2 SAMUEL 14 - Bibəl ta Sar̄

Absalom tél aw̄ gogə́ Jerusalem

¹ Joab ngōn̄ Seruya a̰a̰ kadə̄ kem mban̄g i dɔ Absalom tə́.

² Ni-əla gō dəyá̰ kógə̄ḿ kə́ kumən edə̄ ngá̰ý tə́ kem ɓē kə́ Tekoa tə́ adə̄ reē, ba ədan na: Ā ī-rāā tītə̄ kə́ deē yāí kógə̄ḿ oy adə̄ ā ə́hɔ i ndoōn. Ā ō̰ō̰ pír ō, ā ī-ndum yibə̄ aĺ ō, ā ī-rāā tītə̄ kə́ ḭ̄ i dəyá̰ kógə̄ḿ kə́ a əhɔ i ndoō deē yān kə́ oy jóó ngá̰ý beé.

³ Ā āw̄ rɔ̄ mban̄g tə́ ba ā ə́dan yá̰á̰ ń m-ā m-ɔ́jiī toó. Loo ń noō tə́ Joab ɔjə dəyá̰ ní najə̄ ń kadə̄ əda mban̄g ní.

⁴ Adə̄ dəyá̰ kə́ Tekoa ní aw̄ kɔr̄ najá kə mbangāá. Ni-əsō ɔsə non nang tə́ no mban̄g tə́, ba əda na: Kɔ́ɔ̄ ɓē gə̄, ī-dḭḭ̄m̄ tə́!

⁵ Mban̄g dəjen na ké i rí n rāān wa. Anī ni-tél ədan na: Mā i dəyá̰ kə́ nge kəla ndoō. Ngaḿ oy kɔ̄ɔ́,

⁶ ba ngánə́ḿ kə́ dəngam gə̄ i jōó. Nin̄ rɔ̄ɔ̄n̄ naā bembeé, ba de kə́ yā mā̰ȳdə́ gətóo, adə̄ nge kə́ kógə̄ḿ ənda madə̄n tɔ̄l̄.

⁷ Loo ń noō tə́ ngéén gə̄ malang əgan̄ naā dɔḿ tə́, ədamə̄n̄ na kə m-ādə̄də́ kə nge tɔ̄l̄ madə̄n ní kadə̄ kə n-tɔ̄l̄nən̄ kum gotə ngōkó̰o̰n ń ni-tɔ̄lən ní, kadə̄ nge kənge yá̰a̰ ndəbā kə gətóoń kɔ̄ɔ́ ɗer. I tītə̄ ń noō n ndigən̄neé tɔ̄l̄ ngōnə̄ḿ ń na̰y ní yā kadə̄ rī ngaaḿ kə ɓārəń to̰ aĺ ō, kadə̄ gír kaa yān kə gətóoń dɔ nang tə́ ō ní.

⁸ Mban̄g əda dəyá̰ ní na: Ī-tél āw̄ ɓēé na m-ā m-ə́dá yá̰á̰ kə́ tām̄ yāí tə́.

⁹ Dəyá̰ kə́ Tekoa ní tél əda mban̄g na: Kɔ́ɔ̄ ɓē gə̄, ká i rí n rāań yá̰a̰ gə̄gē anī najə̄n i dɔḿ mā tə́ ō, dɔ ngééḿ gə̄ tə́ ō, ba i dɔí tə́ ō, dɔ ko̰o̰ ɓē yāí tə́ ō alé.

¹⁰ Mban̄g əda dəyá̰ ní na: Deē ń a ɔr̄ najə̄n seí ní, ī-reē seneé ādə̄m̄! Kɔ́ɔ̄ a tél yā rāāī kə najá to̰ alé.

¹¹ Dəyá̰ ní əda ɓáý to̰ na: Kɔ́ɔ̄ ɓē gə̄, ə̄nī ndūí ādə̄m̄ kə rī Kɔ́ɔ̄ɓē Nə́ɓā yāí, ādə̄ nge rāā ba̰ā̰ ngōnə̄ḿ ń oy ní tɔ̄l̄ deē ərōń madə̄ to̰ alé, ādə̄ ni- tɔ̄l̄ ngōnə̄ḿ ń nay ní to̰ alé. Mban̄g əda na: Tītə̄ ń Kɔ́ɔ̄ɓē ndiń kə kumneé noō, nənga dɔ ngōnīí kógə̄ḿ a əsō nang tə́ alé.

¹² Dəyá̰ ní tél əda ɓáý to̰ na: Kɔ́ɔ̄ ɓē gə̄, ādə̄m̄ ta róbə ādə̄ m-ə́daī yá̰á̰ kógə̄ḿ ɓáý to̰. Mban̄g əda na kə əda yá̰á̰ ní.

¹³ Anī dəyá̰ ní əda na: Ba i tām̄ rí tə́ á ī-núm̄ rāā yá̰á̰ kə́ majaĺ kə́ tītə̄ ń noō kə gír deē yā Nə́ɓā gēé ní? Najə̄ ń mban̄g əda ngɔr toó, gān̄g i sarya dɔ rɔ̄n nəkɔ́ tə́, tɔdɔ̄ deē ń ni-tə̄ɓān ɓē yān tə́ kɔ̄ɔ́ ní, tél reē seneé gogə́ alé.

¹⁴ Rɔ̄kum yojí i tītə̄ man̄ ń deē ɓōkə́ nang tə́ anī loo tél kɔyn gogə́ gətóó ní. Ɓá tā ba yá̰á̰ ń Nə́ɓā núm̄ tām̄ yā Absalom tə́ ní, kə ngɔr ń toō tə́ i nge ń noō alé. Ni əndā dɔ rɔ̄n danaá kɔ̄ɔ́ yā kadə̄ Absalom ndi sa̰y rɔ̄n tə́ alé.

¹⁵ Kɔ́ɔ̄ ɓē gə̄, ré m̄-reē m-ə́daī yá̰a̰ gə̄ ń toō malang ní ɓáa, kumən na de gə̄ rāāmə̄n̄ adə̄ m̄-ɓōĺ. Adə̄ m̄-gír̄ kemḿ tə́ m-ə́da na kə m̄-reē kə m-ə́daī na majanī ā ī-rāā yá̰á̰ ń m-ə́daī ní.

¹⁶ Adə̄ deē ń sāā tə̄ɓājí kə ngōnə̄ḿ kɔ̄ɔ́ kem ɓē ń Nə́ɓā adə̄ gír deē yān gə̄ tə́ ní, ḭ̄ ā ī-ndigə taājí kə ngōnə̄ḿ kem jī kɔ́ɔ̄ tə́ yā kəya̰jí dɔɔ́.

¹⁷ Mā nge kəla yāí kə́ dəyá̰ m̄-gír̄ kemḿ tə́ m-ə́da na yá̰á̰ ń ā ə́dá ní a rāā kadə̄ ndíl de gə̄ a tél yā reē rɔ̄də́ tə́ gogə́. Tɔdɔ̄ mban̄g i tītə̄ de kə́ dɔ rā̰ tə́ yā Nə́ɓā beé. Yá̰á̰ kə́ majanī a̰a̰ ger̄ ō, yá̰á̰ kə́ majanī a̰a̰ ger̄ ō. Beé ní ādə̄ Kɔ́ɔ̄ɓē yāí i seí naā té.

¹⁸ Mban̄g tél əda dəyá̰ ní na: M-ā m̄-dəjeī najə̄ kógə̄ḿ laā, ba ī-lōō mundə̄m̄ yá̰á̰ kə́rēý. Anī dəyá̰ ní əda mban̄g na kə əda najə̄ ní.

¹⁹ Anī mban̄g dəjen na ké najə̄ gə̄ ń ɔr̄ malang toó ní ké i Joab n əndā tan tə́ aĺ wa. Anī dəyá̰ ní əda mban̄g na: Kɔ́ɔ̄ ɓē gə̄, tītə̄ ń ī-ndiń kə kumií noō, i ngarā̰ kum najə̄ n ə́dá ní. Rɔ̄kum, i nge kəla yāí Joab n ədam̄ na kə m̄-rāā yá̰á̰ ń m̄-rāā toó ní ō, i nəkɔ́ n əndā najə̄ gə̄ ń toō malang taḿ tə́ kadə̄ m-ɔ̄r̄ ō ní.

²⁰ Nge kəla yāí Joab rāā yá̰á̰ ń noō i yā tūrəń gíŕ yá̰á̰ ń rāā yá̰á̰ ní kɔ̄ɔ́. Banī kɔ́ɔ̄ḿ i de kə́ kumə̄n edə̄ ngá̰ý tītə̄ de kə́ dɔ rā̰ tə́ yā Nə́ɓā beé. Ni ger̄ yá̰a̰ malang ń a rāā yá̰a̰ dɔ nang tə́ ní.

²¹ Mban̄g əda Joab na: Majə! Gír najə̄ gān̄g. Āw̄ ī-reē kə Absalom.

²² Joab ɔsə non nang tə́ rɔȳń mban̄g ō, rāān kə́ra ō, ba əda na: Kɔ́ɔ̄ ɓē gə̄, ɓōólaā m̄-ger̄ kadə̄ ī-rāā kem majə kə nge kəla yāí, tɔdɔ̄ ī-ndigə rāā yá̰á̰ ń m-ə́daī ní.

²³ Joab ḭḭ dɔɔ́ aw̄ Gesur, aw̄ reē kə Absalomoó gogə́ kem ɓē kə́ Jerusalem tə́.

²⁴ Mban̄g əda na: Ādə̄ Absalom tél aw̄ gogə́ ɓēé, ādə̄ əndā njan rɔ̄ḿ tə́ laā alé. Loo ń noō tə́ Absalom tél aw̄ gogə́ ɓēé kanjə̄ ka̰a̰ kum mban̄g.

Dabid tél əndān̄ najə̄ naā tə́ kə Absalomoó

²⁵ Dɔ nang kə́ Israel tə́ malang ní de kə́ rīn ɓār̄ tām̄ yā majən tə́ tītə̄ yā Absalom beé gətóo. Əla gír da njan tə́ bátə́ ugə̄ń jam dɔn tə́ dɔɔ́ ní, loon kógə̄ḿ kə́ nujə gətóo.

²⁶ Ni a dəsā dɔn i ta ngó̰y ɓāl̄ tə́ kə dɔ ɓāl̄ gə̄. I dan ń nənga dɔn a ɔȳn ngá̰ý ní n a dəsā ní. Kɔȳ nənga dɔn tɔȳ kəlōo jōó kə gō yá̰a̰ mbɔ̄jə́ kɔȳ yá̰a̰ yā mbangāá.

²⁷ Ngán Absalom kə́ dəngam gə̄ i mətá ō, ngōnən kə́ dəyá̰ i kógə̄ḿ ō. Nge kə́ dəyá̰ ní rīn na i Tamar. Ni mandə ngá̰ý.

²⁸ Absalom ndi Jerusalem ɓāl̄ jōó kanjə̄ ka̰a̰ kum mban̄g.

²⁹ Ndɔ̄ kə́rēý tə́ ni-əla gō Joab tə́ yā kəlan ɓē mbangāá anī Joab mbātə́ reē rɔ̄n tə́ kɔ̄ɔ́. Ni-tél əla kəla nja kə́ nge ko̰ jōó gō Joab tə́, banī Joab mbātə́ ɓáý to̰.

³⁰ Anī Absalom əda ngé kəla yān gə̄ na: Á̰a̰ī ndɔr̄ kōō ɔ́rjə yā Joab ń i kadə yāḿ tə́ noō waḿ? Āw̄ ə́laī hor dɔ tə́ kɔ̄ɔ́. Ngé kəla gə̄ aw̄ rāān̄ yá̰á̰ ń Absalom əda ní.

³¹ Tā anī Joab aw̄ gō Absalom tə́ ɓēé dəjen na: Ngé kəla yāí gə̄ əndan̄ hor dɔ kōō yāḿ tə́ i tām̄ rí tə́?

³² Anī Absalom tél ədan na: I tām̄ kəla ń m-ə́la gōí tə́ kadə̄ ī-reē anī ī-mbātə́ reē ní. m̄-sāā i kəlaī rɔ̄ mban̄g tə́ kadə̄ ī-dəjen na ké m-ā̰ȳ m-āw̄ Gesur ba m̄-tél dɔ tə́ m̄-reē i tām̄ yā rí tə́ wa? Ndiḿ gogə́ Gesur i só tə́. Ngɔlaā m̄-gḛy kaw̄ rɔ̄ mban̄g tə́. Ba ré najə̄ i dɔḿ tə́ anī ādə̄ mban̄g tɔ̄lə̄m̄.

³³ Joab aw̄ əda mban̄g kəla yā Absalom. Mban̄g əla gō Absalom tə́ anī ni-reē ɔsə non nang tə́ non tə́. Loo ń noō tə́ mban̄g əhɔ Absalom kə̄ rɔ̄n tə́ ɓirə̄n dagə.