Biblia Todo Logo
Bib sou entènèt

- Piblisite -

2 MBAN̄G 9 - Bibəl ta Sar̄


Əndān̄ Yehu mban̄g

1 Elije nge koō ta ɓāŕ deē kógə̄ḿ kə́ dan ɓūtə̄ ngé koō ta gə̄ tə́ ədan na: Ī-do̰ō̰ ɓōdīí ō, ún kū yibə̄ ń toō jīí tə́ ō, ba āw̄ Ramot kə́ Galaad.

2 Ré ūgə̄ anī, āw̄ ə́nge Yehu ngōn̄ Josapat kə́ ngōn̄ Nimsi. Ī-ɓārə̄n dan madə̄n gə̄ tə́, āw̄ seneé kem kújə́ kə́ gə́lá tə́ tə́.

3 Úr yibə̄ kə́ kem kūú dɔn tə́ ba ədan na, Kɔ́ɔ̄ɓē əda na n-əndāī mban̄g kə́ Israel tə́. Gō tə́ anī ī-teē ta kújə ba ā̰ȳ kanjə̄ kɔr bā̰ā̰.

4 Adə̄ balsáá kə́ nge koō ta ní aw̄ Ramot kə́ Galaad.

5 Dan ń ni ugə̄ ní ngol ngé rɔ̄ɔ̄ gə̄ ndin̄ i loo kán̄ naā tə́. Ni-əda na: Ngol, m-āw̄ kə najə̄ kógə̄ḿ yā kədaī! Yehu dəjen na ké sāā kɔr̄ najə̄ i kə náāá dandə́ tə́ wa. Anī tél ədan na: Ngol, m̄-sāā kɔr̄ najə̄ i seí ḭ̄kɔ́!

6 Yehu ḭḭ dɔɔ́, ba aw̄ seneé kújú. Balsáá ní ur yibə̄ dɔn tə́ ba ədan na: Kɔ́ɔ̄ɓē, Nə́ɓā yā Israel, əda na n-əndāī mban̄g kadə̄ ó̰o̰ ɓē dɔ gír deē yān gə̄ tə́, dɔ Israel tə́.

7 Ā ī-tɔ̄l̄ de gə̄ kə́ gír kojə yā kɔ́ɔ̄í Akab tə́. I beé n n-a n-rāań ba̰ā̰ mósə́ ngé kəla yān gə̄ malang, adə̄ i ngé koō ta yān gə̄ ō, ngé kəla yān kə́ rang gə̄ ō ń Jesabel tɔ̄l̄də́ ní.

8 De kə́ gír kojə yā Akab tə́ gə̄ malang a oyn̄. N-a n-tɔ̄l̄ de kə́ dəngam gə̄ kə́ gír kojə yā Akab tə́ malang, ngáń kə́ dūú gə̄gē de kə́ tɔgə gə̄gē ō.

9 Yá̰á̰ ń na n-rāā kə de gə̄ kə́ gír kojə yā Jeroboam ngōn̄ Nebat tə́ ō, de gə̄ kə́ gír kojə yā Basa ngōn̄ Ahia tə́ ō ní, na n-a n-rāā kə de gə̄ kə́ gír kojə yā Akab tə́ ō.

10 Ba Jesabel tā a deē a dubə̄n alé, tɔdɔ̄ bísə gə̄ a əsan̄ nīnən kem ndɔr̄ kə́ Jisreel tə́. Dan ń balsáá ní əda najə̄ gə̄ ń noō oy anī, teē ta kújə ba a̰ȳ.

11 Yehu teē aw̄ rɔ̄ ngol ngé rɔ̄ɔ̄ gə̄ yā kɔ́ɔ̄n tə́, anī dəjenən̄ na ké i rí n rāā yá̰a̰ wa, ké nge kɔ̄r̄ ń noō reē rɔ̄n tə́ i najə̄ rí tə́ wa. Anī ni-tél ədadə́ na: Sḭḭ̄ kɔ́ gə̄ ī-gerī deē ń noō majə kə najə̄ kɔrə̄n gēé.

12 Anī nin̄ tél ədanən̄ na: Ḭ̄ ī-sor̄ i mbée, ə́dájí najə̄ ń ədaī ní. Yehu tél ədadə́ na: Najə̄ malang ń ɔr̄ seḿ ní n toó: Kɔ́ɔ̄ɓē əda na: M-ə̄ndāī mban̄g kə́ Israel tə́.

13 Kə̄ ta jī tə́ beē ngol ngé rɔ̄ɔ̄ gə̄ ró̰ȳn̄ kūbə̄ yādə́ kə́ dɔ madə̄ tə́ gə̄ rɔ̄də́ tə́, lábə̄n̄ dɔ loo kə́ kḭḭ kə̄ dɔɔ́ ń deē a tə́ndā njan i dɔ loo tə́ndā nja gə̄ tə́ tá a al̄ a aw̄ń kə̄ tū tə́ ní tə́ kadə̄ Yehu ndi dɔ tə́. Nin̄ kɔ̄rə́n̄ tōw̄ gajə dā̰ ō, ədan̄ na Yehu i mban̄g ō.


Yehu nin̄ kə madə̄n gēé oōn̄ naā dɔ mban̄g Joram tə́

14-15 Dan ń noō tə́ ní ngé rɔ̄ɔ̄ kə́ Israel tə́ gə̄ malang a ngɔ̄mə̄n̄ i ɓē kə́ Ramot kə́ Galaad na sōgə́ Hajael, mban̄g kə́ Aram, reē rɔ̄ɔ̄ ɓē ní. Ba dan ń mban̄g Joram a rɔ̄ɔń Hajael tə́ ní, Aram gə̄ adə̄nən̄ do. Adə̄ tél aw̄ Jisreel kadə̄ do̰ō̰n̄ don, adə̄ ni to i dɔ tə̄rá mo̰yo̰ó̰ kem ɓē kə́ Jisreel tə́. Loo ń noō tə́ Yehu ngōn̄ Josapat kə́ ngōn̄ Nimsi oōn̄ naā kə madə̄n gēé dɔ Joram tə́. Ni-əda madə̄n gə̄ kə́ ngol ngé rɔ̄ɔ̄ gə̄ na: Kemjí i yā naā ɓá ní, ādə̄ deē kógə̄ḿ teē kem ɓēé aw̄ Jisreel kəda yá̰á̰ ń rāā yá̰a̰ laā tə́ ní alé!

16 Gō tə́ anī Yehu al̄ kem púsə́ sə́nda yān tə́ ba aw̄ Jisreel, loo ń Akajias mban̄g kə́ Juda aw̄ go̰ō̰ Joram to dɔ tə̄rá mo̰yo̰ó̰ tū tə́ ní.

17 Nge ngɔ̄m̄ loo ń ra i dɔ kújə́ kə́ ngāl̄ ɓururu kum kə̄ dɔɔ́ kə́ Jisreel tə́ ní a̰a̰ ɓūtə̄ de gə̄ ń i kə Yehu ní anī əla əda mban̄g na n-a̰a̰ ɓūtə̄ de gə̄ kə́ a reēn̄. Anī Joram ədan na kə ɓāŕ nge kal̄ sə́ndá kógə̄ḿ kə əlan kadə̄ tə́nī tadə́ ba kə dəjedə́ na ké loo to karī wa.

18 Nge kal̄ sə́ndá ní tə́nī tadə́ ba əda na mban̄g əda na ké loo to karī wa. Anī Yehu tél ədan na: Ká ré loo to karī gə̄gē a usiī i rí? Ī-tūr̄ taí ba ún gōḿ. Nge kum̄ loo əda na: Nge kəla ugə̄ rɔ̄də́ tə́ ba tél alé.

19 Mban̄g əla nge kal̄ sə́ndá kə́ nge ko̰ jōó. Ni ugə̄ rɔ̄də́ tə́, ədadə́ na: Mban̄g əda na ké loo to karī wa. Anī Yehu tél ədan na: Ká ré loo to karī gə̄gē a usiī i rí? Ī-tūr̄ taí ba ún gōḿ!

20 Nge kum̄ loo əda na: Nge kəla aw̄ ugə̄ rɔ̄də́ tə́ ba tél alé. Deē ń a reē ní, loo njə̄rā kə púsú yān i tītə̄ loo njə̄rā kə púsú yā Yehu ngōn̄ kaa Nimsi beé. Tɔdɔ̄ a reē i kə ngɔ̄də̄ kə́ to ɓōĺ ngá̰ý.

21 Joram əda na: Ādə̄ do̰ō̰n̄ púsə́ gíŕ sə́nda gə̄ tə́! Anī do̰ō̰n̄ púsə yān gíŕ sə́nda gə̄ tə́. Joram mban̄g kə́ Israel ō, Akajias mban̄g kə́ Juda ō, ndin̄ i kem púsə yādə́ gə̄ tə́ kógə̄ḿ kógə̄ḿ kə dɔdə́ gēé n teēnneé kɔ̄ɔ́ kem ɓēé ba a aw̄n̄neé kə̄ tə́nī ta Yehu tə́ ní. Nin̄ əngenən̄ i kadə ndɔr̄ yā Nabot kə́ Jisreel tə́.


Joram, mban̄g kə́ Israel, oy

22 Loo ń Joram əla kumən lap a̰a̰ń Yehu anī dəjen najə̄, əda na: Yehu, loo to karī a? Yehu tél ədan na: Ī-dəjem̄ najə̄ kə́ beē i tām̄ rí tə́? Dan ń kó̰ó̰í Jesabel a rāā kaya ō, a rāā kəga ō, jīn tə́ laā ɓáý ní, loo a to karī i ba̰ý?

23 Joram tūr̄ ta sə́nda yān ba a̰ȳ. Ni-əda Akajias na: Akajias, ənīn̄jí kɔ̄ɔ́!

24 Yehu ɔr̄ ga̰ gərā yān urəń Joram gidən tə́, dɔ dáń kār̄ bɔ̄gə̄n kə́ jōó gə̄ tə́. Kum gərā ɔsə kújə́ mósən ba teē dām̄ kə́rēý tə́. Adə̄ Joram əsō kem púsə yān tə́.

25 Yehu əda Bidkar nge kətō der yān na: Únən āw̄ ə̄nīn kem ndɔr̄ yā Nabot kə́ Jisreel tə́. Ba ādə̄ əga kemií dɔ najə̄ ń Kɔ́ɔ̄ɓē əda bɔbə̄n kété dan ń jḭḭ seí jōó, ḭ̄ ō, mā ō, jə-ndi kem púsú gō bɔbə̄n tə́ j-a jə-dānə̄nəń ní tə́.

26 Kɔ́ɔ̄ɓē əda bɔbə̄n kété na mósə Nabot nin̄ kə ngánən gēé ní na n-a̰ā̰. N-a̰ā̰ na i joó ngá̰ý alé. Na n-a n-rāā seneé kadə̄ əgā kə̄rān kem ndɔr̄ nəkɔ́ ń toō tə́. Yehu əda ɓáý to̰ na: I beé ní ún Joram ə̄nīn kem ndɔr̄ ń toō tə́, tītə̄ ń Kɔ́ɔ̄ɓē ədań ní.


Akajias mban̄g kə́ Juda oy
(Á̰a̰ī 2 Yá̰a̰ 22.7-9 )

27 Dan ń Akajias mban̄g kə́ Juda a̰ā̰ beé anī, ɔtə a̰ȳ kə róbə kə́ ta kaw̄ kə̄ Bet Gan. Banī Yehu sōn̄g gōn. Ni-əda deē yān gə̄ na kə tɔ̄lə̄n̄ Akajias ō. Adə̄ urən̄ Akajias kem púsə yān tə́ dɔ róbə́ kə́ əta tan kə̄ dɔɔ́ ta kaw̄ kə̄ Gur tə́, kadə ɓē kə́ Ibəleam tə́. Akajias a̰ȳ aw̄ oy Megido.

28 Ngé kəla yān gə̄ aw̄n̄ seneé kə púsú Jerusalem. Dubə̄nən̄ i kem bāá ɓádə yān tə́ kadə kaan gə̄ tə́, kem ɓē yā Dabid tə́.

29 I kem ɓāl̄ ko̰o̰ ɓē kə́ nge ko̰ kutə gidə i kógə̄ḿ yā Joram ngōn̄ Akab tə́ n əndān̄neé Akajias mban̄g Juda tə́ ní.


Jesabel oy

30 Yá̰a̰ malang ń rāā yá̰á̰ ní Jesabel oō. Adə̄ rāā yá̰á̰ súū rɔ̄ dɔ kumən tə́ ō, rāā dɔn adə̄ majə ō. Ba dan ń Yehu tél dɔ tə́ reē gogə́ Jisreel anī, Jesabel aw̄ ndi kum ko̰rō̰ kújə́ kə́ bo kə́ rāān̄ tū kújə́ tə́.

31 Dan nəkɔ́ ń Yehu əndā njan kə̄ ta róbə ndogə̄ tə́ ba mān̄ a udə kə̄ kem ɓēé anī, Jesabel ədan na: Jimri kə́ nge tɔ̄l̄ mban̄g yān, ī-to karī a?

32 Yehu ɔr̄ dɔn dɔɔ́ a̰a̰ loo kum kə̄ ko̰rō̰ kújə́ tə́ ba əda na: I náā n i deē yāḿ mā? I náā? Anī ngé kəla yā mban̄g gə̄ jōó aké mətá wań əlan̄ dɔdə́ kə̄ ndágá kum kə̄ rɔ̄n tə́.

33 Yehu ədadə́ na kə mbəren̄ Jesabel kadə̄ əsō nang tə́. Nin̄ mbərenən̄ adə̄ əsō. Mósən kə̄rā tū ndogə̄ mbal̄ tə́ ō ɔdə sə́nda gə̄ ō. Yehu tə́ɓān kə njaneé.

34 Gō tə́ anī udə kújə yā mban̄g tə́, əsa yá̰a̰ ō, a̰ȳ ō, ba əda na: Á̰a̰ī gō dəyá̰ kə́ ndɔ̄ĺ i dɔn tə́ ń noō, ī-dubīin̄, tɔdɔ̄ i ngōn̄ mban̄g.

35 Aw̄n̄ dubə̄n tə́ anī əngen̄ i kār̄ dɔn ō, njan gə̄ kə jīn gə̄ ō ngóy.

36 Tél reē ədan̄ Yehu anī Yehu əda na: I yá̰á̰ ń noō n Kɔ́ɔ̄ɓē əndā ta nge kəla yān Eli kə́ Tisbe tə́ adə̄ əda ní, əda na bísə gə̄ a əsan̄ dā̰ Jesabel kem ndɔr̄ kə́ Jisreel tə́ ō,

37 nīnə́n a to i tītə̄ yedə̄ dā̰ kə́ deē seĺ kem ndɔrɔ́ ō, adə̄ deē a asə kəda na yá̰á̰ ń toō i Jesabel alé.

Bibəl ta Sar̄ © L'Alliance Biblique du Tchad, 2006, 2010.

Bible Society of Chad
Swiv nou:



Piblisite