2 SAMUEL 11 - Bibəl ta Sar̄

Dabid nin̄ kə Batəseba

¹ Dan ń ɓāl̄ kə́ kijə reē ugə̄ anī, kem nāā ń mban̄g gə̄ a aw̄n̄neé rɔ̄ɔ̄ tə́ ní, Dabid əla Joab nin̄ kə go̰ rɔ̄ɔ̄ gə̄ ō, Israel gə̄ ō, malang ta rɔ̄ɔ̄ tə́. Adə̄ nin̄ tɔ̄lə̄n̄ ngán Amon gə̄ ngá̰ý ō, gīrə̄n̄ gidə ɓē kə́ Raba ō. Ba Dabid tá ndi ɓēé Jerusalem.

² Ndɔ̄ kógə̄ḿ tə́ loo sɔlí dan ń Dabid ɔr̄ koō oy anī, ḭḭ dɔ tə̄rá yān tə́ ba aw̄ njə̄rā dɔ kújə́ dúŕ dur yā mban̄g tə́. Ni-ra dɔ kújə́ ní tə́, anī a̰a̰ dəyá̰ kógə̄ḿ loo ndogə̄ man̄ tə́. Dəyá̰ ní mandə ngá̰ý.

³ Dabid əla de gə̄ kadə̄ dəjen̄ najə̄ kə́ dɔ dəyá̰ ní tə́. Anī ədan̄ na i Batəseba kə́ ngōn̄ Eliam, ba na i nə̄yá̰ Uri ń ni i Het ní.

⁴ Dabid əla gō dəyá̰ ní tə́ adə̄ reē, ba ni ɓīī seneé. Dəyá̰ ní tə́go rɔ̄n kə́ tām̄ yā mósə́ kə́ əhɔn tə́ i ngɔr ɓáý. Ni-tél aw̄ gogə́ ɓēé looneé.

⁵ Batəseba un mósə ngōn̄ anī əla əda Dabid na n-ndān̄ ngōn̄.

⁶ Anī Dabid əla kəla əda Joab n i ngol áskar gə̄ ní na kə əla kə Het ń rīn na i Uri ní kə adə̄n. Adə̄ Joab əla seneé adə̄n.

⁷ Dan ń Uri reē ɔtə̄ rɔ̄ Dabid tə́ anī, Dabid dəjen kōō Joab ō, kōō ngé rɔ̄ɔ̄ gə̄ ō, dəjen najə̄ kə́ dɔ rɔ̄ɔ̄ tə́ ō.

⁸ Gō tə́ anī Dabid əda Uri na kə aw̄ ɓēé kə tə́go njan. Uri teē kɔ̄ɔ́ ndogó mbangāá, ba mban̄g əla kə́ yá̰á̰ gōn tə́.

⁹ Uri to ta kújə yā mban̄g tə́ naā tə́ kə ngé kəla gə̄ yā kɔ́ɔ̄neé, ba aw̄ ɓēé alé.

¹⁰ Reē ədan̄ Dabid na Uri na aw̄ ɓēé alé. Anī Dabid dəje Uri na ké tél i mbā tə́ aĺ wa. Ké aw̄ ɓēé aĺ i najə̄ rí tə́ wa.

¹¹ Anī Uri tél əda Dabid na sandúkə yā Nə́ɓā ndi i gíŕ kújə́ kámbə́ tə́ ō, Israel gə̄ ō, Juda gə̄ ō, ndin̄ i gíŕ kújə́ kámbə gə̄ tə́ ō. Kɔ́ɔ̄ḿ Joab ō, ngol ngé rɔ̄ɔ̄ gə̄ yā kɔ́ɔ̄ḿ ō, ndin̄ i kem gérgereé bembeé ō. Anī mā kə m-āw̄ kem kújə yāḿ tə́ kə m-ə́sá yá̰a̰ ō, kə m-ā̰ȳ ō, kə m̄-ɓīī kə nə̄yá̰ḿ ō a? Tītə̄ ń ī-ndiń kə kumií noō, m-ā m̄-rāā nge ń noō aĺ i kə́ bátə́ gə̄ tə́!

¹² Dabid əda Uri na: Majə. Ɓōólaā ī-ndi laā ɓáý. Bírí anī m-ā m-ə́ya̰ī kadə̄ ī-tél āw̄ gogə́. Adə̄ Uri ndi Jerusalem bátə́ loo ti dɔn tə́.

¹³ Dabid ɓārə́n adə̄ əsa yá̰a̰ ō, a̰ȳ ō ta kumən tə́. Ni-adə̄n kasə ngá̰ý adə̄ kasə rāān. Ba ndɔ̄ɔ́ anī Uri teē aw̄ to kə ngé kəla yā kɔ́ɔ̄n gēé, banī aw̄ ɓēé alé.

¹⁴ Teē dəloí anī Dabid ndang makətūbə̄ əla jī Uri tə́ kadə̄ aw̄ń adə̄ Joab.

¹⁵ Najə̄ ń ni ndang kem makətūbūú ní n toó: Ə̄ndāī Uri kété no madə̄n gə̄ tə́ ta rɔ̄ɔ̄ tə́, loo kə́ rɔ̄ɔ̄ təngā ngá̰ý tū tə́ tə́, ba ī-téliī kɔ̄ɔ́ gōn tə́ adə̄ tɔ̄l̄nən̄.

Uri kə́ ngaa Batəseba oy

¹⁶ Joab ń i nge kəndā kumən gíŕ yá̰a̰ gə̄ ń a rāān̄ yá̰a̰ kem ɓē ń áskar yān gə̄ gīrə̄n̄ gidə tə́ ní, ger̄ loo ń go̰ rɔ̄ɔ̄ yā madə̄ ba̰ā̰ gə̄ ran̄ tū tə́ a ngɔ̄mə̄n̄ ní, adə̄ ni-əndā Uri loo ní tə́.

¹⁷ Ngé rɔ̄ɔ̄ dɔ ɓē tə́ gə̄ teēn̄ kem ɓēé reē ənīn̄ Joab rɔ̄ɔ̄. Nin̄ tɔ̄lə̄n̄ de kə́rēý gə̄ dan ngán Israel gə̄ tə́ ō, dan ngol ngé rɔ̄ɔ̄ yā Dabid gə̄ tə́ ō. Uri ń i Het ní oy ō.

¹⁸ Joab əla deē kadə̄ aw̄ ɔjə Dabid gotə yá̰a̰ gə̄ ń rāān̄ yá̰a̰ ta rɔ̄ɔ̄ tə́ ní malang,

¹⁹ ba əda nge kaw̄ kəla ní na: Ré ɔ́jə mban̄g gotə yá̰a̰ gə̄ ń rāān̄ yá̰a̰ ta rɔ̄ɔ̄ tə́ ní malang oy,

²⁰ ba wōn̄g rāā mban̄g adə̄ dəjeī na ké i tām̄ rí tə́ á kə āwī ngɔr rɔ̄ ɓē tə́ ə̄nīiń rɔ̄ɔ̄ wa? Ké ī-gerī kadə̄ de gə̄ a ran̄ dɔ ndogə̄ mbal̄ tə́ yā kurəńsí aĺ wa?

²¹ Ké i náā n tɔ̄l̄ Abimelek kə́ ngōn̄ Yerbesetə ní wa? Ké i de kə́ dəyá̰ n ra dɔ ndogə̄ mbal̄ tə́ ənīn kə mbal̄ riī yá̰á̰ ní aĺ wa? ké Abimelek oy kem ɓē kə Tebes tə́ i tītə̄ n noō aĺ wa? Ké āwī ngɔr rɔ̄ ɓē tə́ i tām̄ rí tə́ wa? Anī ī-téĺ ə́dan na: Nge kəla yāí Uri ń i Het ní oy ō.

²² Nge kəla ní aw̄ əda Dabid yá̰a̰ malang ń Joab ədan ní.

²³ Ni-əda Dabid na: De gə̄ ní tɔ́gə́də́ tɔȳ yājí. Nin̄ teēn̄ kem ɓēé ba reēn̄ gōjí tə́ kem bembeé ənīn̄jí rɔ̄ɔ̄. Banī jə-tā̰də́ rɔ̄ɔ̄ j-aw̄ sedə́ bátə́ j-ugə̄ sedə́ ta róbə́ kə́ yā kudəń kə̄ kem ɓēé tə́.

²⁴ I loo ń noō tə́ n ngé kur gərā gə̄ ran̄ dɔ ndogə̄ mbal̄ tə́ dɔɔ́ túrə̄n̄ ngé kəla yāí gə̄ ní. Ngé kəla yā mban̄g kə́rēý gə̄ oyn̄ ō, nge kəla yāí Uri ń ni i Het ní oy ō.

²⁵ Mban̄g tél əda nge kəla ní na: Āw̄ ə́da Joab na kə lōō kadə̄ najə̄ ń noō tōrə̄n ngá̰ý. Tɔdɔ̄ kə́rēý gə̄ anī kaskar a tɔ̄l̄ laā ō, nú ō, ba kə tél kə əndā rɔ̄n nang tə́ gogə́ rang kə rɔ̄ɔ̄ ɓē ní kə ngangá kə tetən. Əla go̰ kem Joab tə́ tītə̄ ń noō.

²⁶ Dan ń Batəseba oō kadə̄ ngaan Uri oy anī, ni nōō ngaan.

²⁷ Dan ń ni-rāā ndoō ngaan oy anī, Dabid reē seneé rɔ̄n tə́. Ni-taān kə́ dəyá̰ tə́ adə̄ ojə ngōn̄ kə́ dəngam seneé. Banī yá̰á̰ ń Dabid rāā ní nel̄ Kɔ́ɔ̄ɓē alé.