2 KORḚNTƏ 3 - Bibəl ta Sar̄

Ngé rāā kəla madə̄ naā kə́ kijə

¹ Najə̄ gə̄ ń noō ní ɔjən̄ kadə̄ jə-tél j-əda i najə̄ yājí kə́ majə a? Jə-sāā i kadə̄sí makətūbə̄ kə́ ɔjə najə̄ kə́ majə yājí tītə̄ ń de kə́rēý gə̄ a rāān̄neé ní a? Aké jə-sāā i kadə̄ sḭḭ̄ ī-rāāī makətūbə̄ ə́daīneé najə̄ kə́ majə yājí a?

² I sḭḭ̄ kɔ́ gə̄ n i makətūbə̄ kə́ ndang yājí ní. Ndangən̄sí i dan wurjí tə́ ō, de gə̄ malang asən̄ ger̄ ō, asən̄ tə́da ō.

³ Kadə̄ sḭḭ̄ i makətūbə̄ kə́ Kərist ndang əla jījí tə́ kadə̄ j-adə̄ de gə̄ ní, nge ń noō to i kə̄ dɔ ndágá. Sḭḭ̄ i makətūbə̄ kə́ ndang kə man̄ yá̰á̰ kə́ nduluú alé, banī i kə́ ndang kə Ndíĺ Nə́ɓā kə́ ndi kə kumneé. Sḭḭ̄ i najə̄ kə́ ndang dɔ ngán mbal̄ kə́ laa gə̄ tə́ alé, ba i dan wur deē tə́.

⁴ Jḭḭ j-əda nge ń noō tɔdɔ̄ j-ənī kemjí mámák j-adə̄ Nə́ɓā kə ta kūl̄ Kərist.

⁵ Tɔdɔ̄ jḭḭ ń toō j-asə rāā yá̰á̰ kógə̄ḿ kə deē dɔjí alé, banī i Nə́ɓā nəkɔ́ n rāā tá jḭḭ j-asəń rāā yá̰á̰ ní.

⁶ Tɔdɔ̄ i ni n i nge rāā tá kadə̄ jḭḭ j-asəń téĺ ngé rāā kəla gə̄ yā madə̄ naā kə́ kíjə ní. Madə̄ naā kə́ kijə ní ra i dɔ ndū najə̄ kə́ ndang tə́ alé, banī ra i dɔ Ndíĺ tə́. Ndū najə̄ kə́ ndang a tɔ̄l̄ i deē, banī Ndíĺ i nge rāā kadə̄ deē ndi kə kumneé.

⁷ Kété ní ndangən̄ ndū najə̄ i dɔ bar mbal̄ gə̄ tə́ ō, kɔsə gɔn yā Nə́ɓā ndə́lē ngá̰ý dan ngeé ń noō tə́ ō. Ta kum Moijə ndə́lē ngá̰ý ō, adə̄ ngán Israel gə̄ asən̄ kəndā kumdə́ ta yān tə́ alé. Tá kɔsə gɔn ní, i kɔsə gɔn kə́ a to ta kum Moijə tə́ i ngándáńg alé. Ré ndū najə̄ ń kəla rāān i kaw̄ kə deé kəlan ta yo tə́ ní, reē i kə kɔsə gɔn kə́ asə naā beé anī,

⁸ kɔsə gɔn ń a dān̄ gō kəla yā Ndíĺ ní i ngá̰ý tɔȳ aĺ a?

⁹ Ré kɔsə gɔn yā kəla gān̄g saryaá dɔ de gə̄ tə́ to anī, kəla ń rāā adə̄ de gə̄ télən̄ de kə́ gōtə́ gə̄ ta kum Nə́ɓā tə́ ní tá kɔsə gɔn yān i ngá̰ý tɔȳ aĺ a!

¹⁰ Tá j-asə kəda na kɔsə gɔn ń ndə́lē kété ní, i yá̰a̰ alé kadə nge kə́ ngɔlaā tə́, tām̄ nge kə́ ngɔlaā tɔȳn sa̰y ngá̰ý.

¹¹ Tɔdɔ̄ ré yá̰á̰ ń to dan i ngá̰ý aĺ ní kɔsə gɔn yān to anī, yá̰á̰ ń a to ngándáńg ní kɔsə gɔn yān i ngá̰ý tɔȳ aĺ i ba̰ý?

¹² Dan ń j-əndā kemjí i dɔ yá̰á̰ kə́ tītə̄ ń noō tə́ ní, j-ənī kemjí mámák jə-ndiń kanjə̄ sōl̄ yá̰á̰ kógə̄ḿ.

¹³ Jḭḭ jə-rāā yá̰a̰ tītə̄ yā Moijə alé. Ni-seĺ kūbə̄ ta kumən tə́ kɔ̄ɔ́, ɔgə̄ń ngán Israel gə̄ ka̰a̰ ta tɔ̄l̄ ta yá̰á̰ kə́ ndə́lē ngá̰ý kə́ a mān̄.

¹⁴ Banī nin̄-asən̄ ger̄ kum najə̄ alé. Adə̄ bátə́ ɓōólaā gə̄gē ní, ré a tə́dan̄ makətūbə̄ madə̄ naā kə́ jóo anī, kūbə̄ kə́ kógə̄ḿ beē nəkɔ́ ń toō i kə́ seĺ ta kumdə́ tə́ ɓáý. I de kə́ nin̄-ɓoon̄ naā kə Kərist ngóy n kūbə̄ ngeé ń toō a gətóo kɔ̄ɔ́ ta kumən tə́ ní.

¹⁵ Bátə́ ɓōólaā gə̄gē ní, kə dɔ tə́dádə́ makətūbə̄ yā Moijə malang ń noō ní, kūbə̄ ní a utə̄ ta kumdə́ laā ɓáý.

¹⁶ Ba tītə̄ ń makətūbə̄ ədań ní, loo ń ré deē tūr̄ rɔ̄n kə̄ rɔ̄ Kɔ́ɔ̄ɓē tə́ anī, kūbə̄ ní i kə́ kun kɔ̄ɔ́.

¹⁷ Tá laā ní, najə̄ ń ədan̄ na i Kɔ́ɔ̄ɓē ní, kumən na i Ndíl. Ba loo ń Ndíĺ Kɔ́ɔ̄ɓē i tū tə́ ní, deē i kɔ́ɔ̄ rɔ̄n tū tə́ ō.

¹⁸ Ba jḭḭ̄ malang ń unən̄ kūbə̄ kə́ seĺ ta kumjí tə́ kɔ̄ɔ́ ní, j-ɔjiī kɔsə gɔn yā Kɔ́ɔ̄ɓē kə̄ ndágá. I beé n tūrə̄n̄neéjí kadə̄ jə-toī tītə̄ Kɔ́ɔ̄ɓē ō, j-ḭḭ̄neé tū kɔsə gɔn kógə̄ḿ tə́ ba j-awīneé tū kɔsə gɔn kə́ rang kə́ bo tɔȳ nge kə́ kété tə́ ō ní. Tɔdɔ̄ kəla ń Ndíĺ Kɔ́ɔ̄ɓē rāā ní n noó.