2 MBAN̄G 6 - Bibəl ta Sar̄

Njár̄ kə̄ngā kə́ əsō gír maná

¹ Ngé koō ta gə̄ ədan̄ Elije na: Á̰a̰ā̰, loo ń jə-ndi tū tə́ j-a j-oōń najə̄ taí tə́ ní asəjí alé.

² Ní, ādə̄jí ta róbə ādə̄ j-aw̄ bā Jurdḛ tə́ jə-tə́gā sáā kāgə̄ gə̄ yā reē rāań səlá kə́ rang loo ń toō tə́ kadə̄ jə-ndiī gírí. Ni tūr̄ ədadə́ na kə aw̄n̄.

³ Anī deē kógə̄ḿ dandə́ tə́ əda na: Ɓɔ́, āw̄ sejí! Anī Elije tél əda na: Majə m-ā m-āw̄ sesí!

⁴ Adə̄ ni-aw̄ sedə́. Nin̄ aw̄ ugə̄n̄ bā Jurdḛ tə́ anī tə́gān̄ kāgə̄ gə̄.

⁵ Deē kógə̄ḿ dandə́ tə́ ra a tə́gā kāgə̄ anī njár̄ kə̄ngā yān teē əsō maná. Deē ní un ndūn kə̄ dɔɔ́ ədan na: Á, kɔ́ɔ̄ḿ, i kə̄ngā kə́ m̄-ndə̄mā i mbée!

⁶ Anī deē yā Nə́ɓā dəjen na ké əsō i rá wa. Anī ni ɔjən loo ń əsō tū tə́ ní. Elije tə́ga gūrū kāgə̄ kógə̄ḿ ənī loo ń njár̄ kə̄ngā əsō tū tə́ ní. Anī njár̄ kə̄ngā ní teē al dɔ man̄ tə́.

⁷ Elije əda deē ní na kə un. Anī deē ní əla jīn unəń.

Elije əhɔ ngé rɔ̄ɔ̄ gə̄ kə́ Aram

⁸ Mban̄g kə́ Aram a rɔ̄ɔ̄ i Israel gə̄. Dan ń oōn̄ naā kə ngol ngé rɔ̄ɔ̄ yān gēé ba ədadə́ na: N-a n-ənda gérger yān na i loo kə́ beē tə́,

⁹ anī deē yā Nə́ɓā əla əda mban̄g kə́ Israel tə́ na: Ī-lōō teē dām̄ loo ń noō tə́, tɔdɔ̄ Aram gə̄ i noó.

¹⁰ Loo ń noō tə́ mban̄g kə́ Israel əla de gə̄ loo ń deē yā Nə́ɓā ɔjən tə́ ní. Ni tāā mban̄g adə̄ ndi dɔ rɔ̄n tə́. Ni-rāā yá̰á̰ ní i nja kógə̄ḿ beē ngóy alé.

¹¹ Kem mban̄g kə́ Aram ndi kə gōó to̰ alé najə̄ yá̰a̰ gə̄ ń rāān̄ yá̰á̰ tə́ ní. Ni ɓāŕ ngol ngé rɔ̄ɔ̄ yān gə̄ ba ədadə́ na: De kógə̄ḿ danjí tə́ i nge rāā kəla yā mban̄g kə́ Israel tə́. Ī-ndigií teē kə gíŕ kɔ́ɔ̄ á ndágá rɔ̄ḿ tə́ aĺ a?

¹² Ngol ngé rɔ̄ɔ̄ yān gə̄ kógə̄ḿ kə́ dan madə̄ gə̄ tə́ tél əda na: Kɔ́ɔ̄ɓē gə̄, deē kógə̄ḿ kə́ nge rāā kəla yā mban̄g kə́ Israel gətóo danjí tə́ laā, ba i Elije nge koō ta ń ndi Israel tə́ ní tá. Ni asə kəda mban̄g najə̄ ń ḭ̄ ɔ̄r̄ kem kújə toí tə́ ní.

¹³ Loo ń noō tə́ mban̄g kə́ Aram əda na: Āw̄ á̰a̰ī loo ń ni i tū tə́ ní ādə̄ m-ə́la de gə̄ gōn tə́ ādə̄ əhɔnən̄. Ədan̄ mban̄g na Elije na i kem ɓē kə́ Dotan tə́.

¹⁴ Anī mban̄g əla de kə́ ngá̰ý gə̄ kə sə́nda gēé ō, kə púsə́ sə́nda gēé ō, adə̄ aw̄ ugə̄n̄ ndɔ̄ɔ́ ba girə̄n̄ gidə ɓē əlan̄ ta naā tə́.

¹⁵ Nge kəla yā Elije ḭḭ dɔɔ́ kə gír looí ba teē kɔ̄ɔ́ kem ɓēé, anī a̰a̰ kadə̄ ɓūtə̄ ngé rɔ̄ɔ̄ gə̄ gīrə̄n̄ gidə ɓē kə sə́nda gēé ō, kə púsə́ sə́nda gēé ō. Ni-əda Elije na: Á! Kɔ́ɔ̄ḿ, j-a jə-rāā i ba̰ý?

¹⁶ Anī Elije tél ədan na: Ī-lōō ɓōĺ! De gə̄ ń i sejí ní nin̄ i ngá̰ý tɔȳ ngé gə̄ ń i sedə́ ní.

¹⁷ Gō tə́ anī Elije ndɔ̄ȳ Nə́ɓā, əda na: Ɓɔ́, Kɔ́ɔ̄ɓē, ī-teē kumən ādə̄ a̰a̰ loo! Kɔ́ɔ̄ɓē teē kum nge kəla yā Elije. Anī ni-a̰a̰ sə́nda gə̄ ō, púsə hor gə̄ ō, gīrə̄n̄ gidə Elije, taān̄ loo dɔ mbalá malang.

¹⁸ Aram gə̄ a aw̄n̄ kə̄ rɔ̄ Elije tə́, anī ni ndɔ̄ȳ Nə́ɓā əda na: Kɔ́ɔ̄ɓē, ī-rāā ādə̄ kum nápar de gə̄ ń toō a̰a̰ loo alé! Anī Kɔ́ɔ̄ɓē rāā adə̄ kumdə́ a̰a̰ loo alé tītə̄ ń Elije ədań ní.

¹⁹ Elije ədadə́ na: Úniī i róbə́ kə́ gōtə́ alé. Ɓē ń ɔjən̄sí ní n toó alé. Úniī gōḿ anī m-ā m-āw̄ sesí gō deē ń ā ī-sāāniī tə́ ní. Ni-aw̄ sedə́ Samari.

²⁰ Dan ń udən̄ kem ɓē kə́ Samari tə́ anī, Elije ndɔ̄ȳ Nə́ɓā əda na: Kɔ́ɔ̄ɓē, ī-teē kum de gə̄ ń toō ādə̄ a̰a̰n̄ loo! Anī Kɔ́ɔ̄ɓē teē kumdə́ anī nin̄ a̰a̰n̄ kadə̄ nin̄ i dan ɓē kə́ Samari tə́.

²¹ Dan ń mban̄g kə́ Israel a̰a̰də́ anī dəje Elije na: Bɔbə́ḿ, m̄-tɔ̄l̄də́ a?

²² Anī Elije tél ədan na: Ī-tɔ̄l̄də́ alé! Kété gə̄ ní ī-tɔ̄l̄də́ de gə̄ ń, ī-tetədə́ rɔ̄ɔ̄ kə kaskaraá ō, kə ga̰ gərā yāí ba ə́hɔ́də́ dəngáý ní a? Ādə̄də́ yá̰a̰ kəsa ādə̄ əsan̄ ō, ādə̄də́ man̄ ādə̄ a̰ȳn̄ ō, ba ādə̄ aw̄n̄ gogə́ rɔ̄ kɔ́ɔ̄də́ tə́.

²³ Mban̄g adə̄də́ yá̰á̰ ngá̰ý adə̄ əsan̄ ō, a̰ȳn̄ ō. Gō tə́ anī əya̰də́ adə̄ tél aw̄n̄ rɔ̄ kɔ́ɔ̄də́ tə́. Əla gír ndɔ̄ noō tə́ ní ɓūtə̄ Aram kə́ ngé ɓogə gə̄ əya̰n̄ kaw̄ nujə looó dɔ nang kə́ Israel tə́.

Ɓō əsō Samari

²⁴ Gō tə́ anī Ben Hadad, mban̄g kə́ Aram, ɔsə dɔ ngé rɔ̄ɔ̄ yān gə̄ naā tə́ malang ba aw̄ girə̄n̄ gidə ɓē kə́ Samari.

²⁵ Loo ń noō tə́ ɓō kə́ ngá̰ý əsō kem ɓēé. Ngé rɔ̄ɔ̄ gə̄ ń gīrə̄n̄ gidə ɓē ní utə̄n̄ ɓē i kutə̄ kə́ ngan̄g ngá̰ý adə̄ gātə̄ dɔ kərō kógə̄ḿ i njár sə́lē arjā̰a̰ sɔ́sɔ́ ō, gātə̄ yedə̄ déŕ kə́ rosə kem kɔ̄ý kógə̄ḿ i njáŕ sə́lē arjā̰a̰ mí ō.

²⁶ Ndɔ̄ kógə̄ḿ tə́ mban̄g kə́ Israel njə̄rā dɔ ndogə̄ mbal̄ tə́ a mān̄ anī dəyá̰ kógə̄ḿ un ndūn kə̄ dɔɔ́ ədanəń na: Kɔ́ɔ̄ḿ mban̄g, ī-rāā seḿ!

²⁷ Banī mban̄g tél ədan na: Ré Kɔ́ɔ̄ɓē mbātə́ rāā seí anī, mā m-ā m-ásə ka̰yī mbērē tə́ i kə rí? I kə njár̄ kōō gémé kə́ kḭḭń loo kənda kōō gémé tə́ aké i kə kasə kan̄ kāgə̄ nduú kə́ kḭḭń loo mbə́rē kan̄ kāgə̄ nduú tə́?

²⁸ Gō tə́ anī mban̄g dəjen na ké gḛy i rí wa. Anī dəyá̰ ní tél ədan na: Dəyá̰ ń toō ədam̄ na kə j-əsa ngōnə̄ḿ ba ré kə teē kə bírí anī kə j-əsa yān.

²⁹ Adə̄ jə-ndīr̄ ngōnə̄ḿ j-əsa. Ba teē kə ndɔ̄ kə́ noō ré m-ə́dan na kə reē kə ngōnəneé kadə̄ j-əsa anī ɓɔ̄ɔ̄ dɔn kɔ̄ɔ́.

³⁰ Mban̄g oō gotə najə̄ ń dəyá̰ ɔjən ní beē anī, əhɔ kūbə̄ kə́ rɔ̄n tə́ rə̄yā̰. Ba dan ń ni a mān̄ i dɔ ndogə̄ mbal̄ tə́ ní, de kə́ kem ɓēé gə̄ malang a̰a̰n̄ kadə̄ mban̄g o̰ō̰ kūbə̄ sákə̄ rɔ̄n tə́ gír kūbə̄ madə̄ gə̄ tə́, adə̄ kūbə̄ ní ɔdə ndārə́n.

³¹ Mban̄g əda na: Ré m-ə́ya̰ dɔm dɔ Elije ngōn̄ Sapat adə̄ ndi ta míndən tə́ ɓōólaā anī, ādə̄ Nə́ɓā rāām̄ yá̰á̰ kə́ tōr̄ ń toō ō, nge kə́ tōr̄ ń toō ɓáý to̰ ō.

Elije əda na gír ɓō na a gān̄g

³² Dan ń mban̄g əla nge kəla yān kógə̄ḿ rɔ̄ Elije tə́ ní, Elije ndi i ɓēé looneé kə kum kɔɔ̄ gə̄ yā Israel gēé n mban̄g əlań rɔ̄n tə́ ní. Ba pá tá kadə̄ nge kəla ní reē ugə̄ rɔ̄n tə́ anī, Elije əda kum kɔɔ̄ gə̄ na: Á̰a̰ī, ngōn̄ nge tɔ̄l̄ deē ń noō əla deē kadə̄ reē əja míndə́ḿ. Ré nge kəla ní ugə̄ anī, ūtī ta kújə kɔ̄ɔ́ ba ī-mbərein̄ kə bápá kum kə̄ ndágá. Ba i kɔ́ɔ̄n ń utə̄ gōn ní n, kōō njan a ɓār̄ noó aĺ a?

³³ Ni a ɔr̄ najə̄ sedə́ kə̄ tan tə́ ɓáý anī mban̄g nəkɔ́ reē ugə̄ ba əda na: I Kɔ́ɔ̄ɓē n reē kə yá̰á̰ kə́ to kum kaȳ aĺ ń toō dɔjí tə́ ní! Ní i yá̰á̰ rí n kə m-ə̄ndā kemḿ dɔ kənge tə́ jī Kɔ́ɔ̄ɓē tə́ ní?