2 MBAN̄G 16 - Bibəl ta Sar̄

Akaj mban̄g kə́ Juda

¹ Kem ɓāl̄ ko̰o̰ ɓē kə́ nge ko̰ kutə gidə i sīrí yā Peka ngōn̄ Remalia tə́ ní, Akaj ngōn̄ Yotam mban̄g kə́ Juda ndi mban̄g.

² Dan ń Akaj əla gírndi mban̄g ní ɓālə̄n i kutə jōó. Ni o̰o̰ ɓē ɓāl̄ kutə gidə i mehḛ́ kem ɓē kə́ Jerusalem tə́. Ni rāā yá̰á̰ kə́ gōtə́ ta kum Kɔ́ɔ̄ɓē Nə́ɓā yān tə́ tītə̄ yā kaan Dabid alé,

³ banī ni ndájə̄ i kəla rāā mban̄g gə̄ kə́ Israel tə́. Ndējə̄ ngōnən adə̄ róōn horó kə gō yá̰a̰ kāgə̄ ɓē yā nápar de gə̄ ń Kɔ́ɔ̄ɓē tə̄ɓādə́ kɔ̄ɔ́ no ngán Israel gə̄ tə́ ní gə̄gē.

⁴ Tun̄ yá̰a̰ ō, róō ndujə̄ yá̰á̰ kə́ kotə majə ō, dɔ loo ndɔ̄ȳ gə̄ tə́ ō, dɔ ngán mbal̄ gə̄ tə́ ō, gír kāgə̄ gə̄ kə́ mbīdə́ i ngá̰ý gə̄ tə́ ō.

⁵ Tā anī Resin mban̄g kə́ Aram ō, Peka ngōn̄ Remalia ń i mban̄g kə́ Israel tə́ ní ō, reēn̄ yā rɔ̄ɔ̄ ɓē kə́ Jerusalem. Nin̄ gīrə̄n̄ Akaj banī asən̄ kənīn rɔ̄ɔ̄ alé.

⁶ Dan ngeé ń noō tə́ ní Resin, mban̄g kə́ Aram, tə̄ɓā Juda gə̄ kɔ̄ɔ́ kem ɓē kə́ Elat tə́, ba téləń adə̄ Edom gə̄, adə̄ Edom gə̄ tél reē ndin̄ gogə́ kem ɓē kə́ Elat tə́. Nin̄ ndin̄ noó bátə́ ɓōólaā.

⁷ Akaj əla əda Tigəlatə Pileser mban̄g kə́ Asiri na: Mā i nge kəla yāí ō, ngōnīí ō. Ī-reē ī-taām̄ jī mban̄g kə́ Aram tə́ ō, mban̄g kə́ Israel tə́ ō, tɔdɔ̄ nin̄ ḭḭn̄ seḿ kə rɔ̄ɔ́.

⁸ Akaj ɔy lɔ́r ō, arjā̰a̰ ō, kə́ kem kújə yā Kɔ́ɔ̄ɓē tə́ ō, kə́ loo ngɔ̄m̄ nar yā mban̄g tə́ ō, əlań adə̄ mban̄g kə́ Asiri kadə̄ karī tə́.

⁹ Mban̄g kə́ Asiri rāā yá̰á̰ ń Akaj dəjen ní, aw̄ ənī ɓē kə́ Damas rɔ̄ɔ̄. Ni-taā ɓē ba ɔy de kə́ kemeé gə̄ aw̄ sedə́ Kir ō, tɔ̄l̄ Resin ō.

¹⁰ Mban̄g Akaj aw̄ Damas kənge Tigəlatə Pileser mban̄g kə́ Asiri tə́. Ni-a̰a̰ loo tun̄ yá̰á̰ kə́ Damas anī, rāā ngōn̄ loo tun̄ yá̰á̰ ní kə́ dūú əlań adə̄ Uria nge tun̄ yá̰a̰ kem ɓē kə́ Jerusalem tə́ ō, ɔjə loo rāān ō, kadə̄ Uria rāā loo tun̄ yá̰á̰ kə́ teēn̄ naā kə nge kə́ Damas jéjé.

¹¹ Uria nge tun̄ yá̰a̰ rāā loo tun̄ yá̰á̰ kə́ teēn̄ naā kə nge ń mban̄g Akaj ndi Damas rāā əlań adə̄n ō, ɔjə loo rāān ō ní. Ni-rāā oy pá tá kadə̄ mban̄g Akaj tél Damas reē ugə̄ ɓáý.

¹² Dan ń mban̄g tél Damas anī a̰a̰ loo tun̄ yá̰á̰ ní. Ni ndɔ́tə̄ kə̄ rɔ̄ tə́,

¹³ ba nəkɔ́ tun̄ yá̰á̰ kə́ yā róō horó dɔ tə́ ō, ndējə̄ ndujə̄ dɔ tə́ ō, tə́te kasə nduú dɔ tə́ ō, tun̄ yá̰a̰ gə̄ kə́ tām̄ yā kem kógə̄ḿ tə́, ba sə̄kā mósə́də́ dɔ tə́ ō.

¹⁴ Gō tə́ anī ndɔ́tə̄ kə loo tun̄ yá̰á̰ kə́ rāā kə gində̄ nə̄ngá kasaá ń ra no Kɔ́ɔ̄ɓē tə́ ní kɔ̄ɔ́. Kété ní loo tun̄ yá̰á̰ ní ra i ta róbə́ kújə́ tə́, dɔ dán loo tun̄ yá̰á̰ kə́ kijə tə́ kə kújə yā Kɔ́ɔ̄ɓēé tə́. Ba ni ndɔ́təń aw̄ əndā gidə loo tun̄ yá̰á̰ kə́ kijə tə́, dām̄ mbɔ́r ɓē kə́ ko̰ó̰ tə́.

¹⁵ Gō tə́ anī mban̄g Akaj əda Uria nge tun̄ yá̰a̰ na ngɔlaā na a tun̄ yá̰a̰ na i dɔ loo tun̄ yá̰á̰ kə́ bo tə́. Na a tun̄ yá̰á̰ kə́ yā róō horoó kə́ dəloí ō, ndujə̄ kə́ ndējə̄ loo sɔlí ō, yá̰a̰ tun̄ yā mban̄g kə́ yā róō horoó ō, ndujə̄ kə́ dɔ tə́ ō, yá̰a̰ tun̄ yā Juda gə̄ kə́ yā róō horoó ō, ndujə̄ kə́ dɔ tə́ ō, kasə nduú kə́ dɔ tə́ ō, na i dɔ tə́. Ni a ɓōkə́ mósə dā̰ kə́ tɔ̄l̄ yā tun̄ gə̄ na i dɔ loo tun̄ yá̰á̰ kə́ bo ní tə́ ō. Ba loo tun̄ yá̰á̰ kə́ rāā kə gində̄ nə̄ngá kasaá ní tá nəkɔ́ n-a n-əda najə̄ kə́ dɔ tə́ ɓáý.

¹⁶ Uria nge tun̄ yá̰a̰ rāā yá̰a̰ malang ń mban̄g Akaj mērən rāā ní.

¹⁷ Mban̄g Akaj gán̄g kə̄ngā púsə gə̄ kə́ kem kújə yā Kɔ́ɔ̄ɓē tə́ ń rāān̄ i kə gində̄ nə̄ngá kasaá ní ō, ɔy səmbē kə́ rúu gə̄ ń tə́ndān̄ ta púsə gə̄ tə́ ní kɔ̄ɔ́ ō. Ni un bay kə́ bo kə́ gōr̄ ń ndi dɔ man̄g gində̄ nə̄ngá kasə kə́ kutə gidə i jōó gə̄ tə́ ní kɔ̄ɔ́, ba əndā nang tə́ dɔ mbal̄ gə̄ kə́ kɔsə̄ nang tə́ tə́.

¹⁸ Ta tɔ̄l̄ ta anī utə̄ ta kújə́ kə́ ta róbə́ tə́ kə́ tū kújə yā Kɔ́ɔ̄ɓē tə́ ń a ɓārə́n̄ na i kújə́ kə́ ta róbə́ tə́ kə́ ndɔ̄ sabat tə́ ní kɔ̄ɔ́ ō, utə̄ ta róbə́ kə́ ndágá ń a ɓārə́n̄ na i ta róbə kudə mban̄g ní kɔ̄ɔ́ ō, kadə̄ nel̄ mban̄g kə́ Asiri.

¹⁹ Gotə yá̰á̰ kə́ rang gə̄ malang ń Akaj rāā ní, ndangən̄ kem makətūbə̄ kəla rāā mban̄g gə̄ kə́ Juda tə́.

²⁰ Dan ń Akaj oy ní dubə̄nən̄ i kem bāá ɓádə yā kaan gə̄ tə́ kem ɓē yā Dabid tə́. I ngōnən Ejekias n o̰o̰ ɓē gotən tə́ ní.