2 MBAN̄G 21 - Bibəl ta Sar̄

Manase mban̄g kə́ Juda

¹ Dan ń Manase əlań gír ndi mban̄g ní ɓālə̄n i kutə gidə i jōó. Ni-o̰o̰ ɓē ɓāl̄ kutə mí gidə i mí kem ɓē kə́ Jerusalem tə́. Rī kó̰on na i Hepsi Ba.

² Ni-rāā yá̰á̰ kə́ majaĺ ta kum Kɔ́ɔ̄ɓē tə́. Ndájə̄ yá̰á̰ kə́ majaĺ ngá̰ý gə̄ yā nápar de gə̄ ń Kɔ́ɔ̄ɓē tə̄ɓādə́ kɔ̄ɔ́ no ngán Israel gə̄ tə́ ní.

³ Ni-tél rāā loo ndɔ̄ȳ gə̄ ń bɔbə̄n Ejekias nujəń kɔ̄ɔ́ ní gogə́. Ni-rāā loo tun̄ yá̰a̰ gə̄ adə̄ ɓesə̄ Baal ō, udə kāgə̄ ɓesə̄ kə́ yā ɓōĺ gidə kógə̄ḿ tītə̄ ń Akab mban̄g kə́ Israel rāań ní ō. Ni-ɔsə non nang tə́ no tə́yō̰ gə̄ malang kə́ dɔ rā̰ tə́ ō, rāā kəla adə̄də́ ō.

⁴ Ni-rāā loo tun̄ yá̰a̰ gə̄ kem kújə yā Kɔ́ɔ̄ɓē ń Kɔ́ɔ̄ɓē nəkɔ́ əda na n-a n-əndā rīn dɔ tə́ kem ɓē kə́ Jerusalem tə́ ní.

⁵ Ni-rāā loo tun̄ yá̰a̰ gə̄ kə́ yā tunə̄ń yá̰a̰ kadə̄ tə́yō̰ gə̄ malang kə́ dɔ rā̰ tə́ ndágə loo kə́ gīr̄ gidə kújə yā Kɔ́ɔ̄ɓē kə́ jōó gə̄ kə́ ta kújə yā Kɔ́ɔ̄ɓē tə́.

⁶ Róō ngōnən kə́ dəngam horoó adə̄ ɓesə̄ ō, rāā kəga kə́ tayā tayā gə̄ ō, aw̄ ndḛḛ̄ sāá rɔ̄ kɔdə̄ sāā gə̄ tə́ ō. To dan rāā yá̰á̰ kə́ majaĺ ta kum Kɔ́ɔ̄ɓē tə́ kə̄ non tə́ adə̄ń Kɔ́ɔ̄ɓē wōn̄g.

⁷ Rāā ɓesə̄ Asera aw̄ń əndā kem kújə́ ń Kɔ́ɔ̄ɓē əda Dabid ō, ngōnən Salomo̰ ō, najə̄n kété na n-a n-əndā rīn dɔ tə́ ō, dɔ ɓē kə́ Jerusalem ń n-gə̄rā dan gír ɓē gə̄ malang kə́ Israel tə́ ō, kadə̄ to ngándáńg ní.

⁸ Ré na ngán Israel gə̄ rāān̄ yá̰a̰ malang ń n-ə́dádə́ kadə̄ rāān̄ ní ō, ngɔ̄mə̄n̄ ndū najə̄ gə̄ malang ń nge kəla yān Moijə ədadə́ ní ō anī, n-a n-rāā kadə̄ dáȳn̄ sa̰y rɔ̄ ɓē ń n-ādə̄ kaadə́ gə̄ ní tə́ alé.

⁹ Banī nin̄ oōn̄ ndūn alé. Manase sə̄lādə́ adə̄ rāān̄ háĺ kə́ majaĺ tɔȳ yā nápar de gə̄ ń Kɔ́ɔ̄ɓē tɔ̄l̄də́ kɔ̄ɔ́ malang ba əya̰ń loo adə̄ ngán Israel gə̄ ní.

¹⁰ Tā anī Kɔ́ɔ̄ɓē əndā najə̄ ta ngé kəla yān gə̄ ń i nge koō ta gə̄ ní tə́ adə̄ ədan̄ na:

¹¹ Manase, mban̄g kə́ Juda rāā yá̰á̰ kə́ majaĺ ngá̰ý gə̄ ń noō malang. Ni-rāā yá̰á̰ kə́ majaĺ tɔȳ yā Amor gə̄ ń rāān̄ kété non tə́ malang ní ō, sə̄lā de kə́ Juda gə̄ adə̄ rāān̄ majaĺ kə ta kūl̄ ɓesə̄ yān gə̄ ō.

¹² Tām̄ najə̄ ń noō tə́ ní, yá̰á̰ ń Kɔ́ɔ̄ɓē Nə́ɓā yā Israel əda ní n toó: M-ā m̄-reē kə yá̰á̰ kə́ to kum kaȳ aĺ kógə̄ḿ kə́ kadə̄ deē oō anī, ɓār̄ mbīn tə́ majə alé dɔ ɓē kə́ Jerusalem tə́ ō, dɔ de kə́ Juda gə̄ tə́ malang ō.

¹³ M-ā m̄-nujə ɓē kə́ Jerusalem tītə̄ ń m̄-nujəń ɓē kə́ Samari ō, de gə̄ kə́ gír kojə yā Akab tə́ ō ní. M-ā m̄-tə́go kem ɓē kə́ Jerusalem tītə̄ ń deē a tə́goń səmbē ba sébə kemən nang tə́ ní.

¹⁴ Gotə deē yāḿ gə̄ ń teēn̄ ta yo tə́ ní m-ā ə́yá̰də́ kɔ̄ɔ́. M-ā m-ə́ládə́ kem jī madə̄ ba̰ā̰də́ gə̄ tə́ kadə̄ əhɔn̄də́ aw̄n̄ sedə́ ō, ɔyn̄ yá̰a̰ kənge kə́ kem ɓē yādə́ gə̄ tə́ malang ō.

¹⁵ M-ā m̄-rāā yá̰a̰ tītə̄ ń noō tɔdɔ̄ əla gír ndɔ̄ ń kaadə́ gə̄ teēn̄neé kɔ̄ɔ́ kem ɓē kə́ Ejiptə tə́ bátə́ ɓōólaā ní, asə deē yāḿ gə̄ rāā yá̰á̰ kə́ majaĺ ta kumḿ tə́ aĺ ō, asədə́ kadə̄m̄ wōn̄g aĺ ō.

¹⁶ Mban̄g Manase tɔ̄l̄ de kə́ kanjə̄ najə̄ dɔdə́ tə́ gə̄ i ngá̰ý, adə̄ mósə taā loo kem ɓē kə́ Jerusalem tə́ malang. Majaĺ ń noō əsō dɔ majaĺ ń ni sə̄lā de kə́ Juda gə̄ adə̄ rāān̄ ní tə́. Ni sə̄lādə́ adə̄ rāān̄ yá̰á̰ kə́ majaĺ ta kum Kɔ́ɔ̄ɓē tə́.

¹⁷ Gotə yá̰á̰ kə́ rang gə̄ ń Manase rāā ní, ndangən̄ kem makətūbə̄ kəla rāā mban̄g gə̄ kə́ Juda tə́. Ənīn̄ gotə yá̰a̰ malang ń ni-rāā ní ō, gotə majaĺ ń ni-rāā ní ō kemeé.

¹⁸ Dan ń Manase oy ní, dubə̄nən̄ i kem ndɔrɔ́ gidə kújə yān tə́. A ɓārə́n̄ loo ní na i ndɔr̄ yā Uja. I ngōnən Amon n o̰o̰ ɓē gotən tə́ ní.

Amon mban̄g kə́ Juda

¹⁹ Dan ń Amon əla gírndi mban̄g ní ɓālə̄n i kutə jōó gidə i jōó. Ni-o̰o̰ ɓē ɓāl̄ jōó kem ɓē kə́ Jerusalem tə́. Rī kó̰o̰n na i Mesulemet, i ngōn̄ Harus kə́ Yotəba.

²⁰ Ni-rāā yá̰á̰ kə́ majaĺ ta kum Kɔ́ɔ̄ɓē tə́ tītə̄ yā bɔbə̄n Manase.

²¹ Ndájə̄ kəla rāā bɔbə̄n. Rāā kəla adə̄ ɓesə̄ gə̄ ń bɔbə̄n rāā kəla adə̄də́ ní ō, ɔsə non nang tə́ nodə́ tə́ ō.

²² Ə́yá̰ Kɔ́ɔ̄ɓē ń i Nə́ɓā yā kaan gə̄ ní kɔ̄ɔ́, un gō róbə yān alé.

²³ Ngé kəla yā Amon gə̄ oōn̄ naā dɔn tə́ ba tɔ̄l̄nən̄ kem kújə yān tə́.

²⁴ Banī de kə́ gō nang kə́ Juda tə́ gə̄ tɔ̄lə̄n̄ de gə̄ malang ń oōn̄ naā dɔ mban̄g Amon tə́ ní, ba əndān̄ ngōnən Josias mban̄g gotən tə́.

²⁵ Gotə yá̰á̰ kə́ rang gə̄ ń Amon rāā ní, ndangən̄ kem makətūbə̄ kəla rāā mban̄g gə̄ kə́ Juda tə́.

²⁶ Dubə̄nən̄ i kem bāá ɓádə yān tə́ kem ndɔr̄ yā Uja tə́. Ngōnən Josias o̰o̰ ɓē gotən tə́.