2 MBAN̄G 7 - Bibəl ta Sar̄

¹ Elije tūr̄ əda na: Sḭḭ̄ malang, ōōī najə̄ ń Kɔ́ɔ̄ɓē əda ní: Bírí kə mbang kə́ beé gātə̄ ndujə̄ kə́ ta róbə́ kə́ yā kudəń kə̄ kem ɓē kə́ Samari tə́ ní dójə́ kógə̄ḿ i njáŕ sə́lē arjā̰a̰ kógə̄ḿ beē ngóy ō, kōō ɔ́rjə kem səmbē bo kógə̄ḿ i sə́lē arjā̰a̰ kógə̄ḿ beē ngóy ō.

² Nge kətō der yā mban̄g ń mban̄g ndə̄nā rɔ̄n dɔ jīn tə́ ní tél əda deē yā Nə́ɓā na: Ká ré Kɔ́ɔ̄ɓē mbútəń i ko̰rō̰ kújə gə̄ dɔ rā̰ tə́ gə̄gē anī, yá̰á̰ ń ə́da noō a reē yā kudə gíŕ nəkɔ́ a? Anī Elije tél ədan na: Majə, ā á̰a̰ā̰ kə kumií ba a ɔdə taí alé.

Aram gə̄ əya̰n̄ gérger yādə́ kɔ̄ɔ́ ba a̰ȳn̄ naā

³ Dan ngeé ń noō tə́ ní ngé bānjə̄ gə̄ sɔ́ ndin̄ ta ɓē kə́ Samari tə́. Nin̄ ədan̄ naā dɔ dáńdə́ tə́ na: Jə-ndiī laā j-a jə-ngóōneé yo i tām̄ rí tə́?

⁴ Ré j-udiī kem ɓēé anī j-a j-oyīī, tɔdɔ̄ ɓō i ngá̰ý. Ré jə-ndiī i laā a j-a j-oyiī ō. Ní, ādə̄ j-awī gérger yā Aram gə̄ tə́, j-osoī kə́ no mbādə́ tə́. Ré gḛyn̄ i kəya̰jí anī əya̰n̄jí ō, i tɔ̄l̄jí anī tɔ̄lə̄n̄jí ō.

⁵ Ngé bānjə̄ gə̄ ní ḭḭn̄ loo tíbí aw̄n̄ gérger yā Aram gə̄ tə́. Ba dan ń ugə̄n̄ ta gérger tə́ ní a, a̰a̰n̄ deē alé.

⁶ Tɔdɔ̄ Kɔ́ɔ̄ɓē rāā adə̄ Aram gə̄ oōn̄ ká̰ púsə gə̄ ō, ká̰ sə́nda gə̄ ō, ká̰ ngé rɔ̄ɔ̄ kə́ ngá̰ý gə̄ ō, kem gérger yādə́ tə́, ba ədan̄ naā na mban̄g kə́ Israel tə́ na adə̄ mban̄g gə̄ yā Het gə̄ ō, mban̄g gə̄ kə́ Ejiptə tə́, ō nar kadə̄ rɔ̄ɔn̄neédə́ dɔn tə́.

⁷ Adə̄ Aram gə̄ ḭḭn̄ loo tíbí, əya̰n̄ gérger jəke kə jī loo toneé beē ba a̰ȳn̄ naā yā kajəń rɔ̄də́. Əya̰n̄ kújə tandā gə̄ ō, sə́nda gə̄ ō, kərō gə̄ ō.

⁸ Dan ń ngé bānjə̄ gə̄ ugə̄n̄ ta ngóy gérger tə́ anī udən̄ kem kújə tandā kógə̄ḿ tə́. Yá̰a̰ gə̄ ń əngen̄ kemeé ní əsan̄ ō, a̰ȳn̄ ō. Gō tə́ anī ɔyn̄ gində̄ arjā̰a̰ ō, lɔ́r ō, kūbə̄ gə̄ ō aw̄ ɓɔ̄ɔ̄n̄. Ba télən̄ dɔ tə́ udən̄ kem kújə tandā kə́ rang tə́, ɔyn̄ yá̰á̰ kə́ kemeé gə̄ aw̄ ɓɔ̄ɔ̄n̄ ɓáý to̰.

Gír rɔ̄ɔ̄ gān̄g ō, gír ɓō gān̄g ō

⁹ Ngé bānjə̄ gə̄ ní ədan̄ naā dɔ dáńdə́ tə́ na: Yá̰á̰ ń jə-rāāī ní i gōtə́ alé. Ndɔ̄ kə́ ɓōólaā i ndɔ̄ yā najə̄ kə́ majə. Ní ré jə-ndiī kə tají kə́ mbóo beē jə-ngóōīneé kadə̄ mbang əɓa anī, Nə́ɓā a əndají. J-aw̄ j-udiī kem ɓēé, ba j-ədaī de kə́ ndogó mbangāá gə̄ najə̄.

¹⁰ Nin̄ aw̄n̄ ɓārə́n̄ ngé ngɔ̄m̄ ta róbə ndogə̄ kə́ yā kudəń kə̄ kem ɓēé gə̄, ba ədan̄də́ na: J-udə̄ kem gérger yā Aram gə̄ tə́, banī j-a̰a̰ deē kógə̄ḿ aĺ ō, j-oō ndū deē aĺ ō, ba j-ənge i sə́nda gə̄ ō, kərō gə̄ ō kə́ do̰ō̰n̄də́, kújə tandā kə́ kəya̰ kɔ̄ɔ́ gə̄ ō ngóy.

¹¹ Ngé ngɔ̄m̄ ta róbə ní gə̄ ɓārə́n̄ deē kógə̄ḿ əlanən̄ kadə̄ aw̄ əda najə̄ ní ndogó mbangāá.

¹² Mban̄g ḭḭ dɔɔ́ ba əda de kə́ bo yān gə̄ na: M-a m-ɔ́jə́sí yá̰á̰ ń Aram gə̄ a númə̄n̄ yā rāā sejí ní! Nin̄-gerə̄n̄ kadə̄ ɓō rāājí ngá̰ý. I yá̰á̰ ń noō n teēnəń kɔ̄ɔ́ gérgereé ba aw̄ ɓɔ̄ɔ̄nəń rɔ̄də́ bembeé ní. Nin̄ ədan̄ na j-a jə-teēī kem ɓēé, adə̄ loo ń noō tə́ n-a n-əhɔn̄jí kə kumjí ō, n-a n-udən̄ kem ɓē yājí tə́ ō.

¹³ Anī de kə́ bo yā mban̄g kógə̄ḿ un najə̄ ɔr̄, əda na: Gotə sə́nda gə̄ ń na̰yn̄ ní, ādə̄ j-əhɔī mí danaá, j-əlaīneé de gə̄ kadə̄ j-a̰a̰īń gíŕ yá̰á̰ ń a rāā yā rāā yá̰á̰ ní. Yá̰á̰ ń a rāādə́ ní i tītə̄ yá̰á̰ ń a rāā Israel kə́ ngá̰ý gə̄ ń ndin̄ kem ɓēé á a rāān̄ yā kudə kɔ̄ɔ́ ní.

¹⁴ Ɔyn̄ púsə gə̄ jōó ō, əhɔn̄ sə́nda gə̄ ō, adə̄n̄ mban̄g adə̄ əlań de gə̄ ndəle nja ngé rɔ̄ɔ̄ gə̄ yā Aram gə̄ tə́. Mban̄g əda de gə̄ ní na: Āw̄ á̰a̰ī!

¹⁵ De gə̄ ní unən̄ tó ngé rɔ̄ɔ̄ gə̄ bátə́ aw̄ ugə̄n̄ bā Jurdḛ tə́. Nin̄-a̰a̰n̄ kūbə̄ gə̄ ō, yá̰a̰ gə̄ ngá̰ý ō, kə́ ton̄ kə gō róbó gō tóo Aram gə̄ ń a̰ȳn̄ naā kə tebəle gēé á ɓōkə́n̄ kɔ̄ɔ́ tə́ ní. Ngé kəla gə̄ tél reē ədan̄ mban̄g.

¹⁶ Loo ń noō tə́ de kə́ kem ɓēé gə̄ teē ɔyn̄ yá̰á̰ kə́ kem gérger yā Aram gə̄ tə́. Ba tītə̄ ń Kɔ́ɔ̄ɓē ədań ní, mangən̄ ndujə̄ dójə́ kógə̄ḿ i kə njáŕ sə́lē arjā̰a̰ kógə̄ḿ beē ngóy ō, kōō ɔ́rjə kem səmbē bo kógə̄ḿ i kə sə́lē arjā̰a̰ kógə̄ḿ beē ngóy ō.

¹⁷ Mban̄g əndā nge kətō der yān ń ni a ndə̄nā rɔ̄n dɔ jīn tə́ ní kadə̄ ngɔ̄m̄ ta róbə ɓē. Banī de kə́ kem ɓēé gə̄ ərenən̄ kadə bápə́ tə́ adə̄ oy tītə̄ ń deē yā Nə́ɓā ədań ní. Ni-əda najə̄ ní i dan ń mban̄g aw̄ń kə̄ rɔ̄n tə́ ní ɓáý.

¹⁸ Tɔdɔ̄ dan ń deē yā Nə́ɓā əda mban̄g na bírí kə kum mbang nəkɔ́ ń toō kōō ɔ́rjə kem səmbē bo kógə̄ḿ kə súkə̄ kə́ Samari tə́ i sə́lē arjā̰a̰ kógə̄ḿ beē ngóy ō, ndujə̄ kem dójə́ kógə̄ḿ i njáŕ sə́lē arjā̰a̰ kógə̄ḿ beē ngóy ō ní,

¹⁹ nge kətō der yā mban̄g əda deē yā Nə́ɓā na ká ré Kɔ́ɔ̄ɓē mbutəń i ko̰rō̰ kújə gə̄ dɔ rā̰ tə́ gə̄gē anī, najə̄ ń ə́da noó na a reē yā kudə gírí nəkɔ́ a? Ba Elije tél ədan na: Majə, ā á̰a̰ā̰ kə kumií ba a ɔdə taí alé.

²⁰ I yá̰á̰ ń noō n rāā yá̰á̰ ní: De kə́ kem ɓēé gə̄ əren̄ nge kətō der kadə bápə́ tə́ adə̄ oy.