1 TIMOTE 5 - Bibəl ta Sar̄

Yá̰a̰ gə̄ kə́ yā kadə̄ deē rāā tām̄ yā ngé taā kem gə̄ tə́

¹ Ī-lōō gɔŕyɔ̄ de kə́ tɔgə ɓə́ga kə ngangāá, ba ɔ̄jən tītə̄ kə́ ni i bɔbí beē. Ɔ̄jə̄ balsáa gə̄ tītə̄ kə́ nin̄ i ngákó̰ó̰í gə̄ ō,

² kó̰o̰ dəyá̰ gə̄ tītə̄ kə́ nin̄ i kó̰ó̰í gə̄ ō, mandə gə̄ tītə̄ kə́ nin̄ i ngákó̰ó̰í kə́ dəyá̰ gə̄ ō, kə háĺ kə́ unjə̄ njáý njáý.

³ Ī-rɔȳ dəyá̰ kə́ ngaa koy gə̄ ń deē yādə́ gə̄ gətóon̄ ní.

⁴ Ré dəyá̰ kə́ ngaa koy kógə̄ḿ i kə ngánən gēé, aláa i kə ngán kaan gēé anī, i nin̄ n majə kadə̄ a̰a̰n̄ gō gír kojə yādə́ ngeé ń toō ní. Yá̰á̰ ń ngéédə́ gə̄ rāān̄ tām̄ yādə́ tə́ ní, majə kadə̄ nin̄-tél rāān̄ tām̄ yādə́ tə́ ō. Tɔdɔ̄ nge ń noō i yá̰á̰ kə́ nel̄ Nə́ɓā.

⁵ Dəyá̰ kə́ ngaa koy ń deē yān gətóo ō, ndi i kə kérneé ō ní, əndā kemən i dɔ Nə́ɓā tə́ ō, na̰y i kə̄ loo ndɔ̄ȳn tə́ ō, loo rāān ɓɔ́ tə́ ndɔ̄ɔ́ ō kadaá ō.

⁶ Banī dəyá̰ kə́ ngaa koy ń i nge ngɔ̄də̄ gō yá̰á̰ kə́ nelə̄n gə̄ tə́ ní, ká ré ndi kə kumneé ɓáý gə̄gē anī, ni i kə́ koy kɔ̄ɔ́.

⁷ Yá̰á̰ ń kadə̄ ə́dádə́ kadə̄ rāān̄ ō, kadə̄ najə̄ gətóoń dɔdə́ tə́ ō ní n noó.

⁸ Ré deē kógə̄ḿ a̰a̰ gō ngéén gə̄ alé, mandang ɓáa a̰a̰ i gō de kə́ kem kújə yān tə́ gə̄ alé anī, ni nējə̄ i taā kə́ ni-taā kem ō, ni i de kə́ majaĺ tɔȳ de kə́ taā kem aĺ ō.

⁹ Yā kadə̄ deē əndāń rī dəyá̰ kə́ ngaa koy dan madə̄n gə̄ tə́ kem makətūbūú ɓáa, ādə̄ ɓālə̄n kə́ ngá̰ý aĺ i kutə mehḛ́ ō, ādə̄ ngaan i kógə̄ḿ beē ō tá.

¹⁰ Majə kadə̄ de gə̄ ger̄nən̄ tām̄ kəla rāān gə̄ kə́ majə tə́. Ādə̄ ni-ətō ngán gə̄ ō, əhɔ de gə̄ kə̄ rɔ̄n tə́ majə ō, tə́go nja de gə̄ yā Nə́ɓā ō, rāā kə ngé gə̄ n wurdə́ ɔldə́ ní ō, əndā rɔ̄n ta kəla malang kə́ majə tə́ ō.

¹¹ Ba dəyá̰ kə́ ngaa koy kə́ na̰y mandə ɓáý gə̄ ní, ī-lōō ndang rīdə́ makətūbūú. Tɔdɔ̄ loo ń ré ngur dəngam rāādə́ anī, a əya̰n̄ Kərist kɔ̄ɔ́, ba a gḛyn̄ taā dəngam.

¹² I tītə̄ ń noō n najə̄ a əhɔńdə́ ní, tɔdɔ̄ míndə́də́ ń ənīn̄ kété ní, ran̄ dɔ tə́ alé.

¹³ Tá ɓáý to̰ ní, dan ń yá̰á̰ kə́ yā kadə̄ nin̄-rāān̄ gətóó ní, kəla rāādə́ i njə̄rā kaw̄ kə̄ ta de gə̄ tə́, kə̄ kem kújə gə̄ tə́. Ba kə́ majaĺ tɔȳ nge ń noō ní, nin̄ i ngé najə̄ wa gə̄ ō, ngé ger̄ kəhɔ tadə́ dɔ najə̄ tə́ aĺ gə̄ ō, ngé kɔr̄ najə̄ kə́ ndetədə́ aĺ gə̄ ō.

¹⁴ Adə̄ dəyá̰ kə́ ngaa koy kə́ na̰y mandə ɓáý gə̄ ní, m̄-gḛy kadə̄ táān̄ dəngam gə̄ ō, ojən̄ ngán gə̄ ō, əndān̄ kumdə́ gír de kə́ kem kújə yādə́ gə̄ tə́ majə ō. I beé tá nin̄ a adə̄n̄neé ngé rɔ̄ɔ̄ sejí gə̄ ta róbə kəda najə̄ kə́ majaĺ dɔjí tə́ alé.

¹⁵ Tɔdɔ̄ dandə́ tə́ ní, ngé kə́rēý gə̄ ndúmə̄n̄ kɔ̄kə́, adə̄ unən̄ gō Sətan.

¹⁶ Ré nge taā kem kógə̄ḿ kə́ dəyá̰ i kə dəyá̰ kə́ ngaa koy gēé dan ngéén gə̄ tə́ anī, ādə̄ nəkɔ́ rāā sedə́. Majə kadə̄ rāā kə dəyá̰ kə́ ngaa koy gēé ngeé ń toō ní, kəlan i dɔ ngé kán̄ naā gə̄ tə́ alé, yā kadə̄ nin̄-əngen̄neé ta róbə rāā kə ngé ngaa koy kə́ rɔ̄kum gēé.

¹⁷ Kum kɔɔ̄ gə̄ ń ɔrən̄ no loo kán̄ naā majə ní, ādə̄ de gə̄ adə̄n̄də́ yá̰á̰ kəndā nja yādə́ loo nja kə́ jōó tə́. Ba kə́ ngá̰ý ɓáa i ngé gə̄ ń əndān̄ rɔ̄də́ ta kəla kə́ ɔȳ ngá̰ý tə́, adə̄ i ta kəla kɔjə najə̄ tə́ ō, ndóō de gə̄ yá̰a̰ tə́ ō ní.

¹⁸ Tɔdɔ̄ makətūbə̄ yā Nə́ɓā əda na: Ré man̄g a səɓā kōō anī, ā ə́la bendə tan tə́ aĺ ō, deē ń i nge rāā kəla ní, majə kadə̄ kɔ́ɔ̄ ənge kəgā yān ō.

¹⁹ Ī-lōō ndigə najə̄ kə́ əndān̄ dɔ de kə́ kum kɔɔ̄ tə́. Ba ré i de kə́ kum tə́ gə̄ jōó, aláa i mətá, n ədan̄ najə̄ dɔn tə́ pá tá ī-ndigə ɓáý.

²⁰ Ngé gə̄ ń rāān̄ majaĺ ní, ī-gɔŕyɔ̄də́ ta kum madə̄də́ gə̄ tə́ malang ādə̄ gotə gə̄ ɓōlə́n̄.

²¹ m̄-rāāī ɓɔ́ ta kum Nə́ɓā tə́ ō, ta kum Kərist Jeju tə́ ō, ta kum de kə́ dɔ rā̰ tə́ gə̄ ń gə̄rān̄də́ ní tə́ ō, ī-rāā yá̰a̰ gə̄ ń m-ɔ́jiī toó kanjə̄ kəya̰ kógə̄ḿ kɔ̄ɔ́ ō, kanjə̄ rāā yá̰a̰ kógə̄ḿ tām̄ ta kum deē ō.

²² Ī-lōō tewle kəndā jīí dɔ deē kógə̄ḿ tə́. Əla rɔ̄í dan majaĺ yā deē tə́ alé. Ī-ngɔ̄m̄ hálí īkɔ́, ādə̄ ḭ̄ i de kə́ ūnjə̄ njáý njáý.

²³ Ī-lōō ka̰ȳ man̄ ngóy, banī ā̰ȳ kasə nduú sḛ́ý, tām̄ yā mo̰y kə́ kemií tə́ ń a njə́ɓāī dejə ní.

²⁴ De kə́rēý gə̄ majaĺ yādə́ to i kə̄ dɔ ndágá, kanjə̄ kadə̄ deē rāā sarya sedə́ ɓáý. Banī majaĺ yā de kə́ rang gə̄ ní, kum deē a teē dɔ tə́ i gō sarya kə́ deē rāā sedə́ tə́.

²⁵ Kəla kə́ majə gə̄ ní ton̄ kə̄ dɔ ndágá wáńg i tītə̄ ń noō ō. Ngé gə̄ ń loo ka̰a̰də́ i láẃ aĺ ní, asən̄ to loo ɓɔ̄ɔ̄ tə́ aĺ ō.