2 SAMUEL 10 - Bibəl ta Sar̄

Əlan̄ rɔ̄sɔl̄ dɔ de kə́ bo gə̄ yā Dabid tə́

¹ Gō tə́ anī mban̄g yā ngán Amon gə̄ oy, ba ngōnən Hanun o̰o̰ ɓē gotən tə́.

² Anī Dabid əda na: M-ā m̄-rāā majə kə Hanun ngōn̄ Nahas tītə̄ ń bɔbə̄n rāań majə seḿ ní. Dabid əla de kə́ bo yān gə̄ rɔ̄ Hanun tə́ kadə̄ sɔlə̄n̄ kemən tām̄ yā bɔbə̄n ń oy tə́ ní. Ba dan ń de kə́ bo gə̄ yā Dabid ɔtə̄n̄ kem ɓē yā ngán Amon gə̄ tə́ anī,

³ ngār yādə́ gə̄ ədan̄ kɔ́ɔ̄də́ Hanun na: Dan ń Dabid əla de kə́ bo yān gə̄ kadə̄ sɔlə̄n̄ kemií ní, ɔ́jəń na ndigə i rɔȳ bɔbí a? Əladə́ i kadə̄ njə̄rān̄ kem ɓēé əndān̄neé ma̰ȳ ɓē, ba kadə̄ ndɔ̄ kə́rēý tə́ anī ni nujəń ɓē.

⁴ Loo ń noō tə́ Hanun əhɔ de kə́ bo gə̄ ń Dabid əladə́ ní, dəsā mbāýdə́ dām̄ kógə̄ḿ ō, tə́jā kūbə̄ yādə́ gə̄ gán̄g danaá adə̄ gində̄ ugə̄ ta gíŕdə́ tə́ ō, ba əya̰də́ adə̄ aw̄n̄.

⁵ Dabid oō najə̄ ní, adə̄ əla deē kógə̄ḿ adə̄ tə́nī tadə́ tɔdɔ̄ rɔ̄sɔl̄ rāādə́ ngá̰ý. Mban̄g əla ədadə́ na kə ndin̄ Jeriko bátə́ kadə̄ mbāýdə́ il̄ pá tá kə reēn̄ ɓáý.

Rɔ̄ɔ̄n̄ Amon gə̄ ō, Aram gə̄ ō

⁶ Amon gə̄ a̰a̰n̄ kadə̄ Dabid əhɔdə́ kemən tə́ najə̄ yá̰á̰ ń nin̄ rāān̄ tə́ ní, adə̄ əlan̄ kəla rɔ̄ Aram gə̄ kə́ Bet Rehob tə́ ō, kə́ Soba tə́ ō, kadə̄ rɔ̄ɔ̄n̄ Dabid sedə́ ba kadə̄ n-adə̄n̄də́ nar. Adə̄ ngé rɔ̄ɔ̄ gə̄ kə́ ngé njə̄rā kə njadə́ gə̄ reēn̄ dūbú kutə jōó ō, de gə̄ yā mban̄g kə́ Maaka i dūbú kógə̄ḿ ō, de gə̄ kə́ Tob i dūbú kutə̄ gidə i jōó ō.

⁷ Dabid oō beé anī əla Joab nin̄ kə áskar yān gə̄ kə́ nin̄ i go̰ rɔ̄ɔ̄ gə̄ malang ta rɔ̄ɔ̄ tə́.

⁸ Amon gə̄ teē ran̄ kə ta naá ta róbə́ ń a udən̄neé kə̄ kem ɓē bo yādə́ tə́ ní kə jī loo rɔ̄ɔ́. Ba Aram gə̄ kə́ Soba ō, kə́ Rehob ō, de gə̄ kə́ Tob ō, kə́ Maaka ō, tá ran̄ i tayā kem bembeé.

⁹ Dan ń Joab a̰a̰ kadə̄ rɔ̄ɔ̄ i non tə́ ō, gōn tə́ ō anī gə̄rā go̰ rɔ̄ɔ̄ gə̄ kə́ Israel tə́ əndādə́ kə ta naá no Aram gə̄ tə́.

¹⁰ Gotə ngé rɔ̄ɔ̄ gə̄ tá ni-adə̄də́ kə ngōkó̰o̰n Abisai kadə̄ əndādə́ kə ta naá no Amon gə̄ tə́.

¹¹ Joab əda ngōkó̰o̰n na: Ré tɔ́gə Aram gə̄ tɔȳ yāḿ anī ī-reē ī-dḭḭ̄m̄, ba ré tɔ́gə Amon gə̄ tɔȳ yāí anī m-ā m-āw̄ yā dḭḭ̄ī ō.

¹² Ī-ra dəngam ō, ādə̄ jḭḭ jə-ra dəngam ō, tām̄ yā gír deē yājí gə̄ tə́ ō, ɓē gə̄ yā Nə́ɓā yājí tə́ ō, ba ādə̄ Kɔ́ɔ̄ɓē rāā yá̰á̰ ń kemən ndigə ní.

¹³ Loo ń noō tə́ Joab nin̄ kə ɓūtə̄ de gə̄ ń seneé ní njə̄rān̄ kum kə̄ rɔ̄ Aram gə̄ tə́ yā rɔ̄ɔ̄də́. Anī Aram gə̄ a̰ȳn̄ naā kɔ̄ɔ́.

¹⁴ Dan ń Amon gə̄ a̰a̰n̄ kadə̄ Aram gə̄ a̰ȳn̄ naā kɔ̄ɔ́ anī, nin̄ aȳn̄ naā kɔ̄ɔ́ no Abisai tə́ ō, ba udən̄ kem ɓēé. Loo ń noō tə́ asə Joab rɔ̄ɔ̄ Amon gə̄ ba ni-tél dɔ tə́ aw̄ gogə́ Jerusalem.

¹⁵ Dan ń Aram gə̄ a̰a̰n̄ kadə̄ Israel gə̄ tetən̄də́ rɔ̄ɔ̄, anī ɔsən̄ dɔdə́ naā tə́ malang.

¹⁶ Hadadejer əla kəla gō Aram gə̄ kə́ gidə bā Opəratə kə́ dām̄ kə́rēý tə́ tə́. Nin̄ reē ugə̄n̄ Helam. I ngol ngé rɔ̄ɔ̄ gə̄ yā Hadadejer ń rīn na i Sobak ní n un dɔdə́ ní.

¹⁷ Dan ń Dabid oō anī, ɔy ngé rɔ̄ɔ̄ gə̄ yā Israel gə̄ malang, teē sedə́ bā Jurdḛ ba aw̄ sedə́ Helam. Aram gə̄ ran̄ kə ta naā no Dabid tə́ kə jī loo rɔ̄ɔ́, ba ənīnən̄ rɔ̄ɔ̄.

¹⁸ Banī Aram gə̄ a̰ȳn̄ naā no Israel gə̄ tə́. Adə̄ Dabid tɔ̄l̄ sə́nda gə̄ ń a ndɔ́rə̄n̄ púsə rɔ̄ɔ̄ kə́ ɓú sīrí gə̄ ní ō, ngé kal̄ sə́nda gə̄ dūbú kutə sɔ́ ō. Ni-ɔsə Sobak ń i ngol ngé rɔ̄ɔ̄ gə̄ kə́ Aram ní adə̄ oy kə̄ loo nəkɔ́ ń noō tə́.

¹⁹ Dan ń mban̄g gə̄ malang ń Hadadejer ndi dɔdə́ tə́ ní a̰a̰n̄ kadə̄ Israel gə̄ tetən̄də́ rɔ̄ɔ̄, anī tél ndin̄ lɔm kə Israel gēé ō, əlan̄ dɔdə́ gír tɔ́gə yā Israel gə̄ tə́ ō. Loo ń noō tə́ Aram gə̄ ɓōlə́n̄ dḭḭ̄ Amon gə̄.