2 JA̰A̰ 1 - Bibəl ta Sar̄

Ja̰a̰ rāā lápə́ya

¹ I mā kum kɔɔ̄ n m̄-ndang makətūbə̄ ń toō m-ə́lań m-ādə̄ Dəyá̰ ń Nə́ɓā gə̄rān ní, nin̄ kə ngánən gēé. Mā m̄-táŕdə́ rɔ̄kum. I mā ngóy n m̄-táŕdə́ alé, banī de gə̄ malang ń gerə̄n̄ najə̄ kə́ rɔ̄kum ní tárən̄də́ ō.

² Tām̄ najə̄ kə́ rɔ̄kum ndi kemjí tə́ ō, a ndi sejí ngándáńg ō.

³ Ādə̄ Nə́ɓā Bɔbə̄ Ngōn̄ nin̄ kə Jeju Kərist ń i ngōnən ní rajən̄jí ō, mā̰ȳn̄ rɔ̄də́ dɔjí tə́ ō, sɔlə̄n̄ kemjí ō, yā kadə̄ j-əngeīneé yá̰á̰ kə́ kadə̄jí karī gə̄ ń noō kə́ rɔ̄kum tə́ ō, kə tárá ō.

Najə̄ kə́ rɔ̄kum ō, tár ō

⁴ Dan ń m-á̰á̰ ngání gə̄ loo njə̄rā tə́ gō najə̄ kə́ rɔ̄kum tə́ tītə̄ ń Bɔbə̄ Ngōn̄ ədańjí kadə̄ jə-rāāī ní, rɔ̄ḿ nelə̄m̄ ngá̰ý.

⁵ Ba ń toō ɓáa Dəyá̰, yá̰á̰ ń m̄-dəjeī kadə̄ ī-rāā ní n toó: Ādə̄ jə-táriī naā. Nge ń noō i gō míndə kə́ kijə n m̄-ndang m-ādī ní alé. Banī i yá̰á̰ kə́ kəda yā rāā kə́ ta kəla gíŕ tə́.

⁶ Ba yá̰á̰ ń i táŕ ní i rāā gō míndə gə̄ ń Nə́ɓā əda kadə̄ yā rāā ní. Ba gō míndə ń Nə́ɓā əda kadə̄ yā rāā ní, i kadə̄ ī-táriī naā, tītə̄ ń ōōīneé ta kəla gíŕ tə́ ní.

⁷ Tɔdɔ̄ de gə̄ ngá̰ý kə́ ngé gól̄ de gə̄ tə̄ndān̄ naā tḭ̄ḭ̄n̄ kə̄ loo gə̄ tə́ malang dɔ nang tə́ laā. Nin̄-ədan̄ najə̄ yā Jeju Kərist ń reē i kə́ deē tə́ ní alé. De kə́ nge gól̄ loo ń i nge rɔ̄ɔ̄ Kərist ní, a ɔjə rɔ̄n kə̄ ndágá i tītə̄ ń noō.

⁸ Ə̄ndāī kum kedə̄ dɔ rɔ̄sí sḭḭ̄ kɔ́ gə̄ tə́, na sōgə́ ī-tḭ̄ḭ̄ ta yá̰á̰ ń jə-rāā á teē yá̰á̰ ní, yā kadə̄ ə́ngeīneé kəgā yāsí kə taá malang.

⁹ Náā nəkɔ́ ń ra dɔ yá̰á̰ ndóō yā Kərist tə́ alé banī mān̄ dɔ tə́ kum kə̄ kété ní, Nə́ɓā i seneé alé. Deē ń ra dɔ yá̰á̰ ndóō yā Kərist tə́ ní, Bɔbə̄ Ngōn̄ i seneé ō, Ngōn̄ nəkɔ́ i seneé ō.

¹⁰ Ré de kə́rēý reē rɔ̄sí tə́ ba i kə yá̰á̰ ndóō ń toō aĺ anī, ə́hɔniī kə̄ rɔ̄sí tə́ kem kújə yāsí tə́ aĺ ō, ī-rāāniī lápə́ya aĺ ō.

¹¹ Tɔdɔ̄ deē ń rāān lápə́ya ní, rāā i kem kógə̄ḿ seneé dɔ kəla rāān gə̄ kə́ majaĺ tə́.

Najə̄ kə́ ta tɔ̄l̄ ta tə́

¹² Yá̰a̰ gə̄ i ngá̰ý kadə̄ m̄-ndang najə̄ kə́ dɔ tə́ m-ādə̄sí. Mā m̄-gḛy ndang kem makətūbūú ō, kə man̄ ndang makətūbə̄ ō alé. Ba m-ə̄ndā kemḿ dɔ kaw̄ loosí tə́, kadə̄ m-āw̄ m-ɔ̄r̄ najə̄ ní sesí kə taḿ, tá yā kadə̄ rɔ̄nel̄ yājí i rɔ̄nel̄ kə́ majə ɔtə̄ kə taá mámák.

¹³ Ngōkó̰ó̰í kə́ dəyá̰ ń Nə́ɓā gə̄rān ní, ngánən gə̄ rāānī lápə́ya.