2 MBAN̄G 12 - Bibəl ta Sar̄

Joas mban̄g kə́ Juda

¹ Dan ń əndān̄ Joas mban̄g ní ɓālə̄n i sīrí.

² I kem ɓāl̄ ko̰o̰ ɓē kə́ nge ko̰ sīrí yā Yehu tə́ ń əndān̄neé Joas mban̄g ní. Ni-o̰o̰ ɓē ɓāl̄ kutə sɔ́ Jerusalem. Rī kó̰o̰n na i Sibia, i dəyá̰ kə́ Beer Seba.

³ Joas rāā yá̰á̰ kə́ gōtə́ ta kum Kɔ́ɔ̄ɓē tə́ kə dɔ ndɔ̄ gə̄ malang ń ni ndiń kə kumneé ní, tɔdɔ̄ Yoyada nge tun̄ yá̰a̰ ndóōn yá̰a̰.

⁴ Ɓá tā ba ni-rāā adə̄ loo ndɔ̄ȳ gə̄ gətóon̄ kem ɓēé alé. Adə̄ de gə̄ na̰yn̄ kə̄ loo ndējə̄ yá̰á̰ kə́ tun̄ gə̄ tə́ ō, kə̄ loo róō ndujə̄ yá̰á̰ kə́ kotə majə gə̄ tə́ ō, dɔ loo ndɔ̄ȳ kə́ kḭḭ kə̄ dɔɔ́ gə̄ tə́.

Joas mēr̄ rāā kújə yā Kɔ́ɔ̄ɓē kə́ nujə

⁵ Ndɔ̄ kógə̄ḿ tə́ anī Joas əda ngé tun̄ yá̰a̰ gə̄ na kə taān̄ nar kə́ kɔr̄ tām̄ yā Kɔ́ɔ̄ɓē tə́ gə̄ malang ń de gə̄ reēn̄neé kem kújə yā Kɔ́ɔ̄ɓē tə́ ní ō, nar ń de gə̄ a əsan̄ kem ɓēé á adə̄n̄ yā gāngəń dɔ rɔ̄də́ ní ō, nar malang ń de gə̄ reēn̄neé kógə̄ḿ kógə̄ḿ kə dɔdə́ gēé kem kújə yā Kɔ́ɔ̄ɓē tə́ kə gō kem ndaa yādə́ ní ō,

⁶ kə nin̄ kógə̄ḿ kógə̄ḿ kə taān̄ jī de gə̄ ń nin̄ gerə̄n̄də́ ní tə́ tām̄ yādə́ tə́ ba loo malang kə́ tū kújə yā Kɔ́ɔ̄ɓē tə́ ń nujə ní tá kə rāān̄.

⁷ Banī ɓāl̄ ko̰o̰ ɓē kə́ nge ko̰ kutə gidə i mətá yā Joas tə́ ní, ngé tun̄ yá̰a̰ gə̄ rāān̄ loo kə́ nujə gə̄ kə́ tū kújə yā Kɔ́ɔ̄ɓē tə́ aĺ ɓáý.

⁸ Tā anī mban̄g Joas ɓāŕ Yoyada nge tun̄ yá̰a̰ ō, ngé tun̄ yá̰á̰ kə́ rang gə̄ ō, ba dəjedə́ na ké i tām̄ rí tə́ áké rāān̄ loo kə́ nujə gə̄ kə́ tū kújə yā Kɔ́ɔ̄ɓē tə́ aĺ wa. Əla gír ngɔlaā ní ā ī-taāī nar kə́ jī de gə̄ ń ī-gerīdə́ ní tə́ to̰ alé, tɔdɔ̄ i kadə̄ ādī tām̄ yā kújə yā Kɔ́ɔ̄ɓē kə́ nujə tə́.

⁹ Ngé tun̄ yá̰a̰ gə̄ ndigən̄ táā nar jī de gə̄ tə́ to̰ aĺ ō, ndigən̄ kadə̄ kəla rāā loo kújə yā Kɔ́ɔ̄ɓē kə́ nujə gə̄ i tū tə́ to̰ aĺ ō.

¹⁰ Yoyada nge tun̄ yá̰a̰ un sandúkə kógə̄ḿ, rāā bəlo tū yá̰a̰ tan tə́, ba əndā kadə loo tun̄ yá̰á̰ tə́. Ré deē a udə kə̄ kem kújə yā Kɔ́ɔ̄ɓē tə́ anī sandúkə ní ndi i dām̄ jī kə́ ko̰ó̰ tə́. Nar malang ń de gə̄ a reēn̄neé kem kújə yā Kɔ́ɔ̄ɓē tə́ ní, ngé tun̄ yá̰á̰ kə́ ngé ngɔ̄m̄ ta róbə́ kújə gə̄ a ɓōkə́n̄ i kemeé.

¹¹ Dan ń a̰a̰n̄ kadə̄ nar ní i ngá̰ý kem sandúkú anī, adə̄n̄ nge ndang makətūbə̄ yā mban̄g ō, ngol ngé tun̄ yá̰a̰ gə̄ ō, reē ɔy tə́dan̄.

¹² Ré tə́dan̄ ɔy anī télə̄nneé adə̄n̄ de gə̄ ń əndān̄də́ dɔ kəla kújə yā Kɔ́ɔ̄ɓē tə́ ní, kadə̄ əgān̄neé ngé rāā kəla gə̄ kə́ tū kújə yā Kɔ́ɔ̄ɓē gə̄, adə̄ i ngé kəja kāgə̄ gə̄ ō,

¹³ ngé kəndā kújə gə̄ ō, ngé tə́gā mbal̄ gə̄ ō, kadə̄ mangən̄neé kāgə̄ gə̄ kə mbal̄ kə́ tə́gā kadə gə̄, yā rāań loo kə́ nujə gə̄ kə́ tū kújə yā Kɔ́ɔ̄ɓē tə́ ō, adə̄ i tām̄ yā kəla malang kə́ tū kújə yā Kɔ́ɔ̄ɓē tə́ kə́ yā rāā kə naraá tə́.

¹⁴ Ɓá tā ba kadə̄ karī gə̄ ń de gə̄ reēn̄neé kem kújə yā Kɔ́ɔ̄ɓē tə́ ní, rāān̄neé səmbē kə́ lú gə̄ kə́ rāā kə gində̄ arjā̰a̰ aĺ ō, kəyā gə̄ aĺ ō, kópə gə̄ aĺ ō, bərúnjə gə̄ aĺ ō, ngáń gájə́ yá̰a̰ rāā kəla gə̄ kə́ rāā kə lɔ́rɔ́ aĺ ō, kə arjā̰a̰á̰ aĺ ō, tām̄ yā kújə yā Kɔ́ɔ̄ɓē tə́.

¹⁵ Télən̄neé malang adə̄n̄ i de gə̄ ń əndān̄də́ dɔ kəla kújə yā Kɔ́ɔ̄ɓē tə́ ní adə̄ nin̄ rāān̄neé i kəla gə̄ kə́ tū tə́.

¹⁶ De gə̄ ń adə̄n̄də́ nar ngeé ń toō kadə̄ əgān̄neé ngé rāā kəla gə̄ ní, dəjen̄də́ kadə̄ ɔjən̄də́ gír yá̰a̰ gə̄ ń rāān̄ kə nar ní alé. Tɔdɔ̄ nin̄ rāān̄ yá̰a̰ i kə gōó.

¹⁷ Banī nar ń de kə́rēý gə̄ adə̄n̄ kum gotə yá̰a̰ tun̄ kə́ tām̄ yā majaĺ tə́ ní, ɓōkə́n̄ kem sandúkú alé, télə̄n̄neé adə̄n̄ i ngé tun̄ yá̰a̰ gə̄.

Gír ko̰o̰ ɓē yā Joas gān̄g

¹⁸ Dan ngeé ń noō tə́ ní Hajael, mban̄g kə́ Aram, reē ənī ɓē kə́ Gat rɔ̄ɔ̄. Dan ń taā ɓē kə́ Gat oy anī, gḛy kaw̄ rɔ̄ɔ̄ ɓē kə́ Jerusalem.

¹⁹ Loo ń noō tə́ Joas mban̄g kə́ Juda, ɔy yá̰a̰ gə̄ ń mban̄g kə́ Juda kə́ kété gə̄, adə̄ i kaan Josapat ō, Joram ō, bɔbə̄n Akajias ō, ɔrən̄ kam̄ tām̄ yā Kɔ́ɔ̄ɓē tə́ ní ō, yá̰a̰ gə̄ ń nəkɔ́ ɔr̄ kam̄ tām̄ yā Kɔ́ɔ̄ɓē tə́ ní ō, lɔ́ŕ kə́ loo ngɔ̄m̄ nar kə́ kem kújə yā Kɔ́ɔ̄ɓē tə́ ō, kə́ kem kújə yā mban̄g tə́ ō malang, əlań adə̄ Hajael, mban̄g kə́ Aram. Loo ń noō tə́ mban̄g kə́ Aram lōō gír kaw̄ rɔ̄ɔ̄ ɓē kə́ Jerusalem tə́.

²⁰ Gotə yá̰á̰ kə́ rang gə̄ malang ń Joas rāā ní, ndangən̄ kem makətūbə̄ kəla rāā mban̄g gə̄ kə́ Juda tə́.

²¹ Ngé kəla yān gə̄ mbātə́nən̄ ba oōn̄ naā dɔn tə́. Nin̄ tɔ̄lnə̄n̄ Bet Milo dan ń a aw̄ kə̄ Sila ní.

²² Ngé kəla yān gə̄ ń tɔ̄lnən̄ ní i Yojabad ngōn̄ Simeat nin̄ kə Yehojabad ngōn̄ Somer. Dubə̄nən̄ i kem bāá ɓádə yā kaan gə̄ tə́, kem ɓē yā Dabid tə́. I ngōnən Amasia n o̰o̰ ɓē gotən tə́ ní.