2 SAMUEL 1 - Bibəl ta Sar̄

Dabid oō najə̄ yo Saul

¹ Dan ń Dabid tetə Amalek gə̄ rɔ̄ɔ̄ á tél reē ndi kem ɓē kə Sikəlag tə́ ní, Saul i kə́ oy kɔ̄ɔ́. Dabid ndi Sikəlag rāā ndɔ̄ jōó.

² Kə ndɔ̄ kə́ nge ko̰ mətá anī deē kógə̄ḿ ḭḭ gérger yā Saul tə́ reē ugə̄. Kūbə̄ kə́ rɔ̄n tə́ i kə́ rə̄yā̰ kɔ̄ɔ́ ō, nán̄g i dɔn tə́ ō. Dan ń deē ní reē ugə̄ ngɔr rɔ̄ Dabid tə́ anī əsō ɔsə non nang tə́.

³ Dabid dəjen na ké ḭḭ i rá wa. Anī əda na n-a̰ȳ na i gérger yā Israel gə̄ tə́.

⁴ Dabid ədan na kə ɔjən gotə yá̰á̰ ń rāā yá̰á̰ ní. Anī deē ní əda na ngán Israel gə̄ na a̰ȳn̄ naā kɔ̄ɔ́ ta rɔ̄ɔ̄ tə́ ō, ngá̰ý gə̄ na oyn̄ ō, tá Saul nin̄ kə ngōnən Jonatan na oyn̄ ō.

⁵ Dabid tél dəjen na ké rāā i ba̰ý n gerēń najə̄ yo Saul nin̄ kə ngōnən Jonatan ní wa.

⁶ Anī balsáá ní əda na: m̄-ra i dɔ mbal̄ Gilboa tə́, anī m-á̰a̰ Saul udə nənga yān nang tə́ ba əhɔ rań, banī madə̄ ba̰ā̰ gə̄ kə́ ngé púsə rɔ̄ɔ̄ gə̄ ō, kə́ ngé kal̄ sə́nda gə̄ ō, ra gīr̄nən̄. Nin̄ i ngɔr rɔ̄n tə́.

⁷ Ni-tūr̄ rɔ̄n a̰a̰m̄ anī ɓārə́m̄. m̄-ndigən m-ə́da na: Mā n toō.

⁸ Anī ni dəjem̄ na ké i mā náā wa. Anī m-ə́dan na mā i Amalek.

⁹ Loo ń noō tə́ ədam̄ na kə m̄-reē kə m̄-tɔ̄lən, tɔdɔ̄ non na ḭḭ̄n na i mbée banī ndílən na i rɔ̄n tə́ ɓáý.

¹⁰ Adə̄ m̄-njə̄rā kə̄ rɔ̄n tə́ m-āw̄ m̄-tɔ̄lən, tɔdɔ̄ m̄-ger̄ kadə̄ gō rɔ̄ɔ̄ ń rāān tə́ ní a ndi kə kumuú alé. Gō tə́ anī m-ɔ̄r̄ jākā mbang kə́ dɔn tə́ ń ɔjə kadə̄ ni i mban̄g ní ō, m-ɔ̄r̄ nə̄ngá kə́ jīn tə́ ō, m̄-reēń laā kadə̄ m-ādī.

¹¹ Dabid əhɔ ta kūbə̄ kə́ rɔ̄n tə́ rə̄yā̰ ō, de kə́ gōn tə́ gə̄ malang rə́yā̰n̄ kūbə̄ gə̄ kə́ rɔ̄də́ tə́ ō.

¹² Nin̄ nōōn̄ ō, ndin̄ ɓō tām̄ yā Nə́ɓā tə́ ō, bátə́ adə̄ loo tíbə dɔdə́ tə́, əhɔnə̄ń ndoō Saul nin̄ kə ngōnən Jonatan ō, əhɔnə̄ń ndoō ngán Israel gə̄ malang ń nin̄ i de gə̄ kə́ dan gír deē yā Kɔ́ɔ̄ɓē gə̄ tə́ ba oyn̄ ta rɔ̄ɔ̄ tə́ ní ō.

¹³ Gō tə́ anī Dabid dəje balsáá ń reē kə najá ədan ní na ké ni i de kə́ rá wa. Anī balsáá ní tél ədan na ni na i ngōn̄ Amalek kógə̄ḿ kə́ nge nam̄.

¹⁴ Dabid əda balsáá ní na: I ba̰ý á ī-ɓōĺ aĺ ba ī-tɔ̄l̄ mban̄g ń Kɔ́ɔ̄ɓē gə̄rān ní ní.

¹⁵ Dabid ɓāŕ nge kəla yān kógə̄ḿ ba ədan na: Ī-njə̄rā kə̄ rɔ̄n tə́ ī-tɔ̄lə̄n. Nge kəla ní tɔ̄l̄ Amalek ní.

¹⁶ Dabid əda Amalek ní na: Ādə̄ mósí i dɔí īkɔ́ tə́, tɔdɔ̄ īkɔ́ ī-gān̄g sarya dɔ rɔ̄í īkɔ́ tə́ ə́da na mban̄g ń Kɔ́ɔ̄ɓē ur yibə̄ dɔn tə́ gə̄rānneé ní i ḭ̄ n na ī-tɔ̄lə̄n ní.

Pā nōō yo yā Dabid

¹⁷ Loo ń noō tə́ Dabid un pā yo nōoń Saul nin̄ kə ngōnən Jonatan.

¹⁸ Ni-mēr̄ ndóō Juda gə̄ pā ní. I pā nōō yo yā ga̰ gərā. Pā ní to kem makətūbə̄ yā de kə́ súmūú tə́ i tītə̄ ń toō:

¹⁹ Israel, i tām̄ rí tə́ á go̰ rɔ̄ɔ̄ gə̄ oyn̄ ní? Ngé rɔ̄ɔ̄ yāí gə̄ ń i yá̰a̰ kɔsə gɔn yāí ní i tām̄ rí tə́ á nīńdə́ to dɔ ngōn̄ mbalá ní?

²⁰ Ī-lōōī kəda najə̄n kem ɓē kə́ Gat tə́. ī-lōōī kəda gotə kum róbə gə̄ kə́ kem ɓē kə́ Askalon tə́, na sōgə́ adə̄ ngán Pilistin kə́ dəyá̰ gə̄ rɔ̄nel̄, na sōgə́ ngáń kə́ dəyá̰ gə̄ yā ngé kəja mɔtədə́ aĺ gə̄ ń noō rāān̄ walya.

²¹ Mbal̄ gə̄ kə́ Gilboa, ādə̄ tal əhɔ dɔsí tə́ aĺ ō, man̄ edə dɔsí tə́ aĺ ō, ādə̄ ndɔr̄ gə̄ kə́ dɔsí tə́ teēn̄ kōō aĺ ō. Tɔdɔ̄ əlan̄ rɔ̄sɔl̄ dɔ der yā go̰ rɔ̄ɔ̄ gə̄ tə́ i loo ń noō tə́, dɔ der yā Saul ń a ndumənən̄

²² mósə madə̄ ba̰ā̰ gə̄ ō, yibə̄ go̰ rɔ̄ɔ̄ yā madə̄ ba̰ā̰ gə̄ ō ní. Əlan̄ rɔ̄sɔl̄ dɔ ga̰ gəra yā Jonatan ń tél kə goneé aĺ tə́ ní ō, dɔ kaskar yā Saul ń a tél a udə gogə́ kem hɔ̄pə̄n tə́ karī aĺ ní ō.

²³ Saul nin̄ kə Jonatan, de gə̄ rāān̄ tɔdɔ̄də́ ngá̰ý. Dan ń nin̄ ndin̄ kə kumdə́, aké ndɔ̄ yodə́ tə́ ní, yá̰á̰ kógə̄ḿ gān̄gdə́ naā tə́ alé. Nin̄ ɔlən̄ tɔȳn̄ kə̄rō gə̄ ō, ngangə̄n̄ tɔȳn̄ ɓɔl gə̄ ō.

²⁴ Ngán kə́ dəyá̰ gə̄ kə́ Israel tə́, ī-nōōī Saul, nge kadə̄sí kūbə̄ kə́ ndə́lē gə̄ ō, kə́ sɔl̄ lɔ́ḿ lɔ́ḿ gə̄ ō, nge kadə̄sí yá̰á̰ súū rɔ̄ kə́ rāā kə lɔ́rɔ́ gə̄ ń ā ī-tə́laī tū kūbə̄ yāsí gə̄ tə́ ní.

²⁵ I tām̄ rí tə́ á go̰ rɔ̄ɔ̄ gə̄ əsō oyn̄ ta rɔ̄ɔ̄ kə́ təngā ngá̰ý tə́ ní? I tām̄ rí tə́ á nīń Jonatan to dɔ ngōn̄ mbalá ní?

²⁶ Ngōkó̰ó̰ḿ Jonatan, wurəḿ ɔləm̄ ngá̰ý, tɔdɔ̄ o̰o̰m̄ tɔdɔ̄í. Táŕ ń ī-tárəm̄ ní nelə̄m̄ ngá̰ý tɔȳ tár yā dəyá̰ gə̄.

²⁷ Go̰ rɔ̄ɔ̄ gə̄ ń noō oyn̄ i tām̄ rí tə́? Ta yá̰a̰ rɔ̄ɔ̄ gə̄ tḭ̄ḭ̄ kɔ̄ɔ́ i tām̄ rí tə́?