yā Absalom gə̄ yā rɔ̄ɔ̄də́. Nin̄ udən̄ naā tə́ rɔ̄ɔ̄n̄ naā kem ku kə́ Epəraim tə́.

⁷ De gə̄ yā Dabid gə̄ tetən̄ de gə̄ yā Absalom gə̄ rɔ̄ɔ̄. Ndɔ̄ ń noō tə́ rɔ̄ɔ̄ rāā de gə̄ yā Absalom gə̄ ngá̰ý, adə̄ oyn̄ asən̄ dūbú kutə jōó.

⁸ Rɔ̄ ní i kə̄ loo gə̄ tə́ malang gō nang ngeé ń noō tə́. De gə̄ ń ku tɔ̄ldə́ ní kutədə́ tɔȳ de gə̄ ń oyn̄ yo kaskar ní.

Joab tɔ̄l̄ Absalom

⁹ Ugə̄ dan loo kə́rēý tə́ anī Absalom əɓa bus kə̄ dɔ ngé rɔ̄ yā Dabid gə̄ tə́. Kərō ń ni-ndi dɔ tə́ ní i kərō rapáy. Kərō ní udə gír kāgə̄ kógə̄ḿ kə́ bo kə́ ta jīn gə̄ súndə̄n̄ naā ngá̰ý tə́. Ta jīn gə̄ ní əhɔn̄ dɔ Absalom adə̄ dɔn nga̰ā̰ mbo̰ō̰də́ tə́. Anī kərō rapáý ń Absalom ndi dɔ tə́ ní teē gírən tə́ aw̄ kɔ̄ɔ́, adə̄ Absalom naā ɓōdə̄ loo tə́ dɔɔ́ rənge.

¹⁰ Deē kógə̄ḿ a̰a̰n anī aw̄ əda Joab na n-a̰a̰ Absalom na naā ta jī kāgə̄ kógə̄ḿ tə́ dɔɔ́ rənge.

¹¹ Joab tél əda deē ń əda najə̄ ní na adə̄ ké á̰a̰n wa, ba ké i tām̄ rí tə́ áké ɔ́sən dɔ tə́ tɔ̄lən ɗer aĺ wa? Nə́ngē tə́ gēé ɔsən dɔ tə́ tɔ̄lən i mbée anī n-a n-adə̄n njáŕ sə́lē arjā̰a̰ kutə kógə̄ḿ ō, ndāŕ do̰ō̰ ɓōdə̄ ō.

¹² Banī deē ní tél əda Joab na: Ká ré ādə̄məń i njáŕ sə́lē arjā̰a̰ dūbú gə̄gē anī, m-ā m-ə́la jīḿ yā kɔdəń rɔ̄ ngōn̄ mban̄g alé. Tɔdɔ̄ najə̄ ń mban̄g ədaī ō, əda Abisai ō, Itai ō ní, j-oō malang. Mban̄g ədasí na n-rāāsí ɓɔ́ ba kə ī-lōōī tɔ̄l̄ ngōnən Absalom.

¹³ Ká ré m̄-tɔ̄lən ba m-ə́dań na m-ōō najə̄ ń mban̄g əda ní aĺ gə̄gē anī, mban̄g a rāā bátə́ yā teē dɔ sor̄ yāḿ tə́, tɔdɔ̄ ni i nge teē dɔ yá̰a̰ malang tə́, adə̄ īkɔ́ gə̄gē ā ī-mbātə́ kun najə̄ dɔḿ tə́ kɔ̄ɔ́.

¹⁴ Joab əda deē ní na n-a n-udə yā ra kə̄ tan tə́ alé. Ni ɔy kāgə̄ kə́ ta katə gə̄ mətá, aw̄ tɔ́səń Absalom ń naā dɔɔ́ rənge ta jī kāgə̄ tə́ ba oy aĺ ɓáý ní dɔ kújə́ mósən tə́.

¹⁵ Gō tə́ anī balsáá kə́ kutə kógə̄ḿ gə̄ ń nin̄ i ngé kətō yá̰a̰ rɔ̄ɔ̄ gə̄ yā Joab ní reē gīrə̄n̄ gidə Absalom ba tɔ́sə̄ tɔ̄l̄nən̄.

¹⁶ Gō tə́ anī Joab kɔ̄ŕ tōw̄ kadə̄ gír rɔ̄ɔ̄ gān̄g. Anī ngé rɔ̄ɔ̄ yā Dabid gə̄ lōōn̄ gír ngɔ̄də̄ ngé rɔ̄ɔ̄ yā Absalom gə̄ tə́.

¹⁷ Unən̄ nīń Absalom ənīn̄ kem bəlo kə́ bo ngá̰ý tə́ kem kuú, ba kánə̄n̄ kūbə̄rū mbal̄ gə̄ dɔ tə́ adə̄ ra dɔ naā tə́ bing. Ngé rɔ̄ɔ̄ yā Absalom gə̄ a̰ȳn̄ naā malang. Nin̄ télən̄ kógə̄ḿ kógə̄ḿ kə̄ ɓē yādə́ gə̄ tə́.

¹⁸ Dan ń Absalom ndi kə kumneé ɓáý ní, adə̄ udən̄ mbal̄ kə nja dɔɔ́ kum wól yā mban̄g tə́. Tɔdɔ̄ ni gír̄ kemən tə́ na ngōn̄ kemən na gətóo adə̄ rīn na a to ta kaw̄ jóo alé. Ni əndā rīn dɔ mbal̄ kə́ kudə kə nja dɔɔ́ ní tə́. Ɓōólaā gə̄gē a ɓārə́n̄ mbal̄ ní na i yá̰a̰ kəga kem dɔ Absalom tə́.

Dabid oō najə yo Absalom

¹⁹ Ahimas kə́ ngōn̄ Sadok dəje Joab ta róbə kadə n-aw̄ n-əda mban̄g gotə najə̄ kə́ majə. Najə̄ ní i gān̄g kə́ Kɔ́ɔ̄ɓē gān̄g sarya yā mban̄g, tɔdɔ̄ Kɔ́ɔ̄ɓē ɔr̄ mban̄g kɔ̄ɔ́ jī madə̄ ba̰ā̰n gə̄ tə́.

²⁰ Banī Joab tél ədan na: Ɓōólaā i ndɔ̄ kəda gotə najə̄ kə́ majə alé, i ndɔ̄ kə́ rang tə́ tá. Ā ə́da i gotə najə̄ kə́ majə alé tām̄ najə̄ ní i najə̄ yo ngōn̄ mban̄g.

²¹ Gō tə́ anī Joab əda deē kógə̄ḿ kə́ Kus na: Ḭ̄, yá̰á̰ ń á̰a̰ā̰ ní āw̄ ə́da mban̄g. De kə́ Kus ní əsō ɔsə non nang tə́ no Joab tə́ ba a̰ȳ ngɔ̄də̄ aw̄.

²² Ahimas kə́ ngōn̄ Sadok tél əda Joab ɓáý to̰ na ká i rí n a rāā yā rāań yá̰a̰ gə̄gē anī, ə́ya̰m̄ ādə̄ m-ā̰ȳ ngɔ̄də̄ m-āw̄ gō de kə́ Kus ń toō tə́. Banī Joab dəjen na: Ngōnə̄ḿ, najə̄ kə́ majə kə́ yā kadə̄ ə́ngé yá̰á̰ gírí gətóo, ba ī-sāā ka̰ȳ ngɔ̄də̄ i tām̄ yā rí tə́?

²³ Ahimas tél əda ɓáý to̰ na: Ká i rí n a rāā yā rāań yá̰a̰ gə̄gē anī, usəm̄ alé, m-a m-ā̰ȳ ngɔ̄də̄ yā kaw̄. Joab ədan na majə kə aw̄ tā. Ahimas un róbə́ kə́ teē ndágə̄ mbō kə́ Jurdḛ tə́ kə ngɔ̄dɔ̄ɔ́, adə̄ ni mān̄ no de kə́ Kus ní.

²⁴ Kum mbang ngeé ń noō tə́ ní Dabid ndi i ta róbə ndogə̄ bɔr kə́ yā kudəń kə̄ kem ɓēé tə́. Nge kum̄ loo ra dɔ ndogə̄ mbal̄ tə́ dɔɔ́ a um̄ loo. Dan ń ɔr̄ dɔn dɔɔ́ anī a̰a̰ de kə́ kə kérneé kə́ a a̰ȳ ngɔ̄də̄ a reē.

²⁵ Ni-əga kɔŕ ədań mban̄g yá̰á̰ ń a̰a̰ ní. Anī mban̄g əda na: Ré deē ní i kə kérneé anī a reē i kə najə̄ kə́ majaá. Dan ń deē ní a reē kə̄ non tə́ anī,

²⁶ nge kum loo ní a̰a̰ de kə́ rang kə́ a a̰ȳ ngɔ̄də̄ a reē ɓáý to̰. Ni-əga kɔŕ ədań nge ra ta róbə ndogə̄ tə́ na: De kə́ rang kə́ kə kérneé a a̰ȳ ngɔ̄də̄ a reē noō ɓáý to̰. Anī mban̄g əda na: Nge ń noō a reē i kə najə̄ kə́ majaá ō.

²⁷ Nge kum loo ní əda na n-ger̄ de kə́ ta kə̄ga dɔ ń a̰ȳ ngɔ̄də̄ a reē ní sɔɔ̄ń ngɔ̄də̄ yān. Deē ní na i Ahimas kə́ ngōn̄ Sadok. Anī mban̄g əda na: I de kə́ majə adə̄ a reē i kə najə̄ kə́ majaá.

²⁸ Dan ń Ahimas reē ugə̄ anī, əga kɔŕ ədań mban̄g na: Yá̰a̰ malang njə̄rā majə! Ni ɔsə̄ non nang tə́ no mban̄g tə́ ba əda na: Kɔ́ɔ̄ ɓē gə̄, ādə̄ de gə̄ tɔ̄ȳn̄ Kɔ́ɔ̄ɓē Nə́ɓā yāí ń əla ngé mbātə́ najə̄ gōí tə́ gə̄ gír tɔ́gə yāí tə́ ní.

²⁹ Mban̄g dəje Ahimas na ké ngōnən Absalom to karī wa. Anī Ahimas tél ədan na: Kum mbang ń Joab əlań nge kəla yāí kə́ rang tə́ ō, əlamə̄ń tə́ ō ní, m-á̰a̰ kadə̄ de gə̄ a̰a̰n̄ yiw yiw ngá̰ý, ba m̄-ger̄ yá̰á̰ ń rāā yá̰á̰ ní alé.

³⁰ Mban̄g əda na: Majə, ə́ja rɔ̄í kə̄ gogə́, ī-ra loo ń noō tə́. Ahimas əja rɔ̄n kə̄ gogə́ ba ra loo ní tə́.

³¹ Loo ń noō tə́ de kə́ Kus ní ugə̄. Ni-əda mban̄g na: Kɔ́ɔ̄ ɓē gə̄, najə̄ kə́ majə tām̄ yāí tə́ n toó: Kɔ́ɔ̄ɓē gān̄g sarya yāí ɓōólaā. De gə̄ malang ń mbātíīn̄ ba tél a rɔ̄ɔ̄īn̄ ní, Kɔ́ɔ̄ɓē taāī jīdə́ tə́ əya̰ī dɔɔ́.

³² Mban̄g dəje de kə́ Kus ní na ké ngōnən Absalom to karī wa. Anī ni-tél ədan na: Kɔ́ɔ̄ ɓē gə̄, ādə̄ yá̰á̰ ń rāā balsáá ń noō ní rāā madə̄ ba̰ā̰í gə̄ ō, rāā de gə̄ malang ń mbātíīn ba gḛyn̄ kadə̄ yá̰á̰ kə́ to kum kaȳ aĺ reē dɔí tə́ ní ō.