2 MBAN̄G 8 - Bibəl ta Sar̄

Ta tɔ̄l ta gotə najə̄ yā dəyá̰ kə́ Sunem

¹ Elije əda dəyá̰ ń rāā ngōnən adə̄ ndól̄ ní na: Ḭ̄ ō, kojə yāí gə̄ ō, ḭ́ḭī laā kɔ̄ɔ́ āwī. Loo ń asiī kaw̄ tū tə́ ní i rá anī, āw̄ ī-ndiī tū tə́. Tɔdɔ̄ Kɔ́ɔ̄ɓē gḛy kadə̄ ɓō əsō dɔ nang kə́ Israel tə́. Ɓō ní a rāā de gə̄ ɓāl̄ sīrí.

² Dəyá̰ ní rāā yá̰á̰ ń deē yā Nə́ɓā ədan ní. Aw̄ kə de kə́ gír kojə yān tə́ gēé aw̄ ndin̄ dɔ nang yā Pilistin gə̄ tə́ ɓāl̄ sīrí.

³ Dan ń gír ɓāl̄ kə́ sīrí gə̄ ní gān̄g anī, dəyá̰ ní ḭḭ dɔ nang yā Pilistin gə̄ tə́ tél reē. Ni-aw̄ rɔ̄ mban̄g tə́ rāān ɓɔ́ najə̄ yā kújə yān tə́ ō, ndɔr̄ yān tə́ ō.

⁴ Dan ń noō tə́ ní mban̄g ndi a ɔr̄ i najə̄ kə Geaji nge kəla yā Elije. Ni mēr̄ Geaji kɔjən gotə yá̰á̰ kə́ to kɔr kum gə̄ malang ń Elije rāā ní.

⁵ Adə̄ Geaji ndi a ənīn i gotə rāā ń Elije rāā de ké koy adə̄ ndól̄ ní. Anī kə ta jiī tə́ noō dəyá̰ ń Elije ndól̄ ngōnən kə́ koy ní reē rɔ̄ mban̄g tə́ yā rāān ɓɔ̄ɔ̄ najə̄ yā kújə yān tə́ ō, ndɔr̄ yān tə́ ō. Anī Geaji əda na: Kɔ́ɔ̄ɓē gə̄, dəyá̰ ní n toó ō, ngōnən kə́ koy ń Elije rāān adə̄ ajə ní n toó ō.

⁶ Mban̄g dəje dəyá̰ najə̄ ní, anī ni ɔjən gotə kə ta nja malang. Kə̄ ta jī tə́ noō mban̄g adə̄ dəyá̰ ní nge kəla yān kógə̄ḿ ba əda nge kəla ní na: Ādə̄ adə̄nən̄ yá̰a̰ yān malang gogə́ ō, əndān̄ njan tām̄ yá̰á̰ ń əngən̄ ndɔr̄ yān tə́ əla gír ndɔ̄ ń ni teēń kɔ̄ɔ́ kem ɓēé bátə́ ɓōólaā ní ní ō.

Elije nin̄ kə Hajael

⁷ Elije aw̄ Damas. Ba Ben Hadad, mban̄g kə́ Aram, i mo̰y. Ədan̄ mban̄g na deē yā Nə́ɓā na reē bátə́ na téē laā.

⁸ Anī mban̄g əda Hajael na: Ún yá̰á̰ kə́ yā ndējə̄ jīí tə́, āw̄ ə́nge deē yā Nə́ɓā ba ī-ndḛḛ̄n sāā dɔḿ tə́ rɔ̄ Kɔ́ɔ̄ɓē tə́ ké m-ā m-ḭ́ḭ dɔ mo̰y ń toō tə́ wa.

⁹ Hajael aw̄ ənge Elije. Ni ɔy yá̰á̰ kə́ majə majə gə̄ kə́ Damas adə̄ jámbal gə̄ kutə sɔ́ ətōn̄. Ni-aw̄ kə yá̰a̰ gə̄ ní yā ndējə̄ Elije. Dan ń reē ugə̄ rɔ̄ Elije tə́ anī, əda na: Ngōnīí Ben Hadad, mban̄g kə́ Aram, əlam̄ rɔ̄í tə́, əda na kə m̄-reē kə m̄-dəjeī ké n-a n-ḭḭ dɔ mo̰y ń toō tə́ wa.

¹⁰ Elije tél ədan na: Āw̄ ə́dan na kə́ rɔ̄kum tə́ a ḭḭ dɔ mo̰y ní tə́. Banī Kɔ́ɔ̄ɓē ɔjəm̄ kadə̄ a oy.

¹¹ Gō tə́ anī deē yā Nə́ɓā tél ndi tītə̄ kə́ súū əndān ta loo tə́ beé. Ni-rāā kumən adə̄ seḿ sésém al̄ naā. Ta tɔ̄l̄ ta anī ni nōō.

¹² Hajael dəjen na: Kɔ́ɔ̄ḿ, ā ī-nōō i rí? Elije tél ədan na: m̄-nōō i tɔdɔ̄ m̄-ger̄ yá̰á̰ kə́ majaĺ ń ā ī-rāā yā rāā kə ngán Israel gēé ní: Ā ī-tə́la hor dɔ ɓē kə́ ngan̄g yādə́ gə̄ tə́ ō, ā ī-tɔ̄l̄ balsáa yādə́ gə̄ kə kaskaraá ō, ā ī-rējə̄ ngáńdə́ kə́ dūú gə̄ ō, ā ī-njár̄ kem dəyá̰ yādə́ kə́ ndān̄ ngán gə̄ ō.

¹³ Hajael əda na: Mā ń i nge kəla yāí kə́ m-ásə́ yá̰a̰ aĺ bátə́ ní, loo kadə̄ m̄-rāā yá̰á̰ kə́ bo ngá̰ý gə̄ kə́ tītə̄ ń noō i ba̰ý? Elije tél ədan na: Kɔ́ɔ̄ɓē ɔjəm̄ kadə̄ ndɔ̄ń tə́ ā ī-ndi mban̄g dɔ ɓē kə́ Aram tə́.

¹⁴ Hajael əya̰ Elije ba tél dɔ tə́ reē gogə́ rɔ̄ kɔ́ɔ̄n tə́. Kɔ́ɔ̄n dəjen na ké Elije ədan na i rí wa. Anī Hajael tél ədan na: Ədam̄ na kə́ rɔ̄kum tə́ ā ḭ́ḭ dɔ mo̰y ní tə́.

¹⁵ Teē kə ndɔ̄ kə́ noō anī Hajael un bájo əla kum man̄ tə́ ənī ta kum mban̄g tə́ utə̄ń ta kumən adə̄ oy. Ni-o̰o̰ ɓē gotən tə́.

Joram mban̄g kə́ Juda

¹⁶ Kem ɓāl̄ ko̰o̰ ɓē kə́ nge ko̰ mí yā Joram ngōn̄ mban̄g Akab kə́ Israel tə́ ní, Joram ngōn̄ mban̄g Josapat kə́ Juda ndi mban̄g. Dan ń noō tə́ ní Josapat i mban̄g kə́ Juda ɓáý.

¹⁷ Dan ń Joram ndi mban̄g ní ɓālə̄n i kutə mətá gidə i jōó. Ni-o̰o̰ ɓē ɓāl̄ sɔ́sɔ́ kem ɓē kə́ Jerusalem tə́.

¹⁸ Ni ndájə̄ kəla rāā mban̄g kə́ Israel tə́ gə̄ tītə̄ yā de kə́ gír kojə yā Akab tə́ gə̄, tɔdɔ̄ ni-taā i ngōn̄ Akab. Ni rāā yá̰á̰ kə́ majaĺ ta kum Kɔ́ɔ̄ɓē tə́.

¹⁹ Banī Kɔ́ɔ̄ɓē gḛy nujə ɓē ko̰o̰ kə́ Juda alé, tɔdɔ̄ ənī ndūn adə̄ nge kəla yān Dabid, ədan na ngánən gə̄ ō, ngán kaan gə̄ ō, na a o̰o̰n̄ ɓē ngándáńg.

²⁰ I dan ń Joram a o̰o̰ń ɓē ní n de kə́ Edom gə̄ mbātə́n̄neé kadə̄ Juda gə̄ ndin̄ dɔdə́ tə́ ba nin̄ kɔ́ gə̄ əndān̄ mban̄g yādə́ ní.

²¹ Adə̄ Joram aw̄ Sair kə púsə rɔ̄ɔ̄ yān gēé malang. Edom gə̄ gīrə̄n̄ gidə Joram kə ngol ngé púsə yān gēé. Banī ni ḭḭ ndɔ̄ɔ́ ənīdə́ rɔ̄ɔ̄ ō, tetədə́ ō, adə̄ ngé rɔ̄ɔ̄ yān gə̄ a̰ȳn̄ naā, tél aw̄n̄ gogə́ ɓē yādə́ gə̄ tə́.

²² I beé n Edom gə̄ mbātə́n̄neé kadə̄ Juda gə̄ ndin̄ dɔdə́ tə́ bátə́ ɓōólaā ní. Dan ngeé ń noō tə́ ní de kə́ Libəna gə̄ mbātə́n̄ kadə̄ Juda gə̄ ndin̄ dɔdə́ tə́ ō.

²³ Gotə yá̰á̰ kə́ rang gə̄ malang ń Joram rāā ní, ndangən̄ kem makətūbə̄ kəla rāā mban̄g gə̄ kə́ Juda tə́.

²⁴ Joram oy aw̄ gō kaan gə̄ tə́. Dubə̄nən̄ i kem ɓē yā Dabid tə́, loo ń dubə̄n̄ kaan gə̄ tū tə́ ní tə́. Ngōnən Akajias o̰o̰ ɓē gotən tə́.

Akajias mban̄g kə́ Juda

²⁵ Kem ɓāl̄ ko̰o̰ ɓē kə́ nge ko̰ kutə gidə i jōó yā Joram ngōn̄ mban̄g Akab kə́ Israel tə́ ní, Akajias ngōn̄ mban̄g Joram kə́ Juda ndi mban̄g.

²⁶ Dan ń Akajias ndi mban̄g ní ɓālə̄n i kutə jōó gidə i jōó. Ni-o̰o̰ ɓē ɓāl̄ kógə̄ḿ kem ɓē kə́ Jerusalem tə́. Rī kó̰o̰n na i Atali. Kó̰o̰n i ngōn̄ kaa mban̄g Omri kə́ Israel.

²⁷ Akajias ndájə̄ kəla rāā de kə́ gír kojə yā Akab tə́ gə̄ ō, rāā yá̰á̰ kə́ majaĺ ta kum Kɔ́ɔ̄ɓē tə́ tītə̄ ń de kə́ gír kojə yā Akab tə́ gə̄ rāān̄ ní ō, tɔdɔ̄ ni i nge de kə́ gír kojə yā Akab tə́ gə̄.

²⁸ Ni-aw̄ rɔ̄ɔ̄ Hajael mban̄g kə́ Aram kem ɓē kə́ Ramot kə́ Galaad tə́ kə Joram ngōn̄ Akab. Banī Aram gə̄ adə̄n̄ mban̄g Joram do ta rɔ̄ɔ̄ tə́.

²⁹ Joram tél dɔ tə́ reē gogə́ Jisreel kadə̄ do̰ō̰n̄ don tə́. Loo ń noō tə́ Akajias aw̄ go̰ō̰n tə́ Jisreel tām̄ do ń ənge tə́ ní.