2 MBAN̄G 13 - Bibəl ta Sar̄

Joakajə, mban̄g kə́ Israel

¹ Kem ɓāl̄ ko̰o̰ ɓē kə́ nge ko̰ kutə jōó gidə i mətá yā Joas ngōn̄ Akajias mban̄g kə́ Juda tə́ ní, Joakajə ngōn̄ Yehu ndi mban̄g Israel tə́. Ni-o̰o̰ ɓē ɓāl̄ kutə gidə i sīrí kem ɓē kə́ Samari tə́.

² Ni-rāā yá̰á̰ kə́ majaĺ ta kum Kɔ́ɔ̄ɓē tə́. Ndájə̄ yá̰á̰ kə́ majaĺ gə̄ ń Jeroboam ngōn̄ Nebat sə̄lā ngán Israel gə̄ adə̄ rāān̄ ní. Ni-lōō gír rāā yá̰á̰ kə́ majaĺ gə̄ ní tə́ alé.

³ Loo ń noō tə́ wōn̄g rāā Kɔ́ɔ̄ɓē kə Israel gēé adə̄ ni əladə́ kem jī Hajael mban̄g kə́ Aram tə́ ō, Ben Hadad ngōn̄ Hajael tə́ ō, dan oy tām̄.

⁴ Banī Joakajə rāā Kɔ́ɔ̄ɓē ɓɔ́ kadə̄ wōn̄g yān tetə. Kɔ́ɔ̄ɓē oō ndūn, tɔdɔ̄ a̰a̰ ko̰y ń mban̄g kə́ Aram ənda Israel gə̄ tū tə́ ní,

⁵ adə̄ ni-adə̄ Israel gə̄ deē kógə̄ḿ kə́ nge kajədə́. Loo ń noō tə́ nin̄ əngen̄ dɔdə́ jī Aram gə̄ tə́ ō, ndin̄ lápə́ya tītə̄ kə́ kété ō.

⁶ Ɓá tā ba nin̄ lōōn̄ gíŕ yá̰á̰ kə́ majaĺ gə̄ ń Jeroboam nin̄ kə de kə́ gír kojə yān tə́ gə̄ sə̄lān̄ Israel gə̄ adə̄ rāān̄ ní tə́ alé. Nin̄ ton̄ dan rāā adə̄ i tītə̄ ń toō n ɓesə̄ Asera gə̄gē a rań dɔɔ́ kem ɓē kə́ Samari tə́ ɓáý ní.

⁷ Ngé rɔ̄ɔ̄ gə̄ ń əya̰n̄də́ adə̄n̄ Joakajə ní, ngé kal̄ sə́nda gə̄ i kutə mí ō, púsə rɔ̄ɔ̄ gə̄ i kutə kógə̄ḿ ō, ngé rɔ̄ɔ̄ kə́ ngé njə̄rā kə njadə́ gə̄ i dūbú kutə kógə̄ḿ ō ngóy. Tɔdɔ̄ mban̄g kə́ Aram tɔ̄l̄ gotə gə̄ ngá̰ý kɔ̄ɔ́. Ni rāādə́ i bumbə́ru nja de gə̄ tə́.

⁸ Gotə yá̰á̰ kə́ rang gə̄ ń Joakajə rāā ní, ndangən̄ kem makətūbə̄ kəla rāā mban̄g gə̄ kə́ Israel tə́. Ənan̄ gotə yá̰a̰ malang ń ni-rāā ní ō, gotə yá̰á̰ kə́ to kɔsə gɔn gə̄ ń ni-rāā ní ō kemeé.

⁹ Joakajə oy aw̄ gō kaan gə̄ tə́ ō, dubə̄nən̄ i Samari ō. I ngōnən Joas n o̰o̰ ɓē gotən tə́ ní.

Joas mban̄g kə́ Israel

¹⁰ Kem ɓāl̄ ko̰o̰ ɓē kə́ nge ko̰ kutə mətá gidə i sīrí, yā Joas mban̄g kə́ Juda tə́ ní, Joas ngōn̄ Joakajə ndi mban̄g Israel tə́. Ni-o̰o̰ ɓē ɓāl̄ kutə gidə i mehḛ́ kem ɓē kə́ Samari tə́.

¹¹ Ni-rāā yá̰á̰ kə́ majaĺ ta kum Kɔ́ɔ̄ɓē tə́. Ni-lōō gír yá̰á̰ kə́ majaĺ gə̄ ń Jeroboam ngōn̄ Nebat sə̄lā Israel gə̄ adə̄ rāān̄ ní tə́ alé. Ni na̰y kə̄ loo rāā tə́.

¹² Gotə yá̰á̰ kə́ rang gə̄ ń Joas rāā ní, ndangən̄ kem makətūbə̄ kəla rāā mban̄g gə̄ kə́ Israel tə́. Ənīn̄ gotə yá̰a̰ malang ń ni-rāā ní ō, yá̰á̰ kə́ to kɔsə gɔn gə̄ ń ni-rāā ní ō, rɔ̄ɔ̄ ń ni ni rɔ̄ɔ̄ Amasia mban̄g kə́ Juda ní ō kemeé.

¹³ Joas oy aw̄ gō kaan gə̄ tə́. Dubə̄nən̄ i Samari kem bāá ɓádə yā mban̄g gə̄ kə́ Israel tə́. I Jeroboam n ndi mban̄g gotən tə́ ní.

Elije əda na a tetən̄ Aram gə̄ rɔ̄ɔ̄

¹⁴ Elije əsō mo̰y. I mo̰y ń a tɔ̄lən ní. Anī Joas mban̄g kə́ Israel aw̄ rɔ̄n tə́, əga kumən kə̄ ta yān tə́ nōoń ba əda na: Bɔbə́ḿ! Bɔbə́ḿ! Púsə rɔ̄ɔ̄ gə̄ kə ngé kal̄ sə́ndá kə́ Israel tə́ gə̄.

¹⁵ Elije ədan na kə un ga̰ gərā ō, ɔy kum gərā gə̄ ō. Anī Joas un ga̰ gərā ō, ɔy gərā gə̄ ō.

¹⁶ Elije əda mban̄g kə́ Israel na kə əndā gərā tū kəlā ga̰ gərā tə́ ba kə ɔr gō kəlā ní kadə̄ ga̰ gərā bəndā. Anī mban̄g əndā gərā tū kəlā ga̰ gərā tə́ ba ɔr gō kəlā ní adə̄ ga̰ gərā bəndā. Elije əndā jīn dɔ yā mban̄g tə́,

¹⁷ ba ədan na kə teē ta ko̰rō̰ kújə́ kə́ dām̄ kə́ gír ɓē tə́. Joas teē ta ko̰rō̰ kújə́ ní. Anī Elije ədan na kə ur kum gərā ní. Joas ur gərā ní anī Elije əda na nge ń noō i kum gərā tetə rɔ̄ɔ̄ yā Kɔ́ɔ̄ɓē, gərā kə́ tām̄ yā Aram gə̄ ń tetən̄də́ rɔ̄ɔ̄ tə́ ní n noó. Ā ī-tetə Aram gə̄ rɔ̄ɔ̄ Apek ō, ā ī-tɔ̄l̄də́ kɔ̄ɔ́ malang ō.

¹⁸ Gō tə́ anī Elije əda Joas na kə ɔy kum gərā kə́ rang gə̄. Mban̄g kə́ Israel ɔydə́. Anī Elije ədan na kə ənda dɔ nang. Ni ənda dɔ nang nja mətá anī dəba.

¹⁹ Loo ń noō tə́ wōn̄g rāā deē yā Nə́ɓā seneé adə̄ ədan na: Nə́ngē tə́ gēé ə́nda dɔ nang nja i mí aláa i mehḛ́ n toó ní a, ā ī-tetə Aram gə̄ rɔ̄ɔ̄ ō, ā ī-tɔ̄l̄də́ malang kɔ̄ɔ́ ō. Ba ń toō ní a, ā ī-tetədə́ rɔ̄ɔ̄ i nja mətá beē ngóy.

²⁰ Elije oy adə̄ dubə̄nən̄. Kə dɔ ɓāl̄ gə̄ ń a ndɔ̄ noó, ɓūtə̄ Moab gə̄ kə́ ngé ɓogə gə̄ a reēn̄ i dɔ nang kə́ Israel tə́ dejə.

²¹ Ndɔ̄ kógə̄ḿ tə́ anī de kə́ ngé kaw̄ dubə̄ yoó gə̄ a̰a̰n̄ dɔ ɓūtə̄ ngé ɓogə gə̄ ní sa̰y loo reē tə́. Anī ənīn̄ nīń deē ń a aw̄n̄ kə dūbūú ní kem bāá ɓádə́ ń dubə̄n̄ Elije tū tə́ ní tə́, ba ɔtə a̰ȳn̄ naā. Dan ń nīń deē ní ɔdə kə̄ngā Elije anī ndól̄ ba ḭḭ ra dɔɔ́.

²² Hajael mban̄g kə́ Aram rāā kum Israel gə̄ ndoō tə́ kə dɔ ndɔ̄ gə̄ malang ń Joakajə ndiń kə kumneé tə́ ní.

²³ Banī ta tɔ̄l̄ ta anī Kɔ́ɔ̄ɓē a̰a̰ kum tō ndoō yādə́. Ni mā̰ȳ rɔ̄n dɔdə́ tə́ sɔɔ̄ń madə̄ naā ń ni-əhɔ kə Abəraham ō, Isaak ō, Jakob ō ní tə́. Adə̄ ni-lōō gír tɔ̄l̄də́ malang kɔ̄ɔ́ tə́. Jóo nəkɔ́ ń toō ní, ni-ɔr̄də́ sa̰y kɔ̄ɔ́ rɔ̄n tə́ alé.

²⁴ Dan ń Hajael mban̄g kə́ Aram oy kɔ̄ɔ́ ní, i ngōnən Ben Hadad n o̰o̰ ɓē gotən tə́ ní.

²⁵ Joas kə́ ngōn̄ Joakajə tél taā ɓē gə̄ ń Hajael táā jī bɔbə̄n Joakajə tə́ dan ń a rɔ̄ɔń bɔbə̄n tə́ ní jī Ben Hadad ngōn̄ Hajael tə́. Joas tetə Ben Hadad rɔ̄ɔ̄ nja mətá. Ni-tél taā ɓē gə̄ kə́ Israel tə́ gogə́.