2 SAMUEL 15 - Bibəl ta Sar̄

Absalom sāā taā ngār jī bɔbə̄n Dabid tə́

¹ Gō tə́ anī Absalom sāā púsə́ kógə̄ḿ ō, sāā sə́nda gə̄ ō, ɔy de gə̄ kutə mí kadə̄ a̰ȳn̄ ngɔ̄də̄ kété non tə́ ō.

² Kə ndɔ̄í ɓatə anī ni a ra i kadə róbə́ kə́ yā kudəń kə̄ kem ɓēé tə́. De gə̄ malang ń a mānə̄n̄ kógə̄ḿ kógə̄ḿ a aw̄n̄ kə̄ ɓē mbangāá yā kadə̄ mban̄g gān̄g sarya yādə́ ní, ni-ɓāŕdə́ ba dəjedə́ na ké nin̄ i de kə́ rá gə̄ wa. Ɓá a de gə̄ ní tél ədanən̄ na nin̄ na i ngán Israel gə̄ kə́ dan gír ɓē kə́ beé tə́.

³ Anī ni ədadə́ kógə̄ḿ kógə̄ḿ kə dɔdə́ gēé na: Majə, najə̄ yāí majə ō, i gōtə́ ō, banī de kə́ kadə̄ mban̄g əndān kadə̄ oō najə̄ yāí gətóo.

⁴ Absalom əda ɓáý to̰ na: Ré i mā n i nge gān̄g sarya kə́ kem ɓē ń toō tə́ anī, de gə̄ malang a reēn̄ saryaá i rɔ̄ḿ mā tə́ ō, m-ā m̄-gān̄g sarya yādə́ i kə gōó yā kadə̄də́ ō.

⁵ Ba ré de gə̄ ní a reēn̄ kə̄ rɔ̄n tə́ yā kɔsə nodə́ nang tə́ non tə́ anī, ni-əla jīn əhɔńdə́ ba ɓir̄də́ dagə kə̄ rɔ̄n tə́.

⁶ Yá̰á̰ ń Absalom a rāā kə ngán Israel gə̄ malang ń a mān̄ a aw̄n̄ kə̄ ɓē mbangāá yā kadə̄ mban̄g gān̄g sarya yādə́ ní n noó. I kum kedə̄ ń noō n Absalom tūrəń ngán Israel gə̄ gidə yān tə́ adə̄ nin̄ gḛyn̄ najə̄ yān ní.

⁷ Ta tɔ̄l̄ ta ɓāl̄ kə́ nge ko̰ sɔ́ tə́ anī, Absalom əda mban̄g na: Ādə̄m̄ ta róbə ādə̄ m-āw̄ Hebron rāā yá̰á̰ ń m-ə̄nī ndūḿ yā rāā tām̄ yā Kɔ́ɔ̄ɓē tə́ ní tə́.

⁸ Tɔdɔ̄ dan ń m̄-ndi Gesur dɔ nang kə́ Aram tə́ ní, m-ə̄nī ndūḿ m-ādə̄ Kɔ́ɔ̄ɓē m-ə́da na ré Kɔ́ɔ̄ɓē tél reē seḿ gogə́ Jerusalem anī, m-ā m̄-tun̄ yá̰a̰ yā kadə̄n kem ɓē kə́ Hebron tə́.

⁹ Mban̄g tél əda Absalom na: Āw̄ kə kem sɔlɔ́. Anī ni-aw̄ Hebron.

¹⁰ Absalom əla deē yān gə̄ kadə̄ ədan̄ gír ɓē gə̄ yā Israel gə̄ malang na ré kə oōn̄ kōō tōw̄ anī, kə ədan̄ na: Absalom ndi mban̄g kem ɓē kə́ Hebron tə́.

¹¹ Absalom mēr̄ de kə́ Jerusalem gə̄ ɓú jōó adə̄ dānə̄nən̄. Ba de gə̄ ní tá ndin̄ i dāyāá gerən gō yá̰a̰ gə̄ ń a rāān̄ yá̰á̰ ní alé.

¹² Dan ń Absalom a tun̄ yá̰a̰ anī əla gō Ahitopel nge kadə̄ Dabid kɔjə̄ tə́ kem ɓē yān tə́ Gilo. Adə̄ kutə de gə̄ yā Absalom a reē i kə̄ dɔ madə̄ tə́ ō, koō naā ní tɔ́gən aw̄ i kum kə́ kété kété ō.

Dabid teē Jerusalem a̰ȳ

¹³ De kógə̄ḿ reē əda Dabid na de kə́ dəngam gə̄ kə́ Israel tə́ na tetən̄ rɔ̄də́ malang gō Absalom tə́ kɔ̄ɔ́.

¹⁴ Anī kə̄ ta jī tə́ noō Dabid əda ngé kəla yān gə̄ malang ń ndin̄ seneé Jerusalem ní na: J-a̰ȳī naā kɔ̄ɔ́ na Absalom a əya̰jí kadə̄ jə-ndiī kə kumjí alé. Ādə̄ j-a̰ȳī naā láẃ na a ɔr bā̰ā̰ loo reē yā rɔ̄jí tə́ alé. Ni a tɔ̄l̄ de kə́ kem ɓēé gə̄ malang yā rāań kadə̄ yá̰á̰ kə́ majaĺ taā loo kem ɓēé.

¹⁵ Ngé kəla gə̄ yā mban̄g tél ədan̄ mban̄g na: Ká kɔ́ɔ̄jí mban̄g ndigəń i rāā rí gə̄gē, jḭḭ ngé kəla yān gə̄ jə-ndi dɔ rɔ̄jí tə́ kɔ̄ɔ́ yā rāā yá̰á̰ ní.

¹⁶ Adə̄ mban̄g teē kə njaneé naā tə́ kə kojə yān gēé malang, ba i də̄yá̰ gidə ndogə̄ yān gə̄ n ni əya̰də́ kutə kógə̄ḿ kadə̄ a̰a̰n̄ gō kem kújə́ ní.

¹⁷ Mban̄g nin̄ kə de kə́ gōn tə́ gēé teēn̄ kə njadə́ ba aw̄ dəban̄ kadə kújə́ kə́ ta ngóy ɓē tə́ tə́.

¹⁸ Ngé kəla yān gə̄ malang mānə̄n̄ ta kumən tə́: Kereti gə̄ ō, Peleti gə̄ ō, Gat kə́ ɓú mehḛ́ gə̄ ń reēn̄ gōn tə́ ní ō. Nin̄ malang mānə̄n̄ ta kum mban̄g tə́.

¹⁹ Mban̄g əda Itai ń i ngol ngé rɔ̄ɔ̄ gə̄ kə́ Gat ní na: Ḭ̄ ī-ndigə kaw̄ sejí ō, i tām̄ yā rí tə́? Ī-tél āw̄ ī-ndi kə mban̄g kə́ kijií. Tɔdɔ̄ ḭ̄ i tə̄rā ō, ásə́ tél kaw̄ gogə́ kem ɓē yāí tə́ to̰ aĺ ō.

²⁰ Ḭ̄ ī-reē gōḿ tə́ i kə̄ tagə́bēé laā anī ɓōólaā kə m-āw̄ seí loo ɓá a? Loo nəkɔ́ ń kadə̄ m-āw̄ tū tə́ ní gə̄gē m̄-ger̄ aĺ kə̄ laā anī, kə m-úniī kadə̄ āw̄ sejí a? I beé alé, ī-tél āw̄ gogə́ kem ɓēé kə ngákó̰ó̰í gēé, ba ādə̄ Kɔ́ɔ̄ɓē rāā kem majə seí ō, rāā yá̰á̰ kə́ gōtə́ seí ō.

²¹ Banī Itai tél əda mban̄g na: Tītə̄ ń Kɔ́ɔ̄ɓē ndiń kə kumneé noō ō, ḭ̄ ī-ndiń kə kumií ō noó, loo ń ā ī-ndi tū tə́ ní m-ā m̄-ndi tū tə́ ō, yā kadə̄ ré ā ī-ndi loo ní tə́ i kə kumií a, m-ā m̄-ndi tū tə́ kə kumḿ ō, ā óy i loo ní tə́ a, m-ā m-óy tū tə́ ō.

²² Dabid əda Itai na majə, kə mān̄. Anī Itai mān̄ naā tə́ kə ngé rɔ̄ɔ̄ yān gə̄ ō, kojə yā ngé rɔ̄ɔ̄ yān gə̄ ō.

²³ Dan ń de gə̄ a mānə̄n̄ anī, de kə́ kem ɓēé gə̄ malang unən̄ ndūdə́ kə̄ dɔɔ́ a nōōnneé. Mban̄g teē man̄ Sedəron kə̄ gidə kə́rēý tə́ ō, de gə̄ malang mānə̄n̄ kumdə́ sɔɔ̄ róbə́ ń to kə gō kadə dəla loo ní ō.

²⁴ Sadok nge tun̄ yá̰a̰ ō, ngán Lebi gə̄ ń nin̄ malang i ngé kətō sandúkə madə̄ naā yā Nə́ɓā ní ō, nin̄ i sedə́. Nin̄ əndān̄ sandúkə madə̄ naā yā Nə́ɓā nang tə́ ba Abiatar al̄ dɔɔ́ bátə́ adə̄ de kə́ kem ɓēé gə̄ ń a teēn̄ ní mānə̄n̄neé malang.

²⁵ Tā anī mban̄g əda Sadok na: Ī-tél kə sandúkə yā Nə́ɓāá āwń gogə́ kem ɓēé. Ré Kɔ́ɔ̄ɓē ndigə rāā majə seḿ anī a tél yā reē seḿ gogə́ kadə̄ m-á̰a̰ sandúkə yān ɓáý ō, kadə̄ m-á̰a̰ loo ndi yān ɓáý ō.

²⁶ Ba ré Kɔ́ɔ̄ɓē əda na n-gḛym̄ aĺ anī, ādə̄ rāā yá̰á̰ ń kemən ndigə ní seḿ.

²⁷ Mban̄g əda Sadok ɓáý to̰ na: Ḭ̄ ō, ngōnīí Ahimas ō, Abiatar nin̄ kə ngōnən Jonatan ō ní, ī-tél āwī gogə́ kem ɓēé kə kem sɔlɔ́.

²⁸ Mā m-ā m̄-nay kem dəla loo tə́ ngɔr kə̄ kadə loo ń a udən̄ man̄ Jurdḛ tū tə́ ní tə́, bátə́ kadə̄ ré m-ōō najə̄ kə́ ḭḭ rɔ̄sí tə́ pá tá.

²⁹ Adə̄ Sadok nin̄ kə Abiatar télən̄ kə sandúkə madə̄ naā yā Nə́ɓāá aw̄n̄neé gogə́ Jerusalem ō, nin̄ ndin̄ kə̄ noó ō.

Dabid əla Husai kadə̄ aw̄ um̄ Absalom

³⁰ Dabid un róbə́ kə́ əta tan ta kaw̄ kə̄ dɔ mbal̄ kāgə̄ olibə gə̄ tə́ i kə nōó kumən tə́. Ni do̰ō̰ kūbə̄ ta kumən tə́ ō, njə̄rā i njan karī ō. De gə̄ malang ń dānə̄nən̄ ní do̰ō̰n̄ kūbə̄ ta kumdə́ tə́ ō, njə̄rān̄ i kə nōó ō.

³¹ Reē ədan̄ Dabid na Ahitopel i dan ngé koō naā gə̄ tə́, adə̄ ni na i gō Absalom tə́. Anī Dabid əda na: m̄-rāāī ɓɔ́ Kɔ́ɔ̄ɓē, ī-rāā ādə̄ kɔjə̄ yā Ahitopel tél kɔjə̄ kə́ to mbóo ro karī.

³² Dan ń Dabid aw̄ ugə̄ dɔ mbal̄ tə́ dɔɔ́ loo ń a ɔsən̄ nodə́ nang tə́ tū tə́ ta kum Nə́ɓā tə́ ní anī, a̰a̰ Husai ń i Arki ní a tə́nī tan. Kūbə̄ ngāl̄ yān i kə́ rə̄yā̰ ō, bumbə́ru i dɔn tə́ ō,.

³³ Dabid ədan na: Ré āw̄ seḿ anī ā ɔ̄ȳm̄ ngá̰ý.

³⁴ Ba ré ī-tél āw̄ gogə́ kem ɓēé ba ə́da Absalom na: Kɔ́ɔ̄ ɓē gə̄, mā i nge kəla yāí. Kété m̄-rāā kəla m-ādə̄ bɔbí, banī ngɔlaā mā i nge kəla yāí. Anī ā ə́nge ta róbə bā ta kɔjə̄ gə̄ yā Ahitopel yā rāań seḿ.

³⁵ Tá ngé tun̄ yá̰a̰ gə̄ ń i Sadok nin̄ kə Abiatar ní nin̄ i seí nú aĺ a? Najə̄ malang ń ā ōō kem kújə yā mban̄g tə́ ní, ə́dádə́.

³⁶ Ngán Sadok nin̄ kə Abiatar ń i Ahimas ō, Jonatan ō ní, nin̄ i sedə́ noō. Adə̄ najə̄ malang ń ā ōōī ní ə́lá ə́damī kə kūl̄də́.

³⁷ Dan ń Absalom udə kə̄ kem ɓē kə́ Jerusalem tə́ anī, Husai madə̄ Dabid udə kem ɓēé ō.