2 MBAN̄G 10 - Bibəl ta Sar̄

Tɔ̄lə̄n̄ de kə́ gír kojə yā Akab tə́ gə̄ malang

¹ Ngán Akab kə́ dəngam gə̄ i kutə sīrí kem ɓē kə́ Samari tə́. Anī Yehu ndang makətūbə̄ əlań Samari adə̄ ngol ngé rɔ̄ɔ̄ gə̄ kə́ kem ɓēé ō, adə̄ kum kɔɔ̄ gə̄ ō, adə̄ ngé ndóō ngán Akab gə̄ yá̰a̰ ō. Najə̄ ń ni ndang kem makətūbūú adə̄də́ ní n toó:

² Sḭḭ̄ i ngé ka̰a̰ gō ngáń kə́ ndogó mbangāá gə̄. Púsə rɔ̄ɔ̄ yāsí gə̄ i noó ō, sə́nda yāsí gə̄ i noó ō, yá̰a̰ rɔ̄ɔ̄ yāsí gə̄ i noó ō, tá ī-ndiī i kem ɓē kə́ ngan̄g tə́. Ré makətūbə̄ ń toō ɔdə jīsí anī,

³ ī-gə̄rāī ngōn̄ mban̄g ń i kə́ asə kadə̄ ndi mban̄g ní dan madə̄n gə̄ tə́ ə̄ndāin̄ dɔ kōr̄ kāgə̄ mbang tə́, ba ī-ndiī dɔ rɔ̄sí tə́ kadə̄ ī-rɔ̄ɔ̄ī tām̄ yā gír kojə yā kɔ́ɔ̄sí tə́.

⁴ De gə̄ ní ɓōĺ asədə́ nák adə̄ ədan̄ naā na: Mban̄g gə̄ jōó ba asən̄ dum̄ ta Yehu aĺ anī jḭḭ̄ j-a j-asiī i ba̰ý?

⁵ De kə́ dɔ yá̰a̰ kənge yā mban̄g tə́ ō, ngol ngé rɔ̄ɔ̄ gə̄ kə́ kem ɓēé ō, Kum kɔɔ̄ gə̄ kə́ kem ɓēé ō, ngé ndóō ngán Akab gə̄ yá̰a̰ ō, əla ədan̄ Yehu na: Jḭḭ i ngé kəla yāí gə̄. Yá̰a̰ malang ń ā ə́dájí nḭ́ j-a jə-rāā. J-a j-əndā deē kógə̄ḿ mban̄g alé. Yá̰á̰ ń á̰a̰ā̰ ta kumií tə́ kadə̄ i yá̰á̰ kə́ majə ní ī-rāā.

⁶ Yehu ndang makətūbə̄ nja kə́ nge ko̰ jōó əlań adə̄də́. Ni ədadə́ kemeé na: Ré sḭḭ̄ i deē yāḿ gə̄ ō, ōōī taḿ ō anī, ī-gángī dɔ ngán mban̄g gə̄ malang ī-reēīneé bírí ādə̄mī kə kum mbang kə́ beé kem ɓē kə́ Jisreel tə́. Ba ngán mban̄g kə́ dəngam gə̄ kə́ kutə sīrí gə̄ ní tā anī ɓɔ̄ɔ̄də́ i kə de kə́ bo gə̄ kə́ kem ɓēé kadə̄ ətōn̄də́.

⁷ Dan ń makətūbə̄ ní ugə̄ rɔ̄də́ tə́ anī, əhɔn̄ ngán gə̄ ní tə́jān̄ míndə́də́ malang ba kánə̄n̄ dɔdə́ kə̄ kem jáng gə̄ tə́ əlan̄neé adə̄n̄ Yehu kem ɓē kə́ Jisreel tə́.

⁸ Ngōmbang kəla kógə̄ḿ reē əda Yehu na reēn̄ kə dɔ ngán mban̄g gə̄ ní noō. Anī Yehu əda na: Ī-kánīdə́ dɔ naā tə́ gír loo jōó ta róbə́ kə́ yā kudəń kə̄ kem ɓē tə́, ādə̄ to bátə́ loo tīī dɔ tə́!

⁹ Teē kə ndɔ̄ kə́ noō dəloí anī, Yehu teē kɔ̄ɔ́ kem ɓēé, ba ra dɔɔ́ ədań de gə̄ malang na: Sḭḭ̄ i de kə́ sew gə̄! I mā n j-oō naā kə madə́ḿ gēé dɔ kɔ́ɔ̄ḿ tə́ ō, i mā n m̄-tɔ̄lən ō ní. Ba ngé gə̄ ń toō malang ní i náā n tɔ̄l̄də́ ní.

¹⁰ I beé ní, ī-gerī kadə̄ najə̄ malang ń Kɔ́ɔ̄ɓē əda dɔ de kə́ gír kojə yā Akab tə́ gə̄ ní, kógə̄ḿ kə́ reē udə gírí aĺ ní gətóo! Kɔ́ɔ̄ɓē rāā yá̰a̰ malang ń əndā ta nge kəla yān Eli tə́ adə̄ əda ní.

¹¹ Yehu tɔ̄l̄ gotə gír kojə yā Akab ń nay Jisreel ní malang, de kə́ bo gə̄ ō, ngé ndi seneé gə̄ ō, ngé tun̄ yá̰a̰ gə̄ ń rāān̄ kəla yān ní ō, ni əya̰ deē kógə̄ḿ alé.

Tɔ̄lə̄n̄ ngán mban̄g kə́ Juda gə̄ malang kɔ̄ɔ́

¹² Gō tə́ anī Yehu ɔr̄ dɔɔ́ aw̄ Samari. Dan ń ugə̄ Bet Eked yā ngé kul̄ yá̰a̰ gə̄ tə́ anī,

¹³ ənge ngákó̰o̰ Akajias mban̄g kə́ Juda gə̄. Ni dəjedə́ na ké nin̄ i náā gə̄ wa. Anī nin̄ tél ədanən̄ na nin̄ na i ngákó̰o̰ Akajias gə̄, ba na n-aw̄n̄ na i kə̄ rāā ngán mban̄g ō, ngán Jesabel kə́ kó̰o̰ mban̄g ō, lápə́ya tə́.

¹⁴ Yehu ədadə́ na: Əhɔīdə́ kə kumdə́! Anī ngé njə̄rā seneé gə̄ əhɔn̄də́ kə kumdə́, tɔ̄lə̄n̄də́ pá tá kánə̄n̄ nīńdə́ kem bəlo man̄ kə́ Bet Eked tə́. Nin̄ i deē kutə sɔ́ gidə i jōó. Deē kógə̄ḿ dandə́ tə́ kə́ teē gətóo.

Yehu əngen̄ naā kə Yonadab

¹⁵ Ni ɔtə loo ń noō tə́ anī a̰a̰ Yonadab kə́ ngōn̄ Rekab a reē kə̄ rɔ̄n tə́. Yehu rāān lápə́ya ba ədan na: Kemií i gō yāḿ tə́ tītə̄ ń kemḿ mā i gō yāí tə́ rɔ̄kum ní a? Yonadab tél ədan na: A̰á̰ā̰! Anī Yehu əda na: Ré kemií i gō yāḿ tə́ anī ə́hɔ jīḿ! Yonadab əhɔ jīn. Loo ń noō tə́ Yehu adə̄ Yonadab aĺ ndi dɔɔ́ rɔ̄n tə́ kem púsə yān tə́.

¹⁶ Ni-əda Yonadab na: Ī-reē j-aw̄, ba á̰a̰ təngā ń m-ā m̄-təngā tām̄ yā Kɔ́ɔ̄ɓē tə́ ní! Adə̄ Yehu unən kem púsə yān tə́ aw̄ seneé.

¹⁷ Dan ń Yehu ugə̄ Samari anī, tɔ̄l̄ gotə de kə́ gír kojə yā Akab tə́ gə̄ ń nayn̄ kem ɓēé ní malang kɔ̄ɔ́. Ni-tɔ̄l̄də́ malang tītə̄ ń Kɔ́ɔ̄ɓē ədań Eli ní.

Yehu tɔ̄l̄ ngé rāā ɓesə̄ Baal gə̄

¹⁸ Gō tə́ anī Yehu ɔsə dɔ de kə́ kem ɓē kə́ Samari tə́ gə̄ naā tə́ malang ba ədadə́ na: Mban̄g Akab rāā ɓesə̄ Baal i sḛ́ý beē, mā Yehu m-ā m̄-ndɔ̄yn kadə̄ tɔȳ yān.

¹⁹ Ké ngɔr ń toō tə́ ī-ɓāríī ngé koō ta yā Baal gə̄ malang ō, ngé kəla yān gə̄ ō, ngé tun̄ yá̰a̰ yān gə̄ malang ō, ādə̄ reēn̄ rɔ̄ḿ tə́ laā. Ādə̄ deē kógə̄ḿ na̰y alé, tɔdɔ̄ m̄-gḛy tun̄ yá̰á̰ kə́ ngá̰ý yā rɔȳń Baal. De gə̄ ń a reēn̄ aĺ ní a tɔ̄lə̄n̄də́ kɔ̄ɔ́. Tá Yehu rāā yá̰á̰ ní i kə kum kedēé yā rāań kadə̄ ngé rāā kəla yā Baal gə̄ gətóon̄ kɔ̄ɔ́ malang.

²⁰ Ni ədadə́ na: Kadə̄ kán̄ naā kógə̄ḿ kə́ bo to yā rɔȳń Baal! Anī ndangən̄ makətūbə̄ ɓāŕ de gə̄,

²¹ adə̄ ni əlań de gə̄ gō nang kə́ Israel tə́ malang. Ngé rāā kəla yā Baal gə̄ reēn̄ malang. Deē kógə̄ḿ kə́ reē aĺ gətóo. De gə̄ ní udən̄ kem kújə yā Baal tə́ adə̄ kem kújə rosə dá dágə́ kə de gēé.

²² Yehu əda nge ngɔ̄m̄ kūbə̄ gə̄ na kə teē kə kūbə̄ gēé tām̄ yā ngé rāā kəla yā Baal gə̄ tə́ malang. Anī ni teēń adə̄də́.

²³ Loo ń noō tə́ Yehu nin̄ kə Yonadab kə́ ngōn̄ Rekab udən̄ kem kújə yā Baal tə́. Yehu əda ngé rāā kəla yā Baal gə̄ na: Á̰a̰ī ké deē kógə̄ḿ kə́ dan ngé rāā kəla gə̄ yā Kɔ́ɔ̄ɓē tə́ gətóo dansí tə́ wa ō, á̰a̰ī ké i ngé rāā kəla gə̄ yā Baal ngóy ō wa.

²⁴ Yehu tə́ndā áskar gə̄ kutə sɔ́sɔ́ gidə kújə ɓesə̄ tə́ ndágá ba ədadə́ na: M-ā m-ə́la de gə̄ ń toō malang kem jīsí tə́. Ré deē kógə̄ḿ dansí tə́ əya̰ nge dandə́ tə́ adə̄ teē a̰ȳ anī, kɔ́ɔ̄ a oy kum gotən. Yehu nin̄ kə Yonadab ndɔ́tə̄n̄ kə̄ kété yā ndējə̄ yá̰a̰ tun̄ tām̄ yā kem kógə̄ḿ tə́ ō, yá̰a̰ tun̄ kə́ yā róō horoó ō.

²⁵ Dan ń Yehu tun̄ yá̰a̰ oy anī əda áskar gə̄ ō, ngol áskar gə̄ ō na: Údiī, ī-tɔ̄līdə́! Ādə̄ deē kógə̄ḿ dandə́ tə́ teē alé! Adə̄ nin̄ tɔ̄lə̄n̄də́ ba ɓōkə́n̄ nīńdə́ gidə ɓē tə́ ndágá. Gō tə́ anī udən̄ kem loo kə́ táĺ ngá̰ý kə́ kem kújə yā Baal tə́.

²⁶ Nin̄ unən̄ kāgə̄ ɓesə̄ kə́ kem kújú teēn̄neé ndágá ba əlan̄ hor dɔ tə́ kɔ̄ɔ́.

²⁷ Gō tə́ anī tɔ̄ɔ̄n̄ mbal̄ ń udən̄ kə nja dɔɔ́ tām̄ yā ɓesə̄ Baal tə́ ní. Ta tɔ̄l̄ ta anī tɔ̄ɔ̄n̄ kújə ɓesə̄ ní kɔ̄ɔ́ ba rāān̄ gotən loo ɓōkə́ yá̰á̰ kə́ yḛr gə̄ kə́ kem ɓēé tə́. Loo ní to noó bátə́ ɓōólaā gə̄gē ɓáý.

Yehu mban̄g kə́ Israel

²⁸ I tītə̄ ń noō n Yehu rāań adə̄ rāā ɓesə̄ Baal gətóoń kɔ̄ɔ́ dɔ nang kə́ Israel tə́ ní.

²⁹ Ɓá tā ba ni un rɔ̄n kɔ̄ɔ́ gō yá̰á̰ kə́ majaĺ gə̄ ń Jeroboam ngōn̄ Nebat rāā á sə̄lā Israel gə̄ adə̄ rāān̄ ní tə́ alé. Yá̰á̰ kə́ majaĺ gə̄ ní i man̄g lɔ́r gə̄ ń ran̄ Betel ō, Dan ō ní.

³⁰ Kɔ́ɔ̄ɓē əda Yehu na rāā na i yá̰á̰ kə́ majə, i yá̰á̰ kə́ ni Kɔ́ɔ̄ɓē n-a̰a̰ ta kumən tə́ kadə̄ i yá̰á̰ kə́ gōtə́, i yá̰á̰ ń na n-ndigə ní bang n na rāā kə de gə̄ kə́ gír kojə yā Akab tə́ ní, I beé ní ngōnən ō, ngōn̄ kaan ō, kaa gugūn ō, kaa dɔgən ō, na a ndin̄ dɔ kōr̄ kāgə̄ mbang kə́ Israel tə́.

³¹ Banī Yehu njə̄rā gō ndū najə̄ yā Kɔ́ɔ̄ɓē Nə́ɓā yā Israel tə́ i kə ngarā̰ kemən gēé mámák alé. Ni un rɔ̄n kɔ̄ɔ́ gō yá̰á̰ kə́ majaĺ gə̄ ń Jeroboam sə̄lā Israel gə̄ adə̄ rāān̄ ní tə́ alé.

³² Dan ngeé ń noō tə́ ní Kɔ́ɔ̄ɓē əla gír kēgə̄ dɔ nang kə́ Israel tə́ kɔ̄ɔ́. Adə̄ Hajael tetə Israel gə̄ rɔ̄ɔ̄,

³³ ba taā dɔ nang yādə́ kə́ gidə bā Jurdḛ tə́ dām̄ kə́ gír ɓē tə́, adə̄ i gō nang malang kə́ Galaad ō, gō nang yā ngán Gad gə̄ ō, yā ngán Ruben gə̄ ō, yā ngán Manase gə̄ ō. Əla gír dɔ ɓē kə́ Aroer dɔ gɔ́sə bā Arnon tə́ bátə́ ugə̄ń gō nang kə́ Galaad tə́ ō, Basan tə́ ō.

³⁴ Ndangən̄ gotə najə̄ kə́ rang gə̄ yā Yehu i kem makətūbə̄ ń rīn na i kəla rāā mban̄g gə̄ kə́ Israel tə́ ní. Ndangən̄ yá̰a̰ malang ń ni-rāā ní kemeé ō, ɔjən̄ gotə kəhɔ rɔ̄ tɔ́gə yān kemeé ō.

^35-36 Ni-o̰o̰ ɓē ɓāl̄ kutə̄ jōó gidə i sɔ́sɔ́ dɔ Israel gə̄ tə́ kem ɓē kə́ Samari tə́. Dan ń oy ní dubə̄nən̄ i Samari. I ngōnən Joakajə n o̰o̰ ɓē gotən tə́ ní.