2 SAMUEL 17 - Bibəl ta Sar̄

Husai tūr̄ gír kɔjə̄ kə́ Ahitopel adə̄

¹ Gō tə́ sḛ́ý anī Ahitopel əda Absalom na: Ādə̄m̄ ta róbə ādə̄ m-ɔ́y de gə̄ dūbú kutə gidə i jōó m̄-ngɔ̄dəń gō Dabid ndɔ̄ɔ́ laā nəkɔ́ ń toō.

² M-ā m̄-teē rɔ̄n tə́ i dan ń kɔr a rāān ní. M-ā m-ə́la ɓōĺ kemən tə́. De gə̄ ń dānə̄nən̄ ní a a̰ȳn̄ naā malang kɔ̄ɔ́. Adə̄ i nəkɔ́ kə kérneé n m-ā m̄-tɔ̄lən.

³ Gō tə́ anī m-ā m̄-tél kə de gēé malang yā reē sedə́ kadī. Tɔdɔ̄ deē ń ī-sāā kadə̄ gətóo kɔ̄ɔ́ ní ré oy anī, de gə̄ malang a télən̄ yā reē rɔ̄í tə́ ō, a ndin̄ majə ō.

⁴ Najə̄ ní majə ta kum Absalom tə́ ō, ta kum kum kɔɔ̄ gə̄ yā ngán Israel gə̄ tə́ ō.

⁵ Ɓá tā ba Absalom əda na kə ɓārə́n̄ Husai kə́ Arki kadə n-oōn̄ yān ō, ké a əda na i rí wa.

⁶ Dan ń Husai reē ugə̄ anī, Absalom ədan yá̰á̰ ń Ahitopel ɔjə kadə̄ yā rāā ní. Ba gō tə́ anī dəjen na ké kə n-rāān̄ yá̰á̰ ní aké kə n-rāān̄ aĺ wa. Ké a əda yān na i rí wa.

⁷ Husai tél əda Absalom na: Kɔjə̄ kə́ ɓōó ń Ahitopel adə̄ toó majə alé.

⁸ Īkɔ́ ī-ger̄ bɔbí ō, deē yān gə̄ ō majə. Nin̄ i go̰ rɔ̄ɔ̄ gə̄ malang, tá wōn̄g rāādə́ tītə̄ dā̰ úrsə kə́ tḭ̄ḭ̄ ta ngōnən bembeé beé. Bɔbí i nge rɔ̄ɔ̄ adə̄ a to kə gotə de gēé alé.

⁹ N toō ni ɓɔ̄ɔ̄ rɔ̄n kɔ̄ɔ́ kem bəlo mbal̄ kə́rēý tə́, aláa ni i loo kə́rēý tə́. Adə̄ ré deē yājí gə̄ oyn̄ ta kəla gír rɔ̄ɔ̄ tə́ anī, de gə̄ a oōn̄ i láẃ ngá̰ý ō, a ədan̄ na de gə̄ na oyn̄ dan de gə̄ ń unən gō Absalom tə́ ní ō.

¹⁰ Loo ń noō tə́ ká i de kə́ ngan̄g kə́ kemən i kem ɓɔl gə̄gē, tɔ́gən a ur̄ wak kɔ̄ɔ́. Tɔdɔ̄ Israel gə̄ malang gerə̄n̄ kadə̄ bɔbí i go̰ rɔ̄ɔ̄ ō, de gə̄ ń seneé ní i de gə̄ kə́ gerə̄n̄ rɔ̄ɔ̄ majə ō.

¹¹ Adə̄ gír̄ yāḿ mā n toó: Ɔ́ý ngé rɔ̄ɔ̄ gə̄ kə́ Israel tə́ malang, ə́lá gír Dan bátə́ Beer Seba, ādə̄ kutədə́ asən̄ naā kə kutə nán̄g ngárə̄ḿnjēý kə́ ta bā tə́ ō, īkɔ́ āw̄ sedə́ ta rɔ̄ɔ̄ tə́ ō.

¹² Ká Dabid toń i rá gə̄gē, j-a j-əngein̄. J-a j-əsōī dɔn tə́ tītə̄ tal kə́ əsō dɔ nang tə́ beē. Ni ō, deē yān gə̄ ō ní deē kógə̄ḿ kə́ yā teē a gətóo.

¹³ Ré ɓɔ̄ɔ̄ rɔ̄n i kem ɓē kógə̄ḿ tə́ anī, ngé rɔ̄ɔ̄ yājí gə̄ malang a reēn̄ kə kəlaá yā kadə̄ jə-ndɔ́rīneé ɓē ní j-awī j-ənīin̄ kum wól man̄ tə́, adə̄ kūbə̄rū mbal̄ kógə̄ḿ gə̄gē a na̰y alé.

¹⁴ Absalom ō, de kə́ dəngam gə̄ kə́ Israel tə́ ō, ədan̄ na: Kɔjə̄ ń Husai adə̄ ní majə tɔȳ yā Ahitopel. Tɔdɔ̄ Kɔ́ɔ̄ɓē ndigə rāā kadə̄ kɔjə̄ kə́ majə yā Ahitopel to karī kɔ̄ɔ́, yā rāań kadə̄ yá̰á̰ kə́ to kum kaȳ aĺ əsō dɔ Absalom tə́.

Dabid teē bā Jurdḛ

¹⁵ Husai tél aw̄ ɔjə ngé tun̄ yá̰a̰ gə̄ ń i Sadok ō, Abiatar ō ní gotə kɔjə̄ ń Ahitopel adə̄ Absalom nin̄ kə kum kɔɔ̄ gə̄ yā ngán Israel gə̄ ní ō, ɔjədə́ gotə kɔjə̄ ń ni-adə̄ ní ō,

¹⁶ ba ta tɔ̄l̄ ta anī ədadə́ na kə əla kə ədan̄ Dabid láẃ kadə̄ oō ō, kə ədanən̄ kadə̄ kə lōō ɓīī ndágə mbō kə́ Jurdḛ tə́ ndɔ̄ɔ́ ɓōólaā ō, ba kə teē bā kə̄ gidə kə́rēý tə́. Ré teē bā aĺ anī a tɔ̄lə̄n̄də́ kə deē yān gēé malang kɔ̄ɔ́.

¹⁷ Jonatan nin̄ kə Ahimas ran̄ i En Rogel. Ba i nge kəla kə́ dəyá̰ kə́rēý n kadə̄ reē ədadə́ tá kadə̄ nin̄ a télənneé yā kaw̄ kəda mban̄g Dabid ɓáý. Nin̄ udən̄ kem ɓēé aĺ i najə̄ kadə̄ deē a̰a̰də́.

¹⁸ Ba balsáá kógə̄ḿ a̰a̰də́ adə̄ aw̄ əda Absalom. Banī Jonatan nin̄ kə Ahimas ɔtən̄ láẃ kɔ̄ɔ́ aw̄n̄ ɓē deē kógə̄ḿ kə́ Bahurim. Bəlo man̄ i kem ndogə̄ yā deē ní tə́ adə̄ nin̄ risə aw̄ ɓɔ̄ɔ̄n̄ rɔ̄də́ kemeé.

¹⁹ Nə̄yá̰ deē ní un tandā ənī ta bəlo man̄ ní tə́ ba najə kōō kemeé, adə̄ deē a̰a̰ ger̄ alé.

²⁰ Ngé kəla gə̄ yā Absalom reē udən̄ kem ndogə̄ yā dəyá̰ ní tə́ ba dəjenən̄ na ké Ahimas nin̄ kə Jonatan i rá wa. Anī dəyá̰ ní ədadə́ na teēn̄ man̄ kɔ̄ɔ́. Ngé kəla gə̄ ní sāān̄də́ ba əngen̄də́ alé, adə̄ tél aw̄n̄ gogə́ Jerusalem.

²¹ Dan ń aw̄n̄ kɔ̄ɔ́ anī Ahimas nin̄ kə Jonatan teēn̄ kɔ̄ɔ́ kem bəlo man̄ ní tə́ ba aw̄ tāān̄ mban̄g Dabid. Nin̄ ɔjənən̄ gotə kɔjə̄ ń Ahitopel adə̄ ní ō, ədanən̄ na kə teēn̄ bā Jurdḛ láẃ kanjə̄ kɔr bā̰ā̰ ō.

²² Adə̄ Dabid ɔr̄ dɔɔ́ kə de gə̄ malang ń seneé ní. Nin̄ udən̄ bā Jurdḛ, loo a rāā yā tīī anī teēn̄ malang kə̄ gidə kə́rēý tə́, de kə́ nay gogə́ gətóo.

²³ Dan ń Ahitopel a̰a̰ kadə̄ de gə̄ tetən̄ rɔ̄də́ gō kɔjə̄ yān tə́ aĺ anī, əndā síŕdí gidə kərō yān tə́ ba ḭḭ dɔ tə́ aw̄ ɓēé. Ni ɔjə de kə́ ta kújə yān tə́ gə̄ yá̰a̰ gə̄ kə́ kadə̄ rāān̄ rāān̄, ba gō tə́ anī ənī kəlā oy kɔ̄ɔ́. Dubə̄nən̄ i kem bəlo ɓádə́ ń dubə̄n bɔbə̄n tū tə́ kété ní tə́.

Dabid i Mahanaim

²⁴ Dan ń Absalom nin̄ kə ɓūtə̄ ngé rɔ̄ɔ̄ gə̄ malang kə́ Israel tə́ a teēn̄ bā Jurdḛ anī, Dabid ugə̄ Mahanaim kɔ̄ɔ́.

²⁵ Absalom gə̄rā Amasa əndān ngol áskar gə̄ tə́ kum gotə Joab. Tá Amasa ní i ngōn̄ dəngam kógə̄ḿ kə́ Israel tə́ kə́ rīn na i Yeter. Dəngam ní taā Abigal ngōn̄ Nahas, ba Abigail i ngōkó̰o̰ Seruya kə́ kó̰o̰ Joab.

²⁶ Absalom nin̄ kə ngán Israel gēé əndān̄ gérger yādə́ i dɔ nang kə́ Galaad tə́.

²⁷ Dan ń Dabid ugə̄ Mahanaim anī, Sobi kə́ ngōn̄ Nahas kə́ Raba ń i ɓē bo yā Amon gə̄ ní ō, Makir kə́ ngōn̄ Amiel kə́ Loo Dabar ō, Barjilai kə́ Rogelim ń i ɓē kə́ dɔ nang kə́ Galaad tə́ ní ō,

²⁸ reēn̄ kə yá̰a̰ ɓīī gə̄ ō, kə kūbə̄ bḭḭ̄ batə̄ gə̄ ō, kə səmbē gə̄ ō, kə kōō gémē gə̄ ō, kə kōō ɔrjə gə̄ ō, kə ndujə̄ gə̄ ō, kə kum kōō kə́ ndaw̄ gə̄ ō, kə kum mənjo gə̄ ō, kə kum la̰tíi gə̄ ō,

²⁹ kə yibə̄ tejə gə̄ ō, kə yibə̄ man̄g gə̄ ō, kə mba man̄g kə́ sīsə̄rī gə̄ ō, kə mba batə̄ kə́ sīsə̄rī gə̄ ō, adə̄n̄ Dabid nin̄ kə̄ de gə̄ ń seneé ní. Tɔdɔ̄ nin̄ gírə̄n̄ kadə̄ de gə̄ ń mānə̄n̄ kem dəla loo tə́ ní ɓō rāādə́ ō, kɔr rāādə́ ō, kəndā man̄ rāādə́ ō.