2 MBAN̄G 4 - Bibəl ta Sar̄

Elije dḭḭ̄ dəyá̰ kə́ ngaa koy

¹ Nə̄yá̰ deē kógə̄ḿ kə́ dan ɓūtə̄ yā ngé koō ta gə̄ tə́ rāā Elije ɓɔ́ kadə̄ kə rāā seneé. Ni-əda Elije na: Ngaaḿ ń i nge kəla yāí ní oy kɔ̄ɔ́ ō, ī-ger̄ majə kadə̄ ni i de kə́ nge ɓōĺ ndíĺ Kɔ́ɔ̄ɓē ō. Ba dəngam ń kə̄rā yān i dɔjí tə́ ní reē kəhɔ ngánə́ḿ kə́ dəngam kə́ jōó gə̄ tə́ yā kaw̄ rāādə́ ɓəlo tə́ kum kə̄rā ní.

² Anī Elije dəjen na ké i rí n kə n-rāā tām̄ yān tə́ wa. Ké yá̰á̰ ń aw̄ń kem kújú ɓēé ní ké i rí wa, kə ədan. Dəyá̰ ní tél əda Elije na n-ənge yá̰a̰ alé, ba i na yibə̄ kə́ yā ndum ngóy n noō ní.

³ Elije ədan na: Āw̄ ī-ndə̄mā madə̄ ɓēí gə̄ malang kū yibə̄ kə́ kem karī gə̄. Ba ī-ndə̄mādə́ kū yibə̄ gə̄ ní ādə̄ təsóo.

⁴ Gō tə́ anī ūtī ta kújə dɔsí tə́ kə ngání gēé, ba ī-tūr̄ yibə̄ ní kem kū gə̄ ní tə́. Ré kū kógə̄ḿ rosə anī, ɔ̄rən kə̄ gogə́, ɔ̄rən kə̄ gogə́.

⁵ Dəyá̰ ní ɔtə aw̄. Dan ń ugə̄ ɓēé anī, utə̄ ta kújə dɔn tə́ kə ngánən gēé. Ngánən gə̄ i ngé kadə̄n kū gə̄ ba ni i nge tūr̄ yibə̄ kemeé.

⁶ Rāān̄ kəla ní beé anī kū gə̄ rosən̄ kɔ̄ɔ́ malang. Adə̄ dan ń dəje ngōnən kógə̄ḿ kū yibə̄ kə́ kem karī anī, ngōnən əda na kū kə́ kem karī na gətóo. Loo ń noō tə́ yibə̄ ń a a̰ȳ ní gír gān̄g kɔ̄ɔ́.

⁷ Dəyá̰ ní aw̄ ɔjə deē yā Nə́ɓā yá̰á̰ ń rāā yá̰á̰ ní, anī deē yā Nə́ɓā ədan na kə aw̄ kə igə yibə̄ ní kə əgan̄ kə̄rā dɔn tə́. Ba gotə nar ń a na̰y ní kə əsan̄neé yá̰a̰ kə ngánən gēé.

Elije i kem ɓē kə́ Sunem tə́

⁸ Ndɔ̄ kógə̄ḿ tə́ Elije mān̄ Sunem. Anī dəyá̰ kóməlō kógə̄ḿ kə́ ndi kem ɓē ní tə́ ɔsə seneé gar gar ta kaw̄ kəsa yá̰a̰ ɓē looneé. Əla gír ndɔ̄ ń noō tə́ ní, ré Elije mān̄ Sunem anī, a aw̄ i ɓē yā dəyá̰ ní tə́ kəsa yá̰á̰.

⁹ Dəyá̰ ní əda ngaan na: m̄-ger̄ kadə̄ dəngam ń a reē loojí ngándáńg ní i de kə́ táĺ yā Nə́ɓā.

¹⁰ Adə̄ majə kadə̄ jə-rāā ngōn̄ kújə́ dɔ kújə́ dúŕ dur yājí tə́ dɔɔ́, ba j-udə̄ tə̄rá ō, j-əndā tábəl ō, kōmbēré ō, lámba ō kemeé, kadə̄ ré reē ɓēé loojí anī, ndiń.

¹¹ Ndɔ̄ kógə̄ḿ tə́ Elije reē ɓēé loodə́ anī aw̄ to kem kújə́ kə́ dɔɔ́ ní tə́.

¹² Ni-mēr̄ nge kəla yān Geaji kadə̄ ɓāŕ dəyá̰ kə́ Sunem ní. Dan ń Geaji ɓāŕ dəyá̰ ní anī, ni-reē ra non tə́.

¹³ Elije əda nge kəla yān na kə əda dəyá̰ ní na a̰a̰ tápə̄ tām̄ yādə́ tə́ ngá̰ý ní ké i rí n kə n-rāā n-adə̄nən̄ wa. Kə n-ɔrə̄n̄ najə̄ kə mbangāá, aké kə ngol áskar gēé tām̄ yān tə́ wa. Dəyá̰ ní tūr̄ əda na n-ndi dan ngéén gə̄ tə́ majə karī.

¹⁴ Anī Elije tél dəje Geaji na ké i rí n kə n-rāān̄ tām̄ yā dəyá̰ ní tə́ tā wa. Anī Geaji əda na: Dəyá̰ ní ojə ngōnən aĺ ō, ngaan tɔgə ɓə́ga kɔ̄ɔ́ ō.

¹⁵ Elije əda Geaji na: Ī-ɓārə́n! Geaji ɓārə́n anī reē ra ta róbə́ kújə́ tə́.

¹⁶ Elije əda na: Kem ɓāl̄ kə́ gogə́ tə́, kə nāā kə́ beē ń a ə̄tō ngōn̄ kə́ dəngam jīí tə́. Dəyá̰ ní əda na: I beé alé, kɔ́ɔ̄ḿ, deē yā Nə́ɓā, ī-lōō kədam̄ mā nge kəla yāí kə́ dəyá̰ najə̄ kə́ sor̄.

¹⁷ Dəyá̰ ní ndān̄ ngōn̄ ba ojə kem ɓāl̄ kə́ kutə̄ gō tə́, kə nāā ń Elije ədanneé tə́ ní.

Elije ndól̄ ngōn̄ bəra mbān kə́ dəyá̰ kə́ koy

¹⁸ Ngōn̄ ní tɔgə. Ndɔ̄ kógə̄ḿ tə́ aw̄ gō bɔbə̄n tə́ rɔ̄ ngé kəja kōō gə̄ tə́,

¹⁹ ba əda bɔbə̄n na: Dɔḿ! Dɔḿ! Anī bɔbə̄n əda nge kəla yān kógə̄ḿ na: Aw̄ seneé ādə̄n kə kó̰o̰neé!

²⁰ Nge kəla ní unən aw̄ seneé adə̄n kə kó̰o̰neé. Ngōn̄ ní ndi nja kó̰o̰n tə́, ba dan ń mbang ugə̄ dan ɓēé anī ngōn̄ oy.

²¹ Kó̰o̰n aw̄ ənīn dɔ tə̄ráá kem kújə́ ń Elije a to tū tə́ ní tə́, utə̄ ta kújə dɔn tə́ ba teē.

²² Dəyá̰ ní ɓāŕ ngaan ba ədan na: Ɓɔ́, ādə̄ nge kəla kógə̄ḿ reē kə kó̰o̰ kərōó ādə̄ m-āwń láẃ ɓē deē yā Nə́ɓāá tə́ m̄-tél.

²³ Ngaan əda na: Ɓōólaā i ndɔ̄ nāā kə́ kijə aĺ ō, i ndɔ̄ sabat aĺ ō, ba i ba̰ý á ā āw̄ kə̄ ɓēé looneé ní? Dəyá̰ ní tél əda ngaan na: Ī-lōō sōl̄!

²⁴ Ni do̰ō̰ síŕdí gidə kó̰o̰ kərō tə́ ba əda nge kəla yān na kə əhɔ kərō kə ndɔ́rəń kanjə̄ dəba, bátə́ kadə̄ ré nəkɔ́ kə n-ədan tá.

²⁵ Dəyá̰ ní aw̄ kənge deē yā Nə́ɓā dɔ mbal̄ Karmel tə́. Dan ń deē yā Nə́ɓā a̰a̰n kə̄ sa̰y anī, əda nge kəla yān Geaji na: I Dəyá̰ yājí kə́ Sunem ní n a reē noó.

²⁶ Ā̰ȳ ngɔ̄də̄ ī-tə́nā tan, ba ī-dəjen ə́da na kə́ to ba̰ý wa, ké ngaan to karī ō, ngōn̄ to karī ō wa. Anī dəyá̰ ní tél ədan na n-ton̄ karī malang.

²⁷ Ba dan ń ugə̄ rɔ̄ deē yā Nə́ɓā tə́ dɔ mbalá anī, əhɔ njan. Geaji reē rɔ̄ dəyá̰ ní tə́ yā kəhɔn kə̄ gogə́, anī deē yā Nə́ɓā ədan na: Əya̰n tɔdɔ̄ rɔ̄n atə̄n. Ba yá̰á̰ ń rāā yá̰á̰ á rɔ̄n atə̄nneé ní Kɔ́ɔ̄ɓē mundə̄m̄ dɔ adə̄ m̄-ger̄ alé.

²⁸ Dəyá̰ ní əda na: Kɔ́ɔ̄ḿ, i mā n m̄-dəjeī ngōn̄ a? M-ə́daī na kə ī-lōō gólə̄m̄ aĺ a?

²⁹ Elije əda Geaji na: Ī-do̰ō̰ ɓōdīí ō, ī-taā kāgə̄ yāḿ jīí tə́ ō, ba āw̄. Ré ə́nge deē róbó anī, ī-lōō rāān lápə́ya ō, ré deē rāāí lápə́ya anī, ī-tūr̄ aĺ ō, ba āw̄ ə̄nī kāgə̄ yāḿ ta kum ngōn̄ ní tə́.

³⁰ Banī kó̰o̰ ngōn̄ ní əda na: Tītə̄ ń Kɔ́ɔ̄ɓē ndiń kə kumneé noō ō, ḭ̄ ī-ndiń kə kumií ō noó, m-ɔ̄r̄ rɔ̄ḿ rɔ̄í tə́ alé! Loo ń noō tə́ Elije ḭḭ dɔɔ́ un gō dəyá̰ ní.

³¹ Geaji aw̄ kété nodə́ tə́. Ni-ənī kāgə̄ ta kum ngōn̄ ní tə́, ba ngōn̄ sɔ̄ḿ aĺ ō, rāā rɔ̄n aĺ ō. Adə̄ Geaji tél dɔ tə́ tə́nī ta Elije ba ədan na: Ngōn̄ ní ndóĺ alé.

³² Elije reē ugə̄ ta kújə́ tə́ anī a̰a̰ nīń ngōn̄ to kem tə̄rá rɔ̄kum.

³³ Ni udə kújú gō ngōn̄ tə́, utə̄ ta kújə dɔn tə́ ba ndɔ̄ȳ Kɔ́ɔ̄ɓē.

³⁴ Gō tə́ anī laa dɔ ngōn̄ tə́ ba əndā tan ta yān tə́ ō, ə̄ndā kumən ta yān tə́ ō, əndā jīn dɔ yān tə́ ō. Dan ń ni laa dɔn tə́ tītə̄ ń noō ní a, rɔ̄ ngōn̄ əɓa təngā.

³⁵ Elije ḭḭ kɔ̄ɔ́ dɔ ngōn̄ tə́, njə̄rā kem kújú aw̄ ō, tél ō. Gō tə́ anī aĺ to dɔ ngōn̄ tə́ gogə́. Ngōn̄ ur ádəsó nja sīrí ba teē kumən.

³⁶ Elije ɓāŕ Geaji ba ədan na: Ī-ɓāŕ dəyá̰ kə́ Sunem ní ādə̄ reē. Geaji aw̄ ɓārə́n. Dan ń ni-reē ugə̄ anī, Elije ədan na: Ún ngōnīí āw̄ seneé.

³⁷ Ní reē əsō kə̄ nja Elije tə́, ɔsə non nang tə́. Gō tə́ anī un ngōnən ba teē aw̄.

Tá̰ kə́ dum̄ ka̰ȳ

³⁸ Elije tél aw̄ Gilgal. Dan ń noō tə́ ní ɓō əsō gō nang ngeé ń noō tə́. Ɓūtə̄ ngé koō ta gə̄ ndin̄ rɔ̄ Elije tə́, anī ni-əda nge kəla yān na: Ə̄ndā jóó kə́ bo horoó ī-nēgə́nń tá̰a̰ ādə̄ ngé koō ta gə̄.

³⁹ Ngé koō ta kógə̄ḿ aw̄ bembeé sāā mbī kámbə́ kə́ yā kəsa tə́, anī ənge yá̰á̰ kə́ to tītə̄ kal kosə́ kə́ ɗɔŕyo̰. Ni tə́jā kanə̄n adə̄ rosə kem kūbə̄ yān, aw̄ń ɓēé tə́jā ɓōkə́ kem jóó. Banī deē ger̄ yá̰á̰ ní alé.

⁴⁰ Dan ń ndīrə̄n̄ yá̰á̰ ní oy anī ɓōkə́n̄ kem kārāá adə̄n̄ de gə̄ kadə̄ əsan̄. Ba dan ń de gə̄ nāān̄ yá̰á̰ ní tadə́ tə́ anī, əgan̄ kɔŕ ədan̄ na: Deē yā Nə́ɓā, yá̰á̰ kə́ a tɔ̄l̄ deē i kem jóó! Adə̄ nin̄ asən̄ kəsa yá̰á̰ ní alé.

⁴¹ Deē yā Nə́ɓā əda na: Ī-reēī kə ndujú ādə̄mī! Ni ndégə̄ ndujə̄ ní ɓōkə́ kem jóó kum yá̰á̰ ní tə́, ba əda nge kəla yān na kə adə̄ de gə̄ kadə̄ əsan̄. Yá̰á̰ kə́ kem jóó ní tél to kəsa kɔ̄ɔ́.

Mápá kə́ sḛý beē asə ta de kə́ ngá̰ý gə̄

⁴² Deē kógə̄ḿ ḭḭ Baal Salisa, reē kə mápa kōō kə́ kijə adə̄ deē yā Nə́ɓā. Ni-reē kə mápa kōō ɔ́rjə kutə jōó ō, njár̄ kōō gémé kə́ kijə kem ngongoó ō. Elije əda nge kəla yān na kə nə̄ɓō de gə̄ kadə̄ əsan̄.

⁴³ Anī nge kəla yān tél ədan na ké loo kadə̄ n-adə̄ de gə̄ ɓú ké i ba̰ý wa. Elije tél ədan ɓáý to̰ na: Ī-nə̄ɓō de gə̄ ādə̄ əsan̄, tɔdɔ̄ Kɔ́ɔ̄ɓē əda na: de gə̄ a əsan̄ ba gotən a teē.

⁴⁴ Nge kəla ní nə̄ɓō yá̰á̰ ní ta kum de gə̄ tə́. De gə̄ əsan̄ ba gotə teē tītə̄ ń Kɔ́ɔ̄ɓē ədań ní.